Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 AWAWOS ḆEPON YA | ROFYOR SNONKAKU WASWAR KAKU OSO IMAR

Wasaebur ro Fafardun Bedi

Wasaebur ro Fafardun Bedi

Farkankin nabor naisya kuker roi ine. Ḇape nakam-ḇa nefainda. Imnis raris ono sisya sikofen ḇe au fa wakanes ker awer ḇaido wafasna sneḇaḇir bedi kuker nyan sairiryakam awer. Ono ḇese imbude sedif au fa wafrur roi ḇeḇese ma fasna sneḇaḇir bedi monda. Refo ḇyuk mamam ḇemnis kaku kuker roi ine, ma fawawi dunya ro baboine nesonem na.

Ro kebudayaan ḇeḇeso skara ḇo sobe ipyumḇa fa snon sya skanes. Ḇape kaku ya, fandun fa komai fa kokanes, syadiwer ro ḇarpon kawasa sya ke? Snonkaku ḇena fawawi ro kesehatan mental sikofenḇadir snar kankanes ima roi snonkaku sya na sifrurna rofyor sfafardun. Ma fasna fafardun ro fafisu ya, na nafnoḇek au fa wasambraḇ pdef ro ḇaḇesneso bedi. Imbape, koḇensewar fa kodwarek sneḇefafardun na nun samswen syadi. Refo ikofenḇadirḇa snar sasar ḇaido ipyumḇa fa kokanes rofyor kofafardun. Kwarapan contoh ro Ye sus i. Nya samambraḇ fa ḇyawes kaḇer snonkaku ḇemar sya, ḇape Yesus kyanes ro ḇarpon kawasa sya rofyor bati ḇyedi Lazarus imar!​—Yohanes 11:33-​35.

Na snonkaku sya simsor rofyor sefafardun snar snonkaku siswar kaku imar ro fafisu skara ḇa. Roi nabor naisya ḇefrur fa snonkaku ḇefafardun sya simsor, imnis raris srower wos ḇepyum ḇa ro snonkaku sesyowi sya. Snon Afrika Selatan oso ḇenir ḇe Mike ikofen, ”Yaḇeumur 14 taun rofyor Kamam yedi ryoe. Rofyor imḇe sikram i, pendeta Anglikan ikofen snar Allah fyandun snonkaku ḇepyum ma dun fasaw si. * Wos ine nafrur fa yamsor kaku snar nkofandun kaker Kamam nkoḇedi. Kirine, swaf taun ri 63 ḇyenande kwar mḇoi yaḇesneso kaker.”

Rariso rofyor koḇaḇir koiso ḇefrur sasar ya? Rofyor snonkaku siswar ya imar kanandor si, snonkaku oso na kyara, ’Yafrur roi oso kada roi ine na ndariryaḇa’. Ḇaido swaf ḇepupes ya imbude muwawosyaye mu. Ine na nafrur fa wafafko rawo sne ḇedi ḇyuk sasarya ḇe mankundaw.

Rofyor masasor ma sne ḇefafko nakyarn swaruser ḇena ido, pok fa wakram na awer. Ipyum syadi wawos kuker ḇati oso nari ḇerower ma ḇeḇuk kakakyar ḇe au snar sneḇaḇir ḇeradine snonkaku ḇefafardun sya sḇaḇir na kako. Refo ḇyuk swarapepen ḇeko, ”Bati ḇekaku fyasna saswar ya ro oras nakam, ma ḇyemanḇekanaek koḇedi ro fafisu ḇesamswen.”​—Amsal 17:17.

Bati ḇepyum kaku faro snonkaku ḇefafardun oso iso Manḇeḇedaw koḇedi, Allah Yahwe I. Wakofenḇadir roi ḇero snemun bedi faro I ro nadi snaro ”i ḇefaduru mko.” (1 Petrus 5:7) Ibasyadiwer, ḇyeasas snonkaku ḇefrur rarirya nari swaruser ma sneḇaḇir sena naknon snar ”saswar-ḇaḇye ro Allah, ḇesyadi ro kakara”. (Filipi 4:​6, 7) Kako, iḇye kada Allah ifnoḇek au roro Wos sren ḇyedi ḇeḇuk sneprei, Refo ya. Fas mnuk-mnuk ḇeḇeso ḇeḇuk sneprei. (Mam  kotak ro baḇ ya). Imbude na wamarisen fa wawasen kaḇer na. Wafrur rarirya na nafnoḇek au rofyor wemir ro roḇ ya ma waḇor wenef rari.​—​Yesaya 57:15.

Baboine, snon oso ḇeumur 40 taun oso, ḇenir ḇe Jack, binswa ḇyedi ryobur i snar dafduf kanker. Jack ikofen ro fafisu ya myander kaku swa ḇyedi. Ḇape nadi ya iso ḇesambrarḇser i. Ikofen, ”Rofyor yaḇenadi ḇe Yahwe I, yaḇaḇir yemirḇa. Ro roḇ yakandor bo yakḇok ma yaḇor yenef rari. Ḇape ro-fyor yawasya ma yawasen wos ḇero Refo ya ramnai yaḇenadi yakofen roi ḇero snemun yedi, sne yedi iprei ma iknon kaku, nafrur fa sne ma swaruser ayena naknon inja bisa fa yenef wer.”

Inkbor oso ḇenir ḇe Vanessa snari ryoburi snaro idufe. I kako isma samambraḇ ro nadi ya. Ikofen, ”Ro fafisu ḇesamswen kaku yor monda Allah snonsnon ḇyedi ma yakanes. Yahwe ryower nadi ayena ma ḇyuk samambraḇ yafandun na ḇesya kwar.”

Psikolog sya sḇuk ananun faro snonkaku ḇefafardun sya insama sifnoḇek snonkaku ḇese ḇaido sḇuk oras sena fa sfarmyan faro kawasa kam. Si-frur roi ine na nḇuk marasrisen ḇesi ma na napyos sne ḇefafardun sena. (Farfyar Ro Manwawansya 20:35) Snonkaku Kristen ḇebor ḇefafardun sya sisma sneprei ḇeba kaku snar sifnoḇek snonkaku ḇese sya.​—2 Korintus 1:​3, 4.

^ par. 5 Inema farkarkor ḇeknam ro Refo isyaḇa. Refoya fyasnaḇadir roi ri-kyor ḇefnai marmar ya.​—Pengkhotbah 9:​11; Yohanes 8:​44; Roma 5:​12.