YAHWE fyasnaḇair ḇe manwawan Paulus fa fyas rari risiw ḇefasnaḇair bon ro rur ḇesrenya. (Galatia 5:22, 23) Nakame, naiso rari ḇepyum kaku ḇeḇeyap ḇe ’rurya bon ḇyena.’ * (Mam fas-fas kasun ro sop.) Rurya bon ḇyena iso ḇar ro ’kenem bebabo’ fandun fa snonkaku Kristen sifasna na. (Kolose 3:10) Aibon oso na ḇyuk bon rofyor isma war ḇemnis na, rarirya kako snonkaku Kristen oso na fyasna rari ḇepyum kaku ine rofyor rur besren imbran pyum ro kenem ḇyedi.​—Mazmur 1:1-3.

Rari ḇerandak Paulus dapḇair iso saswar ya. Rari ine ḇyemaeja kaku ke? Paulus ikofen snar kuker saswarḇa, ima ’ḇyefainda roi osoḇaḇeri!’ (1 Korintus 13:2) Ḇape rosai saswar ya, ma rariso na kofaduru ma koḇawes kakyar ḇeradine ma kofasnaina ro ras ḇe ras?

ROSAI SASWAR YA?

Samswen fa kofasnaḇair kuker kakaku rosai saswarya rariryano, Refo ikofenḇair rariso snonkaku bena saswar oso na kyara ma fyasna na ro kenem ḇyedi rai. Imnis raris, snonkaku ḇesaswar oso na ’ḇyekaḇaḇaḇ ma ḇyenaḇye’ ma ”imarisen monda kuker napnapesya.” Rofyor snonkaku oso nya saswar ido, nari ”fyarmku roḇarpon ro roi ḇeḇor nakam ma imarisen ikyar roi ḇeḇye ro snonkaku oser-oser, rofafisu ḇerariso wer kako saswar ani kakyar ḇyedi ryobur iḇa ma ikḇaḇ iwaf roi ḇeborkam.” Nya saswar ḇeba kaku faro besesya, fyandun kaku si, ma ḇyebati besoasuser oso. Ḇape, rofyor snonkaku oso nya saswarḇa ido, nari isasyar kuker sasurem, imarares, darareri, ḇyedafdifer snonkaku ḇese fa siso marisen ḇyena, imasasor fasaw, ma ikram masasor. Ḇape, na komarisen kofasna rari ḇeḇyeḇa ḇeradine ḇa, komarisen kofasna saswar ḇekaku faro ḇesesya, saswar ḇemnis radine iso ’ḇedafdifer snonkaku ḇese fa siso marisen ḇyenaḇa.’​—1 Korintus 13:4-8.

YAHWE MA YESUS SUḆUK FARARI ḆEMNIS KAKU RO SASWARI

”Allah ikada isaswar.” (1 Yohanes 4:8) Braur bramin ma rosai ikfrurkam na nfasnai roi ine. Fasasna ḇeba kaku ro saswarya isoine iwan Yesus ḇe supswan fa ḇyekandera ma imar warek ko. Manwawan Yohanes doḇe, ”Allah fyasna saswar ḇyedi ro kosnesna snar iwan Rumkun oser ḇyedi ḇe supswan ine insa kuker Rumkun ḇyedi kosma kankenem. Inekada saswar: Koi ḇeswar kwar Allah i ḇa, ḇape Allah i ḇeswar ko kwar, inja iwan Rumkun ḇyedi insa kuker i kosma ḇaḇepayasyos ro sasar koḇena.” (1 Yohanes 4:9, 10) Snar Allah saswar Ḇyedi, sasar koḇena neḇepyos ma kona saneraro ma kankenem.

Yesus fyasna snar iswar snonkaku sya roro fyarser mankundi faro Allah marisen Ḇyena. Manwawan Paulus ikofenḇair ḇeko, ”Ma snar Allah marisen ḇyedi, Yesus Kristus fyasren ko kam ro sasar kuker som ro Yesus mankundi ḇyeḇefarser ḇerarwan oser monda isof fyoro-fyoro.” (Ibrani 10:9, 10) Snonkaku osoḇaḇeri na ḇefasna saswar ḇeba kaku. Yesus doḇe, ”Snonkaku ḇeswar syadi bati ḇyesi isoine, snonkaku ḇeḇuk kankenem ḇyedi faro bati  ansi.” (Yohanes 15:13) Snonkaku ḇemnisḇa bisa sifarari saswar ro Yahwe ma Yesus sufasnai kwarna ke? Imbo! Mkorama komam rariso na kofasnaina rai.

”MKOKENEM RO SASWAR”

Paulus danun beko, ”Rarirya mkoso asuser Allah, imnis romawa iswar kaku ma mkokenem ro saswar, imnis Yesus Kristus iswar mko ma ḇyuk mankundi fa ḇyefarsarser samsom ḇediref faro Allah.” (Efesus 5:1, 2) Rosai knam ro wos ”mkokenem ro saswar”? Knamya iso kofasna saswar ḇesya kwar. Kokofen monda ḇa snar koswar snonkaku besesya. Kofasnana roro rosai kofrurna. Yohanes fyas, ”Romawa yena mko! Koswar monda awer kuker sḇadon roḇaido wawos. Ḇape koswar kuker saswar ḇekaku, kofasna ro fararur koḇena.” (1 Yohanes 3:18) Imnis raris, koḇaryas ’ankankinem ḇeḇye Karajan’ snar koswar Yahwe ma snonkaku besesya. (Matius 24:14; Lukas 10:27) Ko kako ’kokenem ro saswar’ rofyor kofasna kaḇaḇaḇ, ḇaḇenaḇye, ma koḇuk ampun. Kombranser ananun ḇero Refo bekofen, ”[Yahwe] ipyos sasar mkoḇena kwar mko kako mkakfrur rarirya kada.”​—Kolose 3:13.

Rofyor koḇuk wos farkor ḇaido koḇekoreksi snonkaku ḇesesya, imbude, inema fyasna snar kosaswarḇa. Imnis raris, infa romawa suḇedi kyanes awer ido, sinan ḇeḇeso sya na sḇuk monda rosai romawa sesya sorna. Ḇape, Sinan beswar kaku romawa ḇyesya na ḇyensewar fa ḇyuk wos farkor rofyor sfandun na. Rarirya kako, Allah ikada isaswar rariryano, ”iprer snonkaku kyarem imnis romawa ḇyesi.” (Ibrani 12:6) Inja kosaswar ido, na koḇuk disiplin rofyor sifandun na. (Amsal 3:11, 12) Ḇape koswarepen, kokame kosasar kwar ma nanoido kosambraḇ fa kofasna saswar ḇa. Rariso na kofrurna rai? Mkorama komam contoh rikyor skoine.

RARISO NA KOFADURU SASWAR YA?

Ḇerandak ya, wor ḇe Allah fa ḇyuk rur ḇesren ḇyedi, ḇeknam ro saswar. Yesus ikofen snar Yahwe nari ḇyuk ”rur ḇesrenya faro mansei ḇeyor faroiya.” (Lukas 11:13) Inja, na kokyar kaku snar rofyor kor rur besren ma korir fa ifnoḇek ko ido, nari koḇe snonkaku ḇesaswar syadiwer. (Galatia 5:16) Imnis raris, Auma penatua ido, na wor rur besren fa ifnoḇek Au insama wasaswar rofyor buk wos farkor ro Refo faro besesya. Ḇaido sinan risaw ido, na wor Allah rur ḇesren Ḇyedi fa ifnoḇek Au ro disiplin buk ḇe romawa besi, kuker masasorḇa, ḇape kuker saswar.

Ḇeḇesuru ya, kwara kaku kuker Yesus fyasna saswarya rofyor ḇesesya sewayam i. (1 Petrus 2:21, 23) Rofyor snonkaku oso ifrur sne bedi iduf ḇaido sifrur mnis Au ḇa ido, wafuken ro mankundau, ’Rosai nari Yesus ifrurna?’ Srar oso ḇenirḇe Leigh fyawi snar ifuken ro mankundi inema nafnoḇek kaku kakara ḇyena rofyor ifrur roi oso ḇaim. Ikofen ḇo doḇe ”Ras oso, min fararur yedi fyarem e-mail ḇe min besesya kuker ḇyuk wos ḇeḇyeḇa kuker aya ma fararur yafrurna. Nmun kaku sne ayedi. Ḇape yafuken ro mankundaya, ’Rariso na yafarari Yesus i ro roi ine?’ Rofyor yakarauser rosai Yesus ifrurna, yun snemuk fa yaburna ma yakara samswen ine werba. Ramnai, yafarkor snar min fararur ismai dafduf bemarḇak ma isya ḇyestres. Inja yakara snar fyawi mankunba risai fyas kwarna. Yakarauser farari ro Yesus fasasna saswar ḇyena rofyor sawos famfnom i rariryano, ine nafnoḇek aya fa yakfasna saswar berarirya faro min fararur yedi.” Kofarari Yesus ido, na kofasna saswar faro besesya ḇesya kwar.

Ḇekyor ya, kofarkor fa kofasna saswar ḇeḇe fandun mankunba. Ine iso saswar ḇefasnaḇair manfamyan ḇekaku Yesus ḇyesi. (Yohanes 13:34, 35) Yesus mankundi nya saswar bemnis radia, ma ḇyuk farari bemnis kaku faroko. Rariso? Kuker ibur nankiya, ’ḇyeimnis mankundi raris manfyan oso’ faro snonkaku, iba syadiwer ”ikenem kuker aunos faro Allah isof imar”. (Filipi 2:5-8) Rofyor kofarari Yesus saswar ḇyedi ḇeḇe fandun mankunba, swaruser ma sneḇaḇir koḇena nari namnis fanam  kakuwer kuker i, ma nari komam fandun ro snonkaku ḇesesya ḇepon insape fandun mankun koḇena.

FAINDA RO KOFASNA SASWAR

Fainda nabor naisya rofyor kofasnai saswar. Mkorama komam contoh risuru suine:

Rariso kona fainda ro fasasna saswar ya?

  • ḆAḆEMANḆEKANAEK RO SUPSWAN ḆESIPER: Snar saswar koḇena faro oso ma ḇesesya, kofawi snar naek ma srar ro sidang risai kora roya ro supswan ḇesiper na sisaser pyum ko. Rosai barakas ya snar wafawi ḇeswar Au iso ”naek srar Kristen kam ro supswan ine ḇesiper”! (1 Petrus 5:9) Na kosrow saswarya ro fandu Allah kawasa Ḇyesi monda.

  • ḆAḆEASKI: Rofyor kofasnai kaḇaḇaḇ kuker saswar ido, na komarisen snar ḇaḇeaski ḇyefesepen ko fa koḇeoser. (Efesus 4:2, 3) Kosma ḇaḇeaski ine ro fananjur koḇena, kebaktian, ma munara kebaktian ḇeba. Na wamarisen bake snar ḇaḇeaski inema roi ḇeḇese kaku ro fandu dunya ḇeḇesisyeyae ine? (Mazmur 119:165; Yesaya 54:13) Rofyor kosewar ḇaḇeaski ro rofandu ko ma ḇesesya, kofasna snar koswar kaku si, ma nane nafrur Kma koḇedi ro nanki imarisen.​—Mazmur 133:1-3; Matius 5:9.

”SASWARYA KADA ḆYAWES SNONKAKU”

Paulus fyas, ”Saswarya kada ḇyawes snonkaku.” (1 Korintus 8:1) Rosai knam ro wos ine? Ro 1 Korintus fasal 13, ḇeḇeso sya soriḇe ”Saswar Mazmur,” ikofenḇair rariso saswari ḇyawes rai. Saswari myam fandun snonkaku ḇesesya. (1 Korintus 10:24; 13:5) Ma ro roi ḇeḇor nane kam, mkona saswari, ḇekaḇrai ḇefesepen ḇaḇeoser ma ḇaḇenaḇye, ine nḇawes saswar ro kina ma ḇaḇeoser ro sidang.​—Kolose 3:14.

Nyan nabor naisya fa kokfasna saswar koḇena faro snonkaku ḇesesya, ḇape saswar koḇena faro Allah iso ḇefandun syadi ma ḇeḇawes snar saswarya. Rosai ḇefnai ya? Snaro saswar koḇena faro I iso ḇeyufepen kokame! Snonkaku ḇerama ro moḇ nakame, keret, ma wos sisyom Yahwe kayame, ma sifarmyan I ”kayamyame.” (Zefanya 3:9) Inja, mkorama kun snemuk fa kofasna rari ḇefandun kaku isoine Allah rur bon Ḇyedi ro kankenem koḇena ro ras ḇe ras.

^ par. 2 Ine iso ḇerandak ro artikel risiw nari ḇeyawos bon ro rurya.