Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 99

Ḇemamwarek Bui Dakḇe Kristen

Ḇemamwarek Bui Dakḇe Kristen

Ro Filipi, infyan oso rur ḇeḇyeḇa isower i. Rur ḇeḇyeḇa ani ifrur i fa dakfawi dakḇekinsor. Fararur ine nafrur tuan ḇyedi nya pipi sibore. Fafisu Paulus ma Silas suro Filipi kwar, infyan ani iso su ro ras ḇe ras. Rur ḇeḇyeḇa ani ifrur i fa ifyow naba ma ikofen, ”Snonkaku sine ido Allah ro Moḇ ḇekaki manfamyan ḇyesirya.” Mura Paulus ikofen ḇe rur ḇeḇyeḇa ani, ’Kuker snonsnon Yesus, swae ro bin ine!’ Rur ḇeḇyeḇa ani syae ḇeri.

Rofyor tuan-tuan ḇena infyan ani sfawi na sna pipi ro i werḇa, mura simsor kaku. Sun Paulus ma Silas su ḇe ḇebarara sya ma sikofen, ’Snonkaku sine sekdofen sasoser ma sufrur fa snonkaku ḇero mnu ḇeba ine ḇesiper siknon ḇa!’ Ḇebarara ansi siwan fa smun Paulus ma Silas su ma sisun suro bui. Ḇemamwarek bui ani isun suro bui ḇedo ma ḇepampam kaku, ramnai fyesepen wemin suḇena kuker apyaur.

Ro roḇ oso Paulus ma Silas sudisen susandik Yahwe I, ma eḇese ḇesmai kako sya srower sudisen. Ro romfawru ya, saprop imer fafayaḇa ro bui ani kam. Kedwa-kedwa ḇero bui ani kam nbase. Inja rantei ma apyaur sikfesepen su ani namuk. Ḇemamwarek bui ani syun ma myam kedwa annakam nbas kwar. Kyara ḇesmai ansine sifrar sibur kam kwar, inja dun sumber oso ma imbe ḇyukmun mankundi.

Paulus dor naba ḇo ikofen, ’Mun awer mankundaw! Nkokam nkosya rodine!’ Ḇemamwarek bui ani byansuba ro ḇarpon Paulus ma Silas. Ifuken ḇe su, ’Rosai yafrur kaku insama yasmai fasaspar ya?’ Sukofen, ’Au ma kina Bedi fandun fa mkokyar ḇe Yesus i.’ Ramnai Paulus ma Silas sufarkor si Yahwe wos Ḇyena.  Ḇemamwarek bui ani ma kina ḇyesya kam sebaptis.

”Nari sfor mko ma sewayammko; nari skukeḇ mko ro rum nadina ma mkosun ro bui, ma nari sun mkoḇe ḇarpon kankain wairek-wairek ma ḇesma papoik sya snar snonsnon ayedi. Inja roi nane nefafisu faro mko fa mkoḇuk ḇaryas Ankankinem Ḇeḇye ro Allah.”​—Lukas 21:12, 13