Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 AWAWOS ḆEPON YA | RO DISO NA WASMA ḆAḆESNEPREI YA?

Babesneprei ro Fafisu Besamswen

Babesneprei ro Fafisu Besamswen

Roi ḇesamswen na neḇekur ko ro nyan ḇeḇor. Kaku ya na kopok fa kofrur mnis roi ḇesamswen nane oser-oser, ḇape rwama komam fawar rifyak ḇeḇeyap kwar ro artikel ḇerandak ya. Mam mnis rariso snonkaku ḇesmai roi ḇesamswen ḇeḇese sismai kwar ḇaḇesneprei ḇekaku ro Allah I.

RO FAFISU NWA FARARUR ḆA

Seth * fyawar, ”Ro swaf oser aya ma swa yedi nufararur werḇa. Ro swaf taun risuru nukenem monda snar nusmai farfnoḇek ro kina ma fararur ḇemnis mankunḇa nuḇena. Nane nafnai fa swa yedi, Priscilla i, ḇyesneso kaku, ma yaḇaḇir yaḇekir ḇa.

”Rariso nufrur mnisna rai? Priscilla iswarepen mura pdef faro Yesus wos ḇyena ḇero Matius 6:34. Ikofen fa numkakwarek awer faro ras meserdi, snar ras oser nya ananjar ḇardi. Ma nadi kuker sne ḇesiper ḇyena nafnoḇek i fa syambraḇ pdef. Ro fafisu ayena ine, Mazmur 55:22 nḇuk sneprei ḇe aya. Raris manḇefas mazmur i, yasawen samswen ḇemarḇak ayena ḇe Yahwe I, ma yaḇaḇir syambraḇser aya. Kirine yana fararur noḇa, mboi numamwarek kankenem nuḇena imnis Yesus ananun ḇyena ro Matius 6:20-22. Ḇefandun syadi ya iso, nufanam ḇe Allah ma nufanamyae nu.”

Jonathan dakfasnai, ”Yamkak nari ras-ras nayama sasewar farḇaḇyan nkoḇena ro kina namnai, snaro krisis ekonomi, fararur marḇak nkoḇena ro swaf taun ri 20 nefrormo monda. Swa yedi ma aya numasasor kuker pipi ya. Jadi fa nukawkowes kuker kartu kredit ḇa snar numkak nari spampum kartu kredit nuḇena.

”Ḇape Allah Wos Ḇyena ma rur ḇesren Ḇyedi nafnoḇek aya fa yun snemuk ḇepyum. Yafarkor fa yafrur fararur rosai monda, ma robor nufandunḇa na nukowes na ḇa. Snar numa Saksi-Saksi Yahwe inja, nusmai kako farfnoḇek ro naek srar sya. Sisyowi nu ma sḇuk farfnoḇek ro fafisu nusmai samswen.”

ROFYOR FARḆAKḆUK BENA NAMUK

Raquel doḇe, ”Rofyor swa yedi ibur aya, sne yedi iduf ma yamsor kaku. Ma yaḇesneso fafayaḇa. Mboi yafanam faro Allah I, ma yasmai sneprei. Rofyor yaḇenadi ro ras ḇe ras, ḇaḇeaski ro Allah kyadaunwarek sne ayedi. Yaḇaḇir ḇyuk pararei ḇe sne ḇesanekar ayedi.

”Ma yakofen kasumasa faro Wos Ḇyena Refoya, snar nafnoḇek aya fa yakafyo masasor ma sne fafayaf ayena. Yakram ro sne yedi manwawan Paulus wos ḇyena ro Roma 12:21, ’Mkomam monda ḇo ḇarḇorya kyafyo awer mko, mboi iḇyekada naek srar mkokafyo ḇarḇorya kuker ḇaḇyeya.’

”Bati ḇefrur pyum oso ifnoḇek aya fa yafawi fandun fa yasambraḇ pdef. Fyasna ḇe aya Pengkhotbah 3:6 ma kuker mayaryaren ikofen ḇe aya snar kona fafisu isya fa ’kosusu’. Inema ananun ḇepyanḇa fa yaso na, ḇape nane yafandun na. Kirine yana fainda ḇebabo ro kankenem ayedi.”

Elizabeth ikofenḇair, ”Rofyor farḇakḇuk bena namuk ido, wafandun sansonem. Yana bati ḇepyum kaku oso ḇeḇuk sansonem yafandun na, ro ras ḇe ras. Nukanes kayam, ḇyuk sneprei ḇe aya, ma ifrur fa yaḇaḇir snar snonkaku sya spampum aya ḇa ḇape siswar aya. Yakyar kaku Yahwe ḇyuk i fa ifrur prei sne ḇepar ayedi.”

RO FAFISU WASMAI DAFDUF ḆAIDO ḆESINAN KWAR

Luis, ḇeḇeyap ro artikel ḇerandak ya, ismai dafduf barmor ḇemarḇak kaku, ma ro swaf risuru kero kada imar. Ifawi fyandun oksigen ro swaf oras ri 16 ro ras oser. Doḇe, ”Yaḇenadi pdef ḇe Yahwe I. Ramnai, yaḇaḇir rur ḇesren Ḇyedi syambraḇser aya. Nadi nḇuk papoik ḇe aya fa yasambraḇ pdef snar yakyar faro I ma yafawi fyandun aya.”

Petra ḇeumur fanam ḇe 80 fyasnaḇair, ”Yamarisen yafrur roi ḇebor, ḇape jadi ḇa. Yaḇesneso kaku rofyor yamam samambraḇ ayena nasabu kwar.  Yaḇaḇir yambrus kaku ma yasofer faro aryawin ro rum ḇeduf monda. Fyorno ido yakara user Yesus ḇeyor faro Kmari fa iḇye kada dun samswen ḇyena buri. Ḇape Yahwe ḇyuk samarawraw ḇe Yesus i, ma syambraḇser aya kako. Nadi ima aryawin ayedi ro ras ḇe ras. Rofyor yaḇenadi ḇe Allah ramnai yaḇaḇir sne yedi iprei syadiwer.”​—Matius 26:39.

Julian, ḇesmai dafduf sklerosis multipel iso dafduf ḇefrur fa kraf na npakrek, ismai dafduf ine ro swaf fanam ḇe taun ri 30, ḇyaḇir rarirya kako. Doḇe, ”Fyor iwara yakain ro kursi fararur ro kantor ḇape kirine yakain ro kursi roda. Ḇape kankenem yedi ḇyefainda kaker snar yaḇukna fa yafarmyan ḇe snonkaku ḇesesya. Kuker koḇuk, na kandera koḇena nmarḇak werḇa, ma Yahwe ifrur mnis asas Ḇyena pdef fa syambraḇser ko ro fafisu kofandun na. Imnis manwawan Paulus i, na yakofen kaku, ’Ro roi ḇeḇor nakam yaḇarna snar Kristus ḇeḇuk samambraḇ maḇe aya.’”​—Filipi 4:13.

ROFYOR SNONKAKU KOSWAR SYA SRO

Antonio iwasen mura bo doḇo, ”Rofyor kma yedi ryo snar kecelakaan oso, randak ya yakyar ḇaḇeri. Yamam boi inema roi ḇenapes ḇa, nya sasarḇa snar imbran monda ro nyan andir ya. Ḇape jadi fa yafrur roi osoḇaḇeri. Iduf marḇak kaku ro ras ririm rofyor imar ḇaim. Yamewer yafasnai fafardun ayedi ro ḇarpon awin ayedi, mboi rofyor yemir monda ido yakanes rawo. Yafuken ker ro mankundaya, ’Rosai ḇefnai ya? Rosai ḇefnai ya?’

”Ro ras-ras ḇefrur sneso anna, yor ker ḇe Yahwe I fa ifnoḇek aya fa yafarmku sneḇaḇir ayena ma ḇyuk ḇaḇeaski ḇe aya. Ma fyoro mura sne ayedi iknon syadi. Yaswarepen Refo fyasnaḇair snar ’roi ḇekur kofawi ḇaim’ na nkur ko. Snaro Allah ipok fa isrer ḇa, inja yakyar kaku nari yasrow kuker kma ayedi rofyor kaḇakḇok ya ḇeḇejadi.”​—Pengkhotbah 9:11; Yohanes 11:25; Titus 1:2.

”Kecelakaan pesawat oso myun romawa nuḇedi, ḇape nuswarepen kaker fafisu ḇeyun marasrisen rofyor nkoḇeyamyam ro ras-ras naiwara.”​—Robert

Robert, ḇeḇeyap ro artikel ḇerandak ya, kyara radine kako. Doḇe, ”Aya ma swa yedi, kakara nuḇena neaski imnis neḇefas ro Filipi 4:6, 7. Nusmaina ro nadi-nadi nuḇena ḇe Yahwe I. Sne ḇeaski radine nafrur fa nusambraḇ fa nukofenḇair saneraro kaḇakḇok ya ḇe wartawan berita sya. Kecelakaan pesawat oso myun romawa nuḇedi, ḇape nuswarepen kaker fafisu ḇeyun marasrisen rofyor nkoḇeyamyam ro ras-ras naiwara. Iso nukain nuwasenkara ker na.

”Rofyor naek srar sya sikofen snar smam ro televisi nufasnaḇair kakyar nuḇena kuker payamyum, nukofen ḇesi kakakyar nuḇena inema snar nadi ḇebor ro naek srar sya sor faro fandandun nuḇena. Yakyar kaku Yahwe ifnoḇek nu kuker ananun ḇeḇuk sneprei ḇebor sḇukna.”

Fawawar nane nfasnai, Allah na ḇyuk ḇaḇesneprei ḇe snonkaku ḇesmai roi ḇesamswen ma roi ḇedwarek ro swaf oso. Au ido rariso? Roi ḇesamswen sairirya ḇekur Au ro kankenem Bedi, ḇaḇesneprei naisya fa nafnoḇek Au fa wasaeḇur ro fafisu ḇesamswen anna. * Inja rosai ḇefnai fa wor farfnoḇek ro Yahwe I ḇa? Ima ”Allah ḇeḇuk samambraḇ sne faro snonkaku.”​—2 Korintus 1:3.

^ par. 5 Snonsnon ḇeḇeso ro artikel ine neḇefadwer kwar.

^ par. 23 Wamarisen sifnoḇek Au fa wafanam ḇe Allah ma wasmai ḇaḇesneprei ro I ido, swewar Saksi-Saksi Yahwe ro moḇ Bedi ḇaido farem surat ḇe kantor cabang sena ḇefanam kuker moḇ Bedi.