Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Sinan Mkoya, Mkofnoḇek Romawa Mkoḇesya fa Sebaptis Ke?

Sinan Mkoya, Mkofnoḇek Romawa Mkoḇesya fa Sebaptis Ke?

”Rosai beḇirḇar kaker? Wayor au, ma [ḇebaptis].”​—FARFYAR 22:16.

DOYA: 51, 135

1. Rosai fandun fa sinan Kristen skara mnis resarina rofyor romawa sesya sebaptis ḇaim?

IMBESRAR oso ḇenirḇe Blossom Brandt fyawar, ”Ro paik ḇe paik, yakofen ḇe Awin ma Kamam su yamarisen yakḇebaptis. Su kako suyawos ker roi ine kuker aya. Sumarisen insama yafawi snemuk yun ine ḇyefandun kaku. Inja ro tanggal 31 Desember 1934 yakḇebaptis. Ras ani ras ḇeyun raryaḇ ḇeba kaku ḇe aya.” Imnis Blossom sinan ḇyesuya, sinan ḇesesya kako simarisen sifnoḇek romawa sesya fa sun snemuk ḇepyum. Rofyor romawa oso ḇyeḇirḇarḇa fa ḇyebaptis, ḇape alasan ḇekaku nasya fa iwaf ido, bisa kyara mnis resari. Snar ḇaḇeoser ḇyena kuker Yahwe nari nasambraḇ ḇa. (Yakobus 4:17) Ḇape, rofyor romawa ani ḇyebaptis ḇaim, sinan ḇena fawawi sya nari skara mnis resari romawa ani ḇyensewar fa ḇyemanfamyan faro Kristus kwar ke roḇa.

2. (a) Rosai pengawas wilayah ḇeḇeso smam ro romawa babo sya? (b) Rosai na kofarkor ro artikel ine?

 2 Pengawas wilayah ḇeḇeso smam romawa babo ḇeḇeumur fanam ḇe taun ri 20 ḇaido syadi, siba ro napnapes ya mboi sebaptis ḇaime. Ro ras ḇe ras romawa ansine siso fananjur, siḇaryas, ma skara sima se Saksi Yahwe kwar. Ḇape, sḇuk farsamsyom mankun sena ḇe Yahwe ma sebaptis ḇaime. Snaro sinan sesya skara sna fawawi nabor ḇaim fa sebaptis. Inja ro artikel ine, nari kofarkor roi rifiak ḇefnai fa sinansya seḇirḇar fa sanun ḇe romawa sesya insama sebaptis.

UMUR ḆYEDI IMNIS KWAR FA ḆYEBAPTIS KE?

3. Rosai ḇefrur fa Blossom sinan ḇyesuya suḇeḇirḇar?

3 Blossom sinan ḇyesuya ḇeḇeyap ro randak artikel ine, suḇeḇirḇar romawa suḇedine ifawi ḇaim snar ḇaḇebaptis ima roi ḇefandun kaku. Rariso na sinansya sifawi romawa sesya sna fawawi ḇemnis kwar fa sḇuk farsamsyom mankun sena ḇe Yahwe I?

4. Rariso sinansya siso Yesus parenta ḇyena ro Matius 28:19, 20 rofyor sifarkor romawa sesya?

4 Wasya Matius 28:19, 20. Refo dapbairḇa ro umur riḇeḇeso snonkaku oso bisa ḇyebaptis. Ḇape, sinansya fandun fa skara mnis kaku rosai knam ro wos kofnoḇek snonkaku ḇesesya fa sakḇe manfamyan. Ro Matius 28:19, wos Yunani ’kofarkor er sya kam ḇe manfamyan’ ine kyurfasna koḇuk farkarkor ḇesi ma kofnoek si isof sakḇe manfamyan. Manfamyan ima snonkaku ḇefarkor ma ḇemamḇir pyum Yesus farkarkor ḇyena ma imarisen isouserna. Inja rofyor romawa sya sḇeḇeaben, fandun fa sisma farkarkor ḇefnoḇek si fa sḇuk farsamsyom sena faro Yahwe I ma sḇe Kristus manfamyan ḇyesya. Kakuḇae, kapira sya jadifa sebaptis ḇa. Ḇape, Refo kyurfasna romawa sya bisa smambir ma siswar napnapes ḇero Refoya.

5, 6. (a) Rariso kofawi Timotius ḇyebaptis rofyor ḇyabo kaker? (b) Rariso sinansya sifnoḇek romawa sesya kuker fawawi?

5 Manfamyan oso ḇeyun snemuk fa ifarmyan ḇe Yahwe rofyor ḇyaboya, isoine Timotius i. Manwawan Paulus doḇe Timotius ifarkor Allah Wos Ḇyena rofyor ’ibaḇaya’. Kmari isyom Yahwe I ḇa, ḇape snari ma kpuri sufnoḇeki fa iswar Allah Wos Ḇyena. Ḇarpur mura, Timotius kakyar ḇyeja syambraḇ kaku. (2 Timotius 1:5; 3:14, 15) Imbude ḇyesnonkbor kaker ḇaido ḇyeumur taun ri 20 syadi rofyor isma fararur ḇepyum kwar ro sidang.​—Farfyar 16:1-3.

6 Ḇape, kofawi romawa oso imnis kuker ḇesesya ḇa. Ma fawawi sena kako naḇesisyeyae. Ḇesesya smambabir napnapesya kwar rofyor sbabo kaker, inja sifrur snemuk ḇepyum ma simarisen sebaptis. Ḇape, ḇesesya insape sebaptis rofyor sḇesinan kwar. Inja, sinan ḇena fawawi sya sidif awer romawa sesya fa sebaptis. Ḇape, nari sifnoḇek romawa oser-oser fa smamḇir Yahwe I kuker samambraḇ mankun sena. Sinansya simarisen kaku rofyor romawa sesya siso anananun ḇero Amsal 27:11. (Wasya.) Ḇape, fandun fa siswarepen roi sisewar  yaiso sifnoḇek si fa sḇe manfamyan. Inja sinansya fandun fa skarauser, ’Romawa yedine nya fawawi nabor kwar fa ḇyuk farsamsyom mankun ḇyedi faro Allah ma ḇyebaptis ke?’

ROMAWA YEDI ISMA FAWAWI NABOR KWAR KE?

7. Fandun fa snonkaku oso ifawi farkarkor ḇemnis ro Refo nakame insape ḇyebaptis ke? Fasnaḇairpan.

Snaro rofyor ḇyebaptis kwar fandun fa ifarkor pdef Refoya ḇe Kristus manfamyan ḇyedi.

7 Sinansya fandun fa sifarkor romawa sesya insama smambir kaku napnapesya. Rarya ido, romawa sesya nari simarisen fa sḇuk farsamsyom sena faro Allah. Ḇape, ine kyurfasna ḇa romawa oso fandun kaku ifawi farkarkor ḇero Refo nakame insape ḇyebaptis. Snaro rofyor ḇyebaptis kwar, fandun fa ifarkor pdef Refoya ḇe Kristus manfamyan ḇyedi. (Wasya Kolose 1:9, 10.) Inja, snonkaku oso fandun fa nya fawawi nabor insape ḇyebaptis ke?

8, 9. Fawar rosai ḇeḇejadi kuker mananir bui oso ḇero Filipi, ma rosai kofarkor ro farfyar ḇyedine?

8 Fafisu ine, sinansya bisa sifarkor ro farfyar ro kina oso ḇero fafisu iwara. (Farfyar 16:25-33) Ro taun 50 M, Paulus ryaḇe kota Filipi ro marandan utusan injil ḇeḇesuru ḇyeja. Rodiwa snonkaku sya siksof Silas su, sfor su ma susmai ro bui. Ro roḇya rim ḇeba oso myun, ma rofyor ya kako kedwai ḇeḇor nakam nbase. Mananir bui ḇero kota Filipi ani kyara snonkaku ḇesmai ansi sifrar sibur kwar, inja imbe myun mankundi. Ḇape, Paulus idwareki. Ramnai Paulus ma Silas sufarkor mananir bui ani ma kina ḇyesyakam sikyar faro Yesus. Sikyar snar fandun fa sisouser Yesus i. Inja, sikame sebaptis ḇeri. Rosai kofarkor ro farfyar ine?

9 Mananir bui ani imbude sordade Romawi oso ḇefararur werḇa. Ifawi Allah Wos Ḇyena ḇa. Insama ḇyesnonkaku Kristen, fandun fa fyarkor Refoya, myambir rosai Yahwe dor ro manfamyan Ḇyesya, ma imarisen isouser Yesus farkarkor ḇyena. Rosai ifarkor ro swaf ḇekwan ḇa ine nafnoḇeki fa imarisen ḇyebaptis. Kakuḇae, nari ifarkor pdef Refoya rofyor ḇyebaptis kwar. Inja, rosai farkarkorya? Rofyor romawa Bedi ikofen imarisen ḇyebaptis snar iswar Yahwe I ma isouser I, rosai nari wafrurya? Wawan i fa dawos ḇe penatua sya insama sun snemuk bisa ḇyebaptis ke roḇa. * (Mam fasfas kasun ro sop.) Imnis snonkaku ḇese ḇebaptis kwar, romawa ani ifarkor pdef Yahwe marisen Ḇyena ro kankenem ḇyedi ḇesiper ma isof fyoro-fyoro.​—Roma 11:33, 34.

 FARKARKOR ROSAI ḆEPYUM SYADI FARO ROMAWA YEDI?

10, 11. (a) Sinan ḇeḇeso sya, rariso kakara sena? (b) Rosai nari ḇefnoḇek romawa Bedi fa isma kadaun?

10 Sinansya sino skara ipyum syadiya romawa sesya sebaptis rofyor sisma farkarkor ḇekaki ma fararur ḇepyum kwar. Kakara senane nsasar ḇa. Ḇape, fandun fa skara, ’Roi nane na nafnoḇek romawa yedi fa isma samswen ḇa ke? Nane namnis kuker rosai Refo ikofenna ke? Rariso Yahwe imarisen kokenem rai?’​—Wasya Pengkhotbah 12:1.

11 Koswarepen roi ḇero dunya ine kam nambran mnis kuker Yahwe marisen Ḇyena ḇa. (Yakobus 4:7, 8; 1 Yohanes 2:15-17; 5:19) Romawa Bedi fyanam ḇe Yahwe I ido, nari Yahwe kyadaunwareki ro Setan fafrowes ḇyena, dunya ḇyeja ma nyan kakara dunya ine. Ḇape, rofyor sinansya skara farkarkor ḇekaki ma fararur ḇepyum iso ḇefandun syadi ro kankenem ido, nari romawa sya skara roi ḇero dunya ine ḇyefandun syadi ro ḇaḇebati fanam seja kuker Yahwe I. Kakara ḇeradine naḇyeḇa kaku. Faro sinan mkoya, mkomarisen dunya ine fyarkor romawa mkoḇesya rariso sisma aski ro kenem sena ke? Koswarepen, nyan oser fa kosma aski ma marisen yaiso kofakapon Yahwe I ro kankenem koḇena.​—Wasya Mazmur 1:2, 3.

ROFYOR ROMAWA YEDI IFRUR SASAR IDO NA RARISO?

12. Rosai ḇefnai fa sinan ḇeḇeso skara ipyum syadiya romawa sesya siba kwar insape sebaptis?

12 Awin oso fyawar roi ḇefnai imewer inaikir ḇyedi ḇyebaptis. Doḇe, ”Yamai kaku fa yakofen roi ḇefnai ya, ḇape roi yamkak ya iso na sepecat i.” Sinan ḇeḇeso skara ipyum syadiya romawa sesya sebaptis rofyor siba kwar insama sifrur sasar awer, ḇemnis romawa babo  sifrurna. (Kejadian 8:21; Amsal 22:15) Imbude skara, ’Romawa yedi ḇyebaptis ḇaim ido, nari sepecat i ḇa.’ Ḇape, rosai ḇefnai fa sinansya skara awer radirya?​—Yakobus 1:22.

13. Rofyor snonkaku oso ḇyebaptis ḇaim, ine kyurfasna nya fakamamar ḇa ro ḇarpon Yahwe I ke? Fasnaḇairpan.

13 Sinansya na simewer romawa sesya sebaptis rofyor sḇuk farsamsyom sena faro Yahwe I ḇaim. Ḇape skara awer, ’Rofyor romawa yedi ḇyebaptis ḇaim, na nya fakamamar faro Yahwe I ḇa. Romawa oso nya fakamamar ro ḇarpon Allah I kwar rofyor ifawi rosai ḇekaku ma ḇesasar. (Wasya Yakobus 4:17.) Inja, sinan ḇena fawawinanem nari idwarek romawa ḇyedi ḇa fa ḇyebaptis. Rofyor ibaba ya, nari sifarkori fa imarisen faro rosai Yahwe imarisenna ma dayin rosai Allah dayinna. Si kako nari sḇensewar fa sfasnai kankenem ḇepyum faro romawa sesya. (Lukas 6:40) Rofyor romawa Bedi iswar Yahwe ido, nari ifrur sasar ḇeba ḇa. Ḇape, nari imarisen ifrur rosai ḇenapes ro Yahwe mamam Ḇyedi.​—Yesaya 35:8.

ḆESESYA BISA SḆUK FAFNOḆEK

14. Rariso penatua sisaramper sinansya?

14 Penatua sya bisa sisaramper sinansya, imnis raris sifasna kakara ḇeḇye rofyor sawos kuker romawa sya kuker rosai imbe sifrur ro sidang ma fararmyan sena. Imbesrar oso iswarepen fafisu ḇyeumur taun riwonem, Naek Russell dawos kuker i. Imbesrar ine doḇe, ”Dawos menit ri 15 monda ḇe aya kuker rosai yamarisen yafrurna ro fararmyan yedi.” Bonya, imbesrar ani ifarmyan ḇe perintis swaf taun ri 70 syadi! Kakuḇae, wos ḇeyun sneprei bisa nḇuk samambraḇ ḇe snonkaku oso. (Amsal 25:11) Penatua sya kako bisa sḇuk fararur ḇe sinansya ma romawa sesya fa sakfnoḇek fararur ro  Balai Kerajaan. Romawa sya bisa sisma fararur ḇemnis kuker umur ma samambraḇ sena.

15. Rariso naek srar ḇesesya ro sidang sakfnoḇek romawa babo sya?

15 Rariso naek srar ḇesesya bisa sakḇuk fafnoḇek? Sifasnaḇair siswar romawa babo sya. Imnis raris, rosai romawa babo ine ifrurya fa fyasnaḇair fyakapon Allah marisen Ḇyena. Ḇyuk komentar ḇepyum ro fananjur ḇaido dawos bar oso ro fananjur tengah pekan ke? Ḇyaryas ro rumfamkor ḇyedi ke? Pyampum farawrowes fa ifrur sasar ke? Ifrur rarirya ido, mkoḇuk wos ḇeyun samambraḇ faro i. Rofyor fananjur ḇyerak ḇaido posa kwar ido, mkoḇensewar fa mkawos kuker romawa babo sya. Mkofrur radirya ido, nari sḇaḇir sakro ”Allah kawasa ḇeba ḇyedi”.​—Mazmur 35:18.

MKOFNOḆEK ROMAWA MKOḆESYA FA SEBAPTIS

16, 17. (a) Rosai ḇefnai fa romawa sya fandun fa sebaptis? (b) Raryaḇ rosai na sinan Kristen sya sḇaḇirna? (Mam artikel ro randak artikel ine.)

16 Fararur oso ḇepyum kaku sinan sisma yaiso sifarkor romawa sesya fa siswar Yahwe I. (Mazmur 127:3; Efesus 6:4) Fafisu iwara snonkaku Israel sya sḇuk romawa sesya ḇe Yahwe rofyor sḇeaḇen. Ḇape kirine rarirya ḇa. Siswar Yahwe ma napnapes raryano, romawa sesya na seḇaḇir rarirya ḇa. Inja rofyor romawa ani ḇyeaḇen, sinansya fandun fa sfarkini fa dakḇe manfamyan ḇaido ḇyuk farsamsyom ḇyedi faro Allah ma ḇyebaptis. Roi oso ḇaḇeri ḇyefandun syadi ro roine. Rofyor snonkaku oso ḇyuk farsamsyom mankun ḇyedi, ḇyebaptis, ma ifarmayan ḇe Yahwe kuker soasuser, na isma fasaspar ro fafisu ḇaḇekandera ḇebaya.​—Matius 24:13.

Sinansya fandun fa sḇensewar kaku fa sifnoḇek romawa sesya fa sakḇe manfamyan (Mam paragraf 16, 17)

17 Rofyor Blossom Brandt imarisen ḇyebaptis, sinan ḇyesuya sufawi ifrur fasasos kwar. Inja, sumarisen faro snemuk dunna. Fyawar rosai kmari ifrurya ro roḇ fyor ḇyebaptis ḇaim: ”Kamam dor nkofa nkokain ma ḇyenadi. Ikofen faro Yahwe imarisen kaku snar inaikir ḇyedi dun snemuk fa ḇyuk farsamsyom mankun ḇyedi faro Yahwe I.” Ro swaf taun ri 60 syadi, Blossom doḇe, ”Isof fyoro-fyoro na yapok yaḇefnder ḇaḇeri roḇ ani!” Sinan mkoya, iḇye kada mkoryaḇ rofyor romawa mkoḇesya sḇuk farsamsyom sena ma sḇebaptis ḇe Yahwe manfamyan Ḇyesi.

^ par. 9 Sinansya bisa sawawos kuker romawa sesya farkarkor ḇero syap Pertanyaan Kaum Muda—Jawaban yang Praktis, Jilid 2, ram ḇeḇe 304-310. Mam kako ”Kotak Pertanyaan” ro Pelayanan Kerajaan Kita edisi April 2011, halaman 2.