Ee, tuli Bena Kristu. Moneni umulandu twasosela ifi:

● Tulakonka sana ifyo Yesu Kristu afundile kabili tulesha ukumupashanya.—1 Petro 2:21.

● Twasumina ukuti Yesu e pusukilo lyesu, ukuti “tamwaba ipusukilo mu muntu umbi iyo, pantu takwaba ishina limbi mwi samba lya muulu ilyapeelwa na Lesa mu bantu, umo tufwile ukupusukila.”—Imilimo 4:12.

● Abasanguka Inte sha kwa Yehova, bababatishisha mwi shina lya kwa Yesu.—Mateo 28:18, 19.

● Nga tulepepa amapepo, tupitila mwi shina lya kwa Yesu.—Yohane 15:16.

● Twasumina ukuti Yesu e Mutwe wa mwaume, nelyo e o Lesa apeela amaka pa mwaume onse.—1 Korinti 11:3.

Lelo, mu fintu ifingi twalipusanako ne mipepele iingi iya batila Bena Kristu. Natulangilile, twasumina ukuti Baibolo isambilisha ukuti Yesu Mwana wa kwa Lesa, taba mu Bene Batatu. (Marko 12:29) Tatwasumina ukuti umweo taufwa, kabili tatwasumina ukuti Lesa alalungulusha abantu mu mulilo pantu Baibolo tayalandapo ifya musango yu, nelyo ukuti abatungulula ifya mapepo bafwile ukupeelwa amalumbo ayalanga ukuti balicindama sana ukucila abantu bambi.—Lukala Milandu 9:5; Esekiele 18:4; Mateo 23:8-10.