”Abris ḇesur pyum nari isyor, pampen nari imaryoi; ḇape wos Allah koḇedi, nari nasya pdef isof fyoro-fyoro.”​—YESAYA 40:8.

DOYA: 116, 115

1, 2. (a) Rosai na ḇeḇejadi ro kankenem koḇedi rofyor kona Refo ḇa? (b) Rariso kosma fainda nabor ro Refoya?

ROSAI na ḇeḇejadi ro kankenem koḇedi rofyor kona Refo ḇa? Nari kosma anun ma farkankin ro ras ḇe ras ḇa. Nari ko kako kofawiḇa napnapes kuker Allah, kankenem, ma fafisu iwama. Ma nari kofawiḇa rosai Yahwe ifrur kwar faro snonkaku sya ro fafisu iwara.

2 Kokofen kasumasa, snar roi ḇeradirya kosmana ḇa. Yahwe ḇyuk ḇeko Wos Ḇyena, Refoya. Ḇyeasas kwar Refoya nari nasya pdef isof fyoro-fyoro. Ine nasnaibos kaku ro Manwawan Petrus wos ḇyena rofyor dapkaḇer Yesaya 40:8. Kakuḇae, ro mnuk ani dawos ḇeriḇa kuker Refoya, ḇape wos ḇyena nkur ḇe rosai ḇero Refoya. (Wasya 1 Petrus 1:24, 25.) Nari kosma fainda nabor syadiwer rofyor kowasya Refo ro wos koḇedi. Iso ḇefnai fa ro abad ḇe abad, snonkaku ḇeswar Allah Wos Ḇyena, sisma roi ḇedwarek ma samswen rariryano, sifararur marḇak fa  sefararwe Refo ma sirwasna. Yahwe imarisen insama ”snonkakusya kam sisma koreri ma sifawi ro ḇaḇenapnapesya”.​—1 Timotius 2:3, 4.

3. Rosai nari kofarkor ro artikel ine? (Mam sonin ro randak artikel ine.)

3 Ro artikel ine, nari kofarkor rariso Allah Wos Ḇyena nasya pdef rofyor (1) wosna nefararwei, (2) perkembangan ro polotik ḇefnai wosna nefarwei, ma (3) roi ḇedwarek faro fararwei Refoya. Fainda rosai kosmana snar kofarkor roi nane? Nari koḇesyowi syadi Refo ma Manbena kakara ro dorina, Yahwe I.​—Mikha 4:2; Roma 15:4.

WOSNA NEFARARWEI

4. (a) Fyoro mura, rosai ḇeḇejadi kuker wosna? (b) Rariso kofawi Allah ḇyesyowi wos nakame, ma rariso sneḇaḇir Bedi faro roi ine?

4 Wosna nefararwei ker. Fyoro mura, wos ma apap sawos ro fafisu iwara, neḇese kuker wos ḇekaku ḇyena. Imbude, na kwara contoh ro wos mankun bedi. Ine kako ḇeḇejadi kuker wos ḇero fafisu iwara. Wos Ibrani ma Yunani ḇeḇefas ro Refo fafisu iwara neḇese kuker wos Ibrani ma Yunani ḇero baboine. Snonkaku ḇebor sya sifawimnis Refoḇa ro wos Ibrani ma Yunani ḇekwar. Inja, sifandun fararwei Refo ḇebabo. Ḇeḇeso sya skara fandun fa sifarkor wos Ibrani ma Yunani ḇekwar insama sifawimnis kaku Refoya. Ḇape, nun fainda naborḇa. * (Mam fas-fas kasun ro sop.) Kokofen kasumasa kaku snar sefararwei Refoya ḇesiper ḇaido barya monda ro wos syadi ri 3.000. Yahwe imarisen insama snonkaku ḇerama ro ”er oser-oser, wos, ma kawasa” sisma fainda ro Wos Ḇyena. (Wasya Fasasna faro Yohanes [Wahyu] 14:6.) Ine nafrur kofanam syadi ḇe Allah koḇedi, ḇesaswar ma ḇemamfarfir ḇa.​—Kisah 10:34.

Kokofen kasumasa snar sefararwei Refoya ḇesiper ḇaido barya monda ro wos syadi ri 3.000

5. Rosai ḇefnai fa King James Version ḇyeḇefandun?

5 Fararwei ro wosna, nawyaye kako ḇaḇefararwei Refoya. Ḇaḇefararwei ro randakya napyan fa sifawina, ḇape fyoro mura namnis kuker randakya werḇa. Contoh ḇyeja isoine Refo King James Version, ḇeḇefrur randak ro taun 1611. Ro fafisuya, ineiso Refo wos Inggris sifawikamna. Iba syadiwer, wos ḇero King James Version nawyaye kako wos Inggris. * (Mam fas-fas kasun ro sop.) Ḇape, terjemahan ine fyas Yahwe snonsnon Ḇyeja kali riḇeso monda. Ro Allah snonsnon ḇyeja ḇeḇefas nabor ro Syap-Syap Ibrani, sifadwer snonsnon ani ḇe ”LORD” (artinya ”TUHAN”) ro huruf  ḇeba. Cetakan ḇepurya kako sap wos ”LORD” ro huruf ḇeba ro mnuk-mnuk ḇero Syap-Syap Yunani Kristen. Inja, King James Version dakkarem snar Allah snonsnon Ḇyeja sfas kako ro Ḇaḇeasas Babo.

6. Rosai ḇefnai fa komarisen kona Terjemahan Dunia Baru?

6 Rofyor Refo King James Version secetak randakna, wos Inggris ḇyena napyan fa sifawina. Ḇape, fyoro mura, wos ḇeḇeso sepakena werḇa, ma kirine Refo ani samswen fa sifawina. Terjemahan Refo ḇekwar ro wos ḇesena nakmnis radirya. Inja, na komarisen snar kona Kitab Suci Terjemahan Dunia Baru, ma wos ḇero dorina napyan fa kofawina. Terjemahan ine ḇesiper ḇaido bar oserya nasya ro wos syadi ri 150. Ine kyurfasna snonkaku ḇebor ro supswan ine, bisa siwasya Refo ro wos mankun sena. Snar sḇuk wos ḇepyan fa sifawina, rosai ḇero Refo dori nsun kaku ro sne. (Mazmur 119:97) Ḇape, roi ḇefrur Terjemahan Dunia Baru ipyum syadi yaiso srir Yahwe snonsnon Ḇyedi ro moḇ ḇekaku ḇyena ro naskah ḇekakuya.

PERKEMBANGAN RO POLOTIK

7, 8. (a) Rosai ḇefnai fa snonkaku ḇeborsya ro abad ḇekyor SM, sifawimnis ḇa Syap-Syap Ibrani? (b) Septuaginta Yunani ido rosairiri?

7 Perkembangan polotik ro dunya ine, fyorno ido nefararwei wos snonkaku sawosna. Ḇape, Yahwe fyasos insama Refo nasya ro wos snonkaku sifawimnis na. Imnis raris, 39 syap ḇerandak ro Refo ḇeḇefas iso snonkaku Yahudi ḇaido Israel sya. Inja, ”Allah ikyar wos ḇyeja faro kawasa Yahudisya.” (Roma 3:1, 2) Randakya sfas syap-syap nane ro wos Ibrani ma Aram. Ḇape, ro abad ḇekyor SM, snonkaku Yahudi ḇeborsya sifawi wos Ibrani ḇa. Rosai ḇefnai ya? Fafisuya, Aleksander Agung ḇyepoik sup ḇebor, inja Kerajaan Yunani isya ro moḇ nakame. Ine nafnai fa, wos Yunani iso wos sawos ro sup-sup ḇero baḇ papoik Yunani. Inja, snonkaku ḇeborsya sawos wos senaḇa ḇape sawos wos Yunani. (Daniel 8:5-7, 20, 21) Snonkaku Yahudi ḇeborsya napyan ḇesi fa sawos wos Yunani, ro wos Ibrani. Inja, samswen ḇesi fa sifawimnis Syap-Syap Ibrani. Rariso sisma nyan ḇesae ya?

8 Ro swaf taun ri 250 rofyor Yesus ḇyeḇeaben ḇaim, sefararwei syap ririm ḇerandak ro Refo ro wos Yunani. Ḇarpurya, syap-syap Ibrani ḇesena sefararweina kako. Terjemahan ine sap na ḇe Septuaginta Yunani. Ineiso terjemahan Syap-Syap Ibrani sisrow randakna.

9. (a) Rosai fainda ro Septuaginta ma terjemahan ḇesena? (b) Mnuk rosai ḇero Syap-Syap Ibrani wamarisen kakuna?

9 Snar Septuaginta Yunani ine nasya, snonkaku Yahudi ḇeyawos wos Yunani bisa siwasya Syap-Syap Ibrani ro wos Yunani. Simarisen kaku snar bisa siwasya ma srower Allah Wos Ḇyena ro wos sifawi kakuna. Ḇarpurya, syap ḇebor ro Refo sefararweina ro wos sawos ro ras-ras, imnis raris wos Siria, Gotik, ma Latin. Faindaya, snonkaku ḇeborsya bisa siwasya ma smamḇir kaku Allah  Wos Ḇyena, ma simarisen kakuna. Syadiwer si kako bisa sna mnuk simarisen syadina, imnis ko ro baboine. (Wasya Mazmur 119:162-165.) Kakuḇae, Allah Wos Ḇyena naisya pdef rofyor perkembangan ro polotik nafnai wosna nefarwei.

FARARWEI RO REFOYA NASMA ROI ḆEDWAREK

10. Ro fafisu John Wycliffe i, rosai ḇefnai fa snonkaku sya sifawimnis Refoya ḇa?

10 Ro taun ḇe taun, manḇepoik sya sidwarek snonkaku sya fa sakwasya Refoya. Ḇape, snonkaku ḇeswar Allah Wos ḇyena sifararur marḇak insama snonkaku ḇeborsya bisa sifawi Refoya. Oser ro si isoine John Wycliffe, ḇeḇarek ro Inggris fafisu abad ḇeḇe-14 ya. Ikofen snonkaku syakam fandun fa siwasya Refo ro wos mankun sena. Ro fafisu ikenem ya, snonkaku ḇebor ro Inggris sifawimnis Refo ro wos mankun senaḇa. Ḇaḇyak ro Refo nek kaku, inja fandun fa sfas kaḇerna ro ḇramin sena. Inja, snonkaku ḇeḇeso monda bisa ḇesma Refoya. Osower ido, snonkaku ḇebor ro fafisuya kako sifawi siwasyaḇa. Ro gereja, snonkaku sya srower siwasya Refona ro wos Latin. Ḇape, ima wos ḇekwar rirya ma snonkaku sya sifawina werḇa. Rosai Yahwe fyasos insama snonkaku sya bisa siwasya Refo ro wos mankun sena?​—Amsal 2:1-5.

John Wycliffe ma snonkaku ḇesesya simarisen insama snonkaku syakam sna Refoya. Wakna marisen ḇemnis radirya ke? (Mam paragraf 11)

11. Rosai fainda ro Wycliffe Refo ḇyedi?

11 Ro 1382, John Wycliffe fnoḇek snonkaku ḇesesya sefararwei Refona ro wos Inggris. Raryur Lollards simarisen kaku Wycliffe Refo ḇyedi. Raryur ine siswar kaku Refoya. Simbran ro mnu oso ḇe mnu ḇese ro Inggris fa siwasya Refo ma sirwas bar-bar ro Refo sfas kwarna ro bramin sena ḇe snonkaku sya. Inja, snonkaku sya sifawi Refo wer ro fafisuya.

12. Rosai pendeta sifrur faro Wycliffe i ma Refo ḇyedi?

12 Pendeta sya simsor kaku faro Wycliffe i, Refo ḇyedi, ma ḇesoi sya. Sewayam snonkaku ḇeryur ro raryur  Lollards ansya ma srap Wycliffe Refo ḇyenakam. Wycliffe imar kwar rariryano, manfarkin agama sya sikofen ima snonkaku murtad ḇaido Gereja mbroḇ seja. Sbai kubir fa sun kor ḇyena, srapna, ma sisawen roref ḇyena ro Warbeki Swift. Ḇape, snonkaku ḇeborsya simarisen siwasya ma sifawi Allah Wos Ḇyena ma Gereja jadi fa sidwarek marisen sena ḇa. Taun utin ma utin nawas ramnai, snonkaku ḇero Eropa ma sup ḇesena sefararwei ma secetak Refona ro wos sifawina.

”ḆAḆEMANKUN ḆEḆUK FARKARKOR KUKER ROI ḆEYUN FAINDA FARO AU”

13. Rosai kofarkor ro sarisa fararwei Refona, ma rosai faindaya faro ko?

13 Refo ima ḇeramuma ro Allah I. Ḇape, ine kyurfasna ḇa snar terjemahan Septuaginta, Wycliffe Refo ḇyedi, Refo King James Version, ḇaido terjemahan ḇesena, Allah iso ḇefarkin ḇerina. Ḇape, rofyor kofawi rariso sifrur fararur anna, ine nasnaibos faro ko snar Yahwe ifrur asas Ḇyena, isoine Wos Ḇyena nasya pdef isof fyoro-fyoro. Inja, bisa kokyar snar Yahwe asas ḇese ḇyenakam ndarirya.​—Yosua 23:14.

14. Rofyor kofawi Yahwe myamwarek Refoya, rosai ḇefnai fa koswar syadi I?

14 Rofyor kofawi rariso Yahwe myamwarek Wos Ḇyena, kakyar ma saswar koḇena faro I syambraḇ syadi. * (Mam fas-fas kasun ro sop.) Rosai ḇefnai fa Yahwe fyasos ḇepon Refoya ma ḇyeasas na myamwarekna? Snar iswar ko ma ifawi Wos Ḇyena nari nun fainda faro ko. (Wasya Yesaya 48:17, 18.) Inja, ine nafrur fa komarisen koswar ma kosouser I.​—1 Yohanes 4:19; 5:3.

15. Rosai nari kofarkor ro artikel ḇeuserya?

15 Koswar kaku Allah Wos Ḇyena. Inja, rariso kosma fainda ḇepyum ro ḇaḇewasya Refo mankun koḇena? Rariso kofnoḇek snonkaku kosrow ro ḇaḇeḇaryas sya fa sakḇesyowi Refoya? Rariso naek ḇebuk farkarkor ro sidang sya sikyar rosai sfarkor nakam neknam ro Refoya? Nari kofarkor roi nane ro artikel ḇeuserya.

^ par. 4 Mam artikel ”Perlukah Kita Belajar Bahasa Ibrani dan Yunani?” ro Menara Pengawal 1 November 2009.

^ par. 5 Apap ḇebor sifawi ro wos Inggris ḇeḇeyun ro King James Version. Raris ”kyain wepur kuker mka ḇe saprop”, ”kif nakor yedi,” ma ”wakofenḇair snembri.”​—Bilangan 22:31; Ayub 19:20; Mazmur 62:8.