Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Yakub ḇye kpu up faro Mesias snar kyoḇes Esau nasan romawa rawer ḇyedi ke?

Fakfuken ro Ḇewasya

Fakfuken ro Ḇewasya

Ro Israel fafisu iwara, romawa snon oso na ḇyeromawa rak sape ḇyekpu faro Mesias i ke?

Ḇepon iwara kokara kaku rarirya snar nasya ro Ibrani 12:16. Mnuk ani ikofen snar Esau ’ifandunḇa rosai ḇesren’ ma ḇyuk ḇe Yakub i ”nasan romawa rawer ḇyedi kuker roḇean ben oser monda”. Inja, ḇepon iwara kokara ḇo koḇe rofyor Yakub isma ’nasan romawa rawer’, ima fyasnai nya fakamaman ḇeba kako fa ḇyekpu faro Mesias i.​—Matius 1:2, 16; Lukas 3:23, 34.

Ḇape, rofyor komam kaḇer ro Refoya, romawa oso fandun fa ḇyeromawa rak ḇa insape ḇyekpu faro Mesias i. Mkorama komam rosai Refo ḇyairna:

Yakub romawa rak ḇyediso Ruben i, roro swari Lea i. Yakub romawa rak byedi kuker Rakhel iso yusuf i. Ḇape rofyor Ruben ifrur farḇuk famfnom, nasan romawa rawer ḇyedi neḇeyunburi ma sḇuk naḇe Yusuf i. (Kejadian 29:31-35; 30:22-25; 35:22-26; 49:22-26; 1 Tawarikh 5:1, 2) Ḇape, Mesias ryama ro up Ruben ma Yusuf suḇeja ḇa. Mboi ryama ro Yehuda up ḇyedi, isoine romawa snon ḇeḇefiak Lea ḇyedi.​—Kejadian 49:10.

Ro Lukas 3:32 ya, sap snon ririm bebekpu faro Mesias i. Snon ansine romawa rak sirya. Imnis raris, Obed kmariso Boas i, ma Isai kmariso Obed i.​—Rut 4:17, 20-22; 1 Tawarikh 2:10-12.

Isai romawa ḇyediso Daud i. Daud ima romawa randak risyaḇa, ḇape romawa ḇeḇewar rirya. Mesias ryama ro up Daud ḇyedi. (1 Samuel 16:10, 11; 17:12; Matius 1:5, 6)  Ramnai, Mesias kpu ḇyediso Salomo i, ḇape Salomo ima Daud romawa ḇeḇerandak ḇyedi sya ḇa.​—2 Samuel 3:2-5.

Ḇape, koḇe romawa rak yama roi ḇefandun kaku nasya. Isoine romawa rak sine sakna fakamaman syadi ro romawa ḇesesya. Komam kada, romawa rak sya nari ḇyebukor ro kina fa fyadwer kmari ma nari isma waris nabor kaku.​—Kejadian 43:33; Ulangan 21:17; Yosua 17:1.

Fakamaman fa sḇeromawa rak bisa nakren ro romawa oser ḇe romawa ḇesesya. Fafisu Abraham iyawbur Ismael i, nasan romawa rawer ine Isak iso ḇesmaina. (Kejadian 21:14-21; 22:2) Namnis kofarkor kwar anya, nasan romawa rawer Ruben ḇyedine neḇeḇuk faro Yusuf i. 

Inja, farkarkor rosai Paulus imbe ḇyuk ro Ibrani 12:16 ya? Mnuk ani ryok radine, ”Mkowaren insa mkokenem ro farḇuk awer roḇaido mkofandunḇa rosai ḇesren, imnis raris Esau, ḇyoḇ nasan romawa rawer ḇyedi kuker roḇean ben oser monda.”

Ro mnuk ani, Paulus ikofen Mesias kpu ḇyesiḇa. Mboi ḇyuk monda anun swarapepen. Ikofen ḇo doḇe, ”Wambran ro nyan ḇepyom insa wemin ḇeryarḇa bedi ryosdis awer” insamaido ”snon oso ḇaḇeri isasyarbur awer Allah saswar-fakamaman ḇyedi”. Fama, nari sakna roi annakam ḇa rofyor sifrur farḇuk famfnom. (Ibrani 12:12-16) Sifrur roi anna ido simnis Esau i, ’ḇefandunḇa rosai ḇesren’ ma iso rmomen nafsu ḇyena monda ḇardi.

Komam ro rari snonkaku ḇepon siwara, imbude Esau nya fakamaman fa fyarser farsarser ḇe Yahwe I. (Kejadian 8:20, 21; 12:7, 8; Ayub 1:4, 5) Ḇape snar Esau fyabri mankundi, inja fyadwer nasan romawa rawer ḇyedi kuker roḇean ben oser monda. Esau i kako imbude imewer ḇyekanderari kukro Yahwe byardai kwar na Abraham kpu up ḇyansi nari sekandera. (Kejadian 15:13) Esau ḇyesyowi nasan romawa rawer ḇyejaḇa snaro fyarḇuk kuker bin kafir, mura snari ma kmari su suḇe sneriso kaku i. (Kejadian 26:34, 35) Dakmnis Yakub iḇaḇeri. Yakub ima fyarḇuk kuker bin ḇesyom Yahwe I!​—Kejadian 28:6, 7; 29:10-12, 18.

Rosai kofarkor ro fasfas Refo ine faro Mesias up ḇyansi? Sino ḇeromawa rak, onower ido roḇa. Snonkaku Yahudi sifawi roi ine ma sisona. Na kokyar naro? Snaro mankunsi siso ḇekarem Kristus i nari ryama ro Daud up ḇyedi, Isai romawa ḇepur ḇyedi.​—Matius 22:42.