Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Tetragramaton, Allah snonsnon ḇesren Ḇyedi, Yahwe, ro huruf Ibrani, siwasya na ro ḇar raku ḇe ḇar rasar

Huruf Ibrani Ḇekasun Syadi Ḇeḇuk Kakyar Ḇeba

Huruf Ibrani Ḇekasun Syadi Ḇeḇuk Kakyar Ḇeba

Bisa fa kokyar kaku snar Allah asas Ḇyena kam nari nkaku ndarirya ke? Yesus mankundi ikyar kaku roi ine, ma farkarkor ḇyena nḇawes kakyar ro snonkaku ḇerower i sya. Kwarapan sarḇer Yesus ḇyuk ro Faya ḇyedi ro Urek, ḇero Matius 5:18, ”Yakofen kaku faro mko snar farsyos ma supswan nari supromes ḇepon ḇardibur huruf oser ḇekasun syadi ḇaido mir oser ro huruf oso ḇero Sasoser ipromes isof roi nakam ndarirya.”​—Terjemahan Dunia Baru (NW).

Huruf Ibrani ḇekasun syadi isoine י (yod). Ine iso huruf ḇerandak ro Tetragramaton, ima Allah snonsnon ḇesren Ḇyedi, Yahwe. * Manfasfas ma snonkaku Farisi sya, smam mboi roi ḇefandun kaku ro Allah Sasoser Ḇyedi ima wos ma huruf ḇyena monda ḇa, mboi ”mir oser ro huruf” na kako.

Yesus ikofen bo doḇe farsyos ma supswan nari supromes ḇepon ḇardibur roi ḇekasun syadi ro Sasoser ya ndarirya ḇa. Ḇape, Refo ḇyuk kakyar ḇeko snar farsyos ma supswan komam ine nari sukain fyoro-fyoro. (Mazmur 78:69) Inja, Yesus wos ḇyena nkurfasna snar roi ḇekasun syadi kaku ro Sasoser ya kako nari ndarirya.

Allah Yahwe myam roi ḇekasun na nefandun kaku ke? Imbo, rarirya. Kwarapan roi nane: Randak iwara, Allah iwan snonkaku Israel sya fa sipok spankar awer kor osoḇaḇeri ro domba Paskah ya. (Keluaran 12:46) Ine rya roi ḇekasun monda ma imbude sifawi mankun ḇa rosai ḇefnai fa Allah iwan si radine. Ḇape, Yahwe ifawi roi ḇekasun ine nḇeḇair ḇe ḇardadi ḇekur ḇe Mesias i, rofyor imar ro ai kandera nari spankar kor ḇyedi osoḇaḇeri.​—Mazmur 34:20; Yohanes 19:31-33, 36.

Rosai kofarkor ro Yesus wos ḇyenane? Ko kako bisa fa kokyar kaku snar Allah asas Ḇyena kam nari nkaku ndarirya. Kaku ḇeri, huruf Ibrani ḇekasun syadi ḇeḇuk kakyar ḇeba!

^ par. 3 Huruf Yunani ḇekasun syadi isoine iota ma ine imnis kuker huruf Ibrani י (yod). Snar randakya Sasoser Moses sfas ma sfaduru na ro wos Ibrani, inja Yesus wos ḇyenane kyurfasna ḇe huruf Ibrani.