’Mkosasor mko ro snonkaku ḇeposer sasuref mkoḇena.’​—KOLOSE 2:18.

DOYA: 32, 134

1, 2. (a) Sasuref rosai Allah kawasa Ḇyesya siwaf kakuna? (b) Rariso insama komam monda faro sasuref Allah Ḇyeasas kwarna? (Mam sonin ro randak artikel ine.)

SNONKAKU Kristen bena ramrem sisma saneraro ḇepyum kaku. Siwaf kaku fa sikenem ro nanki. Manwawan Paulus dap saneraro ine ḇe ”sasuref, isoine fararyor ro boiyaswa ro Allah”. (Filipi 3:14) Ro nanki, nari sḇepoik fnoḇek Yesus Kristus ro Karajan ḇyedi ma sifnoḇeki fa sifrur snonkaku sya sinapes kaḇer. (Wahyu 20:6) Ineiso saneraro ḇeba kaku! Domba-domba ḇese siwaf sasuref ḇeḇese. Saneraro sena isoine sikenem isof fyoro-fyoro ro Firdaus ro supswan. Saneraro ine nun marasrisen ḇeba faro si!​—2 Petrus 3:13.

2 Paulus imarisen ifnoḇek min ḇyesi ḇesma ramrem kako insama sisouser pdef ma sisma sasuref ani. Doḇe, ”Mkoswarepen monda roi ḇekur boiyaswana.” (Kolose 3:2) Fandun fa smam monda faro saneraro ḇepyum sena. (Kolose 1:4, 5) Allah kawasa Ḇyesyakam bena saneraro ro supswan  ḇaido ro nanki, na smam monda faro sasuref ḇeḇeasas kwar ani kuker skarauser barakas Yahwe nari ḇyuk ḇesi ro fafisu iwama.​—1 Korintus 9:24.

3. Swarapepen rosai Paulus ḇyuk ḇe snonkaku Kristen sya?

3 Paulus ḇyuk swarapepen ḇe snonkaku Kristen sya snar roi ḇeḇyeḇa nasya na ḇefrur sisma sasuref aniḇa. Imnis raris, fyas ḇe snonkaku Kristen ro kolose kuker snonkaku Kristen ḇekakuḇa ḇemarisen ḇefrur Allah imarisen kuker siso Moses Sasoser ḇyedi, ḇape kuker kakyar faro Kristus ḇa. (Kolose 2:16-18) Paulus dawos kako kuker roi ḇeḇyeḇa komam nasya kaker ro kirine ḇefrur fa na kaksma sasuref ani ḇa. Fyarkor ko rariso kopampum marisen ḇesasar ro fararur farḇuk ma rosai fandun fa kofrur ya rofyor kofamfaḇri kuker kina koḇesya ḇaido naek srar ro sidang. Paulus anun ḇyedine bisa nafnoḇek ko ro kirine. Inja, mkorama kofarkor swarapepen ḇeḇeso Paulus ḇyedi ro syapram fyarem ḇe snonkaku Kristen ro Kolose.

MKOMUN MARISEN RO FARARUR FARḆUK ḆESASAR NA

4. Rariso marisen ḇesasar ro fararur farḇuk bisa nafnai fa kosma sasuref ro Allah ḇa?

4 Rofyor Paulus fyawar kuker saneraro ḇepyum ḇe naek srar ansya, fyas ”Eḇedari mkomun marisen rosai ḇero baken mkoḇena ro supswan ine, isoine ḇaḇe farḇuk, ḇaḇearwarem, ḇaḇermomen, marisen ḇeḇarḇor, ma faḇri mankun kako.” (Kolose 3:5) Marisen fa kofrur fararur farḇuk bisa nsambraḇ kaku isof ḇaḇebati koḇena kuker Yahwe I namuk ma nafrur kosma saneraro ro fafisu iyama ḇa. Fafisu iwara naek oso ḇemarisen fa ḇefrur fararur farḇuk, ḇape ḇarpurya imbror ma kyaḇer ḇe sidang. Doḇe marisen fa ifrur fararur farḇuk ḇesasar rofafisu ani syambraḇ kaku ma ”insape ḇyaḇirna rofyor nawarai kwar”.

5. Rosai na kofrurya rofyor koisya rofafisu na ḇefrur fa kofrur sasar?

5 Kokame fandun fa kosasor ko ro fafisu na ḇefrur koyuk Yahwe farkankin Ḇyedi kuker farḇakḇuk ya. Imnis raris, bin ma snon ḇepacaran sya fandun fa suḇuk swarapepen ro randakya faro mankunsu, imnis raris panyae, syumyae, ma rofyor suyemire. (Amsal 22:3) Fafisu samswen ḇesena isoine rofyor kofrur marandan bisnis, ḇaido kofararur kayam kuker snon ma bin sya. (Amsal 2:10-12, 16) Rariso insama kofrur sasar awer? Kokofenḇair koma Saksi-Saksi Yahwe si ko. Kofaduru rari ma kenem koḇena ma koswarepen ḇaḇeembuk bisa nun roi ḇeḇyeḇa. Ko kako fandun fa kosasor ko rofyor koḇesanesoi ḇaido koḇaḇir kokain ro mankunko. Rofafisu ḇeradirya, fyorno ido komarisen kosma sneprei ro snonkaku oso. Sneḇaḇir ḇeradirya bisa sambraḇ kaku inja komarisen snonkaku mansei monda sḇuk sneprei ḇeko. Sneḇaḇir ḇeradirya bisa nun samswen ḇeba. Rofyor kosma roi ḇeradine, kofrur awer rosai monda na ḇefrur kosma sasuref ro Allah ḇa. Ipyum ya, kor fafnoḇek ro Yahwe ma naek srar kobansya.​—Wasya Mazmur 34:18; Amsal 13:20.

6. Rosai fandun fa koswarepen rofyor kokinfir hiburanna?

6 Insama komun marisen ḇesasar ro fararur farḇuk, fandun fa koḇinkwanbur  hiburan ḇeḇyeḇana. Hiburan ḇebor ro kirine nafrur fa koswarepen mura ḇe fafisu ḇero Sodom ma Gomora. (Yudas 7) Hiburan-hiburan nane sifrur nafa nasnai pyum inja fararur farḇuk ḇesasar nasnai ḇe roi ḇesasarḇa. Inja, fandun fa kokinfir hiburan ḇepyum ḇefrur fa komarisen. Koswarepen insama kokinfir awer hiburan ḇefrur kosma sasuref ro Allah ḇa.​—Amsal 4:23.

MKOFASNA SASWAR MA SNEḆENAḆYE

7. Samswen rosai bisa ḇeḇejadi ro sidang?

7 Komarisen kaku snar kosya ro sidang. Ro fananjur, kofarkor Allah Wos Ḇyena ma kosaramper oso ma ḇesesya. Ine nafnoḇek ko fa komam monda faro sasuref Allah Ḇyeasas kwarna. Ḇape, fyorno ido kokara sasar ko ma bisa nafnai famfaḇri. Rofyor kofrur mnis na ḇa ido, bisa nafrur fa kokram masasor.​—Wasya 1 Petrus 3:8, 9.

8, 9. (a) Rari rosai kofandunna insama kosma sasuref ro Allah? (b) Rosai na ḇefnoḇek ko fa kofaduru ḇaḇeaski rofyor min koḇesi sifrur sne koḇena naduf?

8 Koswarepen insama masasor koḇena nafrur awer kosma sasuref Allah Ḇyeasas kwarna ḇa. Paulus ikofenḇair rosai fandun fa snonkaku Kristen sifrurna, ”Eḇedari, mkomnis snonkaku Allah kyinfir ma fyasren ma iswar syadi, ma mkofasna ḇaḇesneso, snemura, ḇaḇerun sne, ḇaḇefafir ma ḇaḇekaḇaḇaḇ. Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi; imnis raris Manseren ipyos sasar mkoḇena kwar mko kako mkakfrur rarirya kada. Ma ro roi ḇeḇor nane kam: mkona saswari, ḇekaḇrai ḇefesepen ḇaḇeoser ma ḇaḇemanasnisya.”​—Kolose 3:12-14.

9 Saswar ma sneḇenaḇye na nafnoḇek ko fa koḇuk maf faro snonkaku ḇesesya. Rofyor sne koḇena naduf snaro wos ma rosai snonkaku oso ifrur faro ko ido, kokarapan rofyor kofrur snonkaku ḇese sne sena naduf kuker wos ma rosai kofrurna. Rofyor snonkaku ani ḇyuk ampun ḇeko, nari komarisen kaku snar saswar ma sneḇenaḇye ḇyedi! (Wasya Pengkhotbah 7:21, 22.) Kokofen kasumasa kako snar Yesus kuker sneḇenaḇye iryur snonkaku ḇemarisen ḇesyom faro Yahwe I. (Kolose 3:15) Kokame koswar Yahwe I, koḇaryas abar ḇemnis, ma kosma samswen ḇebor ḇemnis kako. Rofyor kofasna saswar ma sneḇenaḇye ma koḇuk ampunyae ko, sidang nari ḇyeoser ma komam monda faro sasuref Allah Ḇyeasas kwarna.

10, 11. (a) Rofyor kokram masasor ido, bon ḇeḇyeḇa rosai kosmana? (b) Rariso insama kokram masasor ḇa?

10 Rofyor kokram masasor faro snonkaku ḇese ido, nari nafrur kosma sasuref ro Allah ḇa. Refo kyurfasna kokram masasor faro snonkaku ḇese ido bisa nun ḇe roi ḇeḇyeḇa. Raris, Kain ikram masasor faro Habel isof myuni. Korah, Datan, ma Abiram skokram masasor faro Moses i, ma ḇarpurya sembroḇ fa sisampumi. Raja Saul ikram masasor faro Daud isof ḇyensewar fa myuni. Kakuḇeri Allah Wos Ḇyena ḇekofen, ”Ro moḇ kokram masasor ma kofandun mankun ko rodia isya anunḇesisye ma fararur ḇeḇor ḇeḇarḇorna naisya.”​—Yakobus 3:16.

11 Rofyor koḇensewar kaku fa kofasna saswar ma sneḇenaḇye nari komasasor fasawḇa. Refoya ikofen bo doḇe,  ”Saswar ani kaḇaḇaḇ ma ḇaḇenaḇye. Saswar ani isasyar kuker sasuremḇa.” (1 Korintus 13:4) Insamaido sne ḇemasasor ine nerares ro sne koḇena ḇa ido, fandun fa komam rosai monda imnis Yahwe mamam Ḇyeja. Kokame koḇebaken oser, isoine sidang ya. Refoya ikofenbadir, ”Rofyor kina oso ḇyeḇesandik, kina ḇesenakam nakraḇ kako.” (1 Korintus 12:16-18, 26) Inja, rofyor oso ro naek srar kobansi isma roi ḇepyum ido, kokame nari komarisen ma kokram masasor faro i ḇa. Kokarapan farari ḇepyum ro Raja Saul romawa ḇyedi, Yonatan i. Yonatan ḇyeḇekinfir ḇe raja ḇa raryano, imsor faro Daud i ḇa rofyor Daud ḇyeḇekinfir ḇe raja. Iba syadiwer syambraḇser ma isaramper Daud i. (1 Samuel 23:16-18) Bisa kofarari sneḇenaḇye ma saswar Yonatan fyasna nake?

MKOḆESEWAR FA MKOSMA SASUREF ḆE KINA OSER

12. Ananun ḇepyum rosai Paulus ḇyuk ḇe kina sya?

12 Rofyor min ro kina oser-oser sifrur rosai Refoya ikofen ido, kina ya nari isma aski, marisen, ma sasuref Allah Ḇyeasas kwarna. Paulus ḇyuk ananun ine faro kina syakam, ”Ne, bin ḇena swa, wasouser swambri imnis faro Manseren. Ne, snon ḇena swa, waswar swambri ma bewayam awer i. Ne, inai ma romawa mko, indo mkoḇeuser sna-kma mkoḇesi ro roi ḇeḇor kam, snar naiso ḇefrur marisen faro Manseren. Ne, sna-kma mkoya, indo mkofrur sneduf awer faro inai ma romawa mkoḇesi, insa sisnesna nfafayaf awer.” (Kolose 3:18-21) Ananun ine bisa nafnoḇek kina Bedi ke?

13. Rariso imbesrar Kristen oso bisa ifnoḇek swari insama imarisen daksyom Yahwe I?

13 Kokarapan imbesrar oso swari isyom Yahwe I ḇa. Rosai nari ifrur ya rofyor  swari ifrur mnis i ḇa? Imbesrar ine bisa imsor ma dawos nabore. Ḇape, ine nun fainda ke? Rofyor iso ḇesasarḇa ido, na swari imarisen fyarmyan ḇe Yahwe ke? Oroḇaḇeri. Ḇape, rofyor ḇyesyowi swari ḇebukor ro kina yadori ido, kina ḇyeja nari ḇyeaski syadi ma nun sanandik faro Yahwe I. Rari ḇepyum ro imbesrar ine bisa nafrur swari imarisen ifarmyan ḇe Yahwe isof sukame susma sasuref Allah Ḇyeasas kwarna.​—Wasya 1 Petrus 3:1, 2.

14. Rosai fandun fa snonswa oso ifrur ya rofyor swari bena kakyar oser ḇa ḇyesyowi i ḇa?

14 Kwarapan naek oso swari isyom Yahwe I ḇa. Rosai nari ifrur ya rofyor swari ḇyesyowi i ba? Rofyor imsor ma ḇyawek swari snar ḇyesyowi i ḇa ido, ine nun fainda ke? Na aroḇaḇeri! Allah imarisen insama ḇyesnonswa ḇesaswar ma ifarari Yesus. (Efesus 5:23) Yesus iso ḇebukor ro sidang Kristen, ḇyekaḇaḇaḇ ma isaswar. (Lukas 9:46-48) Rofyor naek ani iso Yesus nyan ḇyena ido, ḇarpurya imbude nari swari imarisen dakfarmyan ḇe Yahwe I.

15. Rariso snonswa oso bisa fyasnai iswar swari?

15 Yahwe ḇyuk parenta ḇe snonswa sya, ”Ne, snon ḇena swa, waswar swambri ma bewayam awer i.” (Kolose 3:19) Snonswa ḇesaswar nari ḇyesyowi swari ma ryower rosai swari ikofenna ma doḇe rosai ikofenna ima fyandun kaku. (1 Petrus 3:7) Rofyor swari iso marisen ḇyenakam ḇa raryano, ryower pyum swari kakara ḇyena na nafnoḇeki fa dun snemuk ḇepyum. (Amsal 15:22) Snonswa ḇesaswar nari idif swari ḇa fa ḇyesyowi i. Ḇape, ḇyensewar kaku fa isma syowi ani. Rofyor snonswa iswar swari ma romawa ḇyeja, kina seja nari neaski syadi rofyor  sifarmyan ḇe Yahwe ma nari sisma sasuref ro Yahwe I.

Rariso insama kosma sasuref Allah Ḇyeasas kwarna rofyor kina koḇesya sisma roi ḇesamswen? (Mam paragraf 13-15)

ROMAWA BABO MKOYA—MKOMNAI AWER FA MKOSMA SASUREF ANI!

16, 17. Romawa babo mkoya, rariso insama mkofafayaf ḇa rofyor sinan mkoḇesya sedisiplin mko?

16 Mkoma romawa babo ido, imbude mkokara sinan mkoḇesya sidif mko ma sifawi ḇa rosai mkosma na. Sneḇaḇir ḇeradirya imbude nafrur fa mkofafayaf isof mkomewer mkofarmyan ḇe Yahwe I. Ḇape rofyor mkobur Yahwe I, nari mkofawi kaku snar ḇeswar kaku mko iso sinan Kristen mkoḇesya ma bati mkoḇesya ro sidang.

17 Mkokarapan: Rofyor sinan mkoḇesya sifarkor mkoḇa ido, kyurfasna siswar mkoḇa. (Ibrani 12:8) Kakuḇae, si kako sinapesḇa. Inja, nyan sḇukifarkor mko imbude nafrur mkofafayaf. Ḇape, mkomam monda awer faro nyan sḇukifarkor mkona. Ḇape, roi ḇefnai sḇuk disiplin ḇe mko. Mkorower pyumna ma mkomasasor fasaw awer. Allah Wos Ḇyena doḇe, ”Snonkaku bena fawawinanem nari dawos fasawba, ma snonkaku bena fawawi nari iknon pdef.” (Amsal 17:27) Mkoḇensewar fa mkoḇe snonkaku ḇemas fa mkorower ananun ma mkofarkor ro ananun ani, mkomam awer faro nyan sḇuk ananun ani rai. (Amsal 1:8) Mkoḇefnder awer rofyor mkona sinan ḇeswar Yahwe ido, ima sasuref ḇemaeja kaku ḇerama ro Allah koḇedi. Simarisen sifnoḇek mko insama mkokenem fyoro-fyoro.

18. Rosai ḇefnai fa wun snemuk fa wamam monda faro sasuref Allah Ḇyeasas kwarna?

18 Kokame kona saneraro ḇepyum ro fafisu iyama, isoine kankenem fyoro ro nanki ḇaido firdaus ro supswan. Saneraro ine nari ḇyendarirya kaku. Ine neknam ro asas Manḇedaw koḇedi ro supswan ma farsyos ḇekofen, ”Supswan nari ifo kuker fawawi ro Yahwe I.” (Yesaya 11:9) Kerower, snonkaku syakam ro supswan ine nari sisma farkarkor ro Allah. Kirine koḇekandera kaku raryano, rosai koḇensewarna nari nefromo ḇa. Inja, koḇefnder awer rosai Yahwe Ḇyeasas kwar faro ko na. Komnai awer isof kosma sasuref Allah Ḇyeasas kwarna!