Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 28

Bileam Keledai Ḇyedi Dawose

Bileam Keledai Ḇyedi Dawose

Snonkaku Israel sro sup ḇeursḇa indokada fafisu swaf taun ri 40 kwar. Sifrur kafyo kota ḇebor kwar. Kirine, sifrur rum kruben fa sḇarek ro sup Moab ḇero ḇar wamurem Warḇeki Yordan. Kerower na sisun ḇe Sup Ḇaḇeasas ya. Balak, raja Moab, imkak na sifrur kafyo sup ḇyedi. Inja, dor snon oso snoriso Bileam fa ryaḇe Moab fa ifras snonkaku Israel sya ḇaido dawos wos ḇeḇyeḇa yoḇ si.

Ḇape Yahwe ikofen ḇe Bileam, ’Wapok wafras awer snonkaku Israel sya.’ Inja, Bileam imewer ryandi. Raja Balak dor i wer ma ḇyeasas nari ḇyuk rosai monda imarisenna. Ḇape, Bileam pyampumi. Mura, Allah ikofen, ’Imbe rwa ido, na wawosḇair rosai yakofen ḇe au na monda.’

Bileam dek ro keledai ḇyeja fa rya ḇe Moab. Yahwe idwarek i kwar, mboi nya aw kaker fa ifras snonkaku Israel si. Yahwe malaikat ḇyedi fyasnai mankundi ro sampak ya rarwan rikyor. Bileam jadi fa myam malaikat ani ḇa, mboi keledai ḇyedi myami. Ḇepon ya, keledai ani imbran ro nyan ḇese ḇeyun ḇe yaf na. Mura, keledai ani isnefer ḇe padwar karui, pyanepen Bileam wesi ro karui na. Ḇepur ya, keledai ani kyain ḇe sop ro sampak ya. Bileam iprer ker keledai ani kuker ankyon.

Iprer keledai ani rarwan rikyor raposa, Yahwe ifrur fa keledai ani dawos imnis mkaren snonkaku. Keledai ani ifuken faro Bileam, ’Waprer aya ker snaro?’ Bileam doḇe, ’Wafnakser aya mankenem. Yana sumber ḇeba ido, yamunbos au kwar.’ Keledai ani ikofen ḇo doḇe, ’Yun au ro swaf taun ḇe taun kwar. Ras oso yakfrur rarirya yoḇ au ke?’

Ramnai, Yahwe ḇye Bileam i fa myam malaikat ani. Malaikat ani doḇe, ’Yahwe idwarek au kwar fa wafras awer snonkaku Israel sya.’ Bileam ikofen, ’Yasasar kwar. Na yabur mura.’ Ḇape,  malaikat ani ikofen ḇo doḇo, ’Ḇye kwar wara ḇe Moab mura, ḇape wasasor au fa wawosḇair rosai Yahwe ikofen ḇe au na monda.’

Bileam isouser ke? Oroḇa. Fyorya raposa, Bileam isewar fa ifras snonkaku Israel rarwan rikyor. Ḇape, Yahwe fyadwer fafras anna ḇe barakas faro snonkaku Israel sya. Ḇarpur ya, snonkaku Israel smamunmun Moab, ma Bileam ḇyeḇemun. Bileam isouser faro Yahwe ro randak ya ido, na ismai roi ḇeradine ke? Na oroḇaḇeri.

”Mkosasor mko ro mnuk rmomenya, snar snonkaku oso nana ḇyena nabor rariso wer kankenem ḇyedi ḇyeknam ro nana ḇyenaḇa.”​—Lukas 12:15