Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 AWAWOS ḆEPON YA | ROSAISO HADIAH ḆEPYUM SYADI YA?

Ḇaḇesasewar Hadiah Ḇepyum Syadi

Ḇaḇesasewar Hadiah Ḇepyum Syadi

Kosewar hadiah ḇesrow kaku ḇe snonkaku oso ima napyan ḇa. Syadiwer, ḇesmaya iso nari ḇemam maeja ro hadiah ani. Ma rosai ḇepyum ḇe snonkaku oso imbude na neḇese kuker ḇesesya.

Imnis raris, romawa babo na smam HP ḇesae babo ḇe hadiah ḇepyum kaku. Ḇape, ḇeba sya imbude sesyowi kaku hadiah smamna ḇe roi ḇemanmin sḇuk ḇe waris faro kina ya. Ro budaya ḇeḇeso, romawa babo ma ḇesinan sya hadiah simarisen ya iso pipi, snar na sḇukna fa sḇukikoḇes rosai monda simarisen na.

Samswen mboi snonkaku ḇebor ḇena fawawi sisewar pdef hadiah ḇesrow kaku faro snonkaku siswar ya. Kakuḇae, imbe kosma hadiah ḇararirya na napyan ḇa, ḇape koswarepen kaku snar roi oso kofrurya na ḇyuk swaf ḇeko fa bisa kosmana. Rwama kawos roi rifyak na nun snedoryaḇ faro snonkaku ḇesmaya.

Rosai ḇesmaya imarisen na. Snon oso ro Belfast, Irlandia Utara ikofen snar hadiah ḇepyum isma fyor ḇyeumur 10 ḇaido 11 iso sepeda balap. Rosai ḇefnai ya? Doḇe, ”Snaro iso yamarisen kaku ya.” Nane nfasnaḇair snar rosai snonkaku oso imarisen na nari nafrur fa ḇyesyowi hadiah ani ke roḇa. Inja, kwarapan resari snonkaku imbe buk hadiah ḇe i. Swewar fa wafawi rosai ḇyesyowi na, snar ine nawyaye marisen ḇyena. Imnis raris, sinan apus na susyowi oras fa sukayamyam kuker kina suḇesya. Imbude sumarisen sumam romawa ma kpu suḇesya ro ras-ras na. Osower ido, sura fa sumbran farma kuker kina suḇesya ima roi sumarisen syadi ro hadiah ḇesena.

Nyan oser fa wafawi rosai snonkaku oso imarisen na iso wamnaf pyum. Refo ḇyuk ananun, ”Mkosamberen famkomnaf, ḇape mkowawos ma mkomasasor fasaw awer.” (Yakobus 1:19) Rofyor wawos kuker bati ḇaido karyer Besi ido rwower pyum si, snar roi sikofen na nḇeḇair rosai simarisen na, ma simewer na. Rarirya ido, na wafawi hadiah ḇesrow kaku fa buk ḇe si.

 Rosai ḇesmaya fyandun na. Imbude nari ḇesmaya ḇyesyowi hadiah kasun buk ḇe i na ḇoi namnis kaku kuker fandandun ḇyedi. Ḇape rariso na wakfawi snonkaku oso roi fyandun na rai?

Nyan ḇepyan fa wafawi ya iso, wafuken ḇeri ḇe snonkaku ani rosai fyandun na ḇaido imarisen na. Imbape, faro snonkaku ḇeḇeso, nane nun raryaḇ mankun ḇe si ḇa rofyor imbe sḇuk hadiah. Simarisen syadi sḇuk hadiah ḇesrow kaku ḇefrur kanandor ḇesmaya. Osower ido, sino sisya imbude sikofenḇair rosai simarisen ma simarisen ḇa na. Ḇape, fyorno ido na sipok fa sikofenḇair ḇa rosai sfandun na.

Rarirya ido, mam pyum kada snonkaku oso kankenem ḇyedi. Ḇyeromawa babo ḇaido ḇyesinan ke, fyarḇuk ḇaim ḇaido fyarḇuk kwar ke, ḇyesisye kuker swari ke, ḇyekabom ke, fyararur kwar ke, ḇaido ḇyepansion kwar ke? Inja kwarapan hadiah risai ḇesrow kuker snonkaku oso fandun ḇyena.

Insama wafawi fandandun ro snonkaku nari buk hadiah ḇe i ido, wawos kuker snonkaku ḇese ḇena fafisu ḇemnis rarirya. Imbude na ikofenḇair ḇe Au fandandun oso ḇyedi mboi snonkaku ḇebor sifawi na ḇa. Waso ananun ine ido, insape wafawi buk hadiah ḇemnis kuker fandandun ḇyedi na snonkaku ḇese skara na ḇa.

Orasya. Refo ikofen, ”Wos oser ḇaken neḇekofen ro oras ḇemnis, sye napyum kaku ra!” (Amsal 15:23) Mnuk ine kyurfasna snar wos kawosna ro oras ḇemnis na nun fararwe ḇeba kaku. Ine imnis kuker roi kofrurna. Wos kawosna ro oras ḇemnis na nun marisen faro ḇerowerya, rarirya kako hadiah koḇuk ro oras ḇemnis ḇaido fafisu ḇemnis na nafrur fa ḇesmaya ḇyeaski.

Bati oso imbe fyarḇuk. Romawa babo insape imnai ro rumfarkor. Imbeswa imbe suna kapira. Ine iso swaf ḇeḇeso ḇe snonkaku sya fa sḇuk hadiah. Snonkaku riḇeso skara fandun fa sfas ḇepon fafisu ḇepyum ḇeradirya faro taun iwama. Rarirya, skara ḇepon hadiah ḇepyum risai nari sḇuk ro fafisu annane. *

Kakuḇae, fandun fa buk hadiah ro fafisu ḇepyum ḇerarirya monda ḇa. Na wasma aski snar buk ḇe ḇesesya ro fafisu sairirya kam. Imbape, fandun fa kosasor ko. Imnis raris, fyor snon oso ḇyuk hadiah ḇe bin oso ḇoi ikofenḇair roi ḇeḇefnai ya ḇa ido, imbude bin ani na kyara snonya imarisen kaku i. Ḇape snonya kyara rarirya ḇa ido, hadiah ḇyuk ani na nun samswen ma skara sasar i. Ine fyasnaḇair fandun fa kokara roi ḇeseya wer iso—rosai ḇeḇedif snonkaku ḇeḇukya.

Roi ḇeḇedif snonkaku ḇeḇukya. Raris farfyar ḇepon ya, ipyum fa manḇeḇuk hadiah kyara resari nari ḇesma hadiah ya imbude na kyara sasar roi ḇyuk ine ke roḇa. Osower ido, manḇeḇukya fandun fa myam kaku roi ḇeḇedif mankundi fa ḇyuk hadiah. Snonkaku ḇebor sya sḇaḇir simarisen sḇuk hadiah snar roi ḇepyum iso ḇeḇedif si. Ḇape ḇesesya sḇuk hadiah ro fafisu oso snar sor si fa sifrur rarirya. Ḇesesya wer simarisen snonkaku sya sifrur pyum si ḇaido sḇuk hadiah ḇe si kako.

Rosai na wafrurya insama wafawi mnis roi ḇepyum iso ḇeḇedif Au fa buk hadiah ya? Refo doḇe, ”Roi mkofrur nakam mkofrur nakam kuker saswar.” (1 Korintus 16:14) Rofyor buk snar saswar ḇekaku ma kwara roi ḇepyum faro ḇesma hadiah ya, imbude na imarisen kaku isma hadiah buk na. Ma snar fasna snemura na wasma marasrisen ḇeba syadi. Buk kuker sne ḇesiper ido, na wafrur Kma koḇedi ro nanki imarisen. Manwawan Paulus isandik snonkaku Kristen ḇero Korintus ḇepon siwara ḇefasna snemura ma sne ḇemarisen  fyor sḇuk fafnoḇek faro min Kristen ḇesma susa ḇero Yudea sya. ”Snar Allah iswar snonkaku ḇeḇuk kuker marisensya.”​—2 Korintus 9:7.

Buk kakara Bena faro rosai kawos kwarna nari nafrur fa hadiah buk anna nun marisen faro si. Yahwe ifrur nyan ḇeradine ma nyan ḇesena kako fa ḇyukifasos hadiah ḇepyum ma ḇeba syadi faro snonkaku syakam. Nkanun ḇe Au fa wakarapan hadiah ḇeba kaku ine kuker wawasya artikel ḇeuser ya.

^ par. 13 Snonkaku ḇebor sḇuk hadiah rofyor sifrur munara ulang taun ma ras ḇeba ḇesena. Ḇape, ro munara annane sifrur roi ḇemnis kuker rosai Refo fyarkor na ḇa. Mam artikel ”Fakfuken ro Ḇewasya—Natal Ima faro Snonkaku Kristen Ke?” ro majalah ine.