Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 97

Kornelius Ismai Rur Ḇesren

Kornelius Ismai Rur Ḇesren

Ro Kaisarea, mambri sarar Romawi oso snori Kornelius. Ima snonkaku Yahudi risyaḇa, ḇape snonkaku Yahudi sya sesyowi i. Imarisen ḇyuk fafnoḇek ḇe snonkaku ḇena roi noḇa sya. Kornelius ikyar faro Yahwe I ma ḇyenadi ḇe I ḇesya kwar. Ro ras oso, malaikat isrow kuker Kornelius i ma ikofen ḇe i, ’Allah ryower nadi Bena kwar. Kirine wawan snonkaku oso ḇe Yopa, moḇ Petrus ḇyarek ro ya. Wor i fa ryamuma ḇe dine.’ Kornelius iwan snonkaku rikyor ḇe Yopa, moḇ ḇeḇeswaf kilometer ri 50 ro moḇ skoḇedi.

Ma fafisu ani ro Yopa, Petrus ismai fasasna oso. Myam aiwan-aiwan snonkaku Yahudi sya sipok fa san ḇa si. Ro dia ryower mkarem oso ḇewan i fa dan si. Petrus imewer ma ikofen, ’Aiwan ḇefor sine yakan ḇaḇeri si.’ Mkarem ani ikofen wer, ’Wap awer aiwan sine ḇe roi ḇefor. Snaro Allah ifrur si fa se roi ḇefor ḇa kwar. Ikofen ḇe Petrus i kako, ’Snon rikyor skoisya skores ro rum bedi ḇarpondi. Rwamura waso sko.’ Mura Petrus syaye fa isrow ma ifuken sko rosai ḇefnai fa skora muma ya. Soḇe,  ’Kornelius, mambri sarar Romawi iso ḇewan inko muma ni. Dor fa naek waramura ḇe rum ḇyeja ro Kaisarea.’ Petrus dor sko fa skenef ro rum ḇyeja roḇ anya ari. Meser ya, insape Petrus ma snonkaku Kristen riḇeḇeso ro Yopa siso snon ansya ḇe Kaisarea.

Fyor Kornelius isrow Petrus i, ḇyansuḇa ḇeri ro ḇarpon ḇyedi. Imboi Petrus doḇe, ’Wores! Aya kako snonkaku ra Au. Snonkaku Yahudi jadi fa sraḇe snonkaku ro er ḇesesya rum sena ḇa, mboi Allah iwan aya fa yarama ḇe rum Bedi. Wakofenḇair rosai ḇefnai fa wor aya ḇe dine.’

Kornelius ikofen, ’Ras rifyak aniwara, fyor yaḇe nadi, malaikat oso isya ikofen insama yor au. Farkor pyan inko Yahwe wos Ḇyena.’ Mura Petrus ikofen, ’Kirine insape yafawi Allah myam farfir ḇa. Imarisen mansei monda sisyom faro I.’ Petrus fyarkor nabor kaku Yesus nyan ḇyena ḇe si. Ḇarpur mura Kornelius ma kina ḇero rum ḇyesya kam sismai rur ḇesren ma sebaptis.

”Snonkaku oser-oser ro er rosairya kaker, ḇeyararyof ma ḇeḇesyowi Allah kuker napnapes imarisen si.”​—Farfyar 10:35