Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 41

Daud ma Saul

Daud ma Saul

Daud myun Goliat raposa, Raja Saul ḇye Daud i fa fyarkin sordade ḇyesi. Ro mamamun ḇebor Daud ismai payamyum, ma ḇye snonsnon. Rofyor ibur ro mamamun na, ḇar binsya siseri ḇo sifyer ma sidisen, ’Saul myun syaran, mboi Daud myun syaran samfur risamfur!’ Saul sne dosam Daud i ma syewar fa myun i.

Daud ifawi ifnak pyum harpa. Ras oso, fyor Daud ifnak harpa ḇe Saul i, Saul iso Daud i kuker bom ḇyedi. Daud ikrenburi inja bom ani ḇyeḇepai epen ro ayar. Fafisu ani mura, Saul syewar swaf ker fa myun Daud. Inja, Daud ifrarbur ma iyokef mankundi ro moḇ ḇeursḇa.

Saul dun sordade ri 3.000 fa siyawuser Daud i. Ifawi ḇa boi isun ḇe  abyaḇ moḇ Daud ma ḇeso i sya siyokef ro ya. Snon ḇeso Daud sya sawos fasis, ’Ine swaf ḇe au fa mun Saul i.’ Daud imbran fanam fasis ḇe Raja Saul ma kyaruk pusyo syatu ḇyedi. Ḇape, Saul ifawina ḇaḇeri. Mura, Daud kyara ifrur sasar kwar snar ḇyesyowi ḇa raja Yahwe ryem kwar ya. Daud idwarek ḇeso i sya fa smun awer Saul. Fafisu Saul isae mura, Daud dori ma ikofen ḇe i kerower myun Saul i kwar snar ismai swaf fa ifrur na. Na Saul imnai fa iyawuser Daud i ke?

Oroḇa. Saul iyawuser ker i. Roḇ oso, Daud ma Abisyai fno ḇyedi susun fasis ro Saul rum kruḇen ḇyedi. Abner, Saul manwarek ḇyedi denef kaku. Abisyai doḇe, ’Ine swaf ya! Ḇe fa yamuni mura.’ Daud kyarem, ’Iso Yahwe ḇar ḇyedi. Kun monda bom ma rosaser ḇyedine ḇo kubur.’

Daud dek ḇe bon ḇefanam Saul rum kruḇen ḇyedi. Dar naba ḇo doḇe, ’Abner e, mam warek Raja bedi ḇa ke? Rodiso raja Saul bom ma rosaser ḇyesuya?’ Saul ifawi ima Daud mkarem ḇyedirya inja ikofen, ’Yafawi bisa mun aya, mboi mun aya ḇa. Yafawi na ḇe raja Israel ḇeuser ya.’ Saul kyaḇer ḇe istana ḇyeja. Ḇape, Saul kina ḇyesi syakam ḇa ḇeyayin Daud i.

”Ro ḇar mkoḇedi, mkosewar fa mkokenem kuker aski faro snonkakusya kam. Naek srar yesi! Mkomunsu awer swarapepen mkadu, snar Allah nari ḇeḇuk samamyaiya.”​—Roma 12:18, 19