DOREEN kyandor kaku rofyor ryower swari, Wesley, umur ḇyeja 54, ismai dafduf tumor otak ḇemarḇak kaku. * Dokter sya sikofen bo soḇe nari ikenem paik riḇeso monda. Fyar, ”Yakyar faro rosai yarower anna ḇa. Yasambraḇ ḇa ro swaf minggu ḇe minggu. Rosai ḇefnai fa roi ine nkur snonkaku ḇesesya ḇa, mboi inko. Yabor yaḇerari.”

Faḇye kaku, Doreen demir ḇesmai roi ḇeradine ḇa. Dafduf ḇemarḇak ḇeradine bisa nkur manseisirya kam ro fafisu risai monda. Mboi, ipyum snar snonkaku ḇebor sisya simarisen smamwarek snonkaku siswar ḇeduf marḇak. Ḇape, ima fararur ḇepyan risyaḇa. Inja, ḇero kina sya rosai bisa sifrur fa sḇuk sneprei ma smamwarek snonkaku siswar ḇeduf marḇak ya? Rariso ḇemamwarek snonkaku ḇeduf sya smam pyum masasor sena fa nek ḇa? Rosai sfasos ḇepon rofyor snonkaku ḇeduf ani fanam ḇe ras imbe imar ya? Rwama, kawos ḇepon rosai ḇefnai fa komamwarek snonkaku ḇeduf marḇak ima roi ḇesamswen ro baboine.

SAMSWEN ḆYENA

Fawawi medis ifnoḇek kwar snonkaku sya fa sikenem kawane. Abad rioser syadi naiwara, ro sup-sup ḇeḇa kako, umur snonkaku sya naknampu syadi. Simar fasaw snar dafduf ḇepampam ḇaido sismai roi ḇemun. Osower ido, snar samswen fa sraḇe rumḇeduf, inja nafrur fa kina ḇebor sya smamwarek snonkaku ḇeduf sya ro rum monda isof ro simar ro rum sena.

Baboine, fawawi ro kedokteran ifnoḇek dokter sya fa spampum dafduf ya insama snonkaku bisa sikenem kawan syadi. Dafduf ḇefrur fa snonkaku ḇero fyor iwara simar fasaw anya, baboine rarirya werḇa. Ḇape, roi nane nafrur fa dafduf ya nari nandebur si ḇa. Snonkaku ḇeduf sino sisya siryar ḇa kwar fa sfaduru mankunsi. Komamwarek snonkaku ḇeradine ima roi ḇesamswen syadi ma nafrur marmor.

Ine nafnai fa snonkaku ḇebor syadi simar ro rumḇeduf ḇardibur ro rum. Snonkaku ḇebor ḇero baboine sifawi werḇa rofyor snonkaku ḇeduf ya  fanam imbe imar, ma ḇebor ḇa ḇemam ḇeri rofyor snonkaku oso imar. Imbude roi nane naiso ḇefrur fa snonkaku sya simkak ḇaido simewer smamwarek snonkaku ḇeduf sya. Inja, rosai na ḇefnoḇek Au ro roi inena?

FASASOS RO ḆARPON

Raris Doreen i, snonkaku ḇebor sḇaḇir sisambraḇ ḇa rofyor snonkaku siswar sya sismai dafduf ḇemarḇak. Rofyor ḇeḇirḇar, wamkak, ma ḇesneso ido, rosai na ḇefnoḇek Au fa wafasos mankundaw faro rosai ḇeḇejadi ro ḇarpon ya? Allah manfamyan ḇesouser oso Ḇyedi ḇyenadi, ”Farkor inko nyan fa nkokor ras-ras inkoḇena insama nkona sne ḇefawinanem.” (Mazmur 90:12) Imbo, wor kaku ro nadi ḇe Allah Yahwe I fa fyasnaiḇair ḇe Au nyan fa ’wakor ras-ras Bena’ kuker fawawinanem insama fasos pyum oras Bena faro snonkaku waswar ya.

Ine nefandun fasasos ḇepyum. Rofyor snonkaku waswarya syambraḇ kaker fa dawose, ipyumya wafuken resari manseiso nari ḇefrurpyan snemuk ḇe i rofyor syambraḇ werḇa. Wawos myaren ḇe i snar nari rofyor ipsur ido, imarisen sestrom kanandori, syun rumḇeduf, ḇaido imarisen faro nyan pararei oso ḇese ke roḇa. Ine na nafrur fa kina Besya skara sasar Au ḇa ḇaido buk sasar ḇe mankundaw ḇa snar sidif Au kwar fa wafrurpyan snemuk ḇe snonkaku ḇeduf ani. Rofyor wawos snai ro randak kwar ido, nari nafnoḇek mkokam fa mkomam monda faro snonkaku ḇeduf ani. Refoya doḇe, ”Aw na nambran ḇa rofyor awawos noḇa”.​—Amsal 15:22.

NYAN FA BUK FARFNOḆEK

Ḇefandun kaku fa ḇeḇuk sneprei ḇe snonkaku ḇeduf sya iso snonkaku ḇemamwarek si. Snonkaku ḇeduf marḇak kaku fanam imbe imar, fandun fa buk kakyar ḇe i snar waswari ma demir ḇa. Rariso wafrurna rai? Wawasya ḇaido wadisen ḇe i, kwinfir syap ma doya ḇesambraḇser ma ḇefrur fa imarisen. Sibor sismai sneprei rofyor ono ro kina sesya sufepen bramin ma sawos myaren yoḇ si.

Ipyum faro snonkaku ḇeduf ani fa ifawi mansei monda ḇerama ḇemamfar i. Syap oso ikofen, ”Faro snonkaku ḇeduf sya, ro indra ririm sena, rawrower iso nari ḇefararur pyum kaker ro indra ḇesena. Imbude [Ḇeduf ya] rya denef kwar, mboi ima ryower kaker. Inja rofyor snonkaku ani denef ido, wawos awer rosai wamewer wawos rofyor snonkaku ani denef ḇa.”

 Bisa ido, muḇenadi kayam. Refo fyawar ro fafisu oso, manwawan Paulus ma min ḇyesi sisya ro fafisu ḇesamswen kaku ma sipok ḇa kwar. Farfnoḇek rosai sisewar ya? Paulus dor kaku ḇe min ḇyansine, ”Nkokyar kaku mkoḇenadi warek nko”. (2 Korintus 1:8-11) Nadi kuker sne ḇesiper ro fafisu ḇesamswen kaku ma dafduf ḇemarḇak ima roi ḇefandun kaku nairi.

KWANDOR AWER FARO MARMARYA

Kokara mura ker snonkaku koswar ḇeduf marḇak ine nari imar ido na nafrur fa koḇesneso. Marmar inema roi komarisen ḇa nairi, snar rofyor Allah ifrur ko imewer fa komardi. (Roma 5:12) Refo doḇe marmar ima ”mbroḇ” nairi. (1 Korintus 15:26) Inja komewer kokara ker marmarya.

Ḇape, rofyor ḇero kina sya sfasos ḇaido skara kwar rosai na ḇeḇejadi ido, nari simkak ḇa ma smam monda faro roi ḇefrur fa siknon. Ro kotak ” Fanam ḇe Ras Marmarya”, mampan roi riḇeso nari ḇekur snonkaku ḇeduf ani. Kakuḇae, snonkaku ḇeduf sya sismai fafisu ḇerarirya kam ba, ma moḇ sismaina namnis kam ḇa. Ḇape, faro snonkaku ḇebor ḇeduf sya, roi ḇeḇeso raris neḇeyap ro kotak ya nari nkur si.

Rofyor snonkaku waswarya imar kwar ido, fandun fa wor farfnoḇek ro bati ḇefanam Besi ḇemarisen fa ḇefnoḇek Au. Ḇemamwareki ma kina ḇyesi fandun fa sismai kakyar snar roi ḇesamswen ḇekur snonkaku ḇemar kwar ani nandeburi kwar. Kuker sawarwar Allah ḇyuk kakyar ḇeko snar ”snonkaku ḇemar sya, sifawi royoḇa ḇeri”.​—Pengkhotbah 9:5.

MANWAREK ḆESAMBRAḆ SYADI KAKU

Kofarkor fa kopampum farfnoḇek ro snonkaku ḇesesya ḇa

Fanam ḇe Allah iso roi ḇefandun kaku. Inema rofyor mamwarek snonkaku ḇeduf marḇak ani monda ḇa, mboi rofyor ḇesneso snar imar kwar kako. Allah nari ifnoḇek Au roro snonkaku ḇesesya fa sḇuk wos sneprei ma farfnoḇek. Dorren doḇe, ”Yapampum farfnoḇek ro snonkaku ḇesesya ḇa. Kaku ya, farfnoḇek nusmaina nabor fafayaḇa. Aya ma swa yedi rya nurower Yahwe doḇe, ’Aya isya rodine fa yafnoḇek mu.’ Yapok yaḇefnder na ḇa.”

Imbo, Allah Yahwe iso Manwarek ḇesambraḇ syadi kaku. Snar I ḇefrur ko, inja fyawi kaku rofyor koḇekandera ma koḇesneso. Nya papoik ma imarisen ḇyuk rosai kofandunna ma syambraḇser ko. Iba syadi, ḇyeasas nari fasaw fa ipyos marmar isof fyoro ma ḇyawes snonkaku ḇebor ḇero swarapepen Ḇyedi fa sikenem wer. (Yohanes 5:28, 29; Wahyu 21:3, 4) Ramnai, nari snonkaku syakam sakofen manwawan Paulus wos ḇyena ḇerok radine, ”Ne, marmare, fainda beja isyaro? Ne, marmare, sayaryur beja isyaro?”​—1 Korintus 15:55.

^ par. 2 Snonsnon ya neḇefadwer kwar.