Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 AWAWOS ḆEPON YA | ḆESYOWI KAKU SASUREF ḆEBA SYADI RO ALLAH I KE?

Sasuref Ḇepyum Syadi Oso

Sasuref Ḇepyum Syadi Oso

ROI sḇukisar pensil raris wai ro Jordan bramin ḇyedi smamna ḇe romawa sya rofarfnak sena monda. Mboi, mankundi myamna ḇe roi ḇepyum kaku. Jordan doḇe, ”Russell, ima karyer ḇefanam kaku ayediri, ḇyuk roi ine ḇe aya rofyor yaḇe romawa kaker.” Rofyor Russell imar kwar, Jordan ifawi snar Russell ifnoḇek kaku kpuri ma sinan ḇyesuya, syambraḇser si rofyor sismai fafisu ḇesamswen. Jordan ikofen wer bo doḇe, ”Fafisu ine yamambir kaku Russell i, rofarfnak kasun ine ḇye sasuref ḇepyum syadi ḇe aya.”

Jordan fawar ḇyenane nfasnaiḇair snar snonkaku ḇeḇeso imbude smam sasuref ine ḇe roi kasun ḇaido ne roi oḇa. Mboi faro snonkaku ḇefasnai syowi, myamna ḇe roi ḇeba ḇepyum kaku. Refoya fyasnaiḇair sasuref ḇepyum syadi oso ro wos korower ker ine, ”Snar Allah saswar ḇyedi ibabos faro supswan ine, isof ḇyuk kwar Rumkun Mandos ḇyedi, insa snonkaku ḇekyar faroi sya sroḇa, mboi sisma [kankenem fyoro, NW].”Yohanes 3:16.

Inema sasuref ḇeḇuk kankenem fyoro faro snonkaku ḇesmai na! Sasuref ono ḇese ḇeba syadi ro sasuref ine isya ke? Sisya sesyowi sasuref ine ḇa, ḇape snonkaku Kristen ḇekaku sya sesyowi sasuref ine ma smamna ḇe ’ḇaḇyak ḇekaki’. (Mazmur 49:8; 1 Petrus 1:18, 19) Ḇape, rosai ḇefnai fa Allah ḇyuk kankenem ro Roma Ḇyedi ḇe sasuref faro supswan ine?

Manwawan Paulus fyasnaiḇair na, ”Sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkakusyakam sifrur sasar kwar.” (Roma 5:12) Snonkaku ḇerandak, Adam i, syasar snar ifawi kwar mboi isouser faro Allah I ḇa, ma ḇarpur mura ismai marmarya. Ro Adam i, marmarya syun ḇe kpu up ḇyesi isoine kawasa snonkaku syakam.

”Snar marmar irya sasuref ro sasarya; ḇape kankenem ḇekain fyoro-fyoro fnoḇek Yesus Kristus Manseren koḇedi irya fakamaman Allah ḇyuk  waworek monda maḇeko.” (Roma 6:23) Insama Allah fyaspar snonkaku ro samamyai marmarya, iwan Rumkun Ḇyedi, Yesus Kristus i, ḇe supswan fa fyarser kankenem ḇemnis ḇyeja faro snonkaku sya. Ḇeknam ro farsarser ani, isoine roi kofawina ḇe ”ḇaḇemkei” ḇaido fasaspar ya, snonkaku syakam ḇefasnai kakyar faro Yesus i nari sismai kankenem fyoro ya.Roma 3:24.

Paulus iwasen mura ḇe barakas ḇebor Allah ḇyuk faro manfamyan ḇesyom I sya roro Yesus i, bo doḇe, ”Kokofen kasumasa mufaḇe Allah snar roi ḇyukma naba kaku.” (2 Korintus 9:15) Kaku, fasaspar ima roi ḇepyum fafayaḇa, inema samswen fa kofasnaiḇair na. Ḇape, rosai ḇefnai fa ro roi ḇepyum nakam Allah ḇyuk faro snonkaku sya, fasaspar iso roi ḇefandun kaku? Rariso ine iḇese ro sasuref ḇesena? * Ma rariso kofasnai kasumasa faro roi ine rai? Nkanun ḇe Au fa wawasya Refo kankarem ḇyena faro fakfuken-fakfuken ine ro artikel risuru ḇeuser nane.

^ par. 8 Yesus imarisen ”ḇyuk kankenem ḇyedi faro ko”. (1 Yohanes 3:16) Imbape, snar farsarser ani ima Allah marisen Ḇyedirya kako, inja ro artikel-artikel ḇeuser nane nari nfasnaiḇair Allah nasan Ḇyedi ḇe Manḇefasos fasaspar ya.