Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 87

Paskah Ḇepupes ro Yesus I

Paskah Ḇepupes ro Yesus I

Ro taun ḇe taun, snonkaku Yahudi sya sifrur Paskah ro ras ḇeḇe 14 paik Nisan. Ras ani ḇyuk swarapepen ḇe si fafisu Yahwe dun si fa sisae ro Masir sup sewomen si ro ya, ma sra ḇe sup Yahwe Ḇyeasas ya. Ro 33 M, Yesus ma manfamyan ḇyesya skofrur ras Paskah ro sim ḇero bo rum oso ro Yerusalem. Fyor skonan ramnai, Yesus ikofen, ’Oso ro mko nari ḇyoḇ aya.’ Sikandor ma sifuken, ’Mansei ḇefrur rariryani?’ Yesus kyarem ḇo doḇo, ’Snonkaku nari yaḇuk mamami ine ḇe i.’ Ramnai, ḇyuk mamami anya ḇe Yudas Iskariot i. Ro dia Yudas dores ma syae bur sko.

Ramnai Yesus inadi, ma pyanis mamami ani ma irwas na ḇe manfamyan ḇerous i sya. Ikofen, ’Mkan mamami ine. Snaro ine fyasnai faro baken yedi, nari yaḇuk ḇe farsarser ḇe mko.’ Ramnai inadi wer, ma ḇyuk anggur ḇe manfamyan ḇyesi. Ma ikofen ḇe si, ’Mkinem anggur ine. Snar ine fyasnai faro rik yedi, insama sasar snonkaku sya neḇepyos. Yakofenḇair ḇe mko, nari mkoḇe raja kuker aya ro nanki. Inja ro taun ḇe taun, mkofrur radine fa mkokswarepen aya.’ Isof ro kirine Yesus manfamyan ḇyesya sifrur ras ani ro taun ḇe taun ro  ras 14 Nisan. Ras anya sifawi i ḇe Anan ro Roḇ kuker Tuan.

Ramnai, manfamyan ḇyesine sfamfaḇri mansei ḇeba syadi ro si. Ḇape Yesus ikofen, ’Mansei ḇekara ḇeba syadi ro mko ido, iso ḇekasun ya.

’Mkoma bati yesi mko. Inja rosai monda Mami ikofen ḇe Aya na yakofenḇair na kako ḇe mko. Kerower yakaḇer ḇe Mami ro nanki. Mkoma mkoro dine pdef, ma snonkaku ḇesesya na sifawi mkoma manfamyan yesi mko rofyor mkoswaryae mko. Imnis ra yaswar mko, mko kako mkoswaryae mko.’

Ḇepupes ya, Yesus inadi insama Yahwe myamwarek manfamyan ḇyesya kam. Dor insama Yahwe ifnoḇek si fa sifararur kayam pyum. Inadi kako insama Yahwe snonsnon Ḇyedi ḇyefasren. Raposa, Yesus ma manfamyan ḇyesine sidisen sisandik Yahwe I ma sisae ro rum ani. Kerower nari sfor Yesus i.

”Naek ḇeborḇa mko, mkomkak awer! Snar Kma mkoḇedi imarisen ḇyuk faro mko [Karajan] ani.”​—Lukas 12:32