Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 29

’Mkora Mura, Mkofarkor Si’

’Mkora Mura, Mkofarkor Si’

”Mkora mura, mkofarkor er sya kam ḇe manfamyan Ayesi.”​MAT. 28:19.

DOYA 60 Kankenem Fyoro Ḇyuk faro Si

ROI NA KOFARKOR *

1-2. (a) Imnis wos ḇero Matius 28:18-20, fararur ḇefandun kaku rosai Yesus ḇyuk faro sidang Kristen? (b) Fakfuken rosai na kawos ro farkarkor ine?

FAFISU Yesus ḇyawes kaḇer ramnai, dor manfamyan ḇyesi fa sisrow i ro urek bon ḇero Galilea. Rofyor sifanjur ro diwa, manwawan sya na sifuken ker ro swaruser sena rosai nari Yesus ifrur ya. (Mat. 28:16) Ineiso sarisa fafisu Yesus ”fyasnai mankundi wer faro manfamyan ḇyesi isyadi ro utin ririm”. (1 Kor. 15:6) Rosai ḇefnai fa Yesus dor si fa sisrow i? Imbe ḇyuk ḇe si fararur ḇefandun kaku ine, ”Inja mkora mura, mkofarkor er sya kam ḇe manfamyan Ayesi.”​—Wasya Matius 28:18-20.

2 Manfamyan ḇerower Yesus wos ḇyenane ḇarpur muma sḇe sidang Kristen ro abad randak. Sidang ani ismai fararur ḇefandun kaku isoine sifrur manfamyan sibor syadi faro Yesus. * Baboine, ro supswan ḇesiper sidang Kristen risyaran naisya, ma sakna fararur ḇemnis kako. Ro farkarkor ine na kawos fakfuken rifyak: Rosai ḇefnai fa koḇuk farkarkor ima fyandun kaku? Rosai monda na kofrur ro koḇuk farkarkor? Na snonkaku Kristen syakam sakso ro fararur ine ke? Rosai ḇefnai fa kofandun kaḇaḇaḇ?

 ROSAI ḆEFNAI FA KOḆUK FARKARKOR IMA FYANDUN KAKU?

3. Ro Yohanes 14:6 ma 17:3, rosai ḇefnai fa koḇuk farkarkor ima fyandun kaku?

3 Rosai ḇefnai fa koḇuk farkarkor ima fyandun kaku? Snaro snonkaku ḇefarkor Refo fa sḇe manfamyan Yesus ḇyesi, si monda na sakḇe bati faro Allah I. Oso wer ido, snonkaku ḇeso Kristus na sikenem pyum syadi ma sismai saneraro fa sikenem fyoro ro ras naiwama. (Wasya Yohanes 14:6; 17:3.) Kaku, Yesus ikyar ko fa kofrur fararur ḇefandun kaku ine, ḇape kemir ḇeyuf fararur ine ḇa. Manwawan Paulus fyas ḇekur i ma min ḇyesi ḇo doḇe, ”Nkoine min ḇefararur kayam fnoḇek Allah.” (1 Kor. 3:9, Terjemahan Dunia Baru [NW]) Inja, snonkaku ḇenapes ḇa koine na kofararur kayam kuker Yahwe ma Yesus su. Inema fakamaman ḇeba kaku!

4. Rosai kofarkor ro Ivan ma Matilde fawawar suḇena?

4 Koḇuk farkor ḇe snonkaku sya na nun marisen ḇeba kaku. Kokarapan fawawar ro Ivan ma swari, Matilde, ro Kolombia. Suḇaryas ḇe snonkbor oso snori Davier. Davier ikofen ḇe su, ”Yaḇe yafadwer kenem yedi mboi jadi ḇa.” Ima manḇefnak tinju ḇeyan sasar narkoba ker, fyarandinem, ma ḇyarekus bin ḇyedi snori Erika. Ivan doḇe, ”Nuḇuk farkarkor Refo ḇe i. Ḇyarek ro mnu ḇebinkwan kaku ma nyan ḇyena nemarser. Inja, nuyek sepeda ḇe diwa ro swaf kawan kaku. Fyor Erika myam mboi Davier ifrur fararwe ro kenem ḇyeja kwar, dakfarkor Refo kako.” Fafisu ya, Davier dan sasar narkoḇa, fyarandinem, ma ifnak tinju werḇa. Mura, Davier ma Erika sufasepen farḇakḇuk suḇedi. Matilde ikofen, ”Yaswarepen Davier ikofen ker, ’Yaḇe yafadwer kenem yedi mboi jadi ḇa.’ Inja, fyor suḇebaptis ro taun 2016, nuswar su rawo nukanes.” Kaku ḇae, na kakḇaḇir raryaḇ ḇeradirya fafisu kofnoḇek snonkaku sya fa sakḇe Kristus manfamyan ḇyedi.

ROSAI MONDA NA KOFRUR RO KOḆUK FARKARKOR?

5. Rosai fandun fa kofrur ḇepon kaku ro koḇuk farkarkor?

5 Roi fandun fa kofrur ḇepon kaku ro koḇuk farkarkor ya iso ’kosewar’ snonkaku ḇemarisen ḇemamḇir Yahwe. (Mat. 10:11) Kosewar fa koḇaryas ḇe snonkaku manseirya monda ḇero moḇ koḇedi ma kosouser Yesus parenta ḇyedi fa koḇaryas ido, kofasnaiḇair koma Saksi-Saksi Yahwe ma snonkaku Kristen ḇekaku siko.

6. Rosai na kofrur insama snonkaku sya simarisen srower ḇararyas koḇena?

6 Ono sisya simarisen kaku fa sfarkor kakaku ro Refo. Ḇape, ḇesesya wer fyor kosrow randak si rya simarisen mankun ḇa. Imbude fandun fa kofnoḇek si insama simarisen. Infa kosmai bon ḇepyum ro ḇararyas ya, fandun fa kofasos pyum ko. Kokara resari roi risai snonkaku na kosrow sya simarisen fa sawawos ya. Ramnai, kokara moḇsa na korandak awawos ya rai.

7. Rariso nyan ya fa korandak awawos kuker snonkaku oso, ma rosai ḇefnai fandun fa korower pyum ma kofasnai syowi?

7 Imnis raris, wafuken ḇe ḇena rum ya, ”Yaḇe yafawi moḇsa kwara rai? Ro supswan ḇesiper snonkaku sibor sismai samswen nabore. Kwara rariso, na pamarenta ro snonkaku sya sipok fa—sipyosbur samswen anna ke?”  Mura wawasya Daniel 2:44 ma wawos na. Ḇaido wafuken ḇe snonkaku oso, ”Rariso nyan ya fa kofarkor romawa koḇesya insama sna kenem ḇepyum rai? Yamarisen yarower kakara Bena.” Ramnai, wawos Ulangan 6:6, 7. Roi risai monda imbe wawos ya, kwarapan snonkaku nari ḇerower Au sya. Wawasenpan moḇsa nari sismai fainda fyor sifarkor Refo. Fafisu wawos yoḇ si, rwower pyum kaku si ma ḇesyowi roi sikofen na. Rarirya, nari wafawi pyum si, ma simarisen syadi fa srower aundi.

8. Rosai ḇefnai fa kosewar kaku fa korama kaḇer?

8 Na kofandun oras ma sasewar fa korama kaḇer isof ro snonkaku oso imarisen fa fyarkor Refo. Rosai ḇefnai ya? Imbude fyor korama kaḇer, snonkaku ani ryo rum ḇa ḇaido nya swaf fa dawos kuker ko ḇa. Oso wer ido, fandun fa korama yoḇ i rarwan riḇeso insama myamḇir ko resari insape dakmarisen fyarkor Refo. Ine imnis ra rokaker oso. Fafisu koruḇ ker i ido na isur pyum. Rarirya kako, fafisu kawos ker Allah Wos Ḇyena kuker snonkaku ḇemarisen ḇefarkor ido, saswar ḇyena faro Yahwe ma Yesus na nasure.

NA SNONKAKU KRISTEN SYAKAM SAKSO RO FARARUR INE KE?

Saksi sya sḇaryas ro supswan ḇesiper fa sisewar snonkaku ḇena sne ḇenapes sya (Mam syos ḇe 9-10) *

9-10. Rosai ḇefnai fa na kokofen manfamyan Kristen syakam sakso ro sasewar snonkaku ḇena sne ḇenapes ya?

9 Manfamyan Kristen koine kam na kakso warpu fa kosewar snonkaku ḇena sne ḇenapes sya. Ine imnis ra kosewar romamkun ḇeḇor oso. Moḇsa ndrariri? Kwarapan fawar oso. Romamkun ḇyeumur taun rikyor iḇore. Snonkaku ri 500 sifnoḇek fa sisewar i. Swaf oras ri 20 mura ido, snonkaku oso isrow romamkun  ani ro yaf katera. Snonkaku ani imewer ḇesesya sisandik i snar iso ḇesrow randak romamkun anya kwar. Doḇe, ”Bisa yasrow romamkun ani snar fafnoḇek ro snonkaku riutin ansi.”

10 Snonkaku ḇebor sya siḇor famfnom simnis ra romamkun ani. Sismai saneraro oḇa, inja sifandun fafnoḇek. (Ef. 2:12) Manḇaryas Karajan ri yuta riwar syadi sisya sisewar snonkaku ḇeradine sya. Fafisu waḇaryas ro moḇ oso, imbude na wasrow snonkaku ḇemarisen ḇefarkor Refo kuker Au ḇa. Ḇape, manḇaryas oso ḇese ḇeḇaryas ro moḇ anya kako iso ḇesrow snonkaku ḇemarisen ḇefarkor kakaku ro Refo ya. Rofyor naek ḇaido srar oso isrow snonkaku nari ḇarpurya dakḇe Yesus manfamyan ḇyedi ido, kokame kakmarisen fnoḇek i snar kakso ro sasewar snonkaku ḇena sne ḇenapes ya.

11. Wafarkin farkarkor Refo kuker snonkaku oso ḇa yo, wasaramper fa buk farkarkor kuker nyan ḇese rosai monda?

11 Kirine wafarkin farkarkor Refo kuker snonkaku oso ḇa yo, na wasaramper fa buk farkarkor kuker nyan ḇese. Imnis raris, fyor ḇefarkor babo sya srama ro Balai Karajan ido bisa waser si ma ḇebati kuker si. Wafasnai saswar kuker nyan ine ido, nari smam koinema snonkaku Kristen ḇekaku siko. (Yoh. 13:34, 35) Ono wer, buk kankarem ro fananjur naknampu monda mboi nafnoḇek si fa sifawi nyan sikofenḇair kakyar sena kuker sne ḇesiper ma syowi. Oso wer ido, wafararur kayam kuker manḇaryas ḇebabo ro ḇaḇeḇaryas ma wafnoḇek i fa buk Refo fa ḇyukifarkor snonkaku sya. Rarirya ido, wafarkor i fa iso Yesus nyan ḇyena.​—Luk. 10:25-28.

12. Fandun fa kokir syadi insape kofarkor snonkaku ḇese ke? Fasnaiḇair pan.

12 Kopok kokara awer fandun fa kokir syadi insape kofarkor snonkaku ḇese fa sakḇe manfamyan faro Yesus. Rosai ḇefnai ya? Kwarapan fawawar ro Faustina, ḇeḇarek ro Bolivia. Fafisu isrow randak Saksi Yahwe sya, ifawi iwasya ḇa. Mura, fyarkor rawo ifawi iwasya kermkun. Kirine, ḇyebaptis kwar ma imarisen dakbuk farkor snonkaku ḇesesya. Fafisu ono, ḇyuk farkarkor Refo faro snonkaku ririm ro swaf minggu oser. Faustina ifawi iwasya mnis ḇaim raris snonkaku ḇefarkor Refo kuker i sya, mboi ifnoḇek snonkaku rifik kwar isof ro sebaptis.​—Luk. 10:21.

13. Kuf fararur nabor ḇape koḇuk oras koḇena fa kakḇuk farkarkor Refo ido rosai barakas na kosmai ya?

13 Snonkaku Kristen ḇebor sya suf fararur nabor. Ḇape, sḇuk oras sena kako fa  sakḇuk farkarkor Refo, ma sismai raryaḇ. Kwarapan Melanie ḇero Alaska fawar ḇyeja. Nya inai ḇyeumur taun riwar, ma demir ḇefarus i. Melanie dakfararur ras ririm ro swaf minggu oser ma myamfaduru kmari ḇeduf kanker. Melanie ḇyarek ro kota ḇebinkwane ma demir ḇe Saksi ro dia. Ḇyenadi pdef fa ismai samambraḇ fa ḇyaryas ro fafisu ḇepnunek kaku, snar imarisen kaku fa isrow ma ifnoḇek snonkaku oso fa fyarkor Refo. Mura ido, isrow kuker Sara. Imarisen kaku fyor ifawi Allah nya snonsnon. Inja, Sara imarisen fyarkor Refo. Melanie doḇe, ”Ro ras Jumat mandira ya, na yamor kaku, mboi aya ma inai yedi nura fa nuḇuk farkarkor. Ine nun fainda kaku ḇe nu. Numarisen fyor nusewar kankarem faro Sara fakfuken ḇyena, ma numarisen syadi fa dakḇebati kuker Yahwe I.” Sara bati ḇyesi ro gereja ma karyer ḇyesi sidwarek i insama fyarkor Refo wer ḇa, ḇape isusu ḇa. Isae ro gereja ma dakḇe baptis.

KOFANDUN KAḆAḆAḆ FAFISU KOḆUK FARKARKOR

14. (a) Rosai ḇefrur fa koḇuk farkarkor ima imnis ra koraswan? (b) Wawasya Paulus wos ḇyena ḇero 2 Timotius 4:1, 2 ya raposa, rosai na wafrur ya?

14 Fafisu mam mboi wasrow snonkaku oso ḇa ḇemarisen ḇefarkor Refo ido, swewar pdef. Waswarepen Yesus doḇe koḇuk farkarkor ima imnis ra koraswan. Manraswan oso na fyandun swaf kawan insape ismai in sya. Fyorno ido ryaswan isof ro romfaḇru ḇaido arwo babo, ma ro moḇ ḇebinkwan kaku. (Luk. 5:5) Rarirya  kako, manḇaryas riḇeso kuker kaḇaḇaḇ sḇuk oras nabor fa sḇaryas ro fafisu nakam ma ro moḇ oser ḇa. Rosai ḇefnai ya? Snaro sifrur rarirya ido na sisrow snonkaku sibor syadi. Manḇaryas ḇefararur marḇak ḇeradine sya nari sisrow snonkaku ḇemarisen ḇerower sya. Bisa wafrur pan ke, ro ras oser waḇaryas ro fafisu ḇaido ro moḇ oso kwara na wasrow kuker snonkaku ḇebor syadi?​—Wasya 2 Timotius 4:1, 2.

Ḇekaḇaḇaḇ fa wafnoḇek ḇefarkor Refo ya fa myamḇir, iswar, ma isouser Yahwe I (Mam syos ḇe 15-16) *

15. Rosai ḇefnai fa kofandun kaḇaḇaḇ fafisu koḇuk farkarkor ya?

15 Rosai ḇefnai fa kofandun kaḇaḇaḇ fafisu koḇuk farkarkor Refo ya? Snar komewer kofnoḇek ḇefarkor sya fa sifawi ma simarsein faro rosai fyarkor ro Refo na monda ḇa. Fandun fa kofnoḇek si fa smamḇir ma siswar Yahwe, Iso Ḇena kakara ḇero Refo. Oso wer, kofarkor si rosai Yesus dor ro manfamyan ḇyesi, ma kako fandun fa kofnoḇek si fa sifawi moḇsa simbran mnis Yesus parenta ḇyena rai. Kofnoḇek kuker kaḇaḇaḇ fafisu sisewar fa sisouser farkankin ro Refo. Ḇefarkor Refo ono sisya jadi fa sifadwer swaruser ma kenem sena ro swaf paik riḇeso monda. Mboi ḇesesya wer sifandun swaf kawan syadi.

16. Farkarkor rosai kun ro Raúl fawawar ḇyeja?

16 Misionaris oso ro Peru ismai bon ḇepyum snar ḇyekaḇaḇaḇ. Doḇe, ”Yaḇuk farkarkor ḇe Raúl. Nufarkor syap risuru isof nabro kwar. Ḇape, samswen ḇe i fa isouser rosai fyarkor kwar ro Refo na. Ismai samswen ro farḇakḇuk ḇyedi, dawos roi ḇeḇyeḇa, ma iso ḇefnai fa romawa ḇyesi sesyowi i ḇa. Mboi dakso ro fananjur ya pdef, inja yarama ḇe i fa yafnoḇek i ma kina ḇyesi pdef. Swaf taun rikyor fyor yasrow randak i raposa, insape isyus fa ḇyebaptis.”

17. Rosai na kawos ro farkarkor ḇerama ya?

17 Yesus iwan ko fa ’kora mura, kofarkor er sya kam ḇe manfamyan ḇyesi’. Inja fyorno ido na kosrow ma kawos yoḇ snonkaku ḇena kakakyar ḇeḇesebur ro ko. Ono sisya sakso ro gereja oso ḇa ḇaido ḇekyar faro Allah I ḇa. Farkarkor ḇerama ya na dawosḇair moḇsa koḇaryas ankankinem ḇeḇye faro si rai.

DOYA 68 Kokef Mor Karajan

^ par. 5 Snonkaku Kristen ḇekaku ro supswan ḇesiper sna fararur ḇefandun kaku isoine sifnoḇek snonkaku sya fa sakḇe Kristus manfamyan ḇyesi. Farkarkor ine na fyasnaiḇair nyan moḇsa kofrur fararur koḇedine rai.

^ par. 2 KNAM RO WOS ḆEḆESO: Yesus manfamyan ḇyesi sifarkor rosai Yesus fyarkor na monda ḇa. Sisouser faro roi sfarkor na. Sisewar kaku fa siso mnis Yesus wewur ḇyena, ḇaido nyan fyasnai na.​—1 Ptr. 2:21.

^ par. 52 SONIN: Snon oso imbe ifrur marandan, dun syapram oso ro Saksi ḇero bandara. Mura, fafisu imbran farma, myam Saksi risuru suḇaryas kuker rak beroda. Fafisu kyaḇer ḇe rum, manḇaryas risuru surama suḇaryas faro i ro kedwai ya ḇarpondi.

^ par. 54 SONIN: Snon anya dakfarkor Refo. Ḇarpur mura ḇyebaptis.