Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 KANKENEM KOḆENA ḆE SNONKAKU KRISTEN

Fararur Kayam ro Ḇaḇeḇaryas ro Moḇ Ḇewos Wos Ḇebor

Fararur Kayam ro Ḇaḇeḇaryas ro Moḇ Ḇewos Wos Ḇebor

Snonkaku simarisen simnaf ankankinem ḇeḇye Karajan rofyor kawos na ro wos mankun sena. Imbude ine iso ḇefnai fa ro ras Pentakosta 33 M, Yahwe fyasos insama ”snon Yahudi ḇekyar ono ro er nakam ro supswan pember” simnaf ankankinem ḇeḇye ro ’wos sena oser-oser’, imbape fafisu ya sawos kuker wos ḇemnis kam, raris wos Ibrani ḇaido wos Yunani. (Farfyar 2:5, 8) Snonkaku ḇero moḇ oso imbude sawos ro wos ḇebor, inja sidang ḇeyawos wos-wos ḇese sḇaryas ro moḇ ani. Rariso mamḇaryas ḇero sidang-sidang ḇerarirya sya sfararur kayam fa sḇaryas ḇe snonkaku sya kuker payamyum, inja sifrur snonkaku ḇero diansya sikmom ḇaido simsor ḇa snar srama ker ḇe si?

  • Swewar akurfasnai (Ams 15:22): Pengawas dinas sya iḇye kada sawos kuker naek eḇesesya ma sfasos nyan fa sḇaryas ro moḇ oso ḇesrow kuker sidang nakame. Moḇ sena naba ḇa ido, nyan ḇesrow iso sra awer ḇe snonkaku ḇeyawos wos ḇese rum sena. Imbape, sidang ḇeyawos wos ḇese moḇ sena naba ido, na sra ḇe moḇ nakam ro ras nakam ḇa. Inja, ḇepyum iso sidang-sidang ḇero moḇ ani soper awer rum-rum na ḇoi sḇaryas ḇe rum nakame. Ramnai, snonkaku ḇefasnai marisen ḇeyawos wos ḇese sisya ido, wakofenḇair sidang ḇeyawos wos ani srama kaḇer ḇe si. (od-IN 93 ¶37) Ḇaido sidang ḇeyawos wos ḇese bisa sor sidang ḇefanam kuker si sya fa sisewar snonkaku ḇeyawos wos ḇero sidang sena. Ramnai, daftar alamat sena sfarem na ḇe sidang ani. (km IN 7/12 5, kotak) Waswarepen snar ro fafisu ono, ro rum oso na sawos wos oser monda ḇa. Fandun fa siso sasoser ḇero moḇ ya kuker nyan sḇuk informasi kuker ḇena rum ya.

  • Fararur kayam (Ef 4:16): Waso akurfasnai rosai monda wasmai ro pengawas dinas Bedi. Ausya wafarkin farkarkor Refo kuker snonkaku ḇeyawos wos mankun ḇyena ḇo wos ḇero sidang Bedi ḇa ke? Ḇefarkor ya imbude isur fasaw ro rur ya rofyor buk ḇe sidang ḇaido raryur ḇefanam ḇefawi wos ḇyena fa fyarkor Refo kukri.

  • Wafrur fasasos (Ams 15:28; 16:1): Rofyor ḇena rum ya dawos wos eḇese ido, ḇensewar pyum insama warwas ankankinem ḇeḇye ḇe i. Wafasos fa wafawi wos risai snonkaku sawos ro moḇ Bedi ya, inja fyor wasrow kuker si napyan ḇe Au fa ḇaryas. Bisa wun Refo ma vidio ro wos seja ro situs web koḇedi ro HP ḇaido tablet. Au kako na buk aplikasi JW Language fa farkor rariso wakofen aroo ro wos-wos anna.