Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 14

Women Ḇesouser faro Allah

Women Ḇesouser faro Allah

Yusuf ima Yakub roma ḇyedirya kako, nya i rofyor ḇyesinan kwar. Ḇeba ḇyesi smam mboi kma sedine iswar syadi Yusuf i. Wakkara ido, moḇsa Yusuf ḇeba ḇyesi smam i rai? Sfafayaf ma sedosam i. Fafisu oso, Yusuf myafu roi ḇefrur fa ikmom, mura fyawar na faro ḇeba ḇyansya. Doḇe myam ro mafafu ḇyana mboi nari naek ḇyansine sḇansuba faro i. Roi nane nafnai fa sedosam syadi i wer!

Ras oso, Yusuf ḇeba ḇyansine smamwarek domba ro moḇ ḇefanam mnu Syikhem. Yakub iwan Yusuf i fa rya myamfar si fa ifawi sḇero payamyum monda ke roḇa. Rofyor Yusuf imbran fanam si ḇaim, sawos ḇo soḇe, ’Komam mura, snon ḇemafafu ani iso ḇembran iyama. Indo komun i!’ Siyer i ma sisawen i ro der ḇedo kaku. Mboi, ḇeba ḇyedi oso ḇenir ḇe Yehuda, doḇe, ’Mkomun awer i! Koḇoḇ i fa ḇyewomen monda.’ Inja, sḇoḇ Yusuf i faro manfarḇaḇyan Midian ḇeraḇe sup Masir kuker ḇaḇyak kumpan sarak ri 20.

Ramnai, sisowen Yusuf sansun ḇyeja ro kambing rik ḇyena ma sfarem na ḇe kma sedi, ma soḇe, ’Kamam mampan ari, roma bani sansun ḇyediso ine ke?’ Inja, Yakub doḇerada aiwan ḇeyan ḇepek smun i kwar. Yakub ḇyesaneso fafayaḇa, ma osoḇaḇeri jadi fa ḇyuk sneprei ḇe i.

Ro sup Masir, sḇoḇ Yusuf i faro ḇebarara ḇenir ḇe Potifar fa ḇyewomen faro i. Mboi, Yahwe ryous Yusuf i ḇesya kwar. Potifar myam mboi Yusuf fyararur myaren ma ikyar i. Mura, Potifar kyur Yusuf i fa myamwarek nana arasai ḇyena kam.

 Potifar swari myam mboi Yusuf ipduk kaku ma idoser. Ras ḇe ras dor ker Yusuf i fa denefus i. Rosai Yusuf ifrur ya? Pyampum i ḇo doḇe, ’Yamewer! Ima roi ḇesasar nairi. Tuan yedi ikyar aya, ma auma swa ḇyedisau. Yenefus au ido, na yafrur sasar faro Allah!’

Ras oso, Potifar swari idif Yusuf i fa denefus i. Pyaw Yusuf sansun ḇyeja, mboi Yusuf ifrar ibur i. Rofyor Potifar ibur ḇe rum, swari dankar i ḇo doḇe Yusuf imbe ifrur farḇuk kuker i. Potifar imsor fafayaḇa ma iwan fa sisun Yusuf i ro bui. Mboi, Yahwe ḇyefnder Yusuf i ḇa.

”Eḇedari rwun mankundaw faro Manseren ḇramin ḇesambraḇ ḇyesuya, insa ikanow mko rofafisu ḇyedi.”​—1 Petrus 5:6