Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 73

Yohanes Ikofenḇair Mesias Rarama Ḇyedi

Yohanes Ikofenḇair Mesias Rarama Ḇyedi

Zakharia ma Elisabet romawa suḇedi Yohanes i, ḇye nabi fafisu iba kwar. Yahwe iwan Yohanes i fa ikofenḇair ḇe snonkaku sya kuker Mesias rarama ḇyedi. Fyarkor si ro mnu ḇeba ma rum nadi ḇa. Mboi ḇyuk farkarkor ro sup ḇerursḇa. Snonkaku ḇero Yerusalem ma Yudea srama fa sakrower farkarkor ḇyena. Ikofen yoḇ si fyor simnai fa sifrur roi ḇeḇyeḇa ido, nari Allah imarisen. Srower farkarkor ḇyena mura ḇebor sya simbror ḇeri ro sasar sena, ma ḇyebaptis si ro Warḇeki Yordan.

Yohanes nya mnis roi noḇa. Sansun ḇyena ro onta ḇur, ma roḇeyan ḇyena kampam ma madu. Snonkaku imbe sifawi kaku mansei Yohanes i. Snonkaku Farisi ma Saduki ḇeyararer ansi srama fa sisrow kuker i. Inja, Yohanes ikofen yoḇ si, ’Mkofadwer kenem mkoḇena ma mkombror. Mkoḇerada mkoma Abraham romawa ḇyesi mko, inja Allah na dap mkoḇe romawa ḇyesi, na rariryaḇa.’

Snonkaku ḇebor sya srama ḇe Yohanes ma sifuken i, ’Rosai nkofrur kaku ya insama Allah imarisen?’ Yohanes kyarem ḇo doḇo, ’Mkosmai sansun ḇesam risuru ido, mkoḇuk oser ḇe snonkaku ḇefandun sya.’ Rosai ḇefnai fa ikofen rariri? Imarisen insama siswar snonkaku ḇesesya.

Yohanes ikofen ḇe ḇeyor som ansine, ’Mkofrur mnis fararur anine, ma mkankar awer snonkaku sya.’ Ikofen ḇe sordade sya, ’Sḇuk roino kuker nyan ḇeḇyeḇa ido mkun awer na, ḇaido mkankarkar awer.’

 Imam ma snonkaku Lewi sya kako srama ḇe Yohanes i ma sifuken, ’Au ido manseisau kaku? Snonkaku syakam imbe sfawi au.’ Yohanes kyarem ḇo doḇe, ’Aya iso ḇekofenḇair ḇe snonkaku sya ro sup ḇerursḇa, ma ḇefnoḇek snonkaku sya fa sakfawi Yahwe I raris Nabi Yesaya ikofen kwar na.’

Snonkaku sya simarisen kaku faro Yohanes farkarkor ḇyena. Ḇebor sya sifakfuken ima Mesias kaku dirya ke roḇa. Ḇape Yohanes ikofen ḇo doḇe, ’Snonkaku ḇeba syadi ro ayanya nari ryama. Roi syoḇer ro wemin ḇyeja monda jadi fa yaper si ḇa. Yaḇebaptis kuker ware, ḇape ima ḇyebaptis kuker rur ḇesren.’

”Yohanes ryama imnis saksi fa ḇyesaksi sasna ani, insa snonkakusya kam sikyar.”​—Yohanes 1:7