Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 2

Kosandik Yahwe ro Fananjur Koḇedi

Kosandik Yahwe ro Fananjur Koḇedi

”Nari yasandik Au ro fandu jemaat sya.”​—MZ. 22:22.

DOYA 59 Warpu Aya Kosandik Yahwe I

ROI NA KOFARKOR *

1. Rariso Daud sneḇaḇir ḇyedi faro Yahwe I, ma nane nadif i fa ifrur rosairirya?

RAJA DAUD fyas, ”Yahwe ima iba kaku ma isyus kaku fa ismai sanandik.” (Mz. 145:3) Daud iswar Yahwe I, ma saswar ḇyena nadif i fa isandik Allah ”ro fandu jemaat sya”. (Mz. 22:22; 40:5) Kakuḇae, na wakswar Yahwe I ma nwa kakara oser kuker Daud wos ḇyenane, ”Rirya kada sye Yahwe, Allah ro sinan ḇepon nkobansi, sisandik Au isof fyoro.”​—1 Taw. 29:10-13.

2. (a) Rosai nyan oser kosandik Yahwe I? (b) Rosai ḇedwarek naek srar ono fa sḇuk kankarem, ma rosai na komam ḇepon na?

2 Ro baboine, nyan oser kosandik Yahwe iso koḇuk kankarem ro fananjur koḇena. Imbape, faro naek srar ono roi nane napyan ḇa kaku. Simarisen sḇuk kankarem ro fananjur na, ḇape simkake. Rariso insama makak ya idwarek awer si rai? Rosai nyan ḇepyandam na ḇefnoḇek kokame fa koḇuk kankarem ḇesambraḇseryae ko? Kokarem fakfuken suine ḇaim, mkorama komam ḇepon roi rifyak ḇewar fa koḇuk kankarem ro fananjur.

ROI ḆEWAR FA KOḆUK KANKAREM RO FANANJUR

3-5. (a) Raris neḇekofen ro Ibrani 13:15, rosai ḇewar fa koḇuk kankarem ro fananjur ya? (b) Fandun fa kokame koḇuk kankarem ḇemnis kam ke? Fasnaḇair pan.

3 Yahwe ḇyuk kwar fakamaman ḇe kokame fa kosandik I. (Mz. 119:108) Kankarem koḇuk ro fananjur na naiso ḇar ro ”farsarser sanandik”, ma snonkaku oso na ḇyuk  farsarser anna fyadwer ko ḇa. (Wasya Ibrani 13:15, NW) Yahwe dor ko oser-oser fa koḇuk farsarser, ḇaido kankarem ḇemnis kam ke? Oroḇa, rarirya ḇa!

4 Yahwe ifawi samambraḇ ma roi ḇekur ko namnis kam ḇa, ma ḇyesyowi kaku farsarser kosambraḇ fa koḇuk faro I na. Kokarapan farsarser ḇemnis rariso snonkaku Israel sḇuk ḇe I. Sia sisambraḇ fa sḇuk domba ḇaido kambing. Ḇape, snonkaku Israel ḇesaḇarar sya na sḇuk ”man tekukur risuru ḇaido manjawa ḇebabo risuru”. Ma rofyor oso syambraḇ ḇa fa ḇyuk man risuru ido, Yahwe imarisen ḇyuk ḇe I ’ḇar ḇeḇesamfur ro tepung ḇepyum ro efa oser’. (Im. 5:7, 11) Tepung nama roi skoḇes kuker ḇaḇyak ḇekaki ḇa. Mboi ’tepung ḇepyum’ sḇuk na ḇe farsarser ido, Yahwe ḇyesyowi na pdef.

5 Allah koḇedi myam rarirya kako faro kankarem koḇuk na. Rofyor koḇuk kankarem, dor ko ḇa fa kawos kir raris Apolos i ḇaido kofawi kun snonkaku sya sisnesna raris Paulus i. (Kis. 18:24; 26:28) Roi Yahwe imarisen ya iso koḇuk kankarem ḇepyum imnis samambraḇ koḇena. Koswarepen kabom ḇeḇuk remis risuru ani. Yahwe ḇyesyowi kaku i snar ḇyuk kuker sne ḇesiper.​—Luk. 21:1-4.

Koḇuk kankarem ido, na nun fainda ḇe ko ma ḇerower sya (Mam paragraf 6-7) *

6. (a) Ro Ibrani 10:24, 25, rariso kosma fainda ro kankarem korower ro fananjur ya? (b) Moḇsa kofasna syowi faro kankarem ḇesambraḇser ko rai?

6 Kanunyae ko kuker kankarem koḇena. (Wasya Ibrani 10:24, 25.) Kokame komarisen korower kankarem sḇuk na ro fananjur koḇena. Komarisen komnaf romawa oso ḇyuk kankarem ḇeknampu ndramuma ro sneri. Rofyor oso iryaḇ kaku fa ḇyuk kankarem ḇekur kakaku insape ifawi na, nane nadif kosnesna. Iḇye syadi, fyor sia simai ḇaido sfarkor babo wos koḇani mboi ’simkak ḇa’ fa sḇuk kankarem ido, na koḇesyowi si kaku. (1 Tes. 2:2.) Moḇsa kofasnai syowi faro sasewar senane rai? Kokofen kasumasa ḇe si snar sḇuk kankarem ḇesambraḇser ko ro fananjur ya. Osower ya iso koḇuk kankarem mankun koḇena. Rarirya ido, na kosmai samaraḇraḇ ro fananjur ya monda ḇa mboi kosambraḇser ḇesesya kako.​—Rm. 1:11, 12.

7. Rariso kosma fainda ro mankunko rofyor koḇuk kankarem?

 7 Kosma fainda ro mankunko rofyor koḇuk kankarem. (Yes. 48:17) Snaro? Oserya, fyor kokara imbe koḇuk kankarem ido, ine idif kaku ko fa kofrur fasasos ḇepyum faro fananjur ya. Fafisu kofrur na ido, na kosmai fawawi nabor syadi ro Allah Wos Ḇyena. Snar kofawi nabor syadi, na komarisen kosouser pyum roi kofarkor kwar na. Ḇesuruya, na koryaḇ syadi ro fananjur snar kakso warpu ro awawos na. Ḇekyorya, snar kosewar kaku fa koḇuk kankarem, na koswarepan fyoro roi kokarem na.

8-9. (a) Raris neḇefasnai ro Maleakhi 3:16, moḇsa Yahwe myam kankarem koḇena rai? (b) Rosai wer ḇefrur sino sisya simkak kaker?

8 Kofrur Yahwe imarisen rofyor kawosḇair kakyar koḇena. Kokyar kaku Yahwe na ryower ma ḇyesyowi kaku sasewar koḇena fa koḇuk kankarem ro fananjur ya. (Wasya Maleakhi 3:16.) Fyasnai na kuker ḇyebarakas ko snar kosewar fa kofrur imarisen.​—Mal. 3:10.

9 Nasnai kaku, kona roi ḇepyum ḇewar fa koḇuk kankarem ro fananjur ya. Ḇape, sino sisya simkak kaker fa sikanow ḇramin sena. Wakḇaḇir rarirya ido, wasusu awer. Mkorama komam wos farkin ro Refo, fawar ḇeḇeso, ma nyan ḇepyandam na ḇefnoḇek kokame fa koḇuk kankarem nabor syadi ro fananjur.

MAKAKAK YA IDWAREK AWER AU

10. (a) Makakak rosai sino sisya sismai ya? (b) Wamkak buk kankarem ido, nḇeḇair rari ḇepyum rosai nwa ya?

10 Rofyor wakanow ḇramin bedi fa buk kankarem ido snembri isyasen ke? Rarirya ido werer monda ḇa. Kakuya, ḇebor ro ko komkake fyor koḇe koḇuk kankarem. Insama makak ya idwarek awer Au fa buk kankarem, fandun fa wafawi roi ḇefrur fa wamkake. Wamkak nari waḇefnder rosai imbe wakofen na ḇaido nari wakarem  sasar ke? Ḇeḇirḇar nari wakarem pyum raris ḇesesya ḇa ke? Kakuya, ḇaḇaḇir ḇeradine nḇeḇair ḇe roi ḇepyum. Nane nefasna nwa sneḇerun ma mam snonkaku ḇese sipyum syadi ro Au. Yahwe imarisen rari sneḇerun. (Mz. 138:6; Flp. 2:3) Ḇape, Yahwe imarisen kako insama wasandik I ma swambraḇser naek srar ḇero fananjur sya. (1 Tes. 5:11) Yahwe iswar Au ma nari ḇyuk ḇaḇebri wafandun na.

11. Mnuk risai ḇero Refo ḇeḇuk swarapepen ḇe ko?

11 Mnuk ḇeḇeso ro Refo nḇuk swarapepen ḇe ko. Refo ikofen kokame kofrur sasar ro wos koḇena ma moḇsariso kawos raya. (Yak. 3:2) Yahwe ma naek srar koḇesi kako, sor ko ḇa fa koḇe snonkaku ḇenapes kaku. (Mz. 103:12-14) Naek srar koḇansi sima kina koḇesirya, ma siswar ko. (Mrk. 10:29, 30; Yoh. 13:35) Sifawi kaku fyorno ido kankarem koḇuk na namnis kuker roi kokara imbe kawos na ḇa.

12-13. Farkarkor rosai kun ro Nehemia ma Yunus fawar suḇena?

12 Kwarapan fawar ro Refo ḇekur Allah manfamyan ḇyesi risuru. Fawar suḇena na nafnoḇek Au fa wasusu ḇa ro makakak bena. Oserya iso Nehemia i. Fyarmyan ro istana faro raja ḇepoik kaku. Ras oso Nehemia ḇyesaneso snar sikofenḇair ḇe i ayar karui ma kerwa ḇeba ro mnu Yerusalem neḇekarbaken kaker. (Neh. 1:1-4) Raja ifuken i rosai ḇefrur fa iryaḇ ḇa. Wawasen kada na Nehemia isyasen kaku! Nehemia ḇyenadi beri ma kyarem ḇe Raja. Bon ya, Raja ifrur roi nabor fa ifnoḇek Allah kawasa ḇyesi. (Neh. 2:1-8) Farkarkor kun ro Nehemia iso fandun fa koḇenadi fyor kokarem ḇaim. Ḇesuruya, fawar ro Yunus i. Fafisu Yahwe dor i fa dawos yoḇ snonkaku Niniwe sya, Yunus imkak kaku inja ifrar ibur ḇe moḇ ḇese. (Yun. 1:1-3) Ḇape mura, kuker fafnoḇek ro Yahwe I, Yunus ifrur fararur ḇyedi. Ma wos ikofen ḇe snonkaku Niniwe anna nun fainda ḇe si. (Yun. 3:5-10) Farkarkor kun ro Yunus iso Yahwe na ifnoḇek ko fa kofarmyan ḇe I fafisu komkak kaku. Kwara rariso, ḇesamswen syadi ya iso koḇuk kankarem ro sidang ke koḇaryas anun samamyai ḇe snonkaku Niniwe sya?

13 Rosai nyan ḇepyandam na ḇefnoḇek au fa buk kankarem ro fananjur ya? Mkorama kawos nyan ḇeḇeso.

14. Rosai ḇefnai fandun fa kofrur fasasos ḇepyum faro fananjur koḇena, ma fafisu risai kofrur ya?

14 Wafrur fasasos faro fananjur nakam. Buk swaf ḇepon ma wafasos pyum ido, nari napyan syadi ḇe au fa buk kankarem. (Ef. 5:16) Kakuḇae, oras koḇuk na fa kofrur fasasos faro fananjur ya namnis kam ḇa. Eloise, kabom oso ḇyeumur taun ri 80 kwar, fyasos Farkarkor Baryas  ro randak minggu na. Doḇe, ”Snar yafasos ḇepon yaso pyum fananjur ya.” Joy, ḇefararur ro ras nakam, ḇyuk ras Sabtu fa fyasos farkarkor Baryas. Doḇe, ”Napyan ḇe aya fa yaswarepen farkarkor na fyor yafrur fasasos ro swaf fanam ḇe ras fananjur ya.” Ike, penatua ḇye perintis kako ikofen, ”Ayama ipyum ḇe aya fa yafasos kermkun-kermkun ro oras kawan ḇa roro swaf minggu ḇesiper ḇardibur yabuk oras nabore.”

15. Moḇsa wafasos pyum fananjur ya rai?

15 Moḇsa wafasos pyum fananjur ya rai? Ḇerandak na kuker ḇenadi wor Yahwe rur ḇesren ḇyedi. (Luk. 11:13; 1 Yoh. 5:14) Ramnai, buk menit riḇeso fa mam mnis judul ḇyeja, judul kasun na, sonin, ma farkarkor ḇero kotak na. Fafisu wafarkor paragraf na oser-oser, ipyum ya wawasya mnuk-mnuk ḇero donakam. Wawasenkara na, isyadi faro roi wamarisen wakarem na. Wafasos pyum ido, nari nwa fainda nabor syadi ma napyan syadi ḇe au fa buk kankarem.​—2 Kor. 9:6.

16. Roi risai monda ḇefasos kwar fa ḇefnoḇek au, ma moḇsa wasma fainda ro na rai?

16 Naisya kwar ro wos bedi ido ḇyuk roi ḇeḇefasos ro internet na. Yahwe fyasos kwar ro organisasi Ḇyedi roi ḇebor ḇero internet ḇefnoḇek ko fa kofrur fasasos faro fananjur ya. Bisa kun publikasi koḇukifarkor ḇero aplikasi JW Library® ma koser na ro HP ḇaido tablet koḇedi. Ramnai, kofarkor na oroḇaido kowasya ḇaido korower na ro swaf ma moḇ sairirya kam. Sia sḇuk JW Library fa sfarkor fafisu simnaisu ro fararur sena, ro rumfakor, ḇaido fyor sifrur marandan. Watchtower Library ma PERPUSTAKAAN ONLINE Menara Pengawal nafnoḇek au fa wafrur riset faro roi wamarisen fa wafawi nabor syadi wer.

Fafisu risai buk na fa wafrur fasasos faro fananjur ya? (Mam paragraf 14-16) *

17. (a) Rosai ḇefnai ipyum syadi fa wafasos kankarem ḇeḇeso? (b) Farkarkor rosai wun ro vidio Menjadi Sahabat Yehuwa—Persiapkan Komentarmu?

17 Swewar fa fasos kankarem ḇeḇeso. Snaro? Imbude skur ḇeri Au ḇa rofyor wakanow ḇramin bedi. Ro fafisu ḇemnis ya, ḇesesya sikanow ḇramin sena kako, ma naek ḇefarkin ya na kyinfir oso ro si. Insama fananjur ya imnai ro oras ḇyena, naek ḇefarkin ani na kyur ḇekanow ḇramin syakam ḇa fa skarem bar ono. Inja kyur Au ḇaim ido, wamsor ḇaido wafafayaf awer. Wafasos kankarem ḇeḇeso ido, nari nwa swaf ḇebor fa buk kankarem. Oserya iso wawasya mnuk ro Refo. Ḇape, ipyum kaku wafasos fa buk kankarem kuker wos mankun bena. *

18. Rosai ḇefnai fa buk kankarem ḇeknampu ya?

 18 Buk kankarem ḇeknampu. Nono ido, kankarem ḇeḇuk samaraḇraḇ iso kankarem ḇeknampu ma ḇesnai bos. Inja swewar fa buk kankarem ḇeknampu na monda. Wafrurpan na ro swaf detik ri 30. (Ams. 10:19; 15:23) Auma buk kankarem ro fananjur ro taun ḇe taun kwar ido, fandun fa fasna nyan ḇepyum kuker buk kankarem ḇeknampu na. Buk kankarem ḇekwan ro swaf menit riḇeḇeso ido, na ḇesesya simewer skarem, snar sḇaḇir sima sipok fa sifrur rarirya ḇa. Ḇape, buk kankarem ḇeknampu ido, na ḇesesya sna swaf kako fa skarem ro fananjur ya. Iba syadi rofyor skur ḇepon au ido, kwarem beri fakfuken ani. Wawosḇair awer roi nakam ḇero paragraf ya. Knam kaku ro paragraf ani nasnai kwar ido, na buk kankarem faro roi ḇese wer.​—Mam kotak ”Rosai Monda na Yaḇuk ḇe Kankarem?”

19. Rariso naek ḇefarkin ya na ifnoḇek au, ḇape rosai fandun fa wafrur ya?

19 Wakofenḇair ḇe naek ḇefarkin ya wamarisen fa kwarem paragraf oso. Waḇe wafrur roi ine ido, fandun fa wakofenḇair ḇe naek ḇefarkin ani rofyor fananjur ya imbran ḇaim. Oras ya imnis kwar fa buk kankarem faro paragraf ani ido, kwanow ḇramin fasaw ma ikaki insama naek ḇefarkin ani myam au.

20. Rariso fananjur koḇedi imnis kuker konan kayam kuker bati koḇesya?

20 Mam fananjur ya raris wanan kayam kuker bati ḇesya. Wawasenpan naek srar ḇero sidang sor au fa mkonan kayame ḇo sor kako fa wun roḇean kermkun. Moḇsa na kwara rai? Na kwara marḇak kero, ḇape na swewar fa wun roḇean ono simarisen san na. Yahwe iso ḇeyor ko fa korama ḇe fananjur ya, ma fyasos roi ḇepyum nabor ro fananjur ya ḇe ko. (Mz. 23:5; Mat. 24:45) Na imarisen rofyor kun roi ḇepyum oso ma koḇuk na kuker sne ḇesiper. Inja, kofasos pyum ma kosewar fa koḇuk kankarem ḇebor syadi wer. Rarirya, nari kan roḇean Yahwe fyasos kwar na monda ḇa, mboi kun ma korwas roi ḇepyum ro fananjur kako.

DOYA 2 Yahwe Iso Snombri

^ par. 5 Raris manḇefas Mazmur, Daud i, kokame koswar Yahwe ma komarisen kosandik I. Kona swaf ḇepyum kaku fa kofasnaiḇair saswar koḇena faro Allah kuker koḇuk kankarem ro fananjur koḇena. Ḇape, sino sisya sḇaḇir samswen fa sḇuk kankarem ro fananjur na. Wasmai samswen ḇeradirya ido, farkarkor ine na ifnoḇek Au fa wafawi roi ḇefrur fa wamkak buk kankarem. Nafnoḇek Au kako fa swewar insama makak bena nadwarek awer au.

^ par. 17 Mam vidio Menjadi Sahabat Yehuwa—Persiapkan Komentarmu ḇero jw.org/id. Swewar ro ḇar AJARAN ALKITAB > ANAK-ANAK.

^ par. 63 SONIN: aek srar ḇero sidang siryaḇ fa sḇuk kankarem ro Farkarkor Baryas.

^ par. 65 SONIN: Naek srar ḇeḇeso ḇeḇuk kankarem ro Farkarkor Baryas seḇefasna ro sonin ḇepon ya. Sko oser-oser sna fafisu ḇeḇesisye, mboi skokam skoḇuk oras fa sifrur fasasos faro fananjur ya.