Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Yesus Imarwarek Kaku Aya Ke?

Yesus Imarwarek Kaku Aya Ke?

WOS Ono naisya neḇefas ro Refo nefasnaiḇair sneḇaḇir ro snonkaku ”ḇemnis kuker ko”. (Yak. 5:17) Imnis raris, na kofawi mnis Paulus sneḇaḇir ḇyedi rofyor ikofen wos ḇero Roma 7:21-24, ”Rofyor yamarisen yafrur roi ḇeḇyeido, roi ḇeḇarḇor naiso ḇeyek ro aya na. . . . Aya ine snonkaku ḇeroë!” Fafisu kosewar fa kopampum marasrisen ḇesasar na, Paulus wos ḇyenane nḇuk samaraḇraḇ ḇe ko.

Paulus dakkofen moḇ ḇyaḇir rai ro fasfas ḇesena. Ro Galatia 2:20, ikofenḇair ikyar Yesus ima ’iswar [faro i] kwar ma ḇyuk mankundi ḇefarsarser [maro i]’ ḇardi! Wakḇaḇir rarirya kako ke? Imbude wakḇaḇir rarirya pdef ḇa.

Koḇuk sasar ker ḇe mankunko faro sasar kofrur ro fafisu naiwara ido, na samswen ḇe ko fa kokyar Yahwe iswar ko ma ḇyuk ampun ḇe ko kwar. Ma samswen kako fa komam Yesus farsarser ḇyedi ḇe roi ḇepyum ḇyuk maro mankunko ḇardi. Yesus imarisen fa kona mamam ḇeradine ke? Inja, rosai na ḇefnoḇek ko? Rwama kawos fakfuken risuru.

NYAN YESUS MYAM FARSARSER ḆYEDI

Kaku, Yesus imarisen komam farsarser ḇyedi ḇe roi ḇyuk faro mankunko ḇardi. Rosai ḇefnai fa kokyar roi ine? Wawasenpan sarisa ḇefas ro Lukas 23:39-43. Snon oso ḇyeḇekaf ro ai kandera warpu Yesus i. Snon ani ifrur sasar ḇeba. Snar ifrur roi ḇeḇarḇor kaku naiso nafnai fa ismai samamyai marmar kuker spai i ro adir. Snon ani ḇyeḇirḇar kaku ma dor faro Yesus, ”Waswarepen aya, rofyor wafyafer imnis wairek.”

Rosai Yesus ifrur ya? Wawasen kada, na Yesus iduf kaku fyor pyambar fa myam beri ḇe snon ani. Rarirya mboi, Yesus imbrifaum yoḇ i ma ḇyuk sneprei ḇe i ḇo doḇe, ”Yakofen kaku faro au ras ine, nari ausya kuker aya ro Firdaus [NW].” Kaku ya, Yesus imarisen ido na ikofen monda ḇe i ”Rumkun Snonkaku ryama . . .  insa ḇyuk kankenem ḇyedi fa ḇyukḇak namuk kawasa ḇeḇor”. (Mat. 20:28) Oroḇa mboi Yesus dawos myaren asuser ḇe snon ani na ismai fainda faro mankundi ro Yesus farsarser ḇyedi. Fyasnai ḇaḇenaḇye kuker dap ”au” ma ”aya”. Ma Yesus ikofen ḇe snon ani nari ikenem ro firdaus ro supswan.

Yesus imarisen snon ani daksmai fainda faro mankundi ro Yesus farsarser ḇyedi. Snon ḇeḇarḇor anya dakfarmyan ḇe Allah ḇaim, mboi Yesus iswar kaku i. Kaku ḇae, na iswar kaku snonkaku Kristen ḇebaptis kwar ḇefarmyan ḇe Allah I kwar. Inja, kofrur sasar ro fafisu iwara ke, rosai na ḇefnoḇek ko fa kokyar Yesus farsarser ḇyedi ḇyuk fainda ḇe mankunko ḇardi?

ROI ḆEFRUR PAULUS FA IKYAR

Snar Yesus ḇyuk fararur ḇaḇeḇaryas ḇe Paulus, inja ikyar kaku Yesus imarwarek i  kwar. Moḇsa ryariri? Ikofen ḇo doḇe, ”Yakofen kasumasa faro Yesus Kristus, Manseren koḇani, ḇeḇuk sambraḇ ḇeaya ma snar kyara aya ḇeḇeuser ma ikyar afuffarmyan ine maḇeaya. Ḇeponya yonef ma yaḇewayam kuker yakoryae ma yamsor Yesus Kristus.” (1 Tim. 1:12-14) Paulus afuffarmyan ḇyena nḇuk kakakyar ḇe i Yesus iswar ma ikyar faro i. Rarirya kako, Yesus ikyar fararmyan ya ḇe ko oser-oser. (Mat. 28:19, 20) Inja, fararmyan koḇena na nafnoḇek ko fa kokyar Yesus imarwarek ko kako ke?

Albert, sisae i ro sidang swaf taun ri 34 mura kyaḇer wer ḇe Yahwe, ikofen, ”Samswen kaku fa yaḇefnder sasar yafrur ro ḇepon iwara na. Ḇape fafisu yara yabaryas, yakḇaḇir raris Paulus ḇyaḇir rai, Yesus ḇyuk fararmyan ine ḇe mankundaya. Ine nafrur fa yaḇeaski syadi wer ma yamam mankundaya, kankenem yedi, ma ras barpon iyama kuker nyan ḇepyum.”​—Mz. 51:3.

Fyor ḇuk farkarkor kakaku ya ḇe snonkaku sairirya monda, ḇuk kakakyar ḇe si Yesus ima iswar si

Allan, fafisu fyarkor kakaku ya ḇaim ima snon mamun ma iḇarbor kaku, ikofen, ”Yakara ker roi ḇeḇyeba yafrur yoḇ snonkaku sya. Fyorno ido, yaḇekandera kaku. Ḇape, yakofen kasumasa faro Yahwe I snaro ḇye snonkaku ḇesasar raris ayaine fa yaḇaryas ankankinem ḇebye faro snonkaku ḇese sya. Fafisu yamam snonkaku sya simarisen srower, yaswarepen Yahwe ima isawarwar ma ibye kaku. Yakara Yahwe ikyar aya fa yafnoḇek snonkaku ḇese ḇekenem imnis aya ro randak ya.”

Rofyor kora koḇaryas koisya kofrur ma kokara monda roi ḇepyum na. Ine nbuk kakakyar ḇeko snar Yesus ima ḇyenabye, iswar ma ikyar ko.

ALLAH YAHWE IBA SYADI RO KOSNESNA

Snar kokenem kaker ro Setan dunya ine, na koḇuk sasar ḇe mankunko ker faro sasar kofrur kwar ro ḇepon iwara na. Rosai ḇefnoḇek ko fa kosawen ḇaḇaḇir ḇeradirya?

Jean, fyor byabo kaker nya kenem ḇeankarkar, ine ifrur fa fyorno ido ḇyesneso. Ikofen, ”Yamarisen yafawi ’Allah ibasyadi ro kosnesna’.” (1 Yoh. 3:19, 20) Kosnesna na naprei fyor kofawi Yahwe ma Yesus sufawi pyum koma snonkaku ḇesasar siko. Koswarepen, sufasna saswar kuker sufasos farsarser fasaspar faro snonkaku ḇesasar ḇembror ro sasar sena, mboi faro snonkaku ḇemnis kaku sya ḇa.​—1 Tim. 1:15.

Inja, fafisu kokarauser moḇsa Yesus ifrur pyum snonkaku ḇesasar sya rai ma kosewar fa kofrur roi ḇepyum ro fararmyan Yesus ḇyuk ḇe ko na ido, na kokyar kaku Yesus imarwarek mankunko ḇardi. Rarirya ido, raris Paulus i na kakkofen, ”Yesus iswar aya ma ḇyuk mankundi ḇe farsarser maro aya.”