Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 30

Nyan Kofnoḇek Snonkaku Ḇekyar Allah Ḇa Sya

Nyan Kofnoḇek Snonkaku Ḇekyar Allah Ḇa Sya

”Yamnis roi ḇeḇor faro snonkakusya kam insa kuker nyan rosairya kaker yun ono fasisma aski.”​—1 KOR. 9:22.

DOYA 82 ’Rarirya Isnai Bedi Isak’

ROI NA KOFARKOR *

1. Ro swaf taun-taun ḇarpur ine, fararwe ḇeba rosai komam ro sup ḇeḇeso?

RO FAFISU naiwara, snonkaku ḇebor ro supswan ḇesiper sakna agama. Ḇape swaf taun-taun ḇarpur ine, fararwe ḇeba isya. Kirinema snonkaku ḇebor syadi smam mankunsi sna agama oḇa. Kaku ya, ro sup ḇeḇeso kawasa sesi sikofenbos sima sna agama ḇa. *Mat. 24:12.

2. Rosai ḇeḇedar fa snonkaku ḇebor syadi sap si sna agama ḇa?

2 Rosai ḇefnai fa snonkaku ḇeyap si sna agama oḇa sya barbor seja dek syadi wer? * Imbude ono sisya kankenem sena neknam ro marasrisen, ḇaido ḇaḇeḇirḇar. (Luk. 8:14) Ono wer randak ya sna agama mboi mura ido sikyar faro Allah I wer ḇa. Ḇesesya sikyar faro Allah, ḇape skara agama ima roi ḇekwar diri, dun fainda oḇa, ma imnis kuker sains ma nyan kakara snonkaku sya ḇa. Imbude sikyar faro bati, guru sya, ḇaido roi sikofen ro media snonkaku sya ḇekofen kankenem ima ryamuma ro evolusi. Ḇape, sirower ḇa sikofenḇair roi ḇeḇefnai kaku fa sikyar ḇe Allah. Sia wer sayin kaku manfarkin agama sya snar sisewar pipi ma samsyom. Ro sup ḇeḇeso, pamarenta ḇero diansya sidwarek kawasa sya fa seari.

3. Rosai farkarkor ine fyasnai ḇe ko?

3 Yesus iwan ko fa kora ’kofarkor er sya kam ḇe manfamyan ḇyesi’. (Mat. 28:19) Moḇsa kofnoḇek snonkaku ḇekyar Allah ḇa sya fa siswar Allah ma sakḇe Yesus manfamyan  ḇyesi rai? Fandun fa kofawi ro moḇ risai snonkaku oso iba ro ya, ḇefnai fa imarisen ryower ke roḇa faro anun koḇaryas ya. Imnis raris, snonkaku ḇeraker Eropa sya sna mamam ḇeḇese kuker snonkaku ḇeraker Asia sya. Rosai ḇefnai ya? Ro Eropa, kawasa sibor sya sifawi Refo ma sakrower kako Allah iso ḇefrur roi ḇebor kam. Ḇape ro Asia, kawasa sibor sya sifawi kermkun ḇaido sifawi ḇaḇeri Refo ya. Ma sup ḇeḇeso ḇero Asia kawasa sesi sikyar ḇa Allah iso ḇefrur roi nakam. Farkarkor ine fyasnai ḇe ko nyan kofnoḇek snonkaku syakam kosrow ro ḇaḇeḇaryas ya fa smamḇir Yahwe I, komam si ro moḇ srama ya ḇaido rosai sikyar ḇa na.

KONA KAKARA ḆEPYUM

4. Moḇsa kona mamam ḇepyum faro snonkaku sya rai?

4 Kona Mamam Ḇepyum. Ro taun oser, snonkaku ḇekyar Allah ḇa sya ono sisya sakḇe Saksi Yahwe kako. Ḇebor ro si randak ya sna kenem ḇepyum kwar ma sayin kaku ankarkar ḇero agama na. Ḇape, ḇesesya sikenem mnis ḇa ma sna rari ḇeḇyeḇa fandun fa sisawen na. Inja, kuker Yahwe fafnoḇek Ḇyedi kokyar na kosrow snonkaku ḇenaḇye fa ”ḇesma kankenem ḇemnaiḇa sya”.​—Farfyar 13:48; 1 Tim. 2:3, 4.

Fafisu waḇaryas ḇe snonkaku ḇekyar faro Refo ḇa sya fadwer nyan wawos yoḇ si (Mam syos ḇe 5-6) *

5. Rosai ḇefrur snonkaku sya fa srower pyum anun koḇaryas ya?

5 Kofrur Pyum ma Kofasnai Syowi. Fyorno ido, snonkaku sya srower pyum anun koḇaryas ya snar rosai kawos na ḇa, mboi nyan kawos na rai. Simarisen kaku fyor kofrur pyum si, kofasnai syowi, ma kofandun kaku si. Komewer kodif si fa srower rosai kokofen na. Ḇape, kosewar fa kofawi rosai kakara sena ḇekur agama. Imnis ra, ono sisya simewer sawos agama kuker snonkaku sisrow babo sya. Ḇesesya skara kopok kofuken awer snonkaku oso kakara ḇyedi ḇekur Allah I. Sia wer simai fyor ḇesesya smam si siwasya Refo, ḇesyadi kuker Saksi Yahwe sya. Rosai monda roi ḇeḇefnai ya, kosewar fa kofawi moḇ sḇaḇir rai.​—2 Tim. 2:24.

6. Rariso Manwawan Paulus fyadwer nyan dawos yoḇ snonkaku sya rai, ma moḇsa kakso nyan ḇyena rai?

6 Rosai na kofrur ya fafisu snonkaku oso rya imarisen ḇa fyor kap ”Refo”, ”Allah”, ḇaido ”agama”? Na kakso Manwawan Paulus i kuker kofadwer nyan kawos yoḇ si raya. Rofyor dawos kuker snonkaku Yahudi, Paulus ḇyuk wos ḇero Refo. Ḇape, fyor dawos kuker manḇefawinanem Yunani ro Areopagus sya, ikofenḇair beri mnuk ro Refo ya ḇa. (Farfyar 17:2, 3, 22-31) Moḇsa kakso Paulus nyan ḇyena rai? Fafisu wasrow ma wawos kuker snonkaku ḇekyar faro Refo ya ḇa, ipyum ya wapḇair mnuk ro Refo na awer. Wafawi mboi oso imai fyor ono smam iwasya Refo warpu Au ido, swewar fa fasnai mnuk ro Refo kuker nyan ḇese, raris fasnai na ro HP Bedi.

7. Rosai na kofrur ya insama kakso Paulus nyan ḇyena neḇefas ro 1 Korintus 9:20-23 ya?

7 Kofasnai Fawawi ma Korower Pyum Si. Fandun fa kofawi roi ḇeḇefnai snonkaku sya sna kakara oso. (Ams. 20:5) Kwarapan kaḇer Paulus fawar ḇyena. Iba rofandu kawasa Yahudi si. Ḇape, fandun fa fyadwer nyan ḇyaryas ḇe snonkaku ḇeḇe Yahudi ḇa sya. Snar sima sifawi kermkun ḇaido sna fawawi ḇaḇeri ḇekur Yahwe ma Refo ya. Insama kofawi mnis nyan kakara snonkaku ḇero moḇ koḇaryas ya, na kosewar kaku fa kofawi si resari ḇaido kofuken ḇe naek srar ḇefarmyan fyoro kwar sya.​—Wasya 1 Korintus 9:20-23.

8. Rosai nyan fa korandak awawos ḇekur Refo ya?

 8 Fandun koḇena iso kosewar snonkaku ḇemarisen ḇerower sya. (Mat. 10:11) Insama kofrur roi ani, fandun fa kor snonkaku sya fa sikofenḇair kakara sena ma korower pyum si. Manbesrar oso ro Inggris ifuken ḇe snonkaku sya rosai kakara sena ḇekur nyan sismai aski ro farḇakḇuk ya, moḇsa sifaduru romawa sesi raya, ḇaido rariso simkuepen fafisu sekandera. Ryower raposa ikofen ḇe si, ”Kwara rariso, wos anun ine ḇefas ro taun ri 2.000 naiwara mboi nḇefainda kaker ke?” Inja, dapḇair ”Refo” ḇa, mboi fyasnai ḇe si mnuk kyinfir ro HP ḇyedi.

KOFNOḆEK SNONKAKU SYA FA SMAMḆIR YAHWE

9. Rariso na kofnoḇek snonkaku ḇemewer ḇeyawos ḇekur Allah I rai?

9 Rofyor kosrow snonkaku ḇemewer ḇeyawos ḇekur Allah I, na kofnoḇek si fa smamḇir Allah kuker kawos roi smam ro rasras na. Imnis raris, snonkaku ḇebor sya simanen kaku roi ḇero farsyos ma supswan. Inja, na kawos radine, ”Na wafawi manfawawinanem sya sifrur roi ḇebabo snar sifarari roi smam ro supswan ine. Imnis ra, sifrur mikrofon ma kamera snar sfarari knaram ma mkamor ro aiwan sya. Rosai na kwara ya fafisu mam roi ḇero farsyos ma supswan ine? Nayafakame ndarirya ro mankundi ke, oso ḇefrur na ke, ḇaido rariso?” Korower pyum si raposa kokofen wer, ”Fafisu manfawawinanem sya sfarkor knaram ma mkamor aiwan sya, kaku ya sfarkor ro mansei? Yamarisen kaku manḇeyuser ḇepon iwara roi ikofen na: ’I ḇefrur knaram, na ipok ryower ḇa ke? I ḇefrur mkaya, na ipok myam ḇa ke? . . . Iso Allah ḇebuk fawawi faro snonkaku sya!’ Manfawawinanem ḇebor sya sna wos oser ma sikyar Allah iso ḇefrur roi ḇeborkam.” (Mz. 94:9, 10) Ramnai kofasnai vidio oso ro jw.org® ”Wawancara dan Pengalaman” ro ḇar ”Pendapat tentang Asal Mula Kehidupan.” (Swewar ro ḇar PUBLIKASI > VIDEO.) Oroḇaido koḇuk ḇe si syap Benarkah Kehidupan Diciptakan? ḇaido syap Asal Mula Kehidupan—Lima Pertanyaan yang Patut Direnungkan.

10. Moḇsa korandak awawos kuker snonkaku ḇemewer ḇeyawos ḇekur Allah I rai?

10 Snonkaku ḇebor simarisen fa sismai roi ḇepyum ro ras naiwama. Ḇape, ono sisya simkak nari supswan ine ḇyeḇemkok ḇaido snonkaku sya kam na simar. Pengawas  wilayah ro Norwegia doḇe snonkaku ḇemewer ḇeyawos ḇekur Allah na simarisen sawawos roi ḇekur dunya inena. Ikofen aroo ḇe snonkaku oso raposa, pengawas wilayah ine na ikofen, ”Kwara ido, ro ras naiwama snonkaku na sismai roi ḇepyum syadi ke? Mansei na ḇebuk roi ḇepyum ani? Ḇefararur ro polotik sya ke, manḇefawinanem sya ke, ḇaido mansei?” Ryower pyum ramnai, iwasya ḇaido dapḇair mnuk oso ḇekofenḇair roi ḇepyum ro fafisu naiwama. Ono sisya simarisen snar siwasya ro Refo supswan ine nari kyain fyoro ma snonkaku ḇefrur pyum sya na sikenem fyoro ro diwa.​—Mz. 37:29; Pkh. 1:4.

11. Rosai ḇefnai fandun fa koḇuk nyan oser ḇa fa korandak awawos kuker snonkaku sya, ma moḇsa kakso Paulus nyan ḇyena ḇefas ro Roma 1:14-16 ya rai?

11 Fandun fa koḇuk nyan oser ḇa fa korandak awawos kuker snonkaku sya. Rosai ḇefnai ya? Snaro snonkaku sya simnis kam ḇa. Imbude roi ḇeyun marisen faro snonkaku oso na ndarirya ḇa faro snonkaku ḇesesya. Sia simarisen sawos ḇekur Allah ma Refo, mboi ḇesesya simarisen syadi sawos roi ḇeḇese. Rarirya mboi, fandun fa koḇuk swaf fa kawos yoḇ snonkaku sairirya kam. (Wasya Roma 1:14-16.) Kaku ḇae, koswarepen kaku Yahwe iso na ḇefrur napnapes fa nasur ro snonkaku ḇeswar roi ḇenapes sya sisnesna.​—1 Kor. 3:6, 7.

KOḆARYAS ḆE SNONKAKU ḆEKYAR ḆA ALLAH IMA ISYA

Manḇaryas Karajan ḇebor sya sfasnai saswar faro snonkaku ḇeraker sup-sup kawasa ḇero diansya sakḇe Kristen ḇa. Manḇaryas ansine sikofenḇair anun ḇepyum ḇebuk fainda ḇefas ro Refo na (Mam syos ḇe 12-13)

12. Rosai mamam snonkaku ḇeraker sup Asia ḇekur Manḇedaw ya, ma moḇsa kofnoḇek si rai?

12 Ro supswan ḇesiper, manḇaryas ḇebor sya sisrow snonkaku ḇekyar ḇa faro Allah ḇekaku ya. Ine kako sup-sup pamarenta ḇero diansya sidwarek snonkaku fa seari. Ro sup riḇeso ḇero Asia, kawasa ḇebor simewer skarauser Manḇedaw ya isya kaku ke roḇa. Fyor sor si fa sfarkor Refo, ono sisya simarisen snar siḇe sifawi. Ḇape, ḇesesya randak ya simarisen ḇa kero, snar roi sfarkor ro Refo insape srower na. Rosai kofrur fa kofnoḇek si? Manḇaryas ḇeḇeso sismai bon ḇepyum ro ḇaḇeḇaryas. Nyan ya sirandak awawos kuker sifarfyare, ma sfasnai syowi. Ma swaf ya isrow kwar ido, sikofenḇair moḇsa wos farkin ḇero Refo nafnoḇek si kwar fa sikenem pyum syadi wer.

13. Rosai na ḇefrur snonkaku sya fa simarisen faro farkarkor ro Refo? (Mam sonin ḇero ḇarpon.)

13 Snonkaku ḇebor simarisen syadi faro wos ḇero Refo ḇebuk fainda faro kankenem ro rasras na. (Pkh. 7:12) Imbesrar oso ro New York ḇyaryas ḇe snonkaku ḇeyawos wos Mandarin. Doḇe, ”Yasewar fa yafasnai syowi ma yarower pyum si. Yafawi srama babo ido, na yafuken, ’Wamarisen ḇarek ro dine ke? Wasmai fararur kwar ke? Snonkaku ḇero dinesya sifrur pyum au ke?’” Kuker nyan ine, jadi fa fyasnaiḇair farkarkor ro Refo. Nasrow ido, imbesrar ine na ifuken wer, ”Rosai kwara ya, sai na ḇefnoḇek snonkaku sya fa sikain pyum kuker ḇesesya? Yamarisen yafasnai anun ḇero Refo, bisa ke? Ryok radine, ’Swewar rakkrakrok ima imnis bas roi ḇedwarek war, wabur beri rofyor rakrok ndrama ḇaim.’ Au ido, anun ine na ifnoḇek ko fa kokain pyum kuker ḇesesya ke?” (Ams. 17:14) Awawos ḇeradine nafnoḇek ko fa kofawi siḇe sifawi nabor syadi wer ke roḇa.

14. Rariso manbesrar ḇero Timur Jauh ifnoḇek snonkaku ḇekarem sikyar faro Allah I ḇa?

14 Rosai na kawos yoḇ snonkaku ḇekarem sikyar faro Allah I ḇa? Manbesrar oso ḇero Timur Jauh ḇefarmyan fyoro kwar fa ḇyaryas ḇe snonkaku ḇena agama  ḇa sya ikofen, ”Fyor oso doḇe, ’Ayama yakyar Allah I ḇa’, kyurfasnai ima ikyar faro allah-allah sisyom ro moḇ anya ḇa. Inja, na yakofen yana wos oser kuker i snar allah sedi snonkaku siso ḇefrur si ma sisnaibos ḇa. Na yawasya Yeremia 16:20, ’Na snonkaku sya sipok sifrur allah-allah ke? Rosai sifrur kam allah sisyaḇa kaku.’ Mura yafuken: ’Moḇsa na kofawi minsai allah ḇekaku ya ma allah-allah snonkaku sifrur ya?’ Yarower pyum i ramnai yawasya Yesaya 41:23, ’Mkokofenḇair ḇe inko rosai nari ḇekur ro ras ḇarpon iyama, insama na nkofawi mkoma allah si mko.’ Mura yafasnai ḇardadi oso ḇefasnaiḇair rosai Yahwe ikofen ḇekur fafisu iyama na ndarirya ḇesya kwar.”

15. Farkarkor rosai kun ro manbesrar ḇero Asia Timur fawawar ḇyeja?

15 Manbesrar oso ro Asia Timur ikofenḇair nyan oser ine fyor ifrur rarama kaḇer. Doḇe, ”Yafasnai ḇe si anun ḇepyum ḇero Refo na, ḇardadi ḇero Refo ḇeḇe ndarirya kwar, ma yawos ḇekur roi ḇero farsyos ma supswan. Mura yafasnai moḇsa roi nanekam nefasnaiḇair Allah ḇekenem ma ḇefawinanem isya kaku. Fyor sakkyar Allah ima isya, insape yafasnai ḇe si rosai Refo ikofen ḇekur ḇe Yahwe I.”

16. Raris ḇefas ro Ibrani 11:6, rosai ḇefnai ḇefarkor Refo fandun fa sna kakyar faro Allah ma Refo ya, ma moḇsa kofnoḇek si rai?

16 Rofyor kofarkor Refo kuker snonkaku ḇekyar Allah ḇa sya, fandun fa kofnoḇek si insama sikyar Allah ima isya. (Wasya Ibrani 11:6.) Ma fandun fa kofnoḇek si fa sikyar faro Refo. Imbude kofarkor si roi oso ro Refo ro rarwan oser monda ḇa. Fyor kofarkor kuker si, fandun fa kawos roi ḇefasnai bos Refo ima Allah Wos Ḇyenairi. Imnis ra kawos ḇardadi ro Refo ḇeḇe ndarirya kwar, rariso roi sfas ro Refo imnis kuker sains ma sejarah, ḇaido anun ḇero Refo nḇuk fainda faro kankenem ro rasras na.

17. Kofasnai saswar faro snonkaku sya ido, rosai fainda ya?

17 Fandun fa kofnoḇek snonkaku sairirya kam, ḇekyar ḇaido ḇekyar Allah ḇa sya, fa sakḇe Yesus manfamyan ḇyesi. (1 Kor. 13:1) Fafisu kofarkor si, kofasnai ḇe si Allah ima iswar ko ma imarisen insama kakswar I kako. Ro taun nakam, snonkaku risyaran randak ya sikyar faro Allah I ḇa, sakḇebaptis snaro siswar faro Allah Yahwe I. Inja, iḇye kada kona mamam ḇepyum, ma kofasnai saswar faro snonkaku sya kam. Korower pyum si. Kosewar fa kofawi mnis kakara sena. Kuker wafasnai nyan ḇepyum, farkor si fa sakḇe Yesus manfamyan ḇyesi.

DOYA 76 Moḇsa Ḇaḇir Rai?

^ par. 5 Ro baboine, na kosrow snonkaku ḇekyar Allah ḇa sya sisya sibor syadi ro ḇepon iwara. Ro farkarkor ine na kawos moḇsa koḇaryas ankinem ro Refo yoḇ si rai. Ma kawos kako rariso kofnoḇek si fa sikyar faro Refo ma Allah Yahwe.

^ par. 1 Sifrur survei ma sifawi sup ḇeḇeso anna naiso: Albania, Australia, Austria, Azerbaijan, Belanda, Cina, Denmark, Hong Kong, Inggris Raya, Irlandia, Israel, Jepang, Jerman, Kanada, Korea Selatan, Norwegia, Prancis, Republic Ceko, Spanyol, Swedia, Swiss, ma Vietnam.

^ par. 2 KNAM RO WOS ḆEḆESO: Ro farkarkor ine, snonkaku ḇena agama oḇa sya kyurfasnai ḇe snonkaku ḇeyaksun ro organisasi agama ḇa ḇaido sikyar faro Allah I ḇa.

^ par. 54 SONIN: Manbesrar oso ḇyaryas ḇe min ḇyedi ḇefararur ro rumḇeduf. Ḇarpur ya, myam ro mankundi situs web jw.org.