• UMWAKA BAFYELWE: 1987

  • ICALO: AZERBAIJAN

  • IFYO BALI: BAWISHI BALI BASHILAMU, BANYINA BALI BAYUDA

INKULILO YANDI:

Nafyalilwe ku Baku, mu Azerbaijan kabili twafyelwe fye babili na nkashi yandi, nine nali kasuli. Batata bali baShilamu e lyo bamayo bali baYuda. Batata na ba mayo bali abatemwana nangu ca kuti tabalepepa ku calici limo. Bamayo tabalekaanya batata nga balesefya Ramadan e lyo na batata nabo tabalekaanya bamayo nga balesefya Ica Kucilila. Twalikwete Koran, Torah (amabuuku ya mu Baibolo 5 aya kubalilapo) e lyo na Baibolo.

Nalekonka ifisambilisho fya baShilamu. Nangu ca kuti nalishininkishe ukuti Lesa e ko aba, kwali ifintu fimo ifyalempapusha. Naleyipusha nati, ‘Cinshi Lesa abumbiile abantu, kabili cinshi abantu baculila e lyo nga bafwa, baya mu kupya mu mulilo wa pe?’ Apo abantu batila fyonse ificitika bufwayo bwa kwa Lesa, naleyipusha nati, ‘Bushe Lesa e ulenga ukuti abantu balecula, e lyo nga balecula aleumfwa bwino?’

Ilyo nali ne myaka 12, natendeke ukupepa amapepo 5 ayo abaShilamu bapepa cila bushiku. Tapakokwele, ine no mukalamba wandi balitutwele pe sukulu lya baYuda. Pa fyo twalesambilila, pali no kusambilila amafunde yaba muli Torah e lyo twalesambilila ne ciHebere. Ilyo tatulatendeka ukusambilila, twalebalilapo ukupepa nge fyo abaYuda bacita. Kanshi ilyo nshilaya ulucelo ku sukulu, nalepepa amapepo ya baShilamu, e lyo nga naya ku sukulu, nalepepako amapepo ya baYuda.

Nalefwaisha sana ukwishiba amasuko ku mepusho nakwete. Lyonse naleipusha ba kafundisha ba pa sukulu nati: “Cinshi Lesa abumbiile abantu? Apo batata baShilamu, bushe Lesa abamona shani? Batata baliba fye bwino, nomba cinshi babamwena ukuti balikowela? Cinshi Lesa ababumbiile?” Ifyo balenjasuka tafyali fya cine.

IFYO BAIBOLO YAYALWILE UBUMI BWANDI:

Mu 2002 nalilekele ukutetekela ukuti Lesa e ko aba. Ilyo twakukiile ku Germany, twaikeleko fye umulungu umo, batata balilwele stroko, ica  kuti no kulanda tabalelanda. Pa myaka iingi, nalepepa sana pa kuti aba mu lupwa lwandi belalwala. Apo nalishibe ukuti Lesa wa maka yonse e wakwata amaka pa bumi ne mfwa, cila bushiku nalepepa ukuti abondape. Naletontonkanya ukuti, ‘Lesa te kuti afilwe ukucita ico ine ne mwaice ndefwaya.’ Nalicetekele ukuti alayasuka amapepo yandi, lelo batata balifwile.

Lelo nalipapile sana pantu Lesa tayaswike amapepo yandi, ne ci calengele ng’umfwe ububi sana. Naleyipusha nati, ‘Bushe nshaishiba fye ukupepa’ nelyo ‘Ni Lesa e ushabako?’ Nalipelenganishiwe ica kuti nalilekele no kupepa amapepo ya baShilamu. Nshatemenwe ifyo aba mu mipepele imbi balesambilisha, ne ci calengele nshininkishe ukuti takwaba Lesa.

Ilyo papitile imyeshi 6, ba Nte balishile pa ng’anda mu kushimikila. Apo tatwacindike imipepele ya Bena Kristu, ine no mukalamba wandi twalefwaya tubashinine ukuti ifyo basambilisha fya bufi. E co twabepwishe atuti: “Cinshi Abena Kristu bapepela Yesu, umusalaba, Maria ne filubi, ifyo Amafunde Ikumi yakaanya?” Ba Nte balibelengele amalembo muli Baibolo ayalelanda ukuti Abena Kristu balingile ukupepa fye kuli Lesa, te ku filubi iyo. Nalipapile pa fyo naumfwile.

Twabepwishe no kuti: “Cinshi mwasuminina ukuti muli Lesa umo mwaba abene batatu? Yesu nga ni Lesa, cinshi bamwipaile ilyo ali pano calo?” Na kabili balibelengele Baibolo pa kwasuka ifi ifipusho, kabili balilondolwele ukuti Yesu te Lesa, kabili talingana na Lesa. Kabili batile ifi Baibolo yalanda e fyalenga ukuti besumina ukuti muli Lesa umo mwaba abene batatu. Nalipapile sana, pantu ifyo ba Nte balandile te fyo aba mu mipepele imbi basambilisha.

Na kabili, nalefwaya ukwishiba ico abantu bafwila ne co Lesa alekela abantu ukuti balecula. Ba Nte bampeele icitabo icitila: Ukwishiba Uko Kutungulula ku Mweo wa Muyayaya, * umwaba ifyasuko ku mepusho yonse ayo nakwete. Kabili tapakokwele, nalitendeke ukusambilila Baibolo nabo.

Lyonse nga tulesambilila, amepusho yonse ayo nalekwata, amasuko yalefuma muli Baibolo. Nalisambilile ukuti ishina lya kwa Lesa ni Yehova. (Amalumbo 83:18) Kabili imibele yakwe iyapulamo kutemwa. (1 Yohane 4:8) Ico abumbiile abantu ni co alefwaya ukuti baleikala bwino sana. Nasambilile no kutila, nangu ca kuti Lesa alamona uko abantu bafyenga abanabo, alipata ulufyengo kabili akalufumyapo umuyayaya. Na kabili nasambilile ukuti icalenga abantu bonse ukuba ababembu ni co Adamu na Efa balipondokele Lesa. (Abena Roma 5:12) Cimo ico ulubembu lwaleta, ni mfwa kabili ulu lwine ulubembu e lwalengele no kuti batata bafwe. Lelo mu calo cipya, Lesa akafumyapo ifyabipa fyonse ificitika, kabili bonse abafwa bakabuuka.—Imilimo 24:15.

Fyonse ifyo nalesambilila fyalefuma mu Baibolo. Ici calengele nsumine na kabili ukuti Lesa e ko aba. Ilyo natendeke ukulongana ne Nte sha kwa Yehova, naishileishiba ukuti balikatana sana mu fyalo fyonse. Nalitemenwe ukumona ifyo bomfwana ne fyo batemwana. (Yohane 13:34, 35) Ifyo nasambilile pali Yehova fyalengele naba Nte pantu nalefwaya ukumubombela. Nabatishiwe pa 8 January mu 2005.

IFYO NANONKELAMO:

Ifyo Baibolo isambilisha fyalengele ubumi bwandi ukwaluka. Ifyebo ifisuma ifyo nasambilila muli Baibolo fyalenga naba no mutende wine wine. Isubilo ilyo Baibolo yalandapo ilya kuti abafwa bakabuuka lyalenga ndeba ne nsansa pantu nalishiba ukuti nkamonana na batata ilyo bakabuuka.—Yohane 5:28, 29.

Napapita imyaka 6 ukutula apo naupilwa kuli ba Jonathan, abaume abatemwa Lesa. Ine na bena mwandi twaishiba ukuti icine caba mu Baibolo calyanguka ukumfwa, kabili calicindama nga nshi. Ici calenga na ifwe tule-ebako bambi ifyo twasambilila mu Baibolo e lyo na pe subilo twakwata ilya ku ntanshi. Nomba nalishiba ukuti Inte sha kwa Yehova Bena Kristu ba cine.

^ par. 15 Abalemba ici citabo ni Nte sha kwa Yehova, ino nshita balileka ukucipulinta.