AGAMA ḇebor ḇero supswan ine, rupa ra Gereja Katolik Roma, Gereja-Gereja Ortodoks, Budha ma ḇesena, siwan manfarkin agama sesya fa sikenem selibat ḇaido sidwarek si fa sfarḇuk awer. Ḇape, snonkaku ḇebor skara snar kenem ḇeradine naisya snaro manfarkin agama sya sifrur farḇakḇuk ḇeḇyeḇa nabor marsir.

Inja na kofuken, Refoya iwan kaku snonkaku Kristen ḇeyuffarmyan sya fa sikenem selibat ke? Infa kosmai kankarem faro fakfuken ine, rwama kawos knam randak ro selibat ya ma rariso iryewen raya. Nari kawos kako rosai Allah mamam Ḇyedi kuker roi ine.

SELIBAT RO SARISA MARANDAN AGAMA

Encyclopædia Britannica ikofen, selibat ima ”snonkaku ḇefarḇuk ḇa, inja rarirya, pyampum anenef fasfus ya. Sifawi kenem ḇeradinema fararur ro manfarkin agama ḇaido snonkaku ḇeyuffarmyan sya”. Ro 2006 ya, Paus Benediktus XVI ikofen ḇe Roman Curia ḇaido Badan Administrasi Roma snar fandun fa snonkaku ḇeyuffarmyan sya sikenem selibat snar nane nefesepen kuker ”tradisi ro fyor iwara sifrur ro swaf fanam ḇe fafisu Manwawan sya simar kwar”.

Ḇape, snonkaku Kristen ro abad randak sya sifrur tradisi agama selibat ine ḇa. Syadiwer, manwawan Paulus ḇekenem ro abad randak ya, ḇyuk swarapepen ḇe snonkaku Kristen sya snar nari snonkaku sino sisya sifrur ”rodur [wos-wos] ḇeḇeninyan” ma ’ḇedwarek snonkaku sfakawin awer’.1 Timotius 4:1-3.

Insape ro abad ḇesuruya, roi ine sifrurna ro gereja-gereja ”Kristen” iso ḇero ḇarpurya sḇe Gereja Katolik Roma. Syap Celibacy and Religious Traditions ikofen, roi ine ”isrow kuker fafisu ḇebabo ḇero Kekaisaran Romawi ḇedwarek fararur farḇuk ya”.

 Ro abad-abad ḇeuserya ramnai, dewan gereja ma snonkaku sap ḇe Bapak-Bapak Gereja sifrur sasoser faro manfarkin agama ḇaido pendeta sya fa sikenem selibat. Skara bo soḇe anenef fasfus ima roi ḇesren ḇa ma namnis kuker manfarkin agama fararur sena ḇa. Ḇape, Encyclopædia Britannica ikofen, ”imbude ro abad ḇe 10 ya, pendeta ḇebor ma uskup sya kako sna binswa kwar”.

Rofyor sifrur Konsili Lateran 1123 ma 1139 ro Roma ramnai, sidif manfarkin agama sya fa sisouser sasoser selibat. Ro ras anya ḇeri, Gereja Katolik Roma smam selibat ḇe fararur ḇesasar ḇa. Kuker sifrur rarirya, sikadaunwarek gereja insama ḇaḇepapoik ma pipi ḇesun na napromes awer rofyor pendeta ḇefarḇuk sya sḇuk roieḇor ḇero gereja faro romawa sesya.

ALLAH MAMAM ḆYEDI KUKER SELIBAT

Refoya fyasnaiḇairbos Allah mamam Ḇyedi kuker selibat ya. Ro dori, na kowasya Yesus wos ḇyena kuker snonkaku ḇefarḇuk ḇa sya raris mankundi, ”snar Ḇaḇesasoser Boiyaswa.” (Matius 19:12) Rarirya kako, Manwawan Paulus fyasḇair snonkaku Kristen ḇekinfir fa ḇefarḇuk ḇa raris mankundi ”faro Ankankinem Ḇeḇye”.1 Korintus 7:37, 38; 9:23.

Ḇape, Yesus ma Paulus suwan snonkaku Kristen ḇeyuffarmyan sya fa sikenem selibat ḇa. Yesus doḇe na ḇesmai ”fakamaman” fa ḇefarḇuk ḇa sima manfamyan ḇyesya kam ḇa. Rofyor Paulus fyasḇair snonkaku ḇefarḇuk ḇa ya, ikofen kaku, ”Farosi yasma sasoser osoḇa ro Manseren. Rariryano imnis snonkaku ḇesma fakamaman ro Manseren, yamarisen yaḇuk ananun ayena.”Matius 19:11; 1 Korintus 7:25.

Osower ido, Refo fyasnaiḇair snar snonkaku Kristen ḇebor ḇeyuffarmyan ro abad randak sya sfarḇuk, Petrus i kako, dakfarḇuk. (Matius 8:14; Markus 1:29-31; 1 Korintus 9:5) Kaku ya, snar fararur farḇuk famfnom nasya nabor ro sup Roma ḇero fafisuya, inja Paulus fyas ḇe manfarkin ḇero sidang ya fyarbuk kwar indo fandun fa ḇye ”snon ḇefakawin kuker bin oser” ma romawa ḇyesi sesyowiyae si.1 Timotius 3:2, 4.

Ine kyurfasna ḇe farbakḇuk selibat ḇa snar Refo ikofenbos kwar ”snonya ikenem imnis fararur ḇyedi faro binya raris swa ḇyedi”, ma fandun fa inbeswa ’suḇesisyeyae awer imnis imbeswa mambeswa’ ro anenef fasfus suḇena. (1 Korintus 7:3-5) Inja nasnaibos kwar snar kenem selibat ima Allah parenta Ḇyena risyaḇa ma snonkaku Kristen ḇeyuffarmyan sya siwan si fa sifrurna ḇa.

FARO FANDANDUN ANKANKINEM ḆEḆYE

Koma siwan ko fa kokenem selibat ḇa. Ḇape, rosai ḇefnai fa Yesus ma Paulus suḇuk anun ḇaḇefarḇuk ḇa ya? Snar rofyor snonkaku oso fyarḇuk ḇa ido, nya swaf nabor fa ḇyaryas ankankinem ḇeḇye faro snonkaku ḇesesya. Snonkaku ḇefarḇuk ḇa sya bisa sḇuk kankenem sena snar saksmai samswen ḇa raris snonkaku ḇefarḇuk sya.1 Korintus 7:32-35.

Mam David fawar ḇyedi kada. Fyararur ro Meksiko City kuker ḇaḇyak ḇekaki, mboi imnai ro fararur ḇyedi fa ryaḇe moḇ ḇeḇinkwan ro Kosta Rika fa ḇyuk farkarkor Refo faro snonkaku ḇesesya. David ifrur roi ine snar fyarḇuk ḇa ke? Doḇe, ”Imboḇae. Kaku ya, yasma samswen fa yakenem mnis kuker budaya ḇebabo ma moḇ ḇesnai ḇese. Ḇape snar yamamfaduru mankundaya monda, inja napyan syadi ḇe aya fa yafrur fararwe ro kankenem ayedi.”

Claudia, inbesrar ḇefarḇuk ḇa oso rya fa dakfarmyan ro moḇ ḇefandun manbaryas sya, doḇe, ”Yasma marasrisen ro fararmyan ayena. Kakyar ma ḇaḇebati ayena kuker Allah syambraḇ syadi rofyor yamam rariso myamfaduru aya.”

”Farḇuk kwar ke roḇaime, nakame napyum. Buk roi ḇepyum kaku ḇe Allah Yahwe ido nari wasmai aski.”Claudia

Kopok komam awer ḇaḇefarḇukḇa ine ḇe roi ḇemarḇak. Claudia ikofen wer, ”Farḇuk kwar ke roḇaime, nakame napyum. Buk roi ḇepyum kaku ḇe Allah Yahwe ido nari wasmai aski.”Mazmur 119:1, 2.