”Roi ḇeḇye ma ḇemnis kosmana ndamaker boiyaswa, Allah ḇyena fanado, i ḇefrur isnai ḇeḇor kam ro nanki.” (Yakobus 1:17) Mnuk ine kyurfasna ḇe ḇaḇenaḇye ro Kma koḇedi ro nanki, Allah Yahwe I. Ḇyuk hadiah ḇebor ḇe snonkaku koine, ḇape hadiah ḇeba kaku oso isya ro hadiah nakame. Rosairirya? Snonkaku sifawi pyum Yesus wos ḇyena neḇefas ro Yohanes 3:16, ḇekofen, ”Snar Allah saswar ḇyedi ibabos faro supswan ine, isof ḇyuk kwar Rumkun Mandos ḇyedi, insa snonkaku ḇekyar faroi sya sroḇa, mboi sisma [kankenem fyoro, NW]”.

Roi Allah ḇyuk ḇe hadiah ya iso Rumkun mandos Ḇyedi. Ine iso hadiah ḇeba kaku snonkaku syakam na sismana, snaro kuker hadiah ani na komkei ro ḇaḇemanfyan faro sasarya, ḇaḇemansar binsar, ma marmar. (Mazmur 51:5; Yohanes 8:34) Koḇesewar kaku rariryano, kopok fa koḇemkeibur roi anna ḇa. Imbape, snar Allah saswar ḇeba Ḇyedi, fyasos rosai kofandun na insama kona ḇaḇemkei. Kuker ḇyuk Rumkun mandos Ḇyedi, Yesus Kristus i fa ḇye fasaspar ḇeko, Allah Yahwe ḇyuk swaf ḇe snonkaku ḇesouser sya fa sikenem fyoro-fyoro. Ḇape fasaspar ido rosairirya? Rosai ḇefnai fa fyandun kaku? Ma rariso na kosmai fainda ro fasaspar ya?

Fasaspar ya iso ḇaḇyak fa ḇekoḇes kaḇer roi ḇepromes kwar ḇaido fa ḇeḇuk ḇaḇemkei ro ḇaḇemanfyan ya. Refo fyasnaḇair snar sinan ḇerandak koḇesuya, Adam ma Eva, randakya suma snonkaku ḇemnis kaku. Suna swaf fa sukenem fyoro ro firdaus ro supswan fnoḇek kpu suḇesya. (Kejadian 1:26-28) Faḇye kaku, sufrur roi nakam napromes kuker sukinfir fa susouser Allah I ḇa. Iso ḇefrur fa susapi ro sasarya. Rosai bon ya? Refo kyarem, ”Sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkakusyakam sifrur sasar kwar.” (Roma 5:12) Adam ḇyuk kankenem ḇemnis kaku ḇe kpu ḇyesi ḇa, ḇape ḇyuk sasar ma marmarya.

Rosai ḇeḇeḇak kuker farsarser fasaspar fandun fa namnis kuker rosai ḇepromes kwar ya. Rofyor Adam isouser Allah I ḇa, isasar ma bon ya iso kankenem ḇemnis ḇyedi ipromes—Adam kankenem ḇyedi. Refo ikofenḇair iso ḇewar fa Adam kpu ḇyesi semanfyan ro sasar ma marmarya. Inja, kankenem snonkaku ḇemnis oso ḇese—Yesus kankenem ḇyedi—fandun fa ḇyeḇeḇuk ḇe farsarser insama snonkaku na simkei ro ḇaḇemanfyan ya. (Roma 5:19; Efesus 1:7) Snar Allah saswar Ḇyedi monda fasaspar ya ḇyeḇeḇak, inja snonkaku sya sna swaf fa sisma kaḇer rosai Adam ma Eva sufrur fa napromes kwar—kankenem fyoro ro firdaus ro supswan.​—Fasasna Faro Yohanes [Wahyu] 21:3-5.

Snar kofawi fainda ro fasaspar ya iso ḇyuk kankenem fyoro, na kokyar kaku snar fasaspar ima hadiah ḇepyum syadi ro Allah maro snonkaku. Infa kofasna koḇesyowi ”roi ḇeḇye ma ḇemnis” ine, rwama komam rariso fasaspar ya, kuker nyan ḇepyum kaku ḇyeimnis roi ḇefnoḇek ko fa koḇuk hadiah ḇemaeja kaku, raris kawos kwar ro artikel ḇepon ya.

Ḇyeimnis marasrisen koḇena. Allah ryir ro snonkaku sya sisnesna marasrisen fa sikenem fyoro. (Pengkhotbah 3:11) Mankunko na kopok ḇa fa kofrur marasrisen ani fa imnis, ḇape fasaspar  ya monda na ḇefrur fa ryarirya. Refo doḇe, ”Snar marmar irya sasuref ro sasarya; ḇape kankenem ḇekain fyoro-fyoro fnoḇek Yesus Kristus Manseren koḇedi irya fakamaman Allah ḇyuk waworek monda maḇeko.”​—Roma 6:23.

Fyasos mnis fandandun koḇena. Snonkaku na sipok fa sfasos fasaspar yaḇa. Refo fyasnaḇair radine, ”Ma ḇaḇyak ḇefaspar kankenem sena nakaki kaku inja pok fa neḇeḇak ḇa isof fyoro-fyoro.” (Mazmur 49:8) Inja kofandun kaku fafnoḇek fa komkeibur ḇaḇemanfyan ro sasar ma marmarya. Ḇape, Allah fyasos kwar roi ḇeḇefandun ya inja ”snonkakusya sisma ḇaḇemkei snar Yesus Kristus.”​—Roma 3:23, 24.

Fafisu ḇemnis. Refo ikofen ḇeko, ”Yesus imar warek ko, rofyor koisya roi sasarya kaker!” (Roma 5:8) Snar fasaspar ya ḇyeḇeḇuk ”rofyor koisya roi sasarya kaker”, ine ḇyuk kakakyar ḇeko snar koine snonkaku ḇesasar mboi Allah iswar ko. Ma fandun fa kokamar sasar koḇena rariryano kona roi ḇepyum nabor fa kowafe.

Ḇyeknam ro saswar ya. Refo ikofenḇair rosai ḇedif Allah I fa ḇyuk Rumkun Ḇyedi ḇe farsarser fasaspar, ”Allah fyasna saswar ḇyedi ro kosnesna snar iwan Rumkun oser ḇyedi ḇesupswan ine insa kuker Rumkun ḇyedi kosma kankenem. Inekada saswar: Koi ḇeswar kwar Allah i ḇa, ḇape Allah i ḇeswar ko kwar.”​—1 Yohanes 4:9, 10.

Rariso na wafasna ḇesyowi hadiah ḇepyum syadi ine rai? Waswarepen Yesus wos ḇyena ro Yohanes 3:16 ḇefasnaḇair snar ”snonkaku ḇekyar” faro i monda nari ḇesma kankenem fyoro ya. Ro Refoya, kakyar iso ”ḇaḇewafwaf ḇekaku faro rosai komander na”. (Ibrani 11:1, NW) Infa kona kakakyar ḇekaku ḇeradine, fandun fa kona fawawi ḇemnis kaku. Iso ḇefnai fa, nkor Au fa wafarkor Allah Yahwe napnapes Ḇyedi, Manḇeḇuk hadiah ḇaido ”roi ḇeḇye ma ḇemnis” ine. Ma swewar fa wafawi rosai fandun fa wafrurna insama wasma kankenem fyoro snar farsarser fasaspar Yesus ḇyedi.

Na wafarkor roi nanekam kuker mam informasi ro Refo ḇeḇefasos kwar ro situs web nkoḇedi www.jw.org/bhw. Saksi-Saksi Yahwe simarisen kaku fa sifnoḇek Au. Nkokyar kaku rofyor wafarkor kuker hadiah ḇepyum syadi ine ma fainda ḇyena, nari nadif Au fa wakofen, ”Kasumasa faro Allah! Snar imarisen fyaspar aya kuker Yesus Kristus.”​—Roma 7:25.