Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 32

Manfarkin Ḇebabo ma Bin Ḇebri Risuru

Manfarkin Ḇebabo ma Bin Ḇebri Risuru

Yosua fyarkin Yahwe kawasa ḇyesya ro swaf taun ḇe taun kwar mura, imar fafisu ḇyeumur taun ri 110. Ro ras-ras kankenem ḇyedikam, snonkaku Israel sisoasuser faro Yahwe I. Ḇape, rofyor Yosua imar kwar, saksyom faro amfyanir, raris snonkaku Kanaan sya. Iso ḇefnai fa Yahwe myam monda raja Kanaan, Yabin, ifrur kandera si. Snonkaku Israel sor fafnoḇek ro Yahwe I. Inja Yahwe ḇyuk ḇe si manfarkin ḇebabo, isoine Barak. Nari ifnoḇek snonkaku Israel fa sikaḇer ḇe Yahwe I.

Bin ḇeyuf farmyan ḇe nabi snoriso Debora, ikofenḇair Yahwe anun ḇyeja faro Barak, ’Wun snon ri 10.000, ma mkora mkomamunmun Yabin sordade ḇyesi ro Warḇeki Kisyon. Ro diwa, na mkofrur kafyo Sisera, manfarkin ro Yabin sordade ḇyesi.’ Barak doḇe, ’Nari yara mboi waso aya kada.’ Debora ikofen, ’Na yaso au ḇae. Ḇape, auso na ḇemun Sisera i ḇa. Yahwe ikofen nari bin oso iso ḇemun i.’

Debora rya fnoḇek Barak ma sordade ḇyesi ḇe Bon Tabor fa sifrur fasasos faro mamamun. Rofyor Sisera ryower na, iryur  kereta mamun ma sordade ḇyesi ro wandow ḇero bon ani. Debora ikofen ḇe Barak i, ’Ras ine Yahwe nari ḇyuk payamyum ḇe mko.’ Barak ma sordade ri 10.000 ḇyesya sado ro bon ani fa smamunmun kuker Sisera sordade ḇyesya ḇesambraḇ kaku.

Yahwe ifrur Warḇeki Kisyon isyap, inja Sisera kereta mamun ḇyesi siwarai ro marser ya dori. Sisera ibur kereta ḇyedi ma ifrar beri. Barak ma sordade ḇyesi sifrur kafyo Sisera sordade ḇyesya kwar, mboi sismai Sisera i ḇa! Iyokef ro bin oso snoriso Yael rum kruben ḇyedi. Bin ani ḇyuk sus fa dinem mura ikawef i kuker srei. Sisera denef moser kaku snar imbruse. Ramnai, Yael imbran fasis fanam ḇe i ma ipai bruri kuker asyonem ro rum kruḇen. Sisera imar bos beri.

Barak ryama fa isewar Sisera. Yael isae ro rum kruḇen ḇyedi ma doḇe, ’Swun. Imbe yafasnai snonkaku wasewar i.’ Barak syun ma myam mboi Sisera imar kwar. Barak ma Debora sudisen susandik Yahwe I, snar ifrur snonkaku Israel sismai payamyum kwar. Fafisu taun ri 40 nawas mura, Israel kyain kuker aski pdef.

”Ḇar bin ḇeḇaryas ankankinem ḇeḇye sya siso sordade ḇeba kaku.”​—Mazmur 68:11