Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Kofarmyan ḇe Yahwe, Allah Knam ro Ḇaḇemkei

Kofarmyan ḇe Yahwe, Allah Knam ro Ḇaḇemkei

“Romoḇsai [Yahwe] Rur ḇyedi isya roya moḇ ani ḇaḇemkeya isya kako.”​—2 KORINTUS 3:17.

DOYA: 49, 73

1, 2. (a) Rosai ḇefnai fa ḇaḇewomen ma ḇaḇemkei suma roi ḇefandun kaku ro Paulus fafisu ḇyedi? (b) Manseiso Paulus dap ḇe Knam ro ḇaḇemkei ḇekaku ya?

SNONKAKU Kristen ro abad randak siwara sro baḇ Karajan Roma. Kawasa ḇero diansya sararer kaku faro sasoser, fararur ro kankain karkara, ma ḇaḇemkei sena. Ḇape, karajan ḇesambraḇ ani ifrur kawasa sya fa sifararur marḇak ḇe women. Rodia, 1 ro snonkaku ri 3 ro kawasa Karajan Roma sima women sirya. Kakuḇae, ḇaḇewomen ma ḇaḇemkei suma roi ḇefandun kaku faro snonkaku ḇebor sya ma faro snonkaku Kristen sya kako.

2 Manwawan Paulus dap ker ḇaḇemkei ro fasfas ḇyena. Mboi, ḇyesewar fa ipyos samswen ḇero dunya ine ḇa, raris rosai snonkaku ḇero fafisu ḇyedi imbe sifrur ya. Imbape, Paulus ma min Kristen ḇyesya sifararur marḇak fa sfarkor kawasa sya fa sakfawi Karajan Allah ma sifnoḇek si fa sakfawi Yesus Kristus marmar ḇyedi. Nama roi ḇefandun kaku nairi. Paulus ikofenḇair faro min ḇyansi manseiso Knam ro  ḇaḇemkei ḇekaku ya. Fyas, ”Manseren kokara rodine isoine Rurya. Ma romoḇsai [Yahwe] Rur ḇyedi isya roya moḇ ani ḇaḇemkeya isya kako.”​—2 Korintus 3:17.

3, 4. (a) Ro mnuk-mnuk ḇero 2 Korintus 3:17 ya ḇaim, rosai Paulus ikofen na? (b) Rosai fandun fa kofrur insama kosmai ḇaḇemkei ḇerama ro Yahwe I?

3 Ro syapram ḇesuru Paulus fyas ḇe snonkaku Korintus sya, ikofen rosai ḇeḇejadi faro Moses i rofyor isabu ro Bon Sinai fafisu myam rarama ro Yahwe malaikat Ḇyedi. Sananai ya isnai ro mka ḇyedi! Rofyor smam Moses i, simkak fafaya i ḇa, inja irup mka ḇyedi. (Keluaran 34:29, 30, 33; 2 Korintus 3:7, 13) Paulus ikofenḇair, ”Ḇape rofyor snonkaku oso kyaḇer wer faro Allah, mar ḇerup ani kako ḇyeḇekanow bur ḇarpon ḇyedi.” (2 Korintus 3:16) Rosai knam ro Paulus wos ḇyenane?

4 Kofarkor kwar ro artikel ḇepon ya Yahwe iso ḇefrur roi nakam, derer monda ḇena ḇaḇemkei ḇekaki ma ḇeba syadi. Inja nasnai kaku, ḇaḇemkei ya ryama ro Yahwe I ma ”romoḇsai [Yahwe] Rur ḇyedi isya roya”. Ḇape, Paulus doḇe insama kosmai ḇaḇemkei ḇeradine, fandun fa kokaḇer ḇe Yahwe I. Ine fyasnaiḇair fandun fa kofanam ḇe I. Snonkaku Israel ro sup ḇeursḇa smam roi nakam ro mamam snonkaku, mboi smam ro Yahwe mamam Ḇyena ḇa. Ine imnis ra srup kakara ma sisnesna. Simarisen sḇuk ḇaḇemkei sismai babo nane fa sifrur marisen mankun sena ḇardi.​—Ibrani 3:8-10.

Snonkaku ḇesmai ro bui si kako na saksmai ḇaḇemkei ine

5. (a) Ḇaḇemkei ḇemnis rariso ḇerama ro Yahwe rur ḇesren Ḇyedi? (b) Rariso kofawi snar snonkaku ḇewomen ḇaido ḇesmai ro bui si kako na saksmai ḇaḇemkei ḇerama ro Yahwe ine? (c) Fakfuken risuru risai fandun fa kokarem na?

5 Ḇaḇemkei ḇerama ro Yahwe rur ḇesren Ḇyedi nama ḇaḇemkei ro ḇaḇewomen monda risyaḇa. Rur ḇesren ani ḇyuk ḇaḇemkei ḇeba syadibur ḇaḇemkei snonkaku sya sḇuk na. Na nafrur fa komkeibur ḇaḇewomen faro sasar, marmar, samsyom ḇekaku ḇa ma rari ḇyena. (Roma 6:23; 8:2) Inema ḇaḇemkei ḇepyum kaku rirya! Snonkaku ḇewomen ḇaido ḇesmai ro bui si kako na saksmai ḇaḇemkei ine. (Kejadian 39:20-23) Srar Nancy Yuen ma Naek Harold King susmai ro bui swaf taun riḇeso snar kakyar suḇena, ḇape suna ḇaḇemkei ḇerarirya. Sufar fawar suḇenane ro JW Broadcasting. (Mam ro baḇ WAWANCARA DAN PENGALAMAN > BERTEKUN MENGHADAPI KESULITAN.) Rwama kokarem fakfuken risuru suine. Rariso na kofasnai koḇesyowi kaku ḇaḇemkei koḇena rai? Ma moḇsa koḇuk ḇaḇemkei koḇena kuker fawinanem rai?

ḆAḆEMKEI ALLAH ḆYUK ḆE KO NA NESYOWI FAFAYAḆA

6. Rariso snonkaku Israel sya sfasnai sifawi sikofen kasumasa ḇa faro ḇaḇemkei Yahwe ḇyuk faro si na?

6 Rofyor snonkaku oso ḇyuk roi ḇepyum kaku ḇe ko ido, na kokofen kasumasa ḇe i. Ḇape, snonkaku Israel sya  sifawi sikofen kasumasa ḇa faro ḇaḇemkei Allah ḇyuk faro si na. Paik riḇeso monda rofyor Yahwe fyasparbur si ro sup Masir raposa, siswar mura ḇe roḇean ma aninem sismai ro diana. Sisnurem snar san ker manna, roḇean Yahwe ḇyuk faro si na. Iba syadiwer, simarisen skaḇer ḇe sup Masir! Ro mamam sena, ’in, ampek, semangka, bawang ram, bawang ḇerik, ma bawang ḇepyoper’ nama napyum syadi ro ḇaḇemkei Yahwe ḇyuk faro si fa sisyom ḇe I. Naiso ḇefnai fa Yahwe imsor kaku si. (Bilangan 11:5, 6, 10; 14:3, 4) Ine nbuk farkarkor ḇefandun kaku ḇe ko.

7. Rariso Paulus iso mnis kaku wos ḇyena ro 2 Korintus 6:1 ya, ma rariso kakfrur rarirya kako?

7 Paulus ḇyuk swarapepen ḇe snonkaku Kristen syakam insama sefandun ḇa awer faro ḇaḇemkei Yahwe ḇyuk faro si roro Yesus Kristus i. (Wasya 2 Korintus 6:1.) Paulus ima snonkaku ḇenapes ḇa, dakḇewomen faro sasar ma marmarya. Ma ine nafnai fa ḇyaḇir ima snonkaku ḇeroë. Ḇape doḇe, ”Kasumasa faro Allah! Snar imarisen fyaspar aya kuker Yesus Kristus.” Rosai ḇefnai fa ikofen rarirya? Paulus ikofen ḇe min Kristen ḇyansi, ”Sasoser rur ḇesren ya, iso ḇeḇuk ḇe mko kankenem ro ḇaḇeoser kuker Kristus Yesus, fyaspar mko kwar ro sasoser sasar ma sasoser marmar.” (Roma 7:24, 25; 8:2, nwt) Snar Yesus marmar ḇyedi naiso ḇefrur fa kosnesna nasren ḇo kofarmyan ḇe Yahwe I, ma ine nun raryaḇ ḇekaku ḇe ko.​—Mazmur 40:8.

Ausya buk ḇaḇemkei Bedi kuker kwinfir fa wafrur rosai Yahwe imarisen na ke wafrur marisen Bedi?(Mam paragraf 8-10)

8, 9. (a) Swarapepen rosai manwawan Petrus ḇyuk kuker nyan rariso koḇuk ḇaḇemkei koḇena rai? (b) Rariso snonkaku oso na ḇyuk ḇaḇemkei ḇyedi kuker nyan ḇesasar?

8 Fandun fa kokofen kasumasa monda ḇe Yahwe ḇa, ḇape fandun kako fa kosasor ko insama koḇuk ḇaḇemkei koḇena kuker nyan ḇesasar awer. Imnis raris, manwawan Petrus ḇyuk swarapepen  ḇe ko fa koḇuk awer ḇaḇemkei koḇena fa kofrur roi ḇesasar. (Wasya 1 Petrus 2:16.) Swarapepen ine nafnoḇek ko fa koswarepen mura ḇe rosai ḇekur snonkaku Israel sya ro sup ḇeursba anya. Iḇye syadi, koro baboine fandun fa koso mnis swarapepen anna. Setan ma dunya ḇyedine ifrowes ko fa kona marasrisen syadi faro sansun, roḇean, aninem ma hiburan na. Ḇefrur iklan sya sepande kaku, inja sḇuk snonkaku ḇedoser sya fa sifrowes ko insama kokoḇes robor kofandun kaku ḇa na. Na napyan ḇe dunya ine fa ifrowes ko insama koḇuk ḇaḇemkei koḇena kuker nyan ḇesasar.

9 Petrus anun ḇyenane nasrow kako faro samswen ḇeba kosmai ro kankenem ine raris, farkarkor ḇekaki, fararur, ma nasan kokinfir na. Imnis raris, sidif roma inai babo sya fa sfarkor marḇak insama sisun ro universitas ḇepyum kaku. Snonkaku ḇebor sikofen ḇe si ḇo soḇe rofyor sismai farkarkor ḇekaki ido, nari suf fararur ḇepyum, sna pipi nabore, ma snonkaku sya sesyowi si. Imbude sfasnai ḇe roma inai babo ansine snar snonkaku ḇemnai ro farkarkor universitas nari pipi sena nabor syadi ro ḇemnai monda ro SMA sya. Imbude roma inai babo sya smam rya farkarkor ḇekaki ima roi ḇepyum kaku dirya. Inja fandun fa skinfir pyum snar na nawyae swaf ḇedawer ro kankenem sena. Ḇape, rosai fandun fa roma inai babo ma sinan sesi siswarepen kaku na?

10. Rosai fandun fa koswarepen rofyor imbe kokinfir fa kofrur marisen mankun koḇena?

10 Sino sisya skara snonkaku oser-oser mankunsi na sikamar rosai sifrurna, inja fandun fa sna ḇaḇemkei fa skinfir roi simarisen na rofyor nawyae sne ḇesren seja ḇa. Skara Paulus wos ḇyena, ”Yamewer ḇaḇemkei ayena nafrur fa snonkaku ḇesesya sneuser sena nmankara aya?” (1 Korintus 10:29, nwt) Kona ḇaḇemkei fa kokinfir ro mankunko faro farkarkor ma fararur koḇena. Ḇape, fandun fa koswarepen ḇaḇemkei koḇena nasyadi ḇa, ma nari kosmai bon ro snemuk rosai kunna. Iso ḇefnai fa Paulus doḇe, ”Roi ḇeḇor komarisen anna nefainda kamḇa. ’Iḇye kofrur rosai komarisen anna’ ḇape roi ḇeḇor komarisen anna nbawes kankenem kobenaḇa.” (1 Korintus 10:23) Inja, koma kona ḇaḇemkei fa kokinfir rosai imbe kofrur raris marisen mankun koḇena, imbape rosai komarisen na nefandun mankun ḇa.

KOFARMYAN ḆE YAHWE I NFASNAIḆAIR KOḆUK ḆAḆEMKEI KOḆENA KUKER FAWINANEM

11. Rosai ḇefnai fa Yahwe fyaspar ko kwar?

11 Rofyor Petrus ḇyuk swarapepen ḇe ko fa koḇuk ḇaḇemkei koḇena kuker nyan ḇesasar ḇa, ikofenḇair nyan ḇepyum ya iso koḇe ”Allah manfamyan ḇyesi”. Roi ḇefnai fa Yahwe iwan Yesus i fa fyasparbur ko ro sasar ma marmarya iso insama na koḇuk kankenem koḇena ḇesiper fa kofarmyan ḇe I.

Nyan ḇepyum kaku fa koḇuk ḇaḇemkei koḇena iso koḇuk oras ma samambraḇ koḇena ḇesiper fa kofarmyan ḇe Yahwe I

12. Nyan ḇepyum rosai Nuh ma kina ḇyesi sḇuk faro ko na?

12 Nyan ḇepyum kaku fa koḇuk ḇaḇemkei koḇena iso koḇuk oras ma samambraḇ koḇena ḇesiper fa kofarmyan ḇe Yahwe I. Kofrur rarirya ido, nari kopok komam fandandun ro dunya ine ma marisen mankun koḇena nḇe roi ḇefandun kaku ro kankenem koḇena ḇa. (Galatia 5:16) Kwarapan rosai Nuh ma kina  ḇyesi sifrurna. Sikenem rofandu snonkaku ḇeḇarḇor ma ḇefrur fararur farḇuk ḇeḇyeḇa. Ḇape saksowarpu snonkaku ḇero ris sesya roi skara ma roi sifrur anna ḇa. Skinfir fa simyaren sifrur fararur Yahwe ḇyuk faro si na. Sḇawes wai ḇeba, siryur roḇean ḇe mankunsi ma rofanfan sya, ma sḇuk swarapepen ḇe snonkaku ḇesesya faro Faḇruḇ Ḇeba ya. ”Nuh ifrur Allah parenta ḇyena kam. Ifrurna imnis kaku radiri.” (Kejadian 6:22) Bon ya iso, Nuh ma kina ḇyesi sismai payamyum rofyor Allah myunpres snonkaku ḇeḇarḇor sya.​—Ibrani 11:7.

13. Rosai Yahwe iwan fa kofrur ya?

13 Rosai Yahwe iwan ko fa kofrur ro baboine na? Yesus manfamyan ḇyesi koine, kofawi Allah iwan ko fa koḇaryas. (Wasya Lukas 4:18, 19.) Setan irup kakara snonkaku ḇebor ro baboine, inja sifawi mnis ḇa ḇo sḇewomen faro agama ḇekaku ḇa, nana arasai, ma polotik na. (2 Korintus 4:4) Raris Yesus i, kona fakamaman fa kofnoḇek snonkaku ḇesesya fa sakmambir ma sisyom Yahwe, Allah Knam ro ḇaḇemkei ya. (Matius 28:19, 20) Koḇaryas ḇe snonkaku ḇese ima roi ḇepyan risyaḇa. Ro moḇ ḇeḇeso, snonkaku sya simewer sifawi Allah, ma ḇeḇeso sya wer simsor rofyor koḇaryas yoḇ si. Ḇape, snar Yahwe iwan ko fa koḇaryas, inja fandun fa kofuken mankunko, ’Aya isya yaḇuk ḇaḇemkei ayena fa yafrur nabor syadi ro fararmyan ḇe Yahwe I ke?’

14, 15. Ḇebor ro Allah kawasa Ḇyesi sun snemuk fa sifrur rosai? (Mam sonin ro randak artikel ine.)

14 Allah kawasa Ḇyesi sifawi mnis papupes dunya ine fyanam kwar, inja sibor sisya sun snemuk fa sikenem syadadi ḇa ma sḇe perintis. Inema roi ḇepyum dirya. (1 Korintus 9:19, 23) Ḇeḇeso sya sḇe perintis ro sup marin sena, ḇesesya wer sraḇe sidang ḇefandun fafnoḇek. Swaf taun ririm ḇarpur ine, syadi ro 250.000, sḇe perintis kwar ma kirine perintis biasa sya sisyadi ro 1.100.000. Komarisen kaku snar komam naek srar sibor sḇuk ḇaḇemkei sena fa sfarmyan ḇe Yahwe kuker nyan ḇepyum ine!​—Mazmur 110:3.

15 Rosai ḇefnoḇek si fa sḇuk ḇaḇemkei sena kuker fawinanem? Kwarapan John ma Judith su, sufarmyan ro sup ḇeḇeso ro swaf taun ri 30 kwar. Sufawar ḇo suyoḇe rofyor Sekolah Dinas Perintis ḇerandak ro 1977 ya, ḇeyakso farkarkor ani sor si fa sra sfarmyan ro moḇ ḇefandun syadi manḇaryas. Insama John ma Judith sufrur mnis aw suḇena, fandun fa sumam kenem suḇena fa nasyadadi ḇa. Inja John fyadwer ker fararur ḇyena. Rarirya, suraḇe sup ḇese fa sufarmyan rodiwa. Rosai ḇefnoḇek su fa sufrur mnis samswen suḇena raris sufarkor wos ḇebabo, budaya ḇebabo, ma iklim ḇero moḇ ya? Suḇenadi ḇe Yahwe ma suyor I fa ifnoḇek su. Moḇsa suḇaḇir rai snar sufarmyan ḇe Yahwe I ro swaf taun  ḇe taun kwar? John doḇe, ”Yaḇaḇir aya isya yakro fararur ḇepyum kaku insape yafawi ḇaido yasmaina. Yahwe fyanam kaku ḇe aya, raris kma ḇesawarwar. Kirine insape yafawi kaku knam ro wos ḇero Yakobus 4:8 ya, ’Fanam faro Allah, ma nari Allah fyanam faro au.’ Yafawi yana rosai yasewar na kwar, iso kankenem ḇeyun payamyum.”

16. Rariso snonkaku syaran sḇuk ḇaḇemkei sena kuker fawinanem rai?

16 Raris John ma Judith su, sino sisya sḇe perintis ro swaf kawan kaku. Ḇesesya sḇe perintis kawan ḇa snar samswen ḇekur si. Ḇape, ḇebor sya sfararur ḇe sukarelawan ro fararur ḇaḇawes sifrur ro supswan ine ḇesiper. Imnis raris, naek srar sisyadi ro 27.000 srama fa sifnoḇek ḇaḇawes kantor pusat ro Warwick, New York. Sino sisya sfararur minggu risuru, paik ḇeḇeso, ḇesesya ro swaf taun oser ḇaido kawan syadi wer. Naek srar sibor sifrur pengorbanan insama sifarmyan ro Warwick. Sima sḇuk farari ḇepyum ro snonkaku ḇeḇuk ḇaḇemkei sena fa sisandik ma sisyowi Yahwe, Allah Knam ro ḇaḇemkei ya!

17. Barakas rosai nari kosmai rofyor koḇuk ḇaḇemkei koḇena kuker fawinanem?

17 Kokofen kasumasa snar komambir Yahwe I kwar ma ḇaḇesamsyom ḇe I nbuk ḇaḇemkei ḇe ko. Mkorama koḇesyowi ḇaḇemkei kosmai ine kuker kofrur wos snemuk ḇepyum. Kofrurna kuker nyan ḇesasar awer, ḇape ipyum ya koḇuk ḇaḇemkei koḇena nasiper fa kofarmyan ḇe Yahwe I. Rarirya, nari kosmai barakas imnis Yahwe asas Ḇyena rofyor ḇardadi ine ndarirya, ”Rofafisu oso farsyos sansoren nari isma faspar ro papoik ḇemuni fa ḇyemomprafya ma nari isma ḇaḇemkei fnoḇek Allah romawa ḇyesi ro baba siḇe sismaya.”​—Roma 8:21.