”Saswar-ḇaḇye ro Allah, ḇesyadi ro kakara, nari nfaduru sne mkoḇena.”​—FILIPI 4:7.

DOYA: 76, 141

1, 2. Rosai ḇekur Paulus ma Silas suro Filipi? (Mam sonin ro randak artikel ine.)

KOKARAPAN farfyar ine. Fafisuya ro romfawru. Misionaris risuru, Paulus ma Silas, suro sim fadu ḇero bui ḇepampan kaku ro mnu beba Filipi. Jadi fa sufrur royoḇaḇeri snaro sewanka suwesna kuker apyawur ḇedworen, ma dokor suḇedi naduf kaku snar siprer babo su. (Farfyar ro Manwawansya [Kisah] 16:23, 24) Ḇepon ya, kawasa ḇeborsya sismer su ḇebarpon ḇeḇenasan ro pasar. Ma fasaw ḇeri sun sufa semankara su. Spansawek sansun ḇero baken suḇena ma siprer su kuker ankyon. (Kisah 16:16-22) Roi nane namnis faro su ke? Paulus ima kawasa Roma rirya, ma ipyumya semankara i kuker nanapes. *—Mam fas-fas kasun ro sop.

2 Rofyor Paulus ryo bui, imbude kyara kuker rosai ḇeḇejadi ro ras ani ma kuker snonkaku ḇero Filipi sya. Sna  sinagoga ro mnu ani ḇa, imnis raris mnu ḇebor Paulus ryarona. Inja snonkaku Yahudi sya senadi robandi kedwai ḇeba ro mnuya ḇefanam war andir. (Kisah 16:13, 14) Imbude ro mnu ani snon Yahudi risamfur sisyaḇa ke? Snaro insama sna sinagoga oso ido, fandun fa snon Yahudi risamfur sisya ro moḇ ani. Snonkaku ḇeḇarek ro Filipi semanen kaku si snaro sḇekawasa Roma. (Kisah 16:21) Iso ḇefnai fa skara ḇaḇeri Paulus ma Silas, snonkaku Yahudi, bisa suḇe kawasa Roma kako. Kofawimnis ḇaḇeri roi ḇekur su na, ḇape kofawiya sifrurmnis su ḇa ma sisun suḇe bui.

3. Rosai ḇefnai fa Paulus ikmom rofyor isma ro bui, ḇape rari rosai isma ya?

3 Imbude Paulus kyara kako kuker roi nari ḇekuri ro Filipi. Ro paik ḇeḇeso aniwara, Paulus isya ro moḇ ḇese ḇero Soren Aegea, ro Asia Kecil. Rofyor isya rodiwa, rur ḇesren idwareki insa ḇyaryas ro moḇ ḇeḇeso monda awer. Imnis raris, rur ḇesren idif i fa ryaḇe moḇ ḇese. (Kisah 16:6, 7) Ḇape ḇe moḇ risai? Rofyor ryo Troas, Paulus isma fasasnai ḇekofen faro i, ”Kwaber muma ḇe Makedonia.” Yahwe marisen ḇyedi nasnaibos faro i! Inja Paulus ryamura ḇeri ḇe Makedonia. (Wasya Kisah 16:8-10.) Mboi rosai ḇeḇejadi rofyor isya ro Makedonia kwar? Ismai ro bui! Rosai ḇefnai fa Yahwe myam monda roi nane nkur Paulus i? Isof fafisu risai ismai ro bui? Paulus kyandor kaku faro roi ḇekuri na raryano, kakyar ḇyena nasambraḇ ma iryaḇ pdef. Paulus ma Silas ”suḇenadi ma sudisen dow sanandik faro Allah”. (Kisah 16:25) Inja, saswar-ḇaḇye ro Allah nḇuk pararei ro sne ma swaruser suḇena.

4, 5. (a) Rariso fafisu kosma nane namnis kuker rosai Paulus ismana? (b) Rariso Paulus fafisu ḇyena nefararwe fasaw kaku?

4 Fafisu oso wakḇaḇir wamnis Paulus i ke? Imbude ro kankenem Bedi, wor insama Allah ifnoḇek Au fa wun snemuk ma ḇaḇir fafisuya rur ḇesren fyarkin Au. Mboi ḇarpurya, roi ḇedwarek nasya nabore roḇaido ḇensewar kaku fa wafrur fararwe ro kankenem Bedi. (Pengkhotbah 9:11) Rofyor kwara kuker rosai wasmana, imbude wafuken rosai ḇefnai fa Yahwe myam monda roi nane nḇejadi. Rosai na ḇefnoḇek Au fa wafarmku pdef, ma wakyar kaku faro Yahwe I? Na kosma kankaremya ro rosai ḇekur Paulus ma Silas suwer.

5 Rofyor Paulus ma Silas sudisen, roi nabor ḇefrur kanandor nasya nḇejadi. Randakya, saprop iwawa naba kaku. Kedwai ḇeḇor ro bui anna nḇase kam. Ma wanka saibur snonkaku ḇesma ansi. Ramnai, Paulus idwarek mananir bui snaro imbe myun mankundi. Ḇarpurya mananir ani ma kina ḇyansikam sḇebaptis. Meser arwoya, ḇebarara-ḇebarara ro mnu ansi siwan ḇefararur ro mnu sya sun Paulus ma Silas susasyar ro bui ma sor su fa subur mnu ani kuker ḇaḇye. Rofyor ḇebarara-ḇebarara ro mnu ansi simnaf Paulus ma Silas snon Roma suirya, sifawi sifrur sasar kwar, ma mankunsi srama siyaker manwawan ansuya fa subur. Ḇape, rofyor subur mnu ani ḇaim, Paulus ma Silas sura ḇe imbesrar ḇeḇebaptis  babo, Lidia i, fa sukofenḇair imbe subur. Ma suḇuk swaf ani fa susambraḇser naek srar ḇesesya ro Filipi. (Kisah 16:26-40) Roi susma nane nefararwe fasaw kaku!

”ḆESYADI RO KAKARA”

6. Rosai nari kofarkor ma komam ro artikel ine?

6 Rosai na kofarkor ro farfyar ḇebor anna? Yahwe bisa ifrur roi kokara baim, inja komkakwarek syadi awer rofyor kosma samswen. Kofawi farkakor anna nasambraḇser Paulus i, snar ḇarpurya fyas syap ḇe naek srar ḇero Filipi sya kuker farkarkor ro makakwarek ma saswar ḇaḇye ro Allah. Ro artikel ine nari kofarkor Paulus wos ḇyena ro Filipi 4:6, 7. (Wasya.) Ramnai, nari komam farfyar riḇeso ḇero Refo ḇefasnaḇair rariso Yahwe ifrur roi kokara baimna. Papupes ya, nari kofarkor rariso saswar ḇaḇye ro Allah nafnoḇek ko fa kofarmku ro samswen koḇena kuker kokyar kaku faro Yahwe I.

Yahwe bisa ifrur roi kokara baim na, inja komkakwarek syadi awer rofyor kosma roi ḇedwarek

7. Rosai farkarkor naek srar ḇero Filipi sismana ro syapram Paulus fyarem ya, ma rosai farkarkor ḇyena faro ko?

7 Rofyor naek srar bero Filipi siwasya syapram Paulus fyarem besina, rosai kakara sena kuker syapram ani? Imbude siswarepen rosai ḇekur Paulus ma Silas su kwar ma sukara ḇaḇeri roi Yahwe ifrur kwar fa ifnoḇek su. Farkarkor rosai Paulus fyarkor besi ro syapram byeja? Farkarkor ḇyena iso: Wamkakwarek awer. Ḇenadi, ma nari wasma ”saswar ḇaḇye ro Allah ḇesyadi ro kakara.” Rosai knam ro wos ine? Terjemahan Refo ḇeḇeso nakofenḇair ”nasyadi ro mafafu koḇenakam” ḇaido ”nakaki syadi ro snonkaku aw senakam.” Inja Paulus ikofen ”saswar ḇaḇye ro Allah” napyum syadi ro rosai kokarana. Rofyor kofawi ḇaḇeri nyan fa kosaebur samswen kosmana, Yahwe fyawina. Ma ifrur roi kokara baimna.​—Wasya 2 Petrus 2:9.

8, 9. (a) Paulus isma roi ḇemnis ḇa nabore ro Filipi rariryano, roi ḇepyum rosai ḇeḇejadi rofafisu ani? (b) Rosai ḇefnai fa naek srar ro Filipi sya sikyar kaku faro Paulus wos ḇyena?

8 Paulus syapram ḇyedine nsambraḇser naek srar ḇero Filipi snar sfarkor rosai Yahwe ifrur ro taun risamfur ḇarpur ya. Yahwe myam monda Paulus ma Silas susma roi ḇemnis ḇa rariryano, rosai ḇeḇejadi kwar anna nḇuk ’sanowarek ankankinem ḇeḇyeya.’ (Filipi 1:7) Ḇebarara-ḇebarara ro Filipi ansi jadi fa sewayam sidang Kristen ḇebabo ansya. Snaro Paulus ikofenḇair ima kawasa Roma kako. Lukas i kako ḇyarek ro Filipi fyor Paulus ma Silas subur mnu ani kwar. Ramnai, Lukas ḇyuk fafnoḇek naḇorwer ḇe snonkaku Kristen ro Filipi sya.

9 Rofyor naek srar ro Filipi siwasya Paulus syapram ḇyeja, sifawi wos  ḇero dorina ima Paulus kakara mankun ḇyena ḇa. Paulus isma roi ḇedwarek ḇemarḇak kaku. Syadiwer rofyor fyas syapram ḇe naek srar sya, isya ḇyetahanan kaker ro rum ḇyeja ro Roma. Ḇape fyasna nya kaker ”saswar ḇaḇye ro Allah.”​—Filipi 1:12-14; 4:7, 11, 22.

”IḆYE MKORARYOF ROSAIRYA WER KAKO”

10, 11. Rosai nari kofrurya rofyor kona makakwarek kuker samswen kosmana, ma rosai kowaf ya?

10 Rosai na ḇefnoḇek ko fa ’koraryof rosairya wer kako’, ḇape kona ”saswar ḇaḇye ro Allah”? Paulus wos ḇyena faro snonkaku Filipi sya nfasnaḇair rofyor komkakwarek kuker samswen kosmana ido, ipyumya koḇenadi snaro iso ḇeḇuk pararei ro kosnesna. Inja rofyor komkakwarek ido, fandun fa kokofenḇair makakwarek koḇena ro nadiya. (Wasya 1 Petrus 5:6, 7.) Rofyor ḇenadi faro Yahwe I, wakyar kaku snar myamfaduru Au. Wakofen kasumasa ḇe I faro barakas rosai monda wasmana. Ma wafanander awer snar Yahwe bisa ifrur ”rosai kam nasyadi ro rosai konadi ma korna roḇa kokarana”.​—Efesus 3:20.

11 Raris Paulus ma Silas su, nari kokandor faro rosai Yahwe ifrur fa ifnoḇek ko. Imbude roi ḇeba risyaḇa, ḇape iso roi kofandun rirya. (1 Korintus 10:13) Ḇape ine kyurfasna komyaren kofararurḇa, komewer kofrur rosai riryakam, ma kowaf monda Yahwe ifrurmnis fafisuya ḇaido ipyos samswen kosmana. Fandun fa kofrur rosai riryakam imnis kuker nadi koḇena. (Roma 12:11) Ro rosai kofrurna, nari nfasnaḇair kofrurna kuker sne ḇesiper ke roḇa. Kuker rarirya, Yahwe nari ḇyebarakas ko. Kobefnder awer Yahwe bisa ifrur rosai riryakam nasyadi ro rosai kor na ma rosai kowaf ya. Fyorno ido, ifrur roi kokara baimna ḇefrur fa kokandor. Inja mkorama kofarkor contoh ḇeḇeso nari ḇefrur kona kakakyar faro Yahwe samambraḇ ḇyedi snar nari ifrur faro ko roi kokara baimna.

CONTOH-CONTOH ḆEFASNAḆAIR ROI KOKARA ḆAIM YAHWE IFRURNA

12. (a) Rosai Raja Hizkia ifrurya rofyor Raja Sanherib doḇo imbe myun i? (b) Farkarkor rosai kun ro roi ḇekur Hizkia i?

12 Ro Refoya, kosrow contoh ḇebor Yahwe ifrur roi kokara baimna. Imnis raris, rofyor Hizkia ḇyeraja ro Yehuda, Sanherib, raja Asiria, myun Yehuda ma imkok mnu ḇero Yehuda nakam mboi Yerusalem ima roḇa. (2 Raja-Raja 18:1-3, 13) Ramnai, Sanherib kyaḇer fa imbe myun Yerusalem wer. Rosai Raja Hizkia ifrur ya? Randakya, ḇyenadi faro Yahwe dor fafnoḇek ma akurfasna ro Yahwe nabi Ḇyedi isoine Yesaya i. (2 Raja-Raja 19:5, 15-20) Ramnai, Hizkia fyasnaḇair kakara ḇeḇye kuker ḇyak som faro Sanherib i. (2 Raja-Raja 18:14, 15) Pupesya, Hizkia fyasos mnu ḇeba ani fa siwaf mamamun ro Asiria sya. (2 Tawarikh 32:2-4) Rosai ḇeḇejadi rofafisu ya? Yahwe iwan malaikat oso fa myun Sanherib sordade ri 185.000 ḇyesi ro roḇ oser.  Hizkia kyara ḇaḇeri rosai ḇeḇejadi ya!​—2 Raja-Raja 19:35.

Farkarkor rosai kofarkor ro roi ḇekur Yusuf i?​—Kejadian 41:42 (Mam paragraf 13)

13. (a) Farkarkor rosai kofarkor ro roi ḇekur Yusuf i? (b) Rosai ḇeḇejadi faro Sara i ma kyara ḇaḇerina?

13 Wawasenpan rosai ḇeḇejadi kuker Yusuf i. Rofyor isya ro bui ḇero Masir, kyara ḇaḇeri nari dakḇe faker ro Masir roḇaido Yahwe na kyadaun kina ḇyesi ro basbiser roro Yusuf fafnoḇek ḇyedi. (Kejadian 40:15, fas-fas kasun ro sop; 41:39-43; 50:20) Kakuḇae, roi Yahwe ifrur nane Yusuf kyarana ḇaḇeri. Kokarapan kuker Yusuf aup ḇyedi, Sara i. Sara ḇyebinsar kwar mboi Yahwe ikofen nari ḇyuk romawa ro snekapar ḇyedi. Inja bin famyan ḇyedi nari ikapar romawa ḇe Sara i ḇa. Sara kyara ḇaḇeri ro ḇaḇeinsar ḇyedi nari daben Ishak i.​—Kejadian 21:1-3, 6, 7.

14. Rosai kokyar ro Yahwe I?

14 Yahwe nari ifrur mujisat fa ipyos samswen kosmanakam ḇa rofyor dunya babo ryama ḇaim. Ma kopok kodif Yahwe I ḇa fa ifrur roi ḇeba kaku ro kankenem koḇena. Ḇape, kofawi snar Yahwe ifnoḇek manfamyan ḇesouser Ḇyesya rofafisu iwara kuker  nyan ḇepyum kaku. Ma ḇyefararwe ḇa. (Wasya Yesaya 43:10-13.) Ine nafrur fa kokyar faro I. Kokyar nari ḇyuk ḇeko samambraḇ kofandunna fa kofrur marisen Ḇyena. (2 Korintus 4:7-9) Rosai kofarkor ro contoh Hizkia, Yusuf, ma Sara sko? Yahwe na ifnoḇek ko, syadiwer rofyor koro fafisu ḇesamswen rofyor kokyar pdef faro I.

Yahwe na ifnoḇek ko iba syadiwer rofyor koro fafisu ḇesamswen rofyor kokyar pdef faro I

15. Rosai ḇefnoḇek ko fa kosma ”saswar ḇaḇye ro Allah” rofyor kosma samswen, ma rariso na kosmana?

15 Rariso na kosma ”saswar ḇaḇye ro Allah” rofyor kosma samswen? Fandun fa kofaduru fasfesepen koḇena kuker Yahwe syambraḇ pdef. Fasfesepen ḇeradine bisa nasya snaro farsarser fasaspar Yesus Kristus ḇyukna. Farsarser ima oser ro fararur ḇepyum kaku Yahwe ifrurna. Snaro farsarser fasaspar, kosmai ampun ro sasar koḇena, kona sneuser ḇesren ma kofanam ḇe Yahwe I.​—Yohanes 14:6; Yakobus 4:8; 1 Petrus 3:21.

NARI NFADURU SNE MA KAKARA KOḆENA

16. Rosai nari ḇeḇejadi rofyor kosma ”saswar-ḇaḇye ro Allah”? Fasnaḇairpan.

16 Rosai nari ḇeḇejadi rofyor kosma ”saswar-ḇaḇye ro Allah, ḇesyadi ro kakara”? Refoya ikofen roi ani nari ”nfaduru” sne ma kakara koḇena. (Filipi 4:7) Ro wos ḇekaku faro ”nfaduru” ine kyurfasna ḇe wos sḇukna ro militer sap naḇe kelompok oser ro sordade ḇefararur fa ḇemamwarek kota oso. Snonkaku ḇeḇarek ro mnu ḇeba Filipi sisma kadaunwarek ro kelompok ḇemnis radirya. Bisa senef pyum ro roḇ na snar sifawi mnu sena sekadaunna kwar. Rarirya kako, rofyor kosma ”saswar-ḇaḇye ro Allah”, koḇeḇirḇar werḇa, sne ma kakara koḇena naknon kaku. Kofawi Yahwe myamfaduru ko ma imarisen kosma payamyum. (1 Petrus 5:10) Ma ikadaunwarek koro sne ḇemakakwarek syadi aroḇaido sne ḇesanekar.

17. Rosai ḇefnoḇek ko fa kokyar faro Yahwe rofafisu ḇaḇekandera ḇeba ya?

17 Ḇaḇekandera ḇeba nari ndrama nkur snonkaku syakame. (Matius 24:21, 22) Kofawimnis ḇaim rosai nari ḇekur ko oser-oser ya. Ḇape, komkak syadi awer kuker ras ani. Kofawi ḇa roi oso ḇaḇeri nari Yahwe ifrurna rariryano, kofawi Allah koḇedi. Ma kofawi rosai ifrur ro fafisu iwara faro manfamyan ḇesouser Ḇyesya. Komam kwar rosai monda ḇeḇejadi ya, Yahwe ḇyuk kakakyar ḇeko snar asas ḇyenakam nari ndarirya kaku. Ma nari ifrurna kako ro roi kokara ḇaimna! Iso ḇefnai fa, rofyor Yahwe ifrur roi oso faro ko, koḇaḇir kosma nyan ḇebabo snar ”saswar-ḇaḇye ro Allah, ḇesyadi ro kakara.”

^ par. 1 Silas i kako kawasa Roma rirya.​—Kisah 16:37.