Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Rosai Ḇefnai fa Koḇuk faro Allah Ḇena Roi Nakam?

Rosai Ḇefnai fa Koḇuk faro Allah Ḇena Roi Nakam?

”Sye Allah nkoḇedi, nkokofen kasumasa ḇe au ma nkosandik snonsnon ḇepyum bedi.”​—1 TAWARIKH 29:13.

DOYA: 9558

1, 2. Rariso Yahwe fyasna snemura ḇeko rai?

YAHWE iso Allah ḇeḇesnemura. Roi kosmana kam ndramuma ro I. Roi ḇekakur nakam ro supswan ine iso ḇena na, ma ḇyukisonem kankenem ro braur ḇyenakam. (Mazmur 104:13-15; Hagai 2:8) Ro Refo, kofarkor rariso Yahwe ifrur mujisat fa ḇyukifamfom fandun kawasa Ḇyesya.

2 Imnis raris, ro fafisu swaf taun ri 40 Yahwe ḇyuk manna ma war faro er Israel sya rofyor sisya ro moḇ ḇeursḇa. (Keluaran 16:35) Inja, sismai rosai sifandun nakam. (Nehemia 9:20, 21) Yahwe ḇyuk papoik ḇe nabi Elisa i fa ifrur mujisat faro kabom ḇesouser oso. Nya maniken kermkun monda, ḇape Yahwe ifrur fa nabor syadiwer. Roi Yahwe ḇyuk nane nafnoḇek i fa ḇyak nyaki ḇyena ma nya kumpan kaker fa byukisaramper kankenem ḇyedi ma romawa ḇyesuya. (2 Raja-Raja 4:1-7) Yahwe ḇyuk papoik ḇe Yesus i  kako fa ḇyuk anan ma iba syadiwer ḇyuk pipi rofyor sifandun na.​—Matius 15:35-38; 17:27.

3. Rosai na kawos ro artikel ine ya?

3 Yahwe na kyinfir fa ḇyuk roi nakam fa isaramper braur Ḇyenakam. Ḇape, imarisen dor manfamyan Ḇyesi fa sḇuk rosai snana fa sisaramper organisasi Ḇyedi. (Keluaran 36:3-7; wasya Amsal 3:9.) Rosai ḇefnai Yahwe dor ko fa koḇuk kaḇer ḇe I roi ḇekakur kosmana? Rariso Yahwe kawasa Ḇyesi ro awar Refo sisaramper fararur Ḇyedi rai? Rariso organisasi ḇyuk kumpan sfarserna ro baboine rai? Ro artikel ine nari kosmai kankarem ḇyena.

ROSAI ḆEFNAI FA KOḆUK FARO YAHWE I?

4. Rosai ḇefnai fa koḇuk faro Yahwe I?

Koḇuk ḇe Yahwe snaro koswar I

4 Koḇuk ḇe Yahwe snaro koswar ma kosyowi I. Rofyor kowasenkara roi Yahwe ifrurna kam beko na ido, ḇaḇesyowi na nek ro sne koḇedi. Ineiso Raja Daud ḇyabirna rofyor fyasnaḇair rosai ḇeḇefandun ro ḇaḇawes bait ya. Daud doḇe roi kosma nakam ndramuma ro Yahwe I ma rosai monda koḇuk ḇe Yahwe I iso roi ḇyuk beko nairi.​—Wasya 1 Tawarikh 29:11-14.

5. Rariso Refo fyarkor ḇeko snar koḇuk kuker sne ḇesiper ima ḇar ḇefandun kaku ro ḇaḇesamsyom ḇekaku ya rai?

5 Komarisen kakḇuk ḇe Yahwe I snar ine iso nyan oser fa kosyom ḇe I. Ro fasasna oso, manwawan Yohanes ryower ḇekenem bero nanki sya sikofen ḇo soḇe, ”O, Manseren [Yahwe], o, Allah nkobedi! Aw monda kada wasyus fawasma sanandik, syowi ma papoik. Snar aw ḇefrur roi ḇeḇor kam, ma snar marisen ḇedi kako roi ḇeḇor anna neḇefrur kwar ma nakenem.” (Fasasna faro Yohanes 4:11) Kakuḇae, Yahwe isyus fa isma syowi ma sanandik nakam, inja komarisen koḇuk roi ḇepyum kaku ḇe Yahwe I. Roro Moses i, Yahwe iwan er Israel sya fa sifrur munara rikyor ro taun oser. Nyan oser sfasna ḇaḇesamsyom sena ro munara nane isoine sḇuk farsarser ḇe Yahwe I. Siwan si fa ”srama ro ḇarpon Yahwe kuker bramin-bebei” awer. (Ulangan 16:16) Baboine kako, roi ḇefandun kaku ro ḇaḇesamsyom koḇena iso koḇuk kuker sne ḇesiper. Rarirya, kofasna koḇesyowi ma kosaramper fararur ro Yahwe organisasi Ḇyedi.

6. Rosai fainda ro koḇuk? (Mam sonin ro randak artikel ine.)

6 Na kosma fainda snar kobuk kuker snemura, boi komarisen kosmai monda ḇa. (Wasya Amsal 29:21.) Kwarapan inaimkun oso ismai pipi kermkun ro sinan ḇyedi, ramnai ḇyukikoḇes hadiah ḇe snari. Rariso sneḇaḇir sinan ḇyesuya rai? Ḇaido, kwarapan perintis ḇebabo ḇeḇarekus sinan ḇyedi. Ḇyuk pipi kermkun fa ḇyak pyan rum sewa ma ḇyukikoḇes roḇean faro kina ḇyesi. Imbude, sinan ḇyesuya suyor i fa ifrur rarirya ḇa. Ḇape sumarisen susmai roi ḇyuk besu na. Rosai ḇefnai ya? Snaro ine iso nyan fa fyasna syowi ḇyeja besu faro roi sufrur ḇe i na. Rarirya kako, Yahwe ifawi  snar ipyum ḇe ko fa koḇuk ḇe I ro roi ḇekakur kosmana.

NYAN SḆUK FARSARSER RO FAFISU IWARA

7, 8. Rariso Yahwe kawasa Ḇyesi ro awar Refo sḇuk farari ḇepyum rofyor sisaramper (a) fararur ḇefandun oso? (b) Allah fararur Ḇyedi?

7 Ro Refoya, kowasya kada Yahwe kawasa ḇyesi sḇuk farsarser fa sisaramper Yahwe fararur Ḇyeja. Fyorno ido sḇuk faro fararur ḇefandun oso. Imnis raris, Moses danun ḇe snonkaku Israel sya fa sḇuk farsarser faro ḇaḇawes tabernakel. Mura, Raja Daud ifrur rarirya kako faro ḇaḇawes bait. (Keluaran 35:5; 1 Tawarikh 29:5-9) Fafisu Raja Yehoas ḇyepoik, imam sya sifrur mnis bait kuker pipi snonkaku sya sḇuk na. (2 Raja-Raja 12:4, 5) Ro abad randak, basbiser ya nkuro sup Yudea ma snonkaku Kristen ro diwa sifandun fafnoḇek. Rofyor snonkaku Kristen ḇero moḇ ḇesena srowerna, oser-oser sun snemuk fa sḇuk ḇe naek srar bero diwansya imnis samambraḇ sena.​—Kisah 11:27-30.

8 Yahwe kawasa Ḇyesi kako sḇuk kumpan fa sḇukisaramper snonkaku ḇeyuf Allah fararur Ḇyedi. Imnis raris, ro baḇ Sasoser Moses snonkaku Lewi sna warisan raris keret ḇese na ḇa. Inja snonkaku Israel sḇuk rarwas ḇar ḇeḇesamfur ro roi sismana faro snonkaku Lewi. Ine nafnoḇek snonkaku Lewi sya fa smam monda faro fararur sena ro tabernakel. (Bilangan 18:21) Rarirya kako, bin bena snemura sḇuk rosai snana fa sisaramper Yesus ma manwawan ḇyesi.​—Lukas 8:1-3.

Snonkaku ḇenana sya ḇaido ḇesaḇarar sya ke, sikame na sḇuk farsarser

9. Ro fafisu iwara, rariso Allah kawasa Ḇyesi sḇuk farsarser rai?

9 Ro fafisu iwara, rariso Allah kawasa Ḇyesi sḇuk farsarser rai? Snonkaku Israel ḇeḇuk farsarser faro ḇaḇawes tabernakel imbude roiebor sḇuk naine sunna ro Masir nairi. (Keluaran 3:21, 22; 35:22-24) Ro abad randak, snonkaku Kristen ḇeḇeso sboḇ roiebor mankun sena, raris saprop roḇa rum, ma ssun pipi na faro manwawan sya. Ramnai manwawan ansine sḇuk pipi anna fa sisaramper naek srar ḇefandun sya. (Kisah 4:34, 35) Snonkaku Kristen ḇesesya sikram ker pipi sena insama na sḇukisaramper fararur ya. (1 Korintus 16:2) Inja snonkaku ḇenana sya ḇaido ḇesaḇarar sya ke, sikame na sḇuk farsarser.​—Lukas 21:1-4.

NYAN FA KOḆUK FARSARSER RO BABOINE

10, 11. (a) Rariso na kakfasnai snemura raris Yahwe manfamyan Ḇyesi ḇekenem ro awar Refo sya rai? (b) Rariso sneḇaḇir bedi snar ḇesaramper fararur Karajan ya?

10 Baboine, na sor kofa koḇuk farsarser faro fandun oso. Imbude sidang kobedi sna aw fa sifrur mnis ḇaido sibawes Balai Karajan ḇebabo oso. Kantor cabang koḇedi imbude fandun fa sifrur mnis kaḇer na. Na koḇuk fafnoḇek  kuker pipi faro munara kebaktian koḇedi kako. Ḇaido, naek srar koḇesi ro moḇ ḇese sisma susa snar rim ḇeba ma sifandun fafnoḇek koḇena. Farsarser koḇukna kako na nasaramper utusan injil, perintis istimewa, pengawas wilayah, ma ḇefararur ro kantor pusat ma kantor cabang ḇero supswan ḇesiper. Sidang kobedi na sfarem farsarser na fa nafnoḇek ḇaḇawes Balai Kebaktian ma Balai Kerajaan faro naek srar ḇero sup-sup ḇesena.

11 Kokame na kosaramper fararur ro Yahwe organsasi Ḇyedi sifrur ro ras-ras ḇepupes ine kuker koḇuk farsarser. Ḇebor ḇeḇuk farsarser sya sap snonsnon sena ḇa. Rofyor korir pipi ro burua farsarser ro Balai Karajan ḇaido ro situs web jw.org, snonkaku ḇesesya sipok sifawi awer barbor ro pipi koḇukna. Ḇape rariso fyor ḇaḇir farsarser bukna nabor mankenem ḇa? Kakuya, farsarser ḇebor ḇesun ḇe organisasi ndramuma ro farsarser ḇeborna ḇa mboi kermkun-kermkun na. Iba syadiwer naek srar ḇena pipi kermkun kako, na sifarari snonkaku Kristen ḇero Makedonia ro abad randak sya. Sesaḇarar kaku ḇape si kako sor fa sakḇuk fafnoḇek ma simarisen sḇuk kuker snemura.​—2 Korintus 8:1-4.

12. Rariso organisasi syewar fa ḇyuk pyum farsarser ismana rai?

12 Badan Pimpinan ḇyesouser ma ifawi nanem ro nyan ḇyuk pyum farsarser na raya. (Matius 24:45) Ḇeḇeanggota sya sḇenadi fa sifrur snemuk ḇepyum, ma sisasor si fyor sifrur aw kuker nyan rariso na sḇuk pyum pipina rai. (Lukas 14:28) Ro awar Refo, snon ḇesouser ḇeyuf farsarser sya na smam kaku insama sḇuk farsarser anna faro ḇaḇesamsyom ḇe Yahwe I monda. Imnis raris, rofyor Ezra kyaḇer ḇe Yerusalem, dun farsarser raja Persia ḇyukna raris ḇrawen, perak, ma arasai ḇesena. Baboine, maeja ro farsarser anna nasyadi ro rupiah trilyun ri 1,3. Ezra myam farsarser anane ḇe roi sḇuk ḇe Yahwe I. Inja ḇyuk akurfasna ḇemnis kaku faro snonkaku ḇenankow roiebor anna fa smam warekna fafisu simbranuk moḇ ḇekarawraw sya skansin ro na. (Ezra 8:24-34) Ḇarpur muma, manwawan Paulus iryur pipi fa ḇyukifnoḇek naek srar ḇeḇefandun ḇero Yudea sya. Myam kaku insama ḇeyuf pipi sya sisasor si fa ’sifrur napnapes ro Manseren ḇarpon ḇyedi mondaba, ḇape roḇarpon snonkaku kako’. (Wasya 2 Korintus 8:18-21.) Baboine, organisasi koḇedi fyarari Ezra ma Paulus kuker ḇyuk pyum kaku farsarser na.

13. Rosai ḇeḇedar fa ro ras ḇarpur ine organisasi ifrur fararwe ḇeḇeso?

13 Kina oser imbude sfadwer nyan sfasos kumpan na insama kumpan ḇesaena nasyadi ro kumpan ḇesun na awer. Ḇaido sisewar nyan fa sikenem syadadiḇa insama na sifrur nabor syadiwer ro fararmyan ḇe Yahwe I. Rarirya kako kuker Yahwe organisasi Ḇyedi. Ras ḇarpur ine, sifrur fararur ḇepyum nabore, ma fyorno ido kumpan sḇukikaḇkoḇesna nabor syadi ro sismana. Inja raris kina insanja ani, organisasi syewar nyan fa fyasos pyum kumpan na ma ifrur fararur fa napyan syadi. Rarirya ḇyuk pyum kaku kumpan ḇeḇefarser kuker snemura na.

 FAINDA RO FARSARSER KOḆUK NA

Farsarser buk na nafnoḇek fararur ro supswan ḇesiper (Mam paragraf 14-16)

14-16. (a) Farsarser koḇena sḇukna faro fararur rosai? (b) Rariso mankundaw wasma fainda ro rosai organisasi ifrurna?

14 Ḇebor ḇemamḇir napnapes fyoro kwar sya soḇe roi kosmai ro organisasi ro kirine na nabor syadi ro fafisu naiwara. Kona situs web jw.org ma JW Broadcasting. Kona Refo Kitab Suci Terjemahan Dunia Baru ro wos ḇebor. Kebaktian Internasional ras rikyor ro 2014/2015 ”Teruslah Cari Dahulu Kerajaan Allah!” sifrurna ro stadion ḇeba kaku ro kota ri 14 ro supswan ḇesiper. Ḇerama ro diansya kam siryaḇ kaku!

15 Ḇebor sya sikofen kasumasa kaku faro roi Yahwe organisasi Ḇyedi ḇyuk nane. Imnis raris, inḇeswa oso ḇeyufarmyan ro Asia suyoḇe, ”Siwan nufa nufarmyan ro kota kasun oso. Fyorno ido nuḇaḇir nuyemire, ma napyan fa nufanander snar ro moḇ nakame naek srar sisya sifarmyan ḇe Yahwe I. Ḇape rofyor numam acara ḇebor ro JW Broadcasting, nuswarepen ḇeri snar numa bar ro ḇaḇemanbekanaek ro supswan ḇesiper. Naek srar koḇesi ḇero moḇ nufarmyan ya simarisen faro JW Broadcasting. Nurower sikofen ker fyor smam acara JW Broadcasting ro paik ḇe paik na, sbabir sfanam syadi ḇe anggota Badan Pimpinan sya. Kirine simanen kaku snar sisya ro Allah organisasi Ḇyedi.”

16 Ro supswan ḇesiper, indokada Balai Karajan ri 2.500 siḇawes babo ḇaido sifrur pyum kaḇer na. Naek srar ḇero sidang oso ro Honduras sikofen simander kaku fa sna Balai Karajan ro mankunsi. Kirine roi simanderna sismai kaku i. Sfas ḇo soḇe, ”Nkomarisen kaku snar nkoisya ro Yahwe kina ḇeba Ḇyedi ma nkosma ḇaḇemanḇekanaek ḇepyum kaku ro supswan ḇesiper.” Besesyawer sḇaḇir rarirya kako rofyor sisma Refo ma publikasi ro wos mankun  sena, rofyor naek srar sifnoḇek si ro fafisu rim ḇeba nkur si, ḇaido rofyor sisma bon ḇepyum ro fararur ḇaḇeḇaryas ro moḇ kawasa kam ḇero moḇ sena.

17. Rosai ḇefasnaḇair Yahwe iso ḇesaramper organisasi Ḇyedi ro baboine?

17 Ḇebesaksi Yahwe ḇa sya skara ḇaḇeri rariso na kofrur roi ḇeborkam kuker farsarser sḇuk kuker marisen na monda. Ḇeyuf perusahaan ḇeba oso ryama ḇe percetakan koḇedi oso. Myanen kaku snar ḇefararur syakam sḇak siḇa, fararur nakam nambran snar farsarser kuker sne ḇemarisen, ma sifrur munara fa siryur pipi ḇa. Doḇe rosai kofrur nane nsun ro swaruserḇa. Kaku ḇae! Kofawi roi nanekam ndarirya snar Yahwe iso ḇesaramper fararur ine.​—Ayub 42:2.

KOSMA BARAKAS SNAR KOḆUK KAḆER ḆE YAHWE I

18. (a) Barakas rosai kosmana rofyor kosaramper fararur Karajan ya? (b) Rariso kofarkor romawa koḇesi ma befarkor babo sya fa sḇuk farsarser kako?

18 Yahwe ḇyuk fakamaman ma swaf beko fa kosaramper fararur ḇeba Karajan. Ḇyuk kakakyar ḇeko rofyor kofrurna ido, nari ḇyuk barakas ḇeko. (Maleakhi 3:10) Yahwe ḇyeasas snar koḇuk kuker snemura ido, na kopok kokananjar ḇa. (Wasya Amsal 11:24, 25.) Ikofen kako fyor koḇuk ido na komarisen, snaro ”ipyum syadi ro koḇuk ya ro kosma ya.” (Kisah 20:35) Ro rosai kokofen ma kofrur na, na kofarkor romawa koḇesya ma ḇefarkor babosya nyan fa sḇuk farsarser faro fararur ine ma sna barakas ḇebor.

19. Rariso artikel ine ifnoḇek Au rai?

19 Roi kosmana kam ndramuma ro Yahwe nairi. Ḇape, koḇuk kaḇer ḇe I ido, kofasna koswar I ma kosyowi roi ifrur kam ḇeko na. (1 Tawarikh 29:17) Rofyor snonkaku Israel sḇuk farsarser faro ḇaḇawes bait ya, ”siryaḇ faro farsarser sḇuk kuker marisen na, snaro sḇuk faro Yahwe I kuker sne ḇesiper.” (1 Tawarikh 29:9) Iḇye kada kosma raryaḇ ma marasrisen pdef rofyor koḇuk kaḇer faro Yahwe roi ḇyuk kwar ḇeko na.