”Allah wos ḇyena wos ḇekenem ma [ḇeser papoik].”​—IBRANI 4:12.

DOYA: 114, 113

1. Rosai ḇefrur fa wakyar faro papoik Allah Wos Ḇyena? (Mam sonin ro randak artikel ine.)

ALLAH kawasa Ḇyesya sikyar Yahwe Wos Ḇyena faro snonkaku nama wos ”ḇekenem ma [ḇeser papoik]”. (Ibrani 4:12) Bisa komam papoik ro Refo ro kankenem koḇena ma snonkaku ḇesesya. Rofyor koḇe Saksi Yahwe ḇaim, ono sisya sḇe mankarawraw, ḇeyanker narkoba, ḇaido sifrur fararur farḇuk. Ḇesesya imbude sna arasai nabor ma sifawisi kaku, ḇape sḇaḇir sisma aski ro kankenem sena ḇa. (Pengkhotbah 2:3-11) Na komarisen kaku snar snonkaku ḇebor ḇesanekar ro fafisu iwara sya kirine sifawi rosai imbe sifrur ro kenem sena ma sna saneraro. Kowasya pengalaman ḇebor ḇepyum ḇemnis radirya ro Baryas ro seri artikel ”Refoya Fyadwer Kankenem”. Ma iba syadiwer rofyor sḇe snonkaku Kristen kwar, fandun fa sifanam pdef ḇe Yahwe kuker fafnoḇek ro Refoya.

2. Rosai fainda ro papoik Allah Wos Ḇyena faro snonkaku ro abad randak sya?

2 Na kokandor ḇa rofyor snonkaku ḇebor bisa sifrur fararwe  ḇeba ro kenem sena fyor sifarkor Refoya. Naek srar koḇesi ro abad randak bena saneraro ro nanki si kako sifrur fararwe ḇemnis radine. (Wasya 1 Korintus 6:9-11.) Rofyor Paulus fyawar kuker snonkaku bena saneraroḇa ro Karajan Allah, doḇe, ”Naek ono rofandu mko ro randakya.” Allah Wos Ḇyena ma rur ḇesren Ḇyeja nafnoḇek snonkaku ansine fa sifrur fararwe. Ḇape, rofyor sḇe snonkaku Kristen kwar, ono sisya ḇefrur sasar ḇeba, ma nafnai fa ḇaḇebati sena kuker Yahwe nfanam werḇa. Imnis raris, Refo ḇyuk contoh kuker naek oso ḇeḇeryem sepecat i. Ḇape ḇarpurya, fyadwer kenem ḇyeja insama iryur kaḇerwer kuker sidang Kristen. (1 Korintus 5:1-5; 2 Korintus 2:5-8) Na komarisen kaku rofyor komam naek srar koḇesya bisa sifrur fararwe ro kenem sena snaro papoik ro Allah Wos Ḇyena.

3. Rosai nari kowawos ro artikel ine?

3 Allah Wos Ḇyena nya papoik ḇeba kaku. Ineiso roi ḇepyum Yahwe ḇyuk ḇeko na. Inja, komarisen koḇukna kuker payamyum. (2 Timotius 2: 15) Artikel ine nari dawos rariso koḇuk papoik ro Allah Wos Ḇyena (1) ro kankenem koḇena, (2) ro ḇaḇeḇaryas, ma (3) rofyor wun faya ro mimbar. Roi nanekam nari nafnoḇek ko fa koswar ma koḇesyowi Yahwe I, ḇebuk farkarkor ḇeyun fainda faro ko.​—Yesaya 48:17.

RO KANKENEM KOḆENA

4. (a) Rosai fandun fa kofrurya insama kosma fainda ro Allah Wos Ḇyena? (b) Rosai wafrur kwar insama bisa wawasya Refoya?

4 Insama Allah Wos Ḇyena nḇefainda ro kankenem koḇena, fandun fa kowasyana ro ras ḇe ras. Inja, koḇensewar fa kowasyana ro ras nakam. (Yosua 1:8) Kakuḇae, kona fararur nabor kaku. Ḇape, koswarepen fararur koḇena nafrur awer koḇefnder fa kowasya Refoya. (Wasya Efesus 5:15, 16.) Imbude bisa kowasya ro arwo, ḇaido arkok, ḇaido roḇ. Na kokame kona kakara ḇemnis kuker manḇefas Mazmur i, rofyor fyas, ”Yaswar kaku wos bedi! Iso roi yakara ro ras be ras na.”​—Mazmur 119:97.

Koswarepen fararur koḇena nafrur awer koḇefnder fa kowasya Refoya ro ras ḇe ras

5, 6. (a) Rosai ḇefnai fa kowasenkara rosai kowasyana? (b) Rariso insama roi kowasenkarana nun fainda syadi? (c) Fawar rariso ḇaḇewasya ma waswasen ro Refoya nafnoḇek Au kwar.

5 Ḇape, kowasya Refo monda ima namnis ḇaime. Fandun fa kokara mnis kaku ma kowasenkara rosai kowasyana. (Mazmur 1:1-3) Kofrur rarirya ido, bisa kofrur rosai kofarkor kwarna. Inja, fandun fa kowasya Refo, imbude secetak kwarna ḇaido elektronik, ma kowasenkarana insama bisa nfadwer kankenem koḇena.

6 Rariso insama roi kowasenkarana bisa nun fainda? Rofyor kowasya Refo, fandun fa komnai resari fa kokara, ’Rosai yafarkor ro mnuk ine kuker  Yahwe I? Ro mnuk ine, rosai bisa yafrur ro kankenem yedi? Fararwe rosaiwer fandun fa yafrur ya?’ Rofyor kowasenkara Allah Wos Ḇyena ma koḇenadi kuker rosai kowasyana, nari komarisen fa kofrurna. Rarirya ido, bisa komam papoik Allah Wos Ḇyena ro kankenem koḇena.​—2 Korintus 10:4, 5.

RO ḆAḆEḆARYAS

7. Rariso koḇuk Refoya kuker nyan ḇepyum ro ḇaḇeḇaryas koḇena?

7 Rofyor koḇaryas ma koḇuk farkarkor ido, fandun fa kofasna Allah Wos Ḇyena ḇesya kwar. Naek oso doḇe, ”Imnis raris, koḇaryas ro rum ḇe rum kuker Yahwe ido, nari koiso ḇeyawos ker ḇe bena rumya, ḇaido kor Yahwe fa ḇeyawos yake?” Rofyor kowasya Refo ḇe snonkaku oso ido, ima imnis raris Yahwe isya dawos ḇe snonkaku ani. Mnuk kokinfir pyumna, ḇyefainda syadi ro rosai monda bisa kokofenna. (1 Tesalonika 2:13) Rofyor koro ḇaḇeḇaryas, koisya koḇensewar fa kowasya Refoya ker ke?

Rofyor kowasya Refo ḇe snonkaku oso ido, koḇuk swaf ḇe Yahwe I fa dawos ḇe i

8. Rosai ḇefnai fa kowasya Refo monda ima namnis ḇaim?

8 Ḇape, kowasya Refo monda namnis ḇaim. Snonkaku ḇebor ro kirine sifawimnis Refoya ḇa. Ro abad randak yakako ḇefawimnis Refoḇa sibor kaku. (Roma 10:2) Inja, kokara fasawsaw awer na bena rumya ifawimnis mnuk kowasyana. Fandun fa kofnoḇeki kuker kowasya kaḇer wos ḇeknam ro mnuk ani, ramnai kofasnaḇair farkarkor ḇyena. Kofrur rarirya ido, Allah Wos Ḇyena bisa nadif sne ma swaruser snonkaku sya.​—Wasya Lukas 24:32.

9. Rosai na kofrurya insama snonkaku sya sḇesyowi syadi Refoya? Buk contoh.

9 Rosai kokofen ḇepon rofyor kowasya mnuk ḇaim bisa nafnoḇek bena rumya fa ḇyesyowi syadi Refoya. Imnis raris, bisa kokofen, ”Rwama kumam rosai Manḇedaw kobedi ikofen kuker roi ine.” Ḇaido, rofyor kawos kuker snonkaku ḇeḇe Kristenḇa, bisa kokofen, ”Rwama kumam rosai Syap Ḇesren ikofen kuker roi ine.” Rofyor kosrow kuker snonkaku ḇefandun agamaḇa sya, bisa kofuken, ”Wakrower kwar wos ḇepyum nane ke?” Rofyor koswarepen snonkaku sna kakara ḇeḇeseyae, nari koḇensewar kaku fa wos koḇena namnis kuker kakara sena.​—1 Korintus 9:22, 23.

10. (a) Rosai naek oso isma ro ḇaḇeḇaryas ya? (b) Fawar pengalaman Bedi rofyor wamam papoik Allah Wos Ḇyena ro ḇaḇeḇaryas.

10 Pengalaman nabor nasya ḇefasnaḇair fainda rofyor kowasya Allah Wos Ḇyena ro ḇaḇeḇaryas koḇena. Imnis raris, naek oso ryama ḇe mansar oso ḇesma majalah koḇedi ro taun ḇe taun. Ras oso, naek ine ḇyuk syap Baryas ḇebabo ḇe i, ma iwasya kako mnuk oso ḇe mansar ani. Iwasya 2 Korintus 1: 3, 4, ḇekofen, ”I Kma sneḇeḇye, ma Allah ḇeḇuk samambraḇ sne  faro snonkaku . . . ḇyuk samambraḇ ro kosnesna, ro fafisu ḇaḇekandera kosma na.” Wos anna nsun kaku ro sne ḇyedi. Ma dor insama iwasya kaḇer mnuk ani. Ramnai, doḇe swarisu suḇesneso kaku ma kirine sufandun wos sneprei. Snar mnuk ani, imarisen ifawi nabor syadiwer kuker Refoya. Rofyor kowasya Refo ro ḇaḇeḇaryas koḇena ido, nari nun fainda ḇeba kaku!​—Kisah 19:20.

ROFYOR WUN FAYA RO MIMBAR

11. Fakamamar rosai naek ḇeyun faya oso ismana?

11 Komarisen kaku rofyor korama ḇe fananjur ma kebaktian. Roi ḇefnai fa korama yaiso snar imbe kosyom Yahwe I. Ḇape, ko kako kosma fainda ro rosai sfarkor ḇekona. Inja, naek ḇebuk farkarkor ro faya sena ima fakamaman ma fakamamar ḇeba kaku ḇesi. (Yakobus 3:1) Farkarkor sḇukna fandun fa neknam ro Allah Wos Ḇyena. Rofyor nwa fararur ḇemaeja kaku ine, rosai na wafrur insama papoik Refo nadif snonkaku ḇerama sya?

12. Rosai naek oso ifrurya insama faya ḇyedi neknam ro Refoya?

12 Ro faya sariryakam monda, Refo ima bar ḇefandun kaku ro fayana. (Yohanes 7:16) Inja, fandun fa mam mnis kakuna. Waswarepen insama pengalaman  ḇaido sararḇer buk ro faya Bedi ḇaido nyan rariso wun fayaya napyum syadi awer ro Refoya. Waswarepen kako wawasya Refo monda nama namnisḇa kuker buk farkarkor ro Refoya. Snaro, rofyor kowasya mnuk nabor ido, ḇerama sya nari siswarepen na ḇa. Inja, kwinfir pyum kaku mnuk imbe wawasyana. Ramnai, wasya fasaw awer mnuk ani. Wawasya ramnai, fasna farkarkor ro mnuk ani, buk ilustrasi, ma wakofenḇair rariso kofrurna ro kankenem koḇena. (Nehemia 8:8) Faya koḇedi ima rangka ido, fandun fa farkor mnis resari rangka ani ma mnuk ḇero dorina. Kwarapan rosai fasfesepen ro rangka ani kuker mnuk ḇero dorina. Ramnai, wawasya mnuk ani ma fasna knam farkarkor ro rangka ani. (Bisa mam wos farkor ḇero farkarkor 21 isof ro 23 ro syap Memperoleh Manfaat dari Pendidikan Sekolah Pelayanan Teokratis.) Ḇefandun syadiya, wor fafnoḇek ro Yahwe I, insama fasna kakara ḇemaeja Ḇyena ro Refoya.​—Wasya Ezra 7:10; Amsal 3:13, 14.

13. (a) Fawar pengalaman ro imbesrar oso ḇerower mnuk oso siwasya ro fananjur ḇesun kaku ro sne ḇyedi. (b) Fawar pengalaman Bedi rofyor warower siwasya mnuk ro fananjur ḇesun ro sne Bedi.

13 Imbesrar oso ro Australia isma roi ḇeḇyeḇa nabore fyor ibaba ya. Ḇarpur  ya, ḇye Saksi Yahwe. Ḇape, ikyarḇa kaker snar Yahwe iswar kaku i. Ramnai, ro fananjur oso, ryower siwasya mnuk oser ḇesun kaku ro sne ḇyedi. Iwasenkara mnuk ani ma ifrur riset, inja iwasya mnuk ḇesena wer. Ḇarpur mura, ikyar kaku snar Yahwe iswari. * (Mam fas-fas kasun ro sop.) Warower kwar siwasya mnuk oso ro fananjur ḇaido kebaktian ḇesun kaku ro sne Bedi ke?​—Nehemia 8:12.

14. Rariso kofasna snar koḇesyowi ma koswar kaku Allah Wos Ḇyena?

14 Kokofen kasumasa ḇe Yahwe snar ḇyuk ḇeko Wos Ḇyena, Refoya. Ḇyeasas nari nasya isof fyoro-fyoro, ma ifrur asas Ḇyena. (1 Petrus 1:24, 25) Inja, komarisen kowasya Refo ro ras ḇe ras, kofrurna ro kankenem koḇena, ma koḇuki fnoḇek snonkaku ḇesesya. Kofrur rarirya ido, bisa kofasna koḇesyowi ma koswar kaku roi ḇepyum ine ma Manbena kakara ro dorina, Allah Yahwe I.