Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

FARKARKOR 45

Karajan ya Ḇyeḇerwas

Karajan ya Ḇyeḇerwas

Fafisu Salomo isouser faro Yahwe I, snonkaku Israel sikenem kuker aski. Ḇape, Salomo fyarḇuk kuker bin ḇeramaker sup ḇese, ḇesyom ḇe amfyanir sya. Fawawas mura, Salomo kenem ḇyedi ḇyeḇefadwer, ma daksyom amfyanir kako. Yahwe imsor kaku. Ikofen ḇe Salomo i, ’Nari sun karajan Israel bur kina bedi ma ḇyeḇerwas ḇe suru. Nari yaḇuk ḇar ḇeba ya faro oso ro manfamyan ḇyesi, ma kina besi nari sḇepoik faro ḇar kasun ya monda.’

Yahwe ḇyuk nyan ḇese kako fa ikofenḇair snemuk Ḇyeja. Oso ro Salomo manfamyan ḇyesi, Yeroboam, isrow kuker Nabi Ahiya ro sampak ya. Ahiya pyansawek syatu ḇyeja ma irwasna ḇe 12 ḇo ikofen ḇe Yeroboam, ’Yahwe nari dun karajan Israel bur Salomo kina ḇyedi ma ḇyeḇerwas ḇe suru. Wun ḇar risamfur nane snar auso nari ḇepoik ḇe raja faro keret risamfur.’ Raja Salomo ryower roi ine ma imbe myun Yeroboam i! Inja Yeroboam ifrar ḇe Masir. Rofyor Salomo imar kwar, romawa ḇyedi, Rehoboam, ḇyepoik ḇe raja. Yeroboam kyaḇer ḇe Israel snar kyara na ismai roi ḇemun werḇa. 

Manfarkin ḇero Israel sya sikofen ḇe Rehoboam, ’Wafrur pyum kawasa ansi ido, nari sisoasuser faro au.’ Ḇape, Rehoboam bati ḇyesya ḇebabo kaker sya soḇo, ’Wafrur pyum awer si! Wawan si fa sifararur marḇak syadi wer!’ Rehoboam iso bati ḇyesya anun sena. Irarmomen faro snonkaku Israel sya. Inja, kawasa ḇero keret risamfur ansi seḇembroḇ i. Skur Yeroboam i fa ḇe raja faro keret risamfur, ḇarpur ya sap iḇe karajan Israel. Keret risuru ḇese suya sap iḇe Karajan Yehuda, ma sisoasuser faro Rehoboam i. Keret ri 12 ro Israel seḇerwas kwar.

Yeroboam imewer kawasa ḇyesya sḇenadi ro bait ḇero Yerusalem, ro mob Rehoboam ḇyepoik ro ya. Wafawi ke rosai ḇefnai ya? Yeroboam imkak na sisoasuser faro i werḇa ma sisonemser Rehoboam i. Inja, ifrur ro brawen sapi mkun risuru ma ikofen, ’Yerusalem ḇyinkwan kaku. Mkoḇenadi mura ro dine.’ Rarirya kawasa ansi sisyom sapi mkun brawen ma siḇefnder Yahwe I wer.

”Mkoḇe oser awer kuker snonkaku ḇekyar ḇa sya, snar napnapes ma ḇaḇeyuk suma sumnis ke?  . . . Ḇaido, snonkaku ḇekyar ma ḇekyar ḇa sya simnis ke?”​—2 Korintus 6:14, 15, Terjemahan Dunia Baru.