Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 61

Skomewer fa Skoḇansuba

Skomewer fa Skoḇansuba

Fyoroḇa rofyor Raja Nebukhadnezar ismai mafafu ḇekur amfyanir anya raposa, ifrur amfyanir ḇeba oso ro brawen. Ryir amfyanir anya ro Dataran Dura. Mura, iwan snonkaku bena nasan sya fa siryur ro diwa, Syadrakh, Mesyakh, ma Abednego sko kako. Raja ḇyuk parenta, ’Rofyor mkorower mkaren kbur, harpa, ma sonker ḇerok ḇesena ido, fandun fa mkoḇansuba faro amfyanir ani! Manseirya wer ḇeḇansuba ḇa ido nari ḇeḇesawen ḇe mob sraprap ya.’ Snonkbor rikyor anskoya na skoḇansuba faro amfyanir ani ke ḇaido sisyom ḇe Yahwe I monda?

Ramnai, Raja iwan insama sifnak sonker ya fa ryok. Snonkaku syakam sḇansuba fa sisyom amfyanir ani, mboi Syadrakh, Mesyakh, ma Abednego skoma oroḇa. Snonkaku ḇemam roi ani sya sikofenḇair ḇe Raja ḇo soḇo, ’Snonkbor rikyor anskoya skomewer skosyom faro amfyanir Tuan wafrur anya.’ Raja Nebukhadnezar dor sko ma ikofen, ’Nari yaḇuk swaf ḇe mko wer. Mkomewer mkoḇansuba ido, nari yasawen mko ḇe moḇ sraprap ya. Allah oso ḇaberi nari ḇepok fa ḇefaspar mko.’ Skokarem, ’Tuan e, buk swaf maro inko awer. Allah nkoḇedi nari fyaspar inko. Ḇape fyaspar nko ḇa ido, nari nkopok nkosyom amfyanir ani ḇa.’

Nebukhadnezar imsor kaku. Ikofen ḇe manfamyan ḇyansi, ’Mkofrur moḇ ḇeraprap anya fa isam syadi rarwan rifik ro randak ya!’ Mura iwan sordade sya, ’Mkofes  snonkbor anskoine ma mkosawen sko ḇe for ya dori!’ Moḇ ḇeraprap ani isam fafayaḇa inja sordade ḇefanam sya sinanem beri. Snonkbor rikyor anskoya skoḇeḇesawen ḇe for ani. Ramnai, Raja myam mboi snonkaku rifyak skoisya skombran mura muma ro moḇ sraprap anya. Imkak fafayaḇa ma ifuken ḇe ḇebarara sya, ’Insande kosawen snonkaku rikyor monda ḇesyaḇo yamam snonkaku rifyak skoisya, ma oser ya rya imnis malaikat!’

Raja Nebukhadnezar fyanam moḇ sraprap anya ma dar naba, ’Manfamyan Allah Ḇekaki Syadi mkoya, mkosasyar!’ Syadrakh, Mesyakh, ma Abednego skosasyar beri. Separpar ḇa. Kif, snonburyam, ma sansun skoḇena narus ḇa, ma ḇaken sena nasnarem ḇe for rofek ḇa. Snonkaku syakam sikandor fafayaḇa.

Raja Nebukhadnezar ikofen, ’Syadrakh, Mesyakh, ma Abednego Allah skoḇedi syambraḇ kaku. Iwan malaikat fa fyaspar sko. Allah osoḇaberi imnis raris Allah sedi.’

Raris snonkbor rikyor anskoya, samswen ḇekur Au na naisya ḇape wamarisen kako fa wasoasuser pdef faro Yahwe I ke?

”Wasyom faro [Yahwe], Allah bedi, ma derer faro I monda ḇenadi!”​—Matius 4:10