”Iḇyekada Allah, ḇyuk ḇaḇekaḇaḇ ma sneprei faro mko, insa mkokenem kuker ḇaḇesne oser, ma mkoso nyan ro Yesus Kristus.”​—ROMA 15:5.

DOYA: 17, 13

1, 2. (a) Fainda rosai naek srar ḇeḇeso sismana snar siso Allah farkankin Ḇyena? (b) Fakfuken ḇefandun rosai nari kowawos ro artikel ine?

IMBESRAR oso ro Kanada ikofen, ”Snaro iso Allah farkankin Ḇyena naiso ḇefnai fa isma aski ro kenem ḇyedi ma nafnoḇek i fa ifrurmnis samswen ismana.” Naek oso ḇefarḇuk taun ri 23 kwar ikofen, ”Snaro suso Allah farkankin Ḇyena inja farḇakḇuk suḇena nakain kuker payamyum ma marasrisen.” Naek osower ḇero Filipina doḇe, ”Snaro iso Allah farkankin Ḇyena, inja nya swaruser ḇepyum ma nafnoḇek i fa fyanam syadi kukro naek srar ḇerama ro er ḇesena.”

2 Kakuḇae, nari kosmai fainda nabor rofyor koso Allah farkankin Ḇyena. Rosai kofrurya insama kosmai farkankin ro Allah? Fandun fa kofawimnis resari rosai Refo ikofen kuker snonkaku ḇeso farkankin ro Allah. Ro artikel ine nari kokarem fakfuken rikior: (1) Imnis rariso snonkaku ḇeso farkankin ro Allah? (2) Farari ḇepyum rosai na ḇefnoḇek ko fa kosma kyaremso ro Allah I? (3) Rariso ”kona Kristus kakara ḇyena” ḇefnoḇek ko fa koso Allah farkankin Ḇyena?

 IMNIS RARISO SNONKAKU ḆESO ALLAH FARKANKIN ḆYENA?

3. Rosai Refoya ikofen kuker snonkaku ḇeso Allah farkankin Ḇyena ma ḇeso marisen mankun sena?

3 Manwawan Paulus ifnoḇek ko fa kofawi rosai ḇeḇese rofandu snonkaku ḇeso Allah farkankin Ḇyena kuker snonkaku ḇeso marisen mankun sena. (Wasya 1 Korintus 2:14-16.) Snonkaku ḇeso marisen sena, ”nari saksma rosai rurya fyasna naḇa. Snar faro snonkaku ani, roi sikofen anna namnis ḇaḇefawawi royoḇa monda.” Ine iḇeseḇur kuker snonkaku ḇeso Allah farkankin Ḇyena, ”ifawi kankunes ro roiḇebor kam” ma nya ”Kristus kakara ḇyena” ine kyurfasna kyara raris moḇsa Kristus kyara ya. Paulus danun ḇeko fa koso Allah farkankin Ḇyena. Rariso na kofawi wer roi ḇeḇese rofandu snonkaku ḇeso Allah farkankin Ḇyena ma snonkaku ḇeso marisen mankun sena?

4, 5. Imnis rariso snonkaku ḇeso marisen mankun sena?

4 Rariso kakara ro snonkaku ḇeso marisen mankun sena? Na siso marisen ro dunya ine monda, ma sfandun mankunsi. Paulus ikofen snonkaku ḇemnis radine sima ”snonkaku ḇeḇarḇorsya”. (Efesus 2:2) Snonkaku ḇemnis radirya napyan fa sawyae si. Sifrur monda rosai simarisenna ma simewer sisewar Allah farkankin Ḇyena. Snonkaku ḇemnis radine nari syewar monda pipi, ḇaḇenasan ḇekaki, ḇaido kyara ima isyadi ro ḇesesya.

5 Snonkaku ḇeso marisen mankun sena, simarisen sifrur fararur ’besasar ro ḇaken sena’. (Galatia 5:19-21) Ro syapram ḇerandak ḇyedi faro sidang ro Korintus Paulus dap fararur ro snonkaku ḇeso marisen sena. Isoine, sifnai pakpef ro sidang, sawyae snonkaku ḇesesya fa sfaḇaḇri, ma sawyae snonkakusya insama spampum ananun sismana, skursofyae sko ro pengadilan, sisouser ḇa ma sfandun sasewar anan ya monda. (Amsal 7:21, 22) Yudas ikofen snonkaku ansine na ”sisma Allah rur ḇyedi ḇa”.​—Yudas 18, 19.

6. Imnis rariso snonkaku ḇeso Allah farkankin Ḇyena?

6 Snonkaku ḇeso marisen mankun ḇyena, iḇesebur kuker snonkaku ḇeso Allah farkankin Ḇyena. Snar myam fasfesepen ḇyena kuker Allah ima roi ḇyefandun kaku. Imarisen Allah rur ḇesren Ḇyedi fyarkin i ma fyarari Yahwe I. (Efesus 5:1) Ḇyensewar fa ifawi rosai Yahwe imarisenna ma ifrur rosai ḇemnis kuker Yahwe mamam Ḇyeja. Ḇyaḇir fyanam kaku kuker Yahwe I. Iḇeseḇur kuker snonkaku ḇeso marisen mankun sena, snonkaku ḇeso Allah farkankin Ḇyena ḇyesyowi Yahwe wos Ḇyena ro kankenem ḇyedi ḇesiper. (Mazmur 119:33; 143:10) Snonkaku ḇemnis radine nari iso monda ”marisen besasar ro ḇaken ḇyena” ḇa, ḇape ḇyensewar fa ifrur fararur ro ’rur ḇesren bon ḇyena’. (Galatia 5:22, 23, NW) Insama kofawi imnis rariso snonkaku ḇeso Allah farkankin Ḇyena, kokarapan roi ine: Snonkaku ḇesma fararur ḇepyum nari roi kyaraya iso fararur ḇyena monda, inja rofyor koswar fasfesepen koḇena kuker Yahwe ido, nari iso roi kokaraker na.

7. Rosai Refoya ikofen kuker snonkaku ḇeso Allah farkankin Ḇyena?

 7 Yesus ikofen snonkaku ḇeso Allah farkankin Ḇyena nari sisma aski ma marisen. Kowasya ro Matius 5:3, ”Aski faro snonkaku [ḇefandun farkankin ro Allah], snar siḇena Ḇaḇesasoser Boiyas.” Ro Roma 8:6 ikofen fainda ḇesewer na kosmai na rofyor koso Allah farkankin Ḇyena. Mnuk ine ikofen, ”Rofyor kokara monda marisen ḇesasar koḇena nari nun ḇe marmar, ḇape rofyor kokara roi ḇemnis kuker Allah marisen ḇyena nari nun aski ma kankenem.” Inja, rofyor koso Allah farkankin Ḇyena nari kofanam syadi kuker I, sne koḇena neprei ma kosma saneraro kankenem fyoro.

8. Rosai ḇefnai fa samswen kaku koso Allah farkankin Ḇyena?

8 Kofawi kokenem ro dunya ḇeḇarḇor. Snaro kosya rofandu snonkaku ḇeso Allah farkankin Ḇyena ḇa, inja fandun fa kofaduru nyan kakara koḇena. Rofyor koso Allah farkankin Ḇyena ḇa ido, nari dunya ine iso ḇefarkin ko kuker kakara ḇesasar ḇyena. Inja, rariso koḇinkwanburna? Ma rariso kosma kyaremso ro Allah I?

KOFARKOR RO SNONKAKU ḆESO ALLAH FARKANKIN ḆYENA

9. (a) Rosai ḇefnoḇek ko fa koso Allah farkankin Ḇyena? (b) Contoh ḇepyum ro mansei nari kofarkorna?

9 Imnis raris romawa kasun fandun fa fyarkor ro sinan ḇyesuya ma iso nyan ḇepyum suḇena, ko kako fandun fa kofarkor ma kofarari snonkaku ḇena fasfesepen ḇepyum kuker Yahwe I. Ine nari nafnoḇek ko fa koso Allah farkankin Ḇyena. Osower ido, ko kako fandun fa kofawi rosai snonkaku ḇeso marisen mankun sena sifrurna insama kakfarari  awer rosai sifrurna. (1 Korintus 3:1-4) Refoya naser contoh ḇepyum ma ḇeḇyeḇa. Inja, mkorama komam contoh ḇepyum bisa kofarkor ro Yakub, Maria ma Yesus sko.

Rosai na kofarkor ro Yakub contoh ḇyedi? (Mam paragraf 10)

10. Rosai Yakub ifrurya ḇefasnaḇair iso Allah farkankin Ḇyena?

10 Imnis raris ko, Yakub i kako isma samswen nabore. Eba ḇyedi Esau imbe myuni. Ma manbanyori ifrowes ker i. Inja, Yakub ikenem kuker snonkaku ḇeso Allah marisen Ḇyena ḇa. Ḇape, Yakub ima iso Allah farkankin Ḇyena pdef. Imnis raris fyor Esau iyaw i, dor Yahwe i fa kyadaunwareki. Ḇyenadi, ”Yor kaku ḇe Au, faspar aya . . . Wakofen kwar, ’Nari yaḇuk barakas ḇe au, ma nari yafrur up ḇedi sibor syadi imnis karyen ro yendisare.’” (Kejadian 32:6-12) Osower ido, Yakub ifawi roro kina ḇyesi nari Yahwe ifrur marisen Ḇyedi, inja Yakub myamfaduru pyum kina ḇyesi. (Kejadian 28:10-15) Yakub fyasna kakyar ḇesambraḇ faro Yahwe asas Ḇyena ma fyasna na ro rosai ifrurna.

Rosai na kofarkor ro Maria contoh ḇyedi? (Mam paragraf 11)

11. Rariso kofawi Maria iso Allah farkankin Ḇyena?

11 Kirine kofarkor kuker Maria i. Yahwe kyinfir Maria i fa ḇyeawin faro Yesus i, snaro iso Allah farkankin Ḇyena. Kowasya rosai Maria ikofen ya rofyor ḇyedakam ḇe karyer ḇyesuya Zakharia ma Elizabet su. (Wasya Lukas 1:46-55.) Ro wos ḇyenane bisa komam Maria iswar Allah Wos Ḇyena ma myambir pyum syap Ibrani. (Kejadian 30:13; 1 Samuel 2:1-10; Maleakhi 3:12) Ma rofyor Maria ma Yusuf sufarḇuk kwar Yusuf denfus Maria i ḇa isof Maria nya Yesus i. Sumam fararur Yahwe ḇyuk ḇe su ḇyefandun kaku ro marisen  mankun suḇena. (Matius 1:25) Maria myam rosai monda ḇeḇejadi ro Yesus kenem ḇyedi ma ryower roi ifarkorna. ”Ikram roi ḇeḇor anna kam ro sne ḇyedi.” (Lukas 2:51) Komam kada, Maria imarisen kaku faro Allah asas Ḇyena kuker Mesias i. Bisa kakfarari Maria i ma koḇesewar fa kofrur rosai Allah imarisenna ke?

12. (a) Rariso Yesus fyarari Kmari? (b) Rariso kofarari Yesus i? (Mam sonin ro randak artikel ine.)

12 Rofandu snonkaku ḇekenem syakam, Yesus derer monda ḇesomnis kaku Allah farkankin Ḇyena. Rofyor ikenem ro supswan imarisen ifarari Kmari. Ro nyan kakara ḇyena, sneḇaḇir, ma rosai ifrurna nakame namnis kuker Yahwe I. Ifrur rosai Allah imarisenna ma ḇyesyowi Allah sasoser Ḇyena. (Yohanes 8:29; 14:9; 15:10) Imnis raris, komam rariso syap Yesaya fyasnaḇair Yahwe sawarwar Ḇyeja ma nyan rariso syap Markus fyasnaḇair Yesus sneḇaḇir ḇyeja. (Wasya Yesaya 63:9; Markus 6:34.) Rariso kofarari Yesus i kuker kofasna sawarwar faro snonkaku ḇefandun fafnoḇek ro ko? Imnis raris Yesus i, komarisen koḇaryas ma koḇuk farkarkor kuker ankankinem ḇeḇye ya ke? (Lukas 4:43) Snonkaku ḇeso Allah farkankin Ḇyena nari fyasna sawarwar ma ifnoḇek snonkaku ḇesesya.

13, 14. (a) Rosai kofarkor ro snonkaku ḇeso Allah farkankin Ḇyena ro baboine sya? (b) Fawar contoh oso.

13 Kirine, naek srar ḇeḇor sya simarisen sakfarari Kristus i. Bisa komam sisma raryaḇ ro fararmyan sena, sifrur pyum, ma sisawarwar. Sinapes ḇa raryano sḇensewar fa sfaduru rari rari ḇepyum ma sifrur rosai Yahwe imarisenna. Rachel, imbesrar oso ro Brasil doḇe, ”Yamarisen yaso nyan snonkaku ḇero dunya ine sisansun si rai. Inja sansun ayena nasnai mnis ḇa. Ḇape rofyor yafarkor napnapes ya ma yaḇur moḇ yedi yaḇensewar kaku fa yaso Allah farkankin Ḇyena. Kakuḇae, kofadwer kenem koḇena ine napyan ḇa, ḇape ine nun aski ma raryaḇ ḇe aya ma nafnoḇek aya fa yafawi rosai Allah imarisen na.”

14 Imbesrar oso ḇero Filipina ḇenirḇe Reylene isma samswen ḇesewer. Ifarmyan ḇe Yahwe fyoro kwar raryano, roi isewar syadi yaiso farkarkor ḇekaki ma fararur ḇepyum. Ine nafnai fa ifakapon rosai imbe ifrur ro sidang ma fararmyan ḇyeja ḇa. Doḇe, ”Yaḇaḇir roi oso ḇefandun syadi ro kankenem yedi yafrurna naḇa. Ine ḇyefandun syadi ro fararur yena.” Reylene fyadwer nyan kakara ḇyena ma ifakapon fararmyan ḇyedi faro Yahwe ro kankenem ḇyeja. Kirine ikyar faro Yahwe asas Ḇyeja ro Matius 6:33, 34 ma ikofen, ”Yakyar kaku Yahwe nari fyasos fandandun yena!” Imbude ro sidang koḇedi naek srar sino sisma rari ḇemnis Reylene i. Rofyor komam sifarari Kristus ido, komarisen kakfarari soasuser sena.​—1 Korintus 11:1; 2 Tesalonika 3:7.

KONA ”KRISTUS KAKARA ḆYENA”

15, 16. (a) Rosai kofrurya insama kakfarari Kristus i? (b) Rariso kona ”Kristus kakara ḇyena”?

15 Rariso kofarari Kristus i? Ro 1 Korintus 2:16, fyasnaḇair fandun fa kona ”Kristus kakara ḇyena.” Ro Roma 15:5 nḇuk swarapepen ḇeko insama ”koso nyan ro Yesus Kristus”. Insama kofawi  nyan Kristus ḇyedi fandun kaku kofarkor kakara ḇyena, sneḇaḇir, ma rosai ifrurna. Yesus iswar kaku fasfesepen ḇyedi kuker Yahwe I, ine ḇyefandun syadi ro rosai riryakam. Inja, rofyor koso Yesus nyan ḇyena ido, imnis raris koso Yahwe nyan Ḇyena kako. Iso ḇefnai fa fandun kaku kona Kristus kakara ḇyena.

16 Rariso kakfarari Yesus i? Rofyor ifarmyan ro supswan, manfamyan ḇyesi smam ifrur mujisat, fyarkor snonkaku ḇeborsya, rariso ifrurpyum snonkaku sariryakam, ma smam rariso Yahwe fyarkin i kuker rur ḇesren ya. Sikofen, ”Inkoine saksi-saksi ro roi ḇeḇor ifrur kwar.” (Farfyar ro Manwawansya [Kisah] 10:39) Kirine na komam Yesus i ḇa. Ḇape na komambir pyum Yesus i ma kofawi kakara ḇyena rofyor kowasya ma kowasenkara injil rifiak, isoine Matius, Markus, Lukas, ma Yohanes. Inja nari ’koso wewur ḇyena’ ma kofarari nyan ”kakara” ḇyena.​—1 Petrus 2:21; 4:1.

17. Fainda rosai kosmaiya rofyor kona kakara raris Kristus i?

17 Fainda rosai kosmaiya rofyor kona kakara raris Kristus i? Imnis raris kan roḇean ḇepyum ido nari baken koḇena nasambraḇ, rarirya kako rofyor kokara raris Kristus ido, nari kakyar koḇena nako. Fawawas mura, kofawi rosai nari Yesus ifrur ro fafisu sairiryakam. Ine na nafnoḇek ko fa kun snemuk ḇefrur Allah imarisen ma kona sneuser ḇesren. Inja, fandun kaku fa ”kofarari Kristus i”.​—Roma 13:14.

18. Ro artikel ine, farkarkor rosai kosmai ro snonkaku ḇeso Allah farkankin Ḇyena?

18 Ro artikel ine nafnoḇek ko fa kofawi mnis snonkaku ḇemnis rariso ḇeso Allah farkankin Ḇyena. Ko kako kofarkor na kona ”Kristus kakara ḇyena” nane nafnoḇek ko fa kofawi Yahwe marisen Ḇyena ma kona fasfesepen ḇefanam kuker I. Bape, farkarkor ḇese nasya fandun fa kofawina. Imnis raris, Rariso kofawi kosmai Yahwe kyaremso Ḇyena? Rosai na kofrurya insama kofawi Allah marisen Ḇyena? Rariso kona kakara ḇefrur marisen Allah I ro kankenem koḇena ras ḇe ras? Ine nari kofarkor ro artikel ḇeuser ya.