Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Iḇye Kada Kakḇeoser Raris Yahwe Ma Yesus Suḇeoser

Iḇye Kada Kakḇeoser Raris Yahwe Ma Yesus Suḇeoser

”Ma yaḇenadi . . . insa sikam seoser, imnis raris Mami, ḇyeoser kuker aya.”​—YOHANES 17:20, 21.

DOYA: 24, 99

1, 2. (a) Ro roḇ rofyor Yesus imar ḇaime, rosai dor ro nadi ḇyena rofyor ḇyenadiwarek manwawan ḇyansi? (b) Rosai ḇefnai fa Yesus fyarkor si kuker ḇaḇeoser ya?

RO ROḆ rofyor Yesus imar ḇaime, fafisu inan fnoḇek manwawan ḇyansi, imkakwarek nari sḇeoser ḇa. Rofyor ḇyenadiwarek si, dor ro nadi ḇyena insama manfamyan ḇyansya sḇeoser raris mankundi ma Kmari suḇeoser ndraya. (Wasya Yohanes 17:20, 21.) Yesus manfamyan ḇyansya sḇeoser ido, na snonkaku ḇesesya smam Yahwe iso ḇewan Yesus i ḇe supswan. Rofyor siswaryae si, snonkaku sya nari sifawi sima Yesus manfamyan ḇekaku ḇyesirya, ma ine nafnoḇek si fa sḇeoser ḇesya kwar.​—Yohanes 13:34, 35.

2 Iso ḇefnai fa ro roḇ ani, Yesus dawos kawan kaku farkarkor ḇekur ḇe ḇaḇeoser ya. Myam kwar mboi manwawan ḇyesya sḇeoser kuf ḇa. Raris moḇ sifrur ro rasras ḇepon ya, manwawan sya ”sfamfaḇri, mansei ro si ḇeba syadiya”. (Lukas 22:24-27; Markus 9:33, 34) Ro fafisu ḇesena, Yakobus ma Yohanes suyor Yesus i fa ḇyuk nasan ḇefandun kaku na suyakuf ro ris ḇyedi ro Karajan nanki.​—Markus 10:35-40.

3. Roi risai monda ḇefnai fa ḇeyakso Kristus i sya sḇeoser ḇa, ma fakfuken risai nari kawos ro artikel ine?

 3 Roi ḇefnai fa ḇeyakso Kristus i sya sḇeoser ḇa iso marisen fa sna nasan ḇekaki monda ḇa. Snonkaku ḇero Yesus fafisu ḇyedi sḇesisye snaro ayayin ma mamfarfir na. Yesus manfamyan ḇyesi fandun fa sisawen kakara ḇesasar ḇeradirya. Ro artikel ine nari kawos fakfuken nane: Rariso Yesus mamam ḇyedi faro mamfarfir ya? Rariso Yesus ifnoḇek ḇeso i sya fa smam faro oso derer ḇardi ḇa, ḇaido sifrur pyum snonkaku syakam, ma sḇeoser? Ma rariso Yesus kenem ma farkarkor ḇyena nafnoḇek ko fa kofaduru ḇaḇeoser ya rai?

SMAMFARFIR YESUS I MA MANFAMYAN ḆYANSI

4. Fasnaiḇair roi ḇefasnai Yesus i kako smamfarfir i.

4 Yesus i kako sakmamfarfir i. Rofyor Filipus ikofen ḇe Natanael i ḇo doḇe isrow Mesias i kwar, Natanael doḇe, ’Inja roi ḇeḇye oso nari ryama ro Nazaret ke?’ (Yohanes 1:46) Imbude Natanael ifawi Mesias nari ḇyeḇeaḇen ro Betlehem, raris ḇardadi ḇero Mikha 5:2 ya. Kyara mnu Nazaret ima moḇ ḇemnis fa Mesias ḇyeḇeaḇen ro dia ḇa. Oso wer ido, ḇebarara Yehuda sisya smamkyof Yesus i snar ryamaker Galilea. (Yohanes 7:52) Snonkaku Yehuda sibor skara snonkaku Galilea sima sakna roi noḇa. Kawasa Yahudi ḇeḇeso sanonef Yesus i kuker sap i ḇe snon Samaria. (Yohanes 8:48) Snonkaku Samaria srama ro er ḇesisye. Ma agama sena nasnai ḇese ro snonkaku Yahudi sya. Kawasa Yehuda ma Galilea sya sesyowi snonkaku Samaria sya ḇa, ma sḇinkwanbur si.​—Yohanes 4:9.

Yesus manfamyan ḇyesya fandun fa sfadwer nyan kakara sena insama sḇeoser pdef

5. Rariso smamfarfir Yesus manfamyan ḇyesya rai?

5 Manfarkin agama Yahudi sya kako sakḇesyowi Yesus manfamyan ḇyesya ḇa. Snonkaku Farisi sya soḇe ’fafrasya kyur’ manfamyan ḇyansine. (Yohanes 7:47-49) Inja, snonkaku ḇeyakfarkor ro farkarkor agama Yahudi ḇa ma ḇeyakso ro rari sena ḇa, na smam si ḇe snonkaku ḇena royoḇaḇeri. (Farfyar 4:​13.) Smamfarfir Yesus ma manfamyan ḇyesya snar snonkaku ḇero fafisuya sararer agama sena, nasan, ma er srama ro na. Roi nane nawninyan kako manfamyan sya ma nyan smam snonkaku ḇesesya raya. Fandun fa sfadwer nyan kakara sena insama sḇeoser pdef.

6. Fasnaiḇairpan roi ḇefasnai snonkaku ḇero baboine smamfarfir.

6 Baboine, snonkaku ḇebor ḇero supswan ḇesiper ine smamfarfir. Imbude snonkaku sya smamfarfir ko, roḇaido koiso na ḇemamfarfir ḇesesya. Imbesrar oso kirine dakḇe perintis ro Australia, doḇe, ”Ayama yayin kaku snonkaku ḇena kif ḇepyoper sya snar yakara ker frur pyum ḇa sena faro snonkaku Abo rigin ro fafisu iwara isof ro baboine. Yayin syadi si wer snaro sakfrur pyum aya ḇa.” Manbesrar oso ro Kanada ikofenḇair roi dakḇaḇir ro fafisu naiwara, ”Yamam snonkaku ḇeyawos wos Prancis si mande. Snonkaku ḇeyawos wos Inggris sima yakmarisen si ḇaḇeri.”

7. Rariso Yesus mamam ḇyedi faro mamfarfir ya?

7 Raris Yesus fafisu ḇyedi, ro baboine roi nabor nafnai fa snonkaku sya smamfarfir syadi ma samswen fa sfadwer kakara sena. Rariso Yesus mamam ḇyedi faro mamfarfir ya? Randak ya, Yesus mankundi nya kakara ḇesasar ḇa. Ima dakmamfarfir snonkaku sya ḇa ḇesya kwar. Ḇyaryas ḇe snonkaku ḇenana, ḇesaḇarar, Farisi, Samaria, ḇeyor som, ma ḇefrur sasar sya kako. Ḇesuru ya, ro kankenem ḇyedi ma farkarkor ḇyena, Yesus fyasnai ḇe manfamyan ḇyesya fa skara sasar ḇaido smamfarfir awer snonkaku sya.

KOSAWEN MAMFARFIR KUKER SASWAR MA SNE ḆERUN

8. Farkarkor ḇefandun kaku rosai ḇeḇeknam ro ḇaḇeoser koḇena? Fasnaiḇairpan na.

8 Yesus fyasnaiḇair farkarkor ḇefandun kaku ḇeḇeknam ro ḇaḇeoser koḇena. Ikofen ḇe manfamyan ḇyansi ḇo doḇe, ”Mko kam mkoḇe mambekanaek.” (Wasya Matius 23:8, 9.) Ine kyurfasnai kokame koḇe manbekanaek snar koine Adam romawa ḇyesiko. (Farfyar 17:26) Yesus doḇe manfamyan ḇyesya semambekanaek kako snar sikame sikyar kaku Yahwe iso Kma sedi ro nanki. (Matius 12:50) Ma srandum sḇeoser ro Allah kina Ḇyedi snar neknam ro saswar ma kakyar ya. Iso eḇedari ro syapram manwawan sya sfarem ḇe sidang-sidang, sap snonkaku Kristen ḇesesya ḇe naek ma srar.​—Roma 1:13; 1 Petrus 2:17; 1 Yohanes 3:13.

9, 10. (a) Rosai ḇefnai fa snonkaku Yahudi sna nyan oḇa fa sararer er ḇaido keret sedi? (b) Rariso Yesus fyarkor manfamyan ḇyansi fa sfawi smamfarfir snonkaku ḇerama ro er ḇaido keret ḇesisye nama nsasar? (Mam sonin ro randak artikel ine.)

9 Yesus dawos faro manfamyan ḇyansi fa smam min sesya ḇe naek srar sesi raposa, ikofenbos yoḇ si insama fandun fa sfasnai sne ḇerun. (Wasya Matius 23:11, 12.) Raris kofarkor kwar, fafisu ono manwawan sya sḇesisye snar sararer si. Ro Yesus fafisu ḇyedi, snonkaku sya sararer kaku er ḇaido keret sedi. Snonkaku Yahudi ḇebor sya skara sipyum syadi ro ḇesesya snar sikyar sima Abraham romawa ḇyesirya. Ḇape Yohanes Ḇeḇebaptis ikofen faro si, ”Allah ipok kaku fa ifrur karui nane fa neromawa faro Abraham!”​—Lukas 3:8.

10 Yesus ḇyuk farkarkor ḇo doḇe rofyor snonkaku sya sararer er ḇaido keret sedi ido, nama nsasar. Ine nasnai kaku ro fafisu ḇefawinananem Refo Yahudi oso ifuken i, ”Rarirya ido min ayesya siso?” Yesus kyarem fakfuken ḇyani kuker fyar farfyar oso. Manfasyar sya smun snon Yahudi oso ramnai siburi ro sampak andirya. Ramnai, snon Yahudi ḇeḇeso simbranuk ro nyan anna ḇo smam i ḇoi simewer sifnoḇek i. Ḇape, fafisu snon Samaria oso myam snon Yahudi ani, iswar i ma fyaduru i. Ro papupes Yesus farfyar ḇyanane ikofen ḇe ḇefawinananem Refo Yahudi ani insama  fandun fa dakmnis snon Samaria ani. (Lukas 10:25-37) Yesus fyasnaiḇair rosai snon Samaria ani ifrur anna nbuk farkarkor ḇe snonkaku Yahudi sya rosai knam ro siswar min sesi.

11. Rosai ḇefnai fa Yesus manfamyan ḇyansi smamfarfir awer snonkaku sya, ma rariso ifnoḇek si fa sifawi pyum roi nane?

11 Fafisu Yesus dek ḇe nanki ḇaime, iwan manfamyan ḇyansya fa sḇaryas ro ”sup Yudea ḇesiper, Samaria isof supswan pember ya”. (Farfyar 1:8) Inja, Yesus manfamyan ḇyansi fandun fa smamfarfir ma sararer si awer. Yesus dap ker rari ḇepyum ro snonkaku mandaman sya, ma ine nfasos manfamyan ḇyesine fa sḇaryas ḇe snonkaku ḇerama ro er sairirya kam. Imnis raris, isandik mananir sarar oso snar nya kakyar ḇeba. (Matius 8:5-10) Ro Nazaret mnu marin ḇyedi, Yesus ikofen rariso Yahwe ifnoḇek kwar ḇemandaman sya raris kabom oso ḇeramaker Sar­fat ma Naaman snon ḇeduf pado ḇeramaker Siria. (Lukas 4:​25-​27) Yesus ḇyaryas kako ḇe bin Samaria oso ma ḇyarek ro mnu anya ras risuru snar kawasa ḇero diansya simarisen srower ankinem dun anna.​—Yohanes 4:21-24, 40.

SNONKAKU KRISTEN RO AWAR RANDAK SIWARA SISAWEN MAMFARFIR

12, 13. (a) Moḇsa manwawan sya skara rai rofyor smam Yesus fyarkor bin Samaria oso? (Mam sonin ro randak artikel ine.) (b) Rosai ḇefasnai Yakobus ma Yohanes sufawi pyum farkarkor Yesus ḇyuk anna ḇa?

12 Samswen ḇe manwawan sya fa sisawen mamfarfir ya. Skandor fafayaḇa rofyor smam Yesus fyarkor bin Samaria oso. (Yohanes 4:9, 27) Rosai ḇefnai ya? Snar manfarkin agama Yahudi sima rya simewer sawos kuker bin oso ro ḇarpon kawasa sya, iba syadi kuker bin Samaria ḇena snonsnon ḇeḇyeḇa. Manwawan sya sor Yesus i fa danan, mboi Yesus imarisen syadi dawos ḇe bin ani ro roḇean na. Allah iwan i fa ḇyaryas ḇe snonkaku syakam, ma faro bin Samaria ani kako. Ma ifrur rosai Kmari imarisen na, myam roi nane raris roḇean.​—Yohanes 4:31-34.

13 Yakobus ma Yohanes suyakfawi pyum farkarkor ḇefandun kaku ine ḇa. Rofyor Yesus fnoḇek manfamyan ḇyesi sifrur marandan ḇe Samaria, sisewar moḇ ro mnu oso ḇero dia fa simnaisu. Ḇape, kawasa Samaria spampum si. Ine nafnai fa Yakobus ma Yohanes sumsor fafayaḇa, inja sufuken Yesus ḇo suyoḇe imarisen ido sor fa for ya isabu ro nanki mumfes fa myun kawasa ro mnu ansya kam. Fafisuya ḇeri Yesus isonek su. (Lukas 9:51-56) Mboi roi ḇeḇesyana nejadi ro mnu marin suḇedi Galilea ido, na imbude sumsor mankenem ḇa. Sumsor snaro sumamfarfir snonkaku sya. Ḇarpur mura, rofyor Yohanes ḇyaryas wer ro Samaria ma snonkaku ḇebor srower i, imai kaku snar rosai ifrur kwar ro ḇepon ya.​—Farfyar 8:14, 25.

14. Rariso sismai nyan ḇesae faro samswen snar mamfarfir ya?

14 Fyoro ḇa mura rofyor ras Pentakosta taun 33 M, ḇero sidang sino sisya sakmamfarfir. Fafisu naek sya sirwas roḇean faro kabom ḇefandun sya, smam faro kabom ḇeyawos wos Yunani sya ḇa. (Farfyar 6:1) Roi ḇeḇesyana nejadi snar wos sena neḇesisye. Manwawan sya fasaw fa sisewar nyan ḇesae faro samswen  anine. Skinfir naek rifik ḇefawinanem fa sirwas mnis roḇean anna. Naek skinfir kwar ansine sna snonsnon Yunani, inja imbude nane nari nun sneprei faro kabom ḇemsor ansi.

15. Moḇsa Petrus fyarkor fa myamfarfir snonkaku sya ḇa? (Mam sonin ro randak artikel ine.)

15 Ro taun 36 M ya, Yesus manfamyan ḇyansi sḇaryas ḇe snonkaku ḇerama ro er sairirya kam. Randak ya, manwawan Petrus ḇyaryas ḇe snonkaku Yahudi monda. Ramnai, Allah fyasnaibos fa snonkaku Kristen sya smamfarfir awer, ma Petrus ḇyaryas ḇe Kornelius, sordade Romawi oso. (Wasya Farfyar 10:28, 34, 35.) Ro fafisu ḇese, Petrus inan kayam fnoḇek snonkaku Kristen ḇeḇe Yahudi ḇa sya. Ḇape, ḇarpur ya ro Antiokhia, imewer inan kayam kuker si. (Galatia 2:​11-​14) Paulus isonek Petrus i, ma imarisen ryower i. Kofawi na ro? Rofyor fyas syapram ḇyedi faro snonkaku Kristen Yahudi ma Yahudi ḇa ḇero Asia-Kasun sya, ikofenḇair fandun kaku fa siswar naek srar syakam.​1 Petrus 1:1; 2:17.

16. Rariso snonkaku Kristen ḇero awar randak sya sifawi si rai?

16 Manwawan sya sfarkor ro Yesus i rariso siswar ”snonkaku syakam” rai. (Yohanes 12:32; 1 Timotius 4:10) Roi nane nefandun swaf, mboi sfadwer kwar mamam sena faro snonkaku sya. Ḇekaku ya, snonkaku Kristen sifawi si snar saswar sena faro min sesi. Indo kada taun 200 M ya, manfasfas oso ḇenir ḇe Tertullian, dap kaḇer rosai snonkaku ḇesesya sikofen kuker snonkaku Kristen sya, ”Sima siswaryae si”, ma ”Sima simarwarek min sesi kako simkak ḇa.” Snar snonkaku Kristen sfasnai kenem ḇebabo kwar, inja sfarkor fa smamfarfir snonkaku sya ḇa raris moḇ Allah myam si raya.​—Kolose 3:10, 11.

17. Rariso na kosawen mamfarfir ḇero kosnesna rai? Fasnaiḇairpan.

 17 Baboine, kofandun swaf kako fa kosawen mamfarfir ro kosnesna. Imbesrar oso ro sup Prancis doḇe roi ine syamswen kaku ḇe i. Doḇe, ”Yahwe fyarkor aya kwar fa yafasnai saswar, snemura, ma moḇsa yaswar snonkaku syakam rai. Ḇape, yaḇensewar kaker fa yasawen kakara ḇesasar faro snonkaku ḇesesya. Ma inema roi ḇepyan ḇa. Iso ḇefnai fa yor roi nane ro nadi ayena ḇesya kwar.” Imbesrar oso ro Spanyol ikofen ḇo doḇe fafisu ono ḇyesewar kaker fa pyampum kakara ḇesasar faro raryur snonkaku oso. Doḇe, ”Yakara yasawen na kwar. Ḇape, yafawi fandun fa yaḇensewar pdef. Kasumasa ḇe Yahwe I, fafisu ine yaḇeaski snar yaksun ro kina Ḇyedi ḇekenem ro ḇaḇeoser.” Kokame fandun fa komam pyum sneḇaḇir koḇena. Mamfarfir naisya kaker fandun fa kosawen na ke?

SASWAR IPYOSBUR MAMFARFIR YA

18, 19. (a) Rosai ḇefnai fa komarisen faro snonkaku syakam? (b) Moḇsa kofrur na rai?

18 Fandun fa koswarepen mura ḇe fafisu iwara fyor koḇinkwan kaker ro Allah I. (Efesus 2:12) Ḇape, snar Yahwe iswar ko rya dun ko fa kofanam ḇe I. (Hosea 11:4; Yohanes 6:44) Ma Kristus i kako imarisen faro ko. Ifnoḇek ko fa kakrandum ro Allah kina Ḇyedi. (Wasya Roma 15:7.) Koma snonkaku ḇenapes ḇa siko, ḇape Yesus fyasnai ḇaḇenaḇye faro ko kwar, inja kopok kokara fa kopampum snonkaku ḇesesya awer!

Koḇeoser ma koswaryae ko snar kosewar ”fawawinanem ḇerama ro boiyaswa” (Mam paragraf 19)

19 Snar kofanam ḇe papupes dunya ḇeḇarḇor ine, inja na snonkaku sya sḇeoser ḇa, smamfarfir, ma sayayin. (Galatia 5:19-21; 2 Timotius 3:13) Ḇape, snar koinema Yahwe kawasa Ḇyesiko, komarisen kosewar ”fawawinanem ḇerama ro boiyaswa” ḇefnoḇek ko fa komamfarfir ḇa, ma kosewar aski. (Yakobus 3:17, 18) Komarisen kaku koḇebati kuker snonkaku ḇerama ro er sairirya kam, komarisen faro rari ro moḇ srama ro na, ma imbude kakfarkor wos sḇukidawos na. Kofrur rarirya ido, na kosmai aski ”raris war ḇedaf” ma roi ḇenapes kofrur anna imnis ”raris risen ḇero soren na”.​—Yesaya 48:17, 18.

20. Barakas rosai nari kosmai rofyor saswarya fyadwer nyan kakara ma sneḇaḇir koḇena?

20 Rofyor imbesrar ro Australia ani fyarkor Refo kwar, mamfarfir ma ayayin ḇyena kam napromes fawawas. Saswarya fyadwer kakara ma sneḇaḇir ḇyena. Manbesrar ro Kanada ḇeyawos wos Prancis ani doḇe insape ifawi fafisu ono sino sisya sayin ḇesesya snar sifawi pyum si ḇa. Ifawi ”snonkaku sya rari sena ndramuma ro moḇ srama ro na ḇa”. Iba syadi wer, fyarḇuk kuker imbesrar ḇeyawos wos Inggris! Fawar nane nfasnaiḇair saswarya ipyosbur mamfarfir ya. Saswar ifrur fa koḇeoser raris kabrai sfes nako ḇepok fa ḇemuk ḇa.​—Kolose 3:14.