Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Yamarisen yaryur kuker roma inai babo ḇero sidang

 REFOYA FYADWER KANKENEM

Yaswar Syadi Kaku Farfnak Bisbol ro Roi Nakam!

Yaswar Syadi Kaku Farfnak Bisbol ro Roi Nakam!
  • ḆYEḆEAḆEN RO: 1928

  • SUP RYAMA YA: KOSTA RIKA

  • FARFYAR ḆYEJA: ORAS ḆYENA NABRO FA ḆYUKIFNAK OLAHRAGA PROFESIONAL MA JUDI

KENEM AYEDI RO RANDAKYA

Yaba ro Puerto Limón, kota oso ro pelabuhan ḇero ḇar wamurem yendisare Kosta Rika. Sinan ayesuya suna romawa riwar, aya iso romawa ḇefik. Kma yedi ryo rofyor yaḇeumur pasi barek riwar. Inja, awin mankundi fyaduru inko isof nkoḇa.

Yamarisen kaku yafnak bisbol rofyor yaḇaḇa kaker, oso ḇese ḇa. Rofyor yaḇeumur fanam ḇe 20, yakryur kuker tim liga amatir. Fyor yaryur kuker tim ine, pelatih oso dor aya fa yaryur kuker tim profesional ro Nikaragua. Ḇape, snar awin ayedi idufe ma aya iso ḇemam i, inja yapampum fararyor ḇyena. Ḇarpur muma, pelatih ḇese dor aya fa yafnak ro tim bisbol nasional Kosta Rika. Ḇefnak ro liga amatir sya skinfir fa siryur ro tim ine. Fararyor ḇyena yaso ḇeri na. Ramnai, yaryur kuker tim nasional ro 1949 isof ro 1952. Yakso fa yakfnak ro Kuba, Meksiko, ma Nikaragua. Ayama yaḇe-baseman ma yafnak pyum. Yafnak ro pertandingan ri 17 kuker yafrur sasar oseroḇaḇeri ro farfnak ya. Snonkaku ḇemam sya sap naḇa snonsnon ayedi indo yamarisen kaku!

Imbape faḇye kaku, kenem ayena naḇyeḇa kaku. Yana pacar oser monda, ḇape bin ḇesesya sisya wer. Aya kako yamasarser. Ras oso yamser fafayaḇa isof yenef ro moḇya ma yakbok yafawi nyan fa yabur ḇa! Yakso kako fa yafnak judi domino ma yafnak lotre.

Fyor kankenem yedi ḇyenapnap kaker, awin ayedi ḇye Saksi Yahwe. Ḇyesewar insama yamarisen yafawi kakyar ḇyedi, ḇape snar yaḇesibuk mankenem ro olahraga, inja yafandun mankun faro roi anna ḇa. Iba syadiwer, fyor yaḇelatihan pyum kwar, ine nafrur fa yaḇefnder yanan ro arkok! Yamam monda faro farfnak ayenane. Yaswar syadi kaku farfnak bisbol ro roi nakam!

Rofyor yaḇeumur 29 ya, yasmai roi ḇemun rofyor yaḇe yafor bola ro farfafnak ani. Fyor yaprei kwar, yamnai yafnak wer. Ḇape, yaso kaker ro organisasi bisbol fa yafarkor ḇefnak sya ro tim liga amatir ḇefanam ro rum yedi.

 RARISO REFOYA FYADWER KENEM YEDI

Ro 1957 ya, yasmai undangan oso fa yakso ro munara kebaktian Saksi-Saksi Yahwe ro stadium moḇ randak yafnak bisbol ani. Snonkaku ḇebor ḇemam aya rofyor yafnak bisbol, sima sirarmomen kaku. Ḇape fyor yakain kuker ḇerama ro munara ine sya, yamam mboi Saksi sima siḇese kaku ro si, sima sifrurpyum. Rosai yamam ro munara kebaktian ani nadif aya fa yamarisen yakfarkor Refo kuker Saksi sya ma yaso ro fananjur sena.

Yamarisen kaku kuker roi ḇebor yafarkor kwar ro Refoya. Imnis raris, Yesus ḇyardi snar ro rasras ḇepupes, nari manfamyan ḇyesi sḇaryas ankankinem ḇeḇye Karajan Allah ro supswan ḇesiper. (Matius 24:14) Yafarkor kako snar snonkaku Kristen ḇekaku sima sifarmyan fa sna untung ḇa. Yesus doḇe, ”Mkosma waworekna monda kwar, inja mkakḇuk waworek kako.”Matius 10:8.

Fyor yafarkor Refo, yamamkara rosai Saksi Yahwe sya sikofenya kuker rosai sifrurya. Yamanen kaku si, snar sima sḇaryas ankankinem ḇeḇye Karajan Allah ro supswan ḇesiper mboi simor ḇa. Yamam si mboi sna sne ḇesiper raris Yesus parenta ḇyena faro snonkaku Kristen sya. Inja rofyor yawasya Markus 10:21 ma yamam Yesus fararyor ḇyena rodia, ”Rwama waso aya”, ine nafrur aya fa yamarisen yakḇe Saksi.

Ḇape, infa yafadwer kenem yedine inema nefandun swaf kawane. Imnis raris, ro swaf taun ḇe taun, yana nomor ḇeḇuk ”untung” ma yaḇukna ro minggu nakam rofyor yafnak lotre. Ḇape, yafarkor ro Refoya snar Allah ifras snonkaku ḇesyom faro ”allah Ḇeḇuk Untung”, ma snonkaku ḇeyan farmbram. (Yesaya 65:11; Kolose 3:5) Ḇarpur mura, yun snemuk fa yamnai yafnak judi. Ḇape rofyor yamnai yafnak lotre ya, ras Minggu ḇeuserya, nomor ḇeḇuk ”untung” ayedi isyae! Snonkaku sya skoryaye aya snar yafnak ro minggu ani ḇa, ma sidif aya fa yafnak wer, ḇape yamewer. Yamnai yafnak judi kwar.

Ro ras yaḇebaptis ro munara kebaktian Saksi-Saksi Yahwe ya, yasmai farawrowes kuker ’kenem ḇebabo’ ayedine. (Efesus 4:24) Fyor munara imnai ro mandira ya, yakaḇer ḇe hotel. Yakandor pacar randak ayeja dores ro ḇarpon kedwa sim yedi. Bin ani dembuk aya radine, ”Sammy e, rwama kufrur marisen kuḇena!” Ramnai yoḇe, ”Yamewer!” Yakofenḇair ḇe i snar ro kirine yakenem imnis kuker wos farkankin ḇero Refoya kwar. (1 Korintus 6:18) Kyarem ḇeri, ”Rosairiri?” Ramnai kyurpampum rosai Refo ikofen kuker fararur farḇuk ḇeḇyeḇa ma idif aya fa kuḇepacar wer. Ḇape, yasun ḇeri ḇe sim yedi ma yaken kedwa ya. Fafisu ine, yamarisen fa yakofen snar rofyor yaḇe Saksi ro 1958 ya, yafadwer kenem ayedi fa ipyum, isof ro rasine kenem yenaine nefadwer ḇa.

BARAKAS YASMAINA

Yamarisen kada na yafas ro syap oso barakas yasmaina snar yasouser faro wos farkankin ḇero Refoya! Barakas nabor yasmai ro kirine iso yana bati ḇekaku sya sibore, yasmai kenem ḇepyum, ma yasmai aski ḇekaku ya.

Yamarisen kaker farfnak bisbol, ḇape yamam roi ḇefandun syadi ḇe aya. Farfnak bisbol nafrur fa sfawi kaku aya ma yana pipi nabore, mboi roi nanekam nakain fyoro ḇa. Ḇape, ḇaḇebati ayena kuker Allah ma naek srar iso nari ḇekain fyoro-fyoro. Refo doḇe, ”Supswan ine ma roi ḇeḇor kawasa sirmomen ro ina nari napromes. Ḇape snonkaku ḇefrur Allah marisen ḇyena, ikenem faswef isof fyoro-fyoro.” (1 Yohanes 2:17) Fafisu ine, yaswar syadi kaku Allah Yahwe I ma kawasa Ḇyesi ro roi nakam!