Snonkaku yuta ma yuta ro supswan ḇesiper sikyar snar ras ḇeba Natal ima Yesus Kristus ras ulang taun ḇyedirya. Ḇape, fafisu oso imbude kwara snonkaku Kristen ḇero abad randak, manfamyan Yesus ḇyesya sakfrur ras ḇeba Natal ke? Ma wafawi rosai Refo ikofen kaku kuker ras ulang taun ya ke? Kosma kankarem faro fakfuken anna ido na nafnoḇek ko fa kofawi ras ḇeba Natal ima faro snonkaku Kristen ke roḇa.

Ḇeoser ya, Refo ikofenḇair ḇa Yesus ḇaido Allah manfamyan ḇesouser ḇesesya sifrur ras ulang taun sena. Refo dap snonkaku risuru monda ḇefrur ras ulang taun suḇeja. Suiso ḇesyom ḇe Allah ḇero Refo, Yahwe I ḇa, ma ro munara ras ulang taun suḇeja, roi ḇeḇyeḇa naisya. (Kejadian 40:20; Markus 6:21) Encyclopædia Britannica ikofen snar snonkaku Kristen ḇero abad randak spampum ”snonkaku kafir ḇefrur ras ulang taun.”

Tanggal fis Yesus ḇyeḇeaḇen ya?

Refo ikofenḇairbos ḇa ras risai Yesus ḇyeḇeaḇen. McClintock ma Strong’s Cyclopedia suyoḇe, ”Ras Kristus ḇyeḇeaḇen ya sfasḇair mnis na ro Ḇaḇeasas Babo ya ḇa ḇaido, ro syap ḇesena kako.” Kakuḇae, Yesus imarisen manfamyan ḇyesi sifrur ras ulang taun ḇyedi ido, nari ikofenḇair kaku ras ḇaido tanggal risai ḇyeḇeaḇen ya.

Ḇesuru ya, Refo fyasḇair ḇa Yesus ḇaido oser ro manfamyan ḇyesi sifrur ras Natal. New Catholic Encyclopedia ikofenḇair ras ḇeba Natal sap randak na ”ro Chronograph ro Philocalus, kalender Roma oso, ro knam ḇyeja sifrur tanggal-tanggal isof ro 336 M.” Nasnai kaku, iso fafisu fyor Refo sfas i fa imnai ma abad-abad rofyor Yesus ikenem ro supswan ine werḇa. Inja, McClintock ma Strong sufas radine ”munara ras ḇeba Natal ima Allah iwan na ḇa, ḇaido ḇeknam ro Ḇaḇeasas Babo ya ḇa.” *

Munara rosai Yesus iwan manfamyan ḇyesi fa sifrurna?

Guru Ḇeba koḇedi, Yesus, ḇyuk parenta ḇesnaibos kuker rosai imarisen manfamyan ḇyesi sifrurna, ma nane neḇefas ro Refo. Ḇape, iwan si fa sifrur ras ḇeba Natal ya ḇa. Raris guru ro rumfarkor imewer romafarkor sya sifrur rosai iwan fa sifrur ḇa na, rarirya kako Yesus imewer manfamyan ḇyesi ’skara syadi awer faro snonkakusya ro rosai sfas kwar’ ro Refoya.​—1 Korintus 4:6.

Osower ido, munara ḇefandun kaku oso isya snonkaku Kristen ḇero abad randak sifawi kaku na isoine munara Swarapepen Yesus marmar ḇyedi. Yesus mankundi ikofen faro manfamyan ḇyesi ras risai sifrur munara ine ma fyasna ḇesi nyan rariso sifrurna rai. Parenta ḇesnaibos ine, ma tanggal ḇekaku ro Yesus marmar ḇyedi, sfasna ro Refo.​—Lukas 22:19; 1 Korintus 11:25.

Inja kofawi kwar, ras ḇeba Natal ima ras ulang taun dirya, ma snonkaku Kristen ro abad randak sifrur ras ḇeba kafir ine ḇa. Iba syadi wer, Refo ikofenḇair ḇa Yesus ḇaido snonkaku ḇesesya sifrur ras Natal. Iso ḇefnai fa snonkaku Kristen riyuta ro supswan ḇesiper sifawi kaku snar ras ḇeba Natal ima ras ḇeba faro si risyaḇa.

^ par. 6 Infa wafawi nabor wer moḇsa ras ḇeba Natal ndrama raya, mam artikel ”Pembaca Bertanya . . . Apa Saja Fakta tentang Natal?” ro Menara Pengawal 1 Desember 2014, naisya kako ro www.jw.org/id.