Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 49

Ratu Ḇeḇarḇor Ismai Samamyai

Ratu Ḇeḇarḇor Ismai Samamyai

Ro kekḇir ro istana ḇyedi ro Yizreel, Raja Ahab myam snon oso ḇenir ḇe Nabot yaf anggur ḇyedi. Ahab sneri ryo yaf angur anya inja syewar fa kyoḇes na. Ḇape, Nabot imewer ḇyoḇna snar ro Yahwe Sasoser Ḇyena, idwarek snonkaku oso fa ḇyoḇ rarwas saprop ismai na. Inja Nabot ifrur roi ḇekaku ya. Ahab ḇyesyowi snemuk ḇyenane ke? Oroḇa. Ahab imsor kaku rawo imewer isae ro sim ḇyedi ma imewer inandi.

Ahab swari, Ratu Izebel ḇeḇarḇor anya, ikofen ḇe i, ’Auma raja Israel disau. Na wasmai rosai monda wamarisen na. Nari yun yaf anya ḇe au.’ Izebel fyas syapram ḇe manfarkin ḇero mnu ani sya. Iwan si fa sḇuk safsof faro Nabot ḇekofen ifras Allah I kwar ma ssoi kuker karui isof imar. Manfarkin ansi sifrur rosai Izebel ikofen ḇe si na. Mura Izebel ikofen ḇe Ahab, ’Nabot imar kwar. Kirine yaf anggur anya nwana.’

Izebel myun Nabot i monda ḇa. Myun kako snonkaku ḇebor ḇeswar Yahwe I sya. Isyom faro amfyanir ma ifrur roi ḇeḇarḇor ḇesena. Yahwe myam roi ifrur nanekam. Rosai na Yahwe ifrur faro i?

Ahab imar kwar mura, Yehoram romawa ḇyedi ḇyeraja fadwer i. Yahwe iwan snon oso snori Yehu fa ḇyuk samamyai faro Izebel ma kina ḇyesi.

Yehu dek kereta ḇyedi ma ifrar ḇe Yizreel, moḇ Izebel ḇyarek ro ya. Yehoram ryama kuker kereta ḇyedi fa isrow Yehu ma ifuken, ’Aski isya rofandu ko ke?’ Yehu doḇe, ’Na aski oḇa fafisu snami, Izebel ifrur roi ḇeḇarḇor pdef.’ Yehoram pyambar  kereta ḇyedi ma syewar fa ifrarbur Yehu i. Ḇape, Yehu ḇyuk ikoi oso fa ḇyukikfo Yehoram i ma imar.

Mura Yehu rya ḇe Izebel istana ḇyedi. Fafisu Izebel ryower Yehu isyamuma, fyamankor mkasi, ifrur mnis pik ḇyena, ma iwaf ro kekḇir ḇero boya. Rofyor Yehu ifyafer, Izebel dawos masasor yoḇ i. Yehu dar naba faro Izebel manfyan ḇyeskoya ḇeyores ro ris ḇyedi, ’Mkosawen i murḇaḇ!’ Skopampum Izebel ro kekḇir anya ḇe bandiya, ma isapi ḇe saprop ma imar.

Fafisu ani ramnai, Yehu myun Ahab romawa ri 70 ḇyesi ma ipyos ḇaḇesamsyom faro amfyanir ro sup ani ḇesiper. Na mam ke, Yahwe ifawi roi nakam ma ro fafisu ḇemnis ya ḇyuk samamyai ḇe snonkaku ḇeḇarḇor sya?

”Randakya snonkaku ḇenambri ismai waris raryano, waris ismai anya nari nḇe barakas ro ḇarpurya ḇa.”​—Amsal 20:21