Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Buk kuker Marisen Nari Nun Fainda

Buk kuker Marisen Nari Nun Fainda

”BIS ya ifrar mura, mboi snonkbor Cina aune barek!” Iso wos Alexandra ryower rofyor kyain iwaf ro bis yadori, ḇembranuk ḇe sup ḇese ro moḇ ḇeḇerwas sup risuru ḇero Amerika Selatan. Isabu fa myam rosai ḇeḇejadi ya. Myam mboi snonkbor Cina ani isewar kaku fa dawos muk-muk wos Spanyol ḇe ḇemamwarek moḇ ḇerwas sup ani fa ikofenḇair samswen ḇyena. Snar Alexandra iryur kuker sidang Saksi-Saksi Yahwe ḇeyawos wos Mandarin, inja dor fa ḇye penerjemah.

Snon ani doḇe ima kawasa ḇeknam kaku ro moḇ oso ḇape dokumen ma pipi ḇyena skaraw na kwar. Randakya ḇemamwarek ani ikyar i ḇa ma kyara sasar snar Alexandra daksowarpu ro ḇaḇaḇoḇ snonkaku. Ḇarpurya ikyar faro rosai ikofen nakam, mboi faḇye kaku snonkbor Cina ḇefrur saswar ḇemandaman ani sor i fa ḇyak denda snar nya dokumen ḇa. Snar nya kumpan ḇa inja Alexandra ḇyuk rupiah ri 260.000 ḇe i. Snonkbor ani ikofen kasumasa ma doḇe nari fyadwer syadi na wer. Alexandra doḇe imewer syewar ḇaḇyak kaḇer mboi imarisen ifnoḇek i snar ifawi inema roi ḇefandun fa ifrur nairi. Ḇyuk syap-syap ḇeknam ro Refo ma danun ḇe i fa fyarkor Refo kuker Saksi-Saksi sya.

Na kosnesna naprei rofyor korower farfyar kuker snonkaku ḇefasnai sanemura faro snonkaku ḇemandaman sya. Ma kakuḇae, snonkaku ḇena agama ma ḇena agama ḇa sya sakfur rarirya kako. Wamarisen wakfasnai sanemura ya ke? Fakfuken ine ipyum kaku snar Yesus doḇe, ”Ipyum syadi ro koḇuk ya ro kosma ya.” (Farfyar ro Manwawansya [Kisah] 20:35) Ro fawawi dunya sya sakfawi ine ipyum snar rofyor buk ido nari waksmai fainda ya kako. Rwama komam fainda risai monda.

’SNONKAKU ḆEḆUK KUKER MARISEN’

Nane nasnai kwar ro kankenem koḇena snar koḇuk ido nari kosmai marisen. Roi risuru suine suḇefesepenyae. Manwawan Paulus fyas snar ”Allah iswar snonkaku ḇeḇuk kuker marisensya.” Inema dawosna kuker snonkaku Kristen ḇeḇuk farfnoḇek kuker sanemura ḇe min kakyar oser sesya ḇesmai samswen. (2 Korintus 8:4; 9:7) Paulus ikofen ḇa snar simarisen inja sḇuk. Ḇape kakuya iso, sna marasrisen snar sḇuk.

Manḇesasewar fawawi oso ikofenḇair snar koḇuk ido nari nafrur fa ”bar-bar ḇero akuk koḇena ḇefesepen kuker marasrisen, kenem kayamyam, ma kayaryar ya, na fyararure. Ma nafrur fa ’kosnesna naprei’ kaku.” Manḇesasewar fawawi ḇese wer ikofen snar ”koḇuk pipi faro snonkaku ḇesesya ido nari komarisen syadibur koḇepake na ro mankunko monda.”

Fafisu ono snar roi wasmaina nafrur fa ḇaḇir na wapok fa wakfrur roi nabor ḇa ḇe snonkaku ḇesesya ke? Mboi kakuya, snonkaku syakam bisa sismai marisen snar sḇe ’snonkaku ḇeḇuk kuker marisen’. Koḇuk kuker kakara ḇepyum ido, na komam ro barbor ḇero roḇebor koḇukna ḇa. Bin Saksi Yahwe oser fyarem syapram anun kuker ḇyuk pipi ḇyena faro ḇefrur  majalah ine bo doḇe, ”Jadi fa yaḇuk nabor ḇa, ḇape yaḇuk pipi kermkun monda ro Balai Karajan.” Ḇape ikofen wer, ”Allah Yahwe ḇyuk ḇe aya nabor syadiwer ro rosai yaḇuk kwar na. . . . Yakofen kasumasa snar mkoḇuk swaf ḇe aya kwar fa yakḇuk farsarser. Ine nḇuk sneprei ḇe aya.”

Nyan nabor nasya fa koḇuk ḇe snonkaku ḇesesya mboi pipi monda ḇa.

BUK IDO NAPYUM FARO PARAREI BENA

Kuker waḇuk ido nari nun payamyum ḇe Au ma snonkaku ḇesesya

Refoya doḇe, ”Snon ḇefrurpyum oso ḇyuk fainda ḇe mankundi, ḇape snonkaku ḇerarmomen dun samswen ḇe mankundi.” (Amsal 11:17) Snonkaku ḇefrurpyum ido, nari sfasnai sanemura. Simarisen sḇuk oras sena, samambraḇ, sfasnai sawarwar, ma roi ḇesena. Frurpyum ḇeradine nḇuk fainda ḇebor faro si, ine kako napyum faro pararei sena.

Manḇesasewar fawawi sfasnaiḇair snar snonkaku ḇemarisen ḇefnoḇek snonkaku ḇesesya sḇaḇir sidafduf mankenem ḇa ma sibrusna naduf mankun ḇa. Inja, nari sismai pararei ḇesyadi wer. Snonkaku ḇemarisen ḇefasnai sanemura na nafrur fa baken sena naprei syadi ro snonkaku ḇeduf marḇak kaku raris dafduf sklerosis multipel ḇaido HIV. Manḇesasewar fawawi sine sfasnaiḇair kako snonkaku ḇefarandinem swan ḇesewar fa ḇemkeibur ro aninem ine, fyor imarisen ifnoḇek snonkaku ḇesesya ido nari nafrur fa iprei fasaw. Ma nari syambraḇ fa pyampum marisen syadi fa dinem kaḇer wer.

Inja na kokofen snar, ”sawarwar, frurpyum, ma ḇaḇenaḇye nari nepampum kakara ḇeḇyeḇa na.” Koḇuk ido nari koḇestres mankenem ḇa ma rik koḇena nek ḇa. Ma faro snonkaku ḇefafardun snar snonkaku siswar sya simar, na siprei fasaw ro fafardun sena rofyor sḇuk farfnoḇek ḇe snonkaku ḇesesya.

Kaku ḇeri, kuker waḇuk ido nari nun payamyum ḇe Au.

KUKER KOḆUK NARI SNONKAKU ḆESESYA SAKFRUR NA

Yesus iwan kaku manfamyan ḇyesi, ”Mkoḇuk kada nari smunsu faro mko: warnkyara ḇeḇye oso, skukira ifyos, ma sisas i isof isbawer ma ḇesbawer anna nari sisbawer na ro farandan bedi. Snar warnkyara mkoḇuki kyaraya, nari ssḇuki kyara mko kako.” (Lukas 6:38) Rofyor koḇuk ido, nari snonkaku sya sesyowi sanemura koḇena kuker sikofen kasumasa ma mankunsi sakfrur rarirya. Inja, kuker koḇuk nari nafnoḇek ko fa kofararur kayam ma kona ḇaḇeḇati.

Kuker koḇuk nari nafnoḇek ko fa kofararur kayam ma kona ḇaḇeḇati

Manḇesasewar fawawi ḇefarkor kwar moḇsa snonkaku sya sifrurpyumyaye si raya smam mboi, ”snonkaku ḇefasnai ker rari ḇefandun mankunḇa nari nadif snonkaku ḇesesya fa sakfrur rarirya.” Ḇape kaku ya, ”kowasya monda farfyar kuker snonkaku ḇefrurpyum inema nafrur fa snonkaku ḇerower sya sfasnai syadi sanemura.” Iso ḇefnai fa manḇesasewar fawawi oso ikofen bo doḇe, ”snonkaku ḇeḇuk internet sya bisa sawyae snonkaku ḇebor sifawi ḇaim sya ḇaido sisrow si ḇaim.” Ḇaido rupa ra, fyor kofrur roi ḇepyum oso ḇe snonkaku ḇesesya ido nari nafrur fa sakfrurna ḇe ḇesesya ḇesya kwar. Na wamarisen barek ro moḇ ḇeradine ke?  Imboḇae, rofyor snonkaku ḇebor sya sifrurpyum kuker sḇuk ḇe ḇesesya ido nari nun fainda nabor syadiwer.

Farfyar oso ḇero Florida, AS, fyasnaiḇair snar roi ine nkaku ndarirya. Rofyor rim ḇeba ifnak moḇ ine, raryur oso ro Saksi-Saksi Yahwe simarisen sḇuk farfnoḇek. Ro swaf siwaf kaker fa roḇebor sḇukifararur rumya ndrama, smam mboi snonkaku ḇebarek ro rum ḇarya ayar ḇyedi nakar, inja sor fa sifrurmnis pyan na. Fyoro ḇa, snonkaku ani fyas syapram ḇe kantor pusat Saksi-Saksi Yahwe bo doḇe, ”Yakofenker kasumasa faro si. Ro snonkaku yasrow syakame, siso snonkaku ḇefrurpyum kaku siri.” Snar syowi ḇyenane nafrur fa fyarem farsarser kumpan faro fararur ḇeba ro Saksi Yahwe sya.

KUKER KOḆUK IMA KOFARARI ALLAH ḆEFRURPYUM

Manḇesasewar fawawi sya sisrow snar ”roi oso isya ḇedif snonkaku sya fa sifnoḇek snonkaku ḇesesya.” Ma sikofen wer snar romawa sya, ”sna rari ḇefandun mankunḇa, syadiwer sifrurna rofyor sifawi sawos ḇaim.” Rosai ḇefnai ya? Refo fyasnai kankarem ḇyena rofyor ikofen snar snonkaku sya sḇeḇefrur raris ”fanir ro Allah”, isoine sna rari-rari ḇepyum raris Allah rari Ḇyena.Kejadian 1:27.

Manḇefrur koḇedi Allah Yahwe I, nya rari ḇepyum nabore, oserya iso sanemura. Ḇyuk kankenem ḇeko kwar ma rosai monda kofandun na insama komarisen. (Farfyar 14:17; 17:26-28) Kuker kofarkor Wos Ḇyena Refoya, na komambir kaku Kma koḇedi ḇero nanki ma marisen Ḇyena faro ko. Refoya fyasnaiḇair kako snar Allah ifrur fasasos kwar faro ko fa kosmai marasrisen ro fafisu iyama. * (1 Yohanes 4:9, 10) Snar Yahwe ima knam ro sanemura ma ifrur ko raris fanir Ḇyedi, inja iso ḇefnai fa bisa kakfarari Allah kuker koḇuk ḇe snonkaku ḇesesya. Kofrur roi ine ido, nari nun payamyum faro ko ma nari Allah imarisen.Ibrani 13:16.

Waswarepen kaker Alexandra ḇeḇeyap ro randak artikel ine ke? Rariso farfyar ḇyeja ro pupes ya? Snonkaku oso ḇese ḇeyakso ro bis ani ikofen ḇe i bo doḇe ima ifnak pipi ḇyena monda. Mboi snon insandi ifnoḇek anya ḇyetelfon bati ḇyeja ro kota moḇ nari bis ani imnai wer roya, ramnai ḇyak ḇeri nyaki ḇyeja ḇe Alexandra i rupiah ri 260.000. Ramnai, snon ine iso Alexandra anun ḇyena ma dakfarkor Refoya. Paik rikyor ḇe ḇarpon ramnai, Alexandra imarisen kaku rofyor isrow kuker i wer ro munara kebaktian Saksi-Saksi Yahwe sifrur kuker wos Mandarin ro sup Peru. Fyasnai kasumasa ḇyena faro rosai Alexandra ifrur kam kwar yoḇ i na, dor Alexandra i ma bati ḇyesya fa sra sanan ro restoran ḇyedi.

Koḇuk ma kofnoḇek snonkaku ḇesesya nari nun raryaḇ ḇeba kaku. Ma iba syadiwer, kuker kofrur roi ine, ima kofnoḇek snonkaku ḇesesya fa smambir kaku Knam ro roi ḇeḇye ma ḇemnis nakam isoine Allah Yahwe I! (Yakobus 1:17) Inja wasmai fainda kwar snar buk faro snonkaku ḇesesya kuker nyan ḇeradine ke?

^ par. 21 Infa wafawi naborwer ido, mam syap Rosai Refo Fyarkor Ḇeko? ḇeḇefrurya iso Saksi-Saksi Yahwe ma nasya kako ro internet ro www.jw.org/bhw. Mam ro ḇaḇ PUBLIKASI > SYAP & BROSUR.