Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

Fasfas Ḇepupes

Fasfas Ḇepupes

1 YAHWE

Allah snonsnon ḇyedi iso Yahwe ma kofawi knam ya iso ”Iso Ḇefnai Ḇedar Fa Ndarirya”. Yahwe iso Allah ḇepoik syadi, ma ifrur roi nakam. Nya samambraḇ fa ifrur rosai imarisen na.

Ro wos Ibrani, snonsnon Allah ḇyedi ssfas i kuker huruf rifiak monda. Ro wos Inggris, sfas na ḇe YHWH ḇaido JHVH. Allah snonsnon ḇyedi naisya fanam ḇe 7.000 ro fasfas Refo Ibrani ḇeknam kaku ya. Snonkaku ro supswan ḇesiper sḇuk snonsnon Yahwe kuker nyan ḇeḇese, ma sap snonsnon ani imnis raris sawos ro wos mankun sena.

Fsl. 1, par. 15

2 REFO YA ”ḆERAMUMA RO ALLAH”

Fasfas ḇero Refo iso karkara Allah ḇyediri, ḇape iwan snonkaku sya fa sfas na. Ine imnis kuker mananwir mnu oso iwan manfasfas ḇyedi fa fyas syap ram oser ḇeser karkara ḇyedi. Allah ḇyuk rur ḇesren ḇyedi fa fyarkin ma fyara manḇefas Refo sya fa sfas karkara Ḇyena. Allah rur ḇyedi fyarkin si ro nyan sairirya kam, fafisu ya ḇyuk mamam ḇaido mafafu ḇesi ido nari ssfas na.

Fsl. 2, par. 5

3 WOS ḆEFARKIN

Farkarkor ḇebor naisya ro Refo nfasnaḇair knam ro napnapes. Imnis raris wos ḇefarkin ine ”ḇemaniḇoḇ kuker ḇaḇeḇarḇorya, nari rari ḇeḇye bedi dakḇarḇor kako” fyarkor ḇeko ḇebati kuker snonkaku sya nari sawyaye ko fa koḇe snonkaku ḇeḇyeḇa ḇaido ḇeḇye. (1 Korintus 15:33) Ma wos ḇefarkin ine ”rosai snonkaku sya sker ma skekefna, nari sinek na” fyarkor ḇeko nari kosma bon ro rosai kofrurna.Galatia 6:7.

Fsl. 2, par. 12

  4 ḆARDADI

Anun ḇerama ro Allah. Ine iso ḇaḇe fasnaḇadir Allah marisen ḇyedi, farkarkor faro kankenem, sasoser, ḇaido ḇaḇe mankara. Ine kako ankinem kuker roi na ḇeḇejadi ro fafisu naiwama. Ḇardadi ḇebor ḇero Refo ndrarirya kaku kwar.

Fsl. 2, par. 13

5 ḆARDADI KUKER MESIAS

Ḇardadi ḇebor kuker Mesias ro Refo ndrarirya ro Yesus i. Mam ro kotak ” Ḇardadi Kuker Mesias”.

Fsl. 2, par. 17, ffs.

6 MARISEN YAHWE ḆYEDI FARO SUPSWAN INE

Yahwe ifrur supswan ine fa ḇyefirdaus moḇ faro snonkaku ḇeswar I sya. Marisen Allah ḇyedi pok fa neḇefadwerḇa. Fyoro werḇa, Allah na ipyos ḇaḇemaḇak ma ḇyuk kankenem fyoro faro kawasa ḇyesi.

Fsl. 3, par. 1

7 SETAN ROḆA IBIRIS

Setan iso malaikat ḇeḇembroḇ faro Allah ro randak ya. Sap iḇe Setan, knam ya iso ”Manḇesampampum”, snaro isampampum ma ḇyembroḇ Yahwe I. I kako sap iḇe Ibiris, knam ya iso ”Manḇeanonef”. Snonsnon ine sḇuk ḇe i snaro ikofen roi ḇekakuḇa kuker Allah I ma dankar snonkaku sya.

Fsl. 3, par. 4

  8 MALAIKAT

Yahwe ifrur malaikat sya fyoro kwar rofyor ifrur supswan ine ḇaim. Sḇeḇefrur fa sikenem ro nanki. Malaikat sya sisyadi ro yuta ri utin oser. (Daniel 7:10) Sna snonsnon ma ḇaḇekenem ḇeḇesisye, ma malaikat ḇesouser sya kuker sne ḇerun simewer sisma samsyom ro snonkaku sya. Sisma fakamamar ḇesisye ma fararur ḇefandun kaku nabor fa sifrurna. Fararur ya iso sefarmyan ḇe Yahwe ro ḇarpon ḇyedi, sikofenḇadir ankinem Yahwe ḇyena, sikadaun ma sifarkin Allah manfamyan ḇyesi ro supswan, sifasnaḇair ḇaḇemankara Ḇyedi, ma sifnoḇek fararur ḇaḇeḇaryas. (Mazmur 34:7; Fasasna Faro Yohanes 14:6; 22:8, 9) Ro fafisu naiwama, nari siwarpu Yesus i ro ras mamamun Armagedon.Fasasna 16:14, 16; 19:14, 15.

Fsl. 3, par. 5; Fsl. 10, par. 1

9 SASAR

Rosai koḇaḇirna, kokarana, ḇaido kofrurna namnis ḇa kuker Allah marisen ḇyena inema sasar rirya. Snaro sasar ya nawyaye ḇaḇebati koḇena kuker Allah, inja ḇyuk ḇeko kwar sasoser ma wos-wos ḇefarkin fa nafnoḇek ko fa kobinkwanbur roi kofawina ḇe roi ḇesasar . Ro randak ya, Yahwe ifrur roi nakam fa namnis, ḇape rofyor Adam ma Eva sukinfir fa susouser ḇe Yahwe I ḇa, sufrur sasar ma sumnis werḇa. Suḇemansar insar, ma sumar, ma snaro kosma sasar ro Adam, ko kako koḇe mansar insar ma komar.

Fsl. 3, par. 7; Fsl. 5, par. 3

10 ARMAGEDON

Ine iso ras mamamun Allah fa fyarmkok dunya Setan ya ma roi ḇeḇarḇor nakam.

Fsl. 3, par. 13; Fsl. 8, par. 18

 11 KARAJAN ALLAH

Karajan Allah ido ḇaḇesasoser Yahwe ifrur fa dores ro nanki. Yesus Kristus iso ḇeḇe Raja ya. Ro fafisu iwama, Yahwe nari ipyos roi ḇeḇarḇor nakam roro Karajan ine. Karajan Allah ine nari ḇyeḇepoik ro supswan ḇesiper.

Fsl. 3, par. 14

12 YESUS KRISTUS

Allah ifrur Yesus rofyor ifrur roi ḇese nakam ḇaim. Yahwe iwan Yesus ḇe supswan ine fa imarwarek faro snonkaku syakam. Rofyor Yesus ḇyeḇemun kwar, Yahwe ḇyawes i. Kirine Yesus ḇyeḇepoik ro nanki ḇe Raja ro Karajan Allah.

Fsl. 4, par. 2

13 ḆARDADI RO MINGGU RI 70

Refo ḇyardi, ikofenḇadir ḇepon, fafisu risai Mesias nari ryama. Ine na ndarirya ro papupes fafisu sap ḇe minggu ri 69, ḇyeḇerak ro taun 455 SM ma imnai ro taun 29 M.

Rariso kofawi fafisu ani imnai ro taun 29 M? Minggu ri 69 nane neḇerak ro taun 455 SM rofyor Nehemia ryama ḇe Yerusalem ma ḇyerak fa ḇyawes kaḇer mnu ḇeba ya. (Daniel 9:25; Nehemia 2:1, 5-8) Imnis raris rofyor korower wos ”lusin” na kokara ḇe angka 12, inja wos ”minggu” na kowasen ḇe angka 7. Minggu-minggu ro ḇardadi ine nkurfasnaḇa ḇe minggu ro ras ri fik ḇape minggu ro taun ri fik, namnis kuker karkor ro ḇardadi ”ras ri oser faro taun ri oser”. (Bilangan 14:34; Yehezkiel 4:6) Ine knam ya iso minggu oser kawanwan ya iso taun ri fik ma minggu ri 69 kawanwan ya iso taun ri 483 (69 x 7). Inja kokor taun ri 483 ro taun 455 SM ido, na nun ko ḇe taun 29 M. Ine iso taun rofyor Yesus ḇyebaptis ma ḇye Mesias!Lukas 3:1, 2, 21, 22.

 Ro ḇardadi ine kako ikofenḇadir minggu oso ḇese, iso taun rifik ḇese. Ro fadu fafisu ine, ro taun 33 M, Mesias na ḇyeḇemun, ma ro randak taun 36 M, ankankinem ḇeḇye ro Karajan Allah nari ḇyeḇeḇaryas ro er nakam ma faro snonkaku Yahudi monda ḇa.Daniel 9:24-27.

Fsl. 4, par. 7

 14 TRITUNGGAL FARKARKOR ḆEKAKUḆA

Refo fyarkor snar Allah Yahwe iso Manḇeḇedaw ma ifrur Yesus ḇepon rofyor ifrur roi ḇese nakam ḇaim. (Kolose 1:15, 16) Yesus ima Allah Ḇepoik Syadi risyaḇa. Ikofenḇadir ḇa snar imnis kuker Allah I. Kaku ya, ikofen, ”Snar Mami ḇeba syadi ro aya.” (Yohanes 14:28; 1 Korintus 15:28) Ḇape agama ḇeḇeso sḇuk farkarkor kuker Tritunggal, sikofen Allah iso mankun rikyor skorandum skoḇe oser: Mami, Rumkun ya ma rur ḇesren. Wos ”Tritunggal” ine nasyaḇa ro Refo ya. Ine farkarkor ḇekakuḇa rirya.

Rur ḇesren ido samamḇraḇ ḇefararur Allah ḇyedi, papoik ḇyedi komamḇa na Allah ḇyuk na fa ikfrur marisen ḇyedi. Ima mankun oso risyaḇa. Imnis raris, snonkaku Kristen ro awar randak ”sifo kuker rur ḇesren”, ma Yahwe ikofen, ”Nari Yasbawer ḇar ro rur yedi faro snonkaku sairiryakam”.Farfyar Ro Manwawansya 2:1-4, 17, NW.

Fsl. 4, par. 12; Fsl. 15, par. 17

15 APROP

Rofyor snonkaku Kristen ḇekaku sisyom ḇe Allah I, ssḇuki syom kuker aprop ya ḇa. Rosai ḇefnai ya?

  1. Aprop ya sḇukna ro ḇaḇesamsyom agama ḇekaku ḇa. Ro fafisu naiwara sḇuk na rofyor sisyom ḇe supswan ma nanki ma ro munara ḇefasnaḇair seks ya ro ḇaḇesamsyom snonkaku kafir. Ro fafisu taun ri 300 ḇerandak rofyor Yesus imar kwar, snonkaku Kristen sḇuk aprop ya ḇa ro ḇaḇesamsyom sena. Ḇarpur ya muma, Kaisar Konstantin ro Roma ifrur aprop ya fa ḇye kapkop ḇe Kristen. Kapkop ine sifrurna insama snonkaku sya sifawi agama Kristen. Ḇape aprop ya ḇyefesepen ḇa kuker Yesus Kristus i. New Catholic Encyclopedia ikofenḇadir, ”Aprop ya naisya ro budaya snonkaku sya rofyor Kristen isya ḇaim ma ro snonkaku ḇekristen ḇa.”

  2. Yesus imar ro aprop ya ḇa. Wos Yunani sefararwei na ḇe ”aprop” knam ḇekaku ya iso ”adir ḇeabyoḇer”, ”ai oso”,  ḇaido ”aiknam oso”. The Companion Bible ikofenḇadir, ”Syadiwer ro wos Yunani ro [Ḇaḇeasas Babo] nfasnaḇair ḇa ai ri suru”. Yesus imar ro adir ḇeabyoḇer oso.

  3. Yahwe imarisen ḇa fa koḇuk amfyainir ma kapkop ro ḇaḇesamsyom koḇena.Keluaran 20:4, 5; 1 Korintus 10:14.

Fsl. 5, par. 12

16 MUNARA SWARAPEPEN

Yesus iwan manfamyan ḇyesi fa sifrur munara Swarapepen faro marmar ḇyedi. Sifrurna taun ḇe taun ro 14 Nisan, oras ḇemnis kuker munara Paskah snonkaku Israel sya sifrurna. Mamami ma anggur, nḇeḇair ḇe baken ma rik Yesus ḇyedi, sirwas na faro snonkaku ḇerama ro munara Swarapepen ya. Snonkaku na ḇeḇepoik fnoḇek Yesus ro nanki siso ḇeyan mamami ma ḇeyinem anggur. Snonkaku ḇesma saneraro fa ḇekenem fyoro ro supswan sya srama ro munara Swarapepen ine snaro sesyowi na ḇape san mamami ma sinem anggur ḇa.

Fsl. 5, par. 21

17 JIWA

Ro Kitab Suci Terjemahan Dunia Baru ro edisi wos Inggris, wos ”jiwa” sḇuk na fa ḇeḇeḇair (1) snonkaku oso, (2) aiwan oso, ḇaido (3)  kankenem ro snonkaku oso ḇaido aiwan oso. Contoh ḇeḇeso isoine:

  • Snonkaku oso. ”Ro awar Nuh . . . snonkaku ḇeḇeso, isoine, jiwa ri war, dun si fa sfaspar ro war ya”. (1 Petrus 3:20, NW) Ro mnuk ine wos ”jiwa” kyur ḇe snonkaku—Nuh ma swa ḇyedi, romawa ri kyor ḇyesi ma swa sesi.

  • Aiwan oso. ”Allah ikofen, ”Iḇye kada ro war ya dori roi ḇekenem [jiwa] naisya, ma iḇye kada, ma roi ḇekenem ḇeroḇ ro boiyaswa ḇeroḇ ro supya bori ro farsyos iyaswa.” Ramnai Allah ikofen, ”Iḇye kada ro supswan ḇeḇesae roi ḇekenem [jiwa] imnis kuker syosyos ḇyena, aiwan sfanfan ya  ma aiwan ḇeis ro sop ya ma aiwan ḇeyan ḇepek ro supswan ine namnis kuker syosyos ḇyena.” Ma ḇyerarirya.”Kejadian 1:20, 24.

  • Kankenem ro snonkaku oso ḇaido aiwan oso. Yahwe ikofenḇadir ḇe Moses, ”Snonkaku syakam ḇesewar fa ḇemun jiwa bedi simar kwar.” (Keluaran 4:19) Rofyor Yesus ro supswan ine, ikofen, ”Aya ine manfarandows ḇeḇye. Manfarandows ḇyuk kankenem [jiwa] ḇyedi faro domba-domba ḇyesi.”Yohanes 10:11.

    Ḇewarpu ya, rofyor snonkaku oso ifrur roi oso kuker ”kankenem [jiwa] ḇesiper” ḇyedi, ine kyurfasna ifrurna kuker sne ḇesiper ma ḇyuk roi ḇepyum ro samambraḇ ḇyedi. (Matius 22:37; Ulangan 6:5) Wos ”jiwa” ine kako ḇyeḇeḇair faro marisen ḇaido marasrisen ro roi ḇekenem. Snonkaku ḇemar oso ḇaido ḇaken ḇemar oso nkur ḇe jiwa ḇemar oso.Bilangan 6:6; Amsal 23:2; Yesaya 56:11; Hagai 2:13.

Fsl. 6, par. 5; Fsl. 15, par. 17

18 RUR

Ro wos Ibrani ma Yunani sefararweina ḇe ”rur” ro Kitab Suci Terjemahan Dunia Baru ro edisi wos Inggris ine kyurfasna ḇe roi oser monda ḇa. Wos nane nkurfasna ḇe roi snonkaku sya smam ḇa, imnis raris wam ya ḇaido knaref ro snonkaku ma aiwan sya. Ma nkurfasna ḇe rur ro snonkaku ma rur ḇesren, iso samambraḇ ḇefararur Allah ḇyedi. Refo ya fyarkor ḇa snar ḇar oso ḇese ro snonkaku ya nari ikenem pdef rofyor imar kwar.Keluaran 35:21; Mazmur 104:29; Matius 12:43; Lukas 11:13.

Fsl. 6, par. 5; Fsl. 15, par. 17

19 GEHENA

Gehena iso snonsnon ro wandow ḇefanam ḇe Yerusalem moḇ fa srap papus na fa napromes. Fasasna oso ḇaḇeri ḇebadiro ro awar Yesus ḇyedi aiwan ḇaido snonkaku sya sewayamsi ḇaido srapsi ro moḇ ine rofyor sikenem kaker.  Inja Gehena ḇeḇeḇairḇa ḇe moḇ komamḇa moḇ snonkaku ḇemar kwar sya sewayam ma srapsi isof fyoro-fyoro ro na. Rofyor Yesus ikofen kuker snonkaku na ḇeḇesawen ḇe Gehena, ikofenḇadir kuker marmar fyoro-fyoro.Matius 5:22; 10:28.

Fsl. 7, par. 20

20 NADI RO TUAN YA

Ine iso nadi Yesus ḇyukna rofyor fyarkor manfamyan ḇyesi nyan fa senadi rai. Ine kako sapna ḇe Nadi Kma Nkoḇedi ḇaido farari ro nadi. Imnis raris, Yesus fyarkor ko fa konadi radine:

  • ”Iḇyekada ḇefasren snombri”

    Konadi insama Yahwe fyasren snonsnon ḇyedi ḇaido reputasi ḇyedi, ro anonef nakam. Inja rarirya ḇero nanki ma supswan syakam na sesyowi ma sisandik snonsnon Allah ḇyedi.

  • ”Iḇyekada Karajan bedi ryama”

    Koḇenadi insama ḇaḇesasoser Allah ḇyedi fyarmkok dunya Setan ḇeḇarḇor ine, fa ḇyepoik ro supswan ḇesiper, ma ifrur supswan ine ḇe firdaus.

  • ”Iḇyekada marisen bedi ryarirya . . . ro supswan”

    Koḇenadi insama marisen Allah ḇyedi faro supswan ine ḇyerarirya, inja snonkaku ḇesouser ma ḇemnis kaku sya nari sikenem fyoro ro Firdaus, imnis raris marisen Yahwe ḇyena faro snonkaku ro randak ya.

Fsl. 8, par. 2

21 FASASPAR

Yahwe fyasos fasaspar ya fa fyaspar snonkaku sya ro sasar ma marmar ya. Fasaspar iso ḇaḇyak ḇeba kaku fa ḇekoḇes kaḇer rosai snonkaku ḇerandak Adam, ifrur fa napromes kwar isoine kankenem snonkaku ḇemnis kaku, ma insama ifrur mnis kaḇer ḇaḇebati snonkaku sya kuker Yahwe I. Allah  iwan Yesus ḇe supswan insama imarwarek faro snonkaku ḇesasar. Snar marmar Yesus ḇyedi, snonkaku syakam sisma saneraro fa sikenem fyoro ma sḇe snonkaku ḇemnis kaku.

Fsl. 8, par. 21; Fsl. 9, par. 13

22 ROSAI ḆEFNAI FA TAUN 1914 ISO TAUN ḆEFANDUN KAKU?

Ḇardadi ro Daniel fasal ḇeḇe 4 fyarkor ḇeko Allah nari ifrur fa Karajan ḇyedi dores ro taun 1914.

Ḇardadi ya: Yahwe ḇyuk ḇe Raja Nebukadnezar ḇardadi oso roro mafafu kuker aiknam ḇeba ḇyeḇekaruk na ḇe sop. Ro mafafu ya, knam ro aiknam ani sfes i kuker besi [mankarmom] ma tembaga insama aiknam ani nasur pdef ḇa ro swaf ”fafisu ri fik”. Fafisu ya ḇyenande kwar, aiknam ani na isur wer.Daniel 4:1, 10-16.

Rosai knam ro ḇardadi ani ḇeko: Aiknam ani ḇyeḇeḇairo ḇaḇesasoser Allah ḇyedi. Ro fafisu kawan, Yahwe ḇyepoik faro er Israel sya roro raja-raja ḇero Yerusalem sya. (1 Tawarikh 29:23) Ḇape raja-raja ansi sisouserḇa, ma ḇaḇepapoik sena namnai. Yerusalem ḇyeḇemkok ro taun 607 SM. Ine iso randak ro ”fafisu ri fik”. (2 Raja-raja 25:1, 8-10; Yehezkiel 21:25-27) Rofyor Yesus ikofen, ”Nari saref apepen Yerusalem, isof fafisu er ansi sedi imnis,” ikofen kuker swaf ”fafisu ri fik”. (Lukas 21:24) Inja ”fafisu ri fik” imnai ḇaim rofyor Yesus ikenem ro supswan. Yahwe ḇyeasas fa inankow Raja oso ro papupes ”fafisu ri fik”. Ḇaḇesasoser ro Raja ḇebabo ine, Yesus, nari ḇyuk barakas ḇebor faro kawasa Allah ḇyesi ro supswan ḇesiper, isof fyoro-fyoro.Lukas 1:30-33.

Kawanwan ro ”fafisu ri fik”: Swaf ”fafisu ri fik” kawanwan ya iso taun ri 2.520. Rofyor kokor taun ri 2.520 ro taun 607 SM, na nun ko ḇe taun 1914. Ine taun rofyor Yahwe ifrur Yesus, iso Mesias i, fa ḇye Raja ro Karajan Allah ro nanki.

 Rariso kofawi karkor ro 2.520? Refo ya ikofen fafisu peser ri kyor imnis kuker ras ri 1.260. (Fasasna 12:6, 14) Inja ”fafisu ri fik” ine ido sapsaper ro angka ani, ḇaido ras ri 2.520. Ras ri 2.520 ine namnis kuker taun ri 2.520 snaro ḇardadi ya kokor ”ras ri oser faro taun ri oser”.Bilangan 14:34; Yehezkiel 4:6.

Fsl. 8, par. 23

23 MIKHAEL MANANWIR RO MALAIKAT SYA

Wos ”mananwir malaikat” knam ya iso ”ḇeḇebru ro malaikat sya”. Refo dap mananwir ro malaikat ima oser monda, ma snonsnon ḇyedi iso Mikhael.Daniel 12:1; Yudas 9.

Mikhael iso Ḇebukor ro sordade malaikat ḇesouser Allah I sya. Fasasna Faro Yohanes 12:7 ikofen, ”Mikhael kuker malaikat ḇyesi se embroḇ korḇen ani . . . kuker malaikat ḇyesi”. Syap Fasasna Faro Yohanes ikofen Ḇebukor ro sordade Allah ḇyesi iso Yesus i, inja Mikhael iso snonsnon ḇese ro Yesus i.Fasasna 19:14-16.

Fsl. 9, par. 4

24 RAS-RAS ḆEPUPES

Wos nane nkurfasna faro fafisu oso roi ḇebor ḇekur rofyor Karajan Allah fyarmkok dunya Setan ine ḇaim. Wos ḇemnis raris, ”papupes supswan ya [dunya]” ma ”raramuma ro Rumkun snonkaku” sapna ro ḇardadi Refo ya fa nkurfasna ḇe fafisu ḇemniskam. (Matius 24:3, 27, 37) ”Ras-ras ḇepupes” ḇeḇerandak rofyor Karajan Allah ḇyerak fa ḇyepoik ro nanki ro taun 1914 ma na imnai rofyor dunya Setan ḇyeḇemkok ro Armagedon.2 Timotius 3:1; 2 Petrus 3:3.

Fsl. 9, par. 5

 25 AḆIḆER

Rofyor Allah ḇyuk kankenem kaḇer ḇe snonkaku ḇemar kwar oso, ine sap ḇe aḇiḇer. Farfyar ri siw kuker aḇiḇer sfasna ro Refo ya. Elia, Elisa, Yesus, Petrus, ma Paulus sikame sifrur mujisat aḇiḇer ya. Mujisat nane ndarirya snaro Allah papoik ḇyedi. Yahwe ḇyeasas fa ḇyuk aḇiḇer faro ”snonkaku ḇenapes ma ḇenapes ḇa sya” ro supswan. (Farfyar 24:15) Refo ya kako dap aḇiḇer ḇe nanki. Ine faro snonkaku Allah kyinfir, ḇaido ḇyeramrem kwar, ḇyeḇawes si fa sikenem ro nanki fnoḇek Yesus i.Yohanes 5:28, 29; 11:25; Filipi 3:11; Fasasna Faro Yohanes 20:5, 6.

Fsl. 9, par. 13

26 SPIRITISME [DEMONISME]

Demonisme ḇaido spiritisme ido fararur ḇeḇyeḇa fa sawos kuker hantu-hantu sya, sawos ḇeri ḇaido roro snonkaku ḇese, imnis raris snonkaku ḇena mon, ḇeyuf roḇor, ḇaido ḇena manwen. Snonkaku ḇebor sifrur spiritisme snaro sikyar farkarkor ḇekakuḇa ḇekofen snonkaku ḇemar kwar sya rur seja nakenem kaker ma sḇemankun rur ḇesambraḇ kaku. Hantu-hantu sya sawyae snonkaku sya fa sisouser Allah I ḇa. Astrologi, kinsasor, mawe, fawawar ḇefesepen kuker hantu-hantu sya, iso ḇar ro spiritisme ya. Syap nabor, majalah, fasfas kuker kinsasor, felem, sonin ḇefasnaḇair hantu-hantu sya, ibasyadiwer rakrok musik ma doya nafnai snonkaku sya simkakḇa faro hantu-hantu ḇaido fararur ḇefesepen kuker hantu-hantu sya ḇeḇemam ḇe roi ḇeyun marisen. Nyan sikram snonkaku ḇemar sya imnis raris sifrur tiga malam, sikapnik sibrusna, spam padamara ḇaido siwaren snonkaku ḇemar sya, siwawos kuker hantu-hantu sya. Snonkaku sya sḇuk aryawen fa sḇensewar fa sisma samambraḇ ro hantu-hantu sya.Galatia 5:20; Fasasna 21:8.

Fsl. 10, par. 10; Fsl. 16, par. 4

 27 ḆAḆEPAPOIK YAHWE ḆYEDI

Yahwe iso Allah Ḇepoik Syadi, ma iḇedaw supswan ma farsyos ḇesiper. (Fasasna Faro Yohanes 15:3) Inja Iso Ḇena roi nakam ma nya ḇaḇepapoik, ḇaido samambraḇ ḇeba kaku fa ḇyepoik faro braur bramin ḇyena kam. (Mazmur 24:1; Yesaya 40:21-23; Fasasna Faro Yohanes 4:11) I ḇefrur sasoser faro roi nakam ifrur kwarna. Yahwe ikako nya papoik fa inankow snonkaku ḇese fa ḇyepoik. Kosonem ḇaḇepapoik Allah ḇyedi kuker koswar I ma kosouser I.1 Tawarikh 29:11.

Fsl. 11, par. 10

28 ABORSI

Aborsi iso smun kaku romawa ro sne kapar rofyor ḇyewar kaker, ḇefnai fa romawa ḇeḇeaben ḇaim ya imar. Ine iso snar bin oso isma roi ḇemun ḇa imnis raris isapi ḇaido sne kapar ḇyedi nako ḇa. Inja ro randak fyadores, romawa dores ya ima ḇar ḇese ro snari ḇaken ḇyedi monda ḇa. Romawa ani iso mankun oso ḇese.

Fsl. 13, par. 5

29 TRANSFUSI RIK

Ine iso nyan ro rum ḇeduf fa sisun rik ya ḇaido oser ro ḇar ri fyak ḇefandun kaku ro rik ro snonkaku ḇese ḇaido rik mankun sena sikram na, sisun na ḇe baken snonkaku oso. Ḇar ri fyak ḇefandun kaku ro rik ya iso plasma, sel rik ḇerik, sel rik ḇepioper, ma keping rik ya.

Fsl. 13, par. 13

 30 DISIPLIN

Ro Refo, wos ”disiplin” ine wos ḇese ro samamyai monda ḇa. Rofyor kosma disiplin ido, na sfarkin ko, sfarkor ko, ma sesonek ko. Rofyor Yahwe ḇyuk disiplin faro snonkaku sya ḇyuk kuker masasor ḇa ḇaido ḇye rarmomen ḇa. (Amsal 4:1, 2) Yahwe ḇyuk farari ḇepyum faro sinan sya. Disiplin Yahwe ḇyukna na nun fainda faro snonkaku oso rofyor imarisen isma disiplin. (Amsal 12:1) Yahwe iswar kawasa ḇyesi, ma fyarkor si. Ḇyuk farkankin ḇesi fa sifrur mnis swaruser ḇeḇyeḇa sena ma ifnoḇek si insama rosai skarana ma sifrurna nun marisen ḇe I. Faro sinan sya, disiplin iso mkofnoḇek romawa sya fa sifawi kaku rosai ḇefnai fandun fa sisoasuser. Ine kako kyurfasna fandun fa mkofarkor si fa siswar Yahwe I, Wos ḇyedi, Refo ya, ma sifawi wos-wos ḇefarkin ḇero do na.

Fsl. 14, par. 13

31 HANTU-HANTU

Mankun rur komamḇa, ḇemaḇak ma sna samambraḇ ḇeba syadi ro snonkaku. Hantu-hantu sya siso malaikat ḇeḇarḇor. Sḇemalaikat ḇeḇarḇor rofyor sifrur mankun si ḇe ḇeḇembroḇ faro Allah kuker sisouser I werḇa. (Kejadian 6:2; Yudas 6) Siryur kuker Setan i fa sḇembroḇ Yahwe I.Ulangan 32:17; Lukas 8:30; Farfyar 16:16; Yakobus 2:19.

Fsl. 16, par. 4