Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

”Mkoḇe maeja syadi.”​—MATIUS 10:31

Allah Ima Iswar Au Ke?

Allah Ima Iswar Au Ke?

ROSAI KOFARKOR RO ALLAH ḆRAUR ḆYENA

Jam oser fyor kapira oso ḇyeaben kwar, na srir kapira ani ro snari dar ḇyesya. Ine iso fafisu ḇefandun kaku faro kapira ani. Rosai ḇefnai ya? Snar fafisu ḇeradine snari nya fasfesepen ḇefanam kuker kapira ḇyedi. Inja, nari nafrur kapira ani iba fasaw samberen. *

Rosai ḇeḇejadi rofyor kapira oso snari durepeni ro ander ḇyesya fyor ḇyeaben babo? Profesor Jeannette Crenshaw fyasnaiḇair ro The Journal of Perinatal Education ḇo doḇe hormon oksitosin ḇero snari baken ḇyena nari neke ḇaido nabor syadi. Hormon ine nari ”nafrur awin oso iswar ḇeri kapira ḇyedi rofyor pyan, iknower, ma syus kapira ḇyani”. Hormon eḇese nasya wer ḇefnoḇek ”awin ani fa ifawi kaku rosai romawa ḇyedi fyandun na” ma nafrur imarisen dawos kuker kapira ḇyanine. Rosai ḇefnai fa roi ine nasya?

Manḇedaw ḇesaswar koḇedi, Allah Yahwe, * I ḇefrur awin oso kuker kapira ḇyedi suna fasfesepen saswar. Raja Daud ikofen snar Allah I ’ḇeḇedari syae ro sne kapar ya’ ma ifrur iknon ro snari kawer ḇyedi. Ḇyenadi ḇo doḇe, ”Auso ḇefaduru aya fyor yaḇeaben mundi ya; fyor yaro awin sne kapar ḇyedi, ḇe Allah ḇe aya kwar.”​—Mazmur 22:9, 10.

WAKARAPAN: Allah ifrur hormon ḇesamswen nane insama awin oso nya fasfesepen saswar kuker kapira ḇyedi ma ifawi ḇeri rosai kapira ḇyedi fyandun na. Inja, kokyar kaku Allah I kako nari iswar ma myamepen ko snar koine ”romawa ḇyedi”.​—Farfyar ro Manwawansya (Kisah) 17:29, Terjemahan Dunia Baru [NWT].

ROSAI REFO FYARKOR KUKER ALLAH SAWARWAR ḆYEDI FARO KO

Yesus Kristus ḇemambir kaku Manḇedaw koḇedi, doḇe, ”Mkofawi ḇake manesu risuru sḇoḇ su kuker maeja ropia oser? Rariryano osero ro man mkun ansi ipok imar famfnomḇa rofyor Mami ro Boiyaswa Imarisenḇa. Ma mko kako snonburyam mkoḇena naser karkor epen. Inja mkomkak awer snar mkoḇe maeja syadi ro manesu ḇeḇor.”​—Matius 10:29-31.

Snonkaku kermkun monda ḇemam man kasun ḇeroḇ ro ris koḇedi sya, syadi wer fyor ono sisapi ro saprop ya bori komam si ḇa. Ḇape, Allah koḇedi ro nanki myam si oser-oser! Man sya sibore, ḇape snonkaku semaeja syadi ro Allah mamam Ḇyedi. Inja, farkarkor ḇyedi isnai kaku: wapok ’wamkak awer’ snar Allah myam Au ma iswar kaku Au!

Allah myamepen kaku ḇaḇeaski koḇena ma myam ko kuker saswar

 Refo ikofenḇair ḇe ko

  • ”Yahwe mkana nasya ro moḇ nakame, myam faro snonkaku ḇeḇarḇor ma snonkaku ḇeḇye.”​—AMSAL 15:3.

  • ”Yahwe mka ḇyedi myam snonkaku ḇenapes, ma kneram Ḇyeja ryower araror fararyor sena.”​—MAZMUR 34:15.

  • ”Nari yaryaḇ kaku snar saswar souser Bena, snar mam kandera yena; Wafawi samswen ḇemarḇak ayena.”​—MAZMUR 31:7.

”YAḆAḆIR KER YAHWE ISWAR AYA ḆA”

Fafisu kofawi Allah myam ko ma fyandun ko ido, nari kakara koḇedi neḇefadwer ke? Imboḇae. Imnis raris Hana * ro Inggris ḇyaḇir na:

”Yaḇaḇir ker snar Allah iswar aya ḇa ma kyarem nadi yena kam ḇa. Imbude yasmai samamyai snar yakyarkuf ḇa. Yaḇaḇir fyandun aya ḇa snar ayama snonkaku ḇeḇefandun ḇa. Yaḇaḇir kaku Allah ifandun aya ḇa.”

Imbape kirine, Hana ikyar ma ikyar kaku snar Allah iswar ma fyandun i. Rosai ḇefnai fa ikyar kaku ya? Fyawar ḇo doḇe, ”Fawawase kakara yena nefarwei. Yaswarepen taun ḇeḇeso aniwara faya oso dawos kuker farsarser fasaspar Yesus ḇyedi. Faya ani nuk kaku sne yedi, ma yakyar kaku Yahwe iswar aya. Fyor Yahwe kyarem nadi yena, yakanes ḇeri snar yafawi Yahwe iswar kaku aya. Kuker yafarkor Refo ma yaso pdef fananjur ya, yana fawawi nabor kaku kuker Yahwe I, rari-rari Ḇyena, ma sneḇaḇir Ḇyedi faro ko. Kirine insape yamambos kaku snar Yahwe iswar ko ma ifnoḇek kaku ko. I kako myam ko oser-oser.”

Hana wos ḇyena nḇuk samarawraw kaku. Ḇape, rariso na kokyar snar Allah myambir ko ma ifawi kaku sneḇaḇir koḇena rai? Nari kawos na ro artikel ḇeuser ya.

^ par. 3 Awin ḇeḇeso ono sḇestres rofyor sikapar kapira sesya kwar. Inja, sna fasfesepen ḇefanam kuker kapira sesya ḇa. Ḇape, sipok skara awer snar sisasar kwar. Institut Kesehatan Mental Nasional AS ikofen, rofyor sikapar ramnai kwar na fafisu sḇestres nasya. Ine snar sasar sena ḇa, ḇape fafisu ḇeradine nasya ro bin ḇekapar babo syakame. Imbe wafawi nabor syadi wer ido, mam ro artikel Sedarlah! 8 Juni 2003, judul ḇyeja ”Memahami Depresi Pascapersalinan.”

^ par. 5 Yahwe iso snonsnon Allah ḇeḇefas ro Refoya.​—Mazmur 83:18.

^ par. 15 Ro artikel ine ma ḇeuserya wer, snonsnon riḇeso neḇefadwer kwar.