Rwa beri be konten ya

Rwa ḇeri ḇe sasyos sarser

Saksi-Saksi Yahwe

Pilih Bahasa Biak

 FARKARKOR 2

Manseiso Allah I?

Manseiso Allah I?

1. Rosai ḇefnai kaku fa kosyom Allah I?

Allah ḇekaku ya iso ḇefrur roi nakam. Nya awar ma pupes ḇa. (Mazmur 90:2) Ankankinem ḇeḇye ro Refo ya ryama ro I. (1 Timotius 1:11) Allah monda kosyom I snar iso ḇeḇuk kankenem ḇeko.​—Wasya Fasasna Faro Yohanes 4:11.

2. Allah ima imnis rariso?

Snonkaku oso myam Allah I ḇa snar Allah ima Rur rirya, rurya iso kankenem ḇekaki bur ro roi ḇekenem ro supswan ine. (Yohanes 1:18; 4:24) Komam Allah I ḇa, imḇape na kofawi rari-rari Ḇyena ro rosai ifrur kwar na. Imnis raris, aibon sairiryakam ma ai ḇepampen nefasnai snar ima Allah bena saswar ma fawawi nanem. Samambraḇ Ḇyena komam ro rosai ifrur ro farsyos ḇeḇa ine.​—Wasya Roma 1:20.

Fyor kowasya Refo ya ido na kofawi nabor syadi rari-rari Allah ḇyena. Imnis raris Refo ikofenḇadir ḇeko rosai Allah imarisen na ma imewer na, ma rariso myam ma ifrur pyum snonkaku sya rai, ma rariso ifrur mnis farmbroḇ ya.​—Wasya Mazmur 103:7-10.

3. Allah nya snonsnon ke?

Allah isma nasan ḇeḇor rariryano, ima nya snonsnon oser monda. Ikofenḇair ḇeko snonsnon Ḇyedi, ”Ayaine Yahwe. Iso snonsnon ayedi.” (Yesaya 42:8) Snar wos na nabor inja, snonsnon Allah ḇyedi sap na namnis kam ḇa. Ro wos Indonesia, Allah snonsnon Ḇyedi iso ”Yehuwa”. Ḇape, kap na ḇe ”Yahwe”.​—Wasya Mazmur 83:18.

Ro Refo ḇeḇor snonsnon Allah ḇyedi sipyos na ma sifadweri kuk’r nasan Tuhan ḇaido Allah. Ḇape, rofyor Refo ya sfas na, Allah snonsnon Ḇyedi sap na kali ri 7.000. Rofyor Yesus fyarkor snonkaku fa sifawi Allah I, Yesus ikofenḇair snonsnon Ḇyedi.​—Wasya Yohanes 17:26.

Mam vidio Allah Nya Snonsnon ke?

 4. Yahwe iswar ko ke?

Imnis raris kma ḇena saswar ine, Allah ifrur roi ḇepyum ḇeyun payamyum faro ko

Snar kandera nabor, ine nefasna Yahwe iswar ko ḇa ke? Snonkaku ḇeḇeso sikofen soḇe kandera kosmai ine ima farfrowes ḇerama ro Allah. Ḇape, rosai skara na nsasar.​—Wasya Yakobus 1:13.

Allah ifrur pyum snonkaku sya kuker ryir wararu fa mankunsi sekinfir. Na koḇesyowi kaku ḇaḇemkey Allah ḇyuk na. (Yosua 24:15) Ḇape, ḇar snonkaku skinfir fa sifrur roi ḇeḇye ḇa ḇe snonkaku ḇesesya. Ine nafnai fa komam kandera nabor. Yahwe sne Ḇyedi ḇesaneso rofyor myam ḇaḇenanapesḇa na.​—Wasya Kejadian 6:5, 6.

Yahwe ima Allah ḇeswar ko. Imarisen fa kosmai raryaḇ ro kankenem koḇena. Fioro werḇa na ipyos kandera ma roi ḇefnai kandera nakam. Ḇape, rofyor ine, Allah nya sano fa ipyos ḇaim kandera ine. Ro farkarkor ḇeḇe 8 ya, insape na kofawi rosai sano ya.​—Wasya 2 Petrus 2:9; 3:7, 13.

5. Rariso na kofanam ḇe Allah I?

Allah Yahwe dor ko fa kofanam ḇe I kuker kawawos ḇe I ro nadi. Myamwarek ko oser-oser. (Mazmur 65:2; 145:18) Kuker sne ḇesiper ipyos sasar koḇena. Kofrur sasar rariryano, Yahwe ḇyesyowi kaku rosai kofrur kwar fa imarisen. Inja, koine snonkaku ḇesasar mboi, na koḇebati kuker Allah I.​—Wasya Mazmur 103:12-14; Yakobus 4:8.

Saswar koḇena ḇe Yahwe I naba syadi bur ro saswar koḇena ḇe snonkaku ḇesesya, snaro I ḇeḇuk kankenem ya. (Markus 12:30) Na Wafasna saswar Ḇena ḇe Allah kuk’r Wafarkor syadiwer ma Wafrur rosai dor ya. Fainda ya, na Wafanam syadi kuk’r I.​—Wasya 1 Timotius 2:4; 1 Yohanes 5:3.