Ifi e fyo Inte sha kwa Yehova balanshanya na bantu. Natwelenganye ukuti ba Anthony baya pa ng’anda ya ba Tim mu kubashimikila.

UKUSUMINA MULI YESU KWALICINDAMA

Anthony: Muli shani ba Tim. Natemwa ukumusanga na kabili.

Tim: Na ine natemwa ukuti mwaisa.

Anthony: Namuletela Ulupungu lwa kwa Kalinda na Loleni! ififumine nomba line. Ndecetekela ukuti mwalatemwa ukubelenga aya ama magazini.

Tim: Natotela. Na kuba cawama ukuti mwaisa pantu kuli ifyo ndefwaya ukumwipusha.

Anthony: Mukwai kuti mwaipusha!

Tim: Bulya bushiku nalelanshanya na uo momba nankwe. Nalemushimikilako ukuti ututabo mwanshilile tusuma sana. Lelo anjebele ukuti wilatubelenga pantu Inte sha kwa Yehova tabasumina muli Yesu. Bushe ifyo alandile fya cine? Namwebele ukuti kanshi nga baisa mu kuntandalila nkabepusha.

Anthony: Mwacita bwino ukunjipusha ukucila ukwipusha abantu bambi. Na kuba, pa kwishiba ifyo umuntu asuminamo, kano mwaipusha uyo wine muntu, bushe te ifyo?

Tim: E fyo na ine natontonkenye.

Anthony: Icishinka ca kuti Inte sha kwa Yehova balisumina muli Yesu. Na kuba, twasumina ukuti umuntu pa kupusuka, kano atetekela Yesu.

Tim: Na ine e fyo naishibe, lelo ilyo uo momba nankwe anjebele ukuti tamwasumina muli Yesu, nalishele ndetontonkanyapo. E lyo kwati tatwalanshanyapo pali ili lyashi.

Anthony: Kamubelengeleko amalembo ayalanga umulandu ukutetekela muli Yesu kwacindamina. Aya e malembo Inte sha kwa Yehova babomfya sana nga baleshimikila.

Tim: Nalatasha sana.

Anthony: Lekeni tubalilepo ukubelenga amashiwi Yesu umwine alandile pali Yohane 14:6. Asosele aya mashiwi ilyo alelanshanya no musambi wakwe. Baibolo itila: “Yesu amwaswike ati: ‘Nine nshila ne cine no mweo. Takuli uwisa kuli Tata kano aishila muli ine.’” Ukulingana na ili ilembo, ni muli nani umuntu alingile ukupitila pa kupalama kuli Lesa?

Tim: Ni muli Yesu.

Anthony: Ca cine. Ifi fine e fyo Inte sha kwa Yehova basuminamo. Lekeni mwipushe na kabili: Ukulingana ne fyo mwaishiba, bushe umuntu uulepepa ipepo alingile ukupepela mwi shina lya kwa nani?

Tim: Mwi shina lya kwa Yesu.

Anthony: Ni fyo fine. E cilenga lyonse nga ndepepa, ndepepela mwi shina lya kwa Yesu. Ifi fine e fyo ne Nte sha kwa Yehova shonse shicita.

Tim: Natemwa ukwishiba ifyo.

Anthony: Ilembo limbi twalabelenga ni Yohane 3:16. Ili ilembo lyalicindama sana ica kuti bamo batila fyonse ifyalembwa pali Yesu kuti mwafilondolwela fye muli ili line ilembo. Belengeni ili ilembo.

Tim: Mukwai paleti: “Pantu Lesa atemenwe  nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”

Anthony: Natotela. Bushe mwalilishiba ili ilembo?

Tim: Nalilyumfwapo imiku iingi kabili ndalimona na pa fipampa.

Anthony: Abengi balilishiba. Mwamona ifyo Yesu alandile, atile: Ico fwe bantu tukabela no mweo wa muyayaya ni co Lesa alitutemwa; lelo kuli ico na ifwe tulingile ukucita, cinshi cilya?

Tim: Tufwile ukuba ne citetekelo.

Anthony: Ca cine. Tufwile ukuba ne citetekelo mu Mwana uwafyalwa eka, Yesu Kristu. Na kuba, pe bula 2 muli ulu Ulupungu lwa kwa Kalinda imupeele paliba amashiwi yatila ukuba ne citetekelo muli Yesu e kukalenga tukakwate umweo wa muyayaya. Iyi magazini ilondolola ukuti cimo ico bailembela ‘kukoselesha abantu ukucetekela Yesu Kristu, uwatufwilile pa kuti tukakwate umweo wa muyayaya. Yesu nomba ni Mfumu ya Bufumu bwa kwa Lesa.’

Tim: Natemwa sana pantu mwabomfya magazini yenu pa kunanga ukuti mwe Nte sha kwa Yehova mwalisumina muli Yesu.

Anthony: Ee, twalisumina muli Yesu.

Tim: Nomba, cinshi abantu balandila ukuti tamwasumina muli Yesu?

Anthony: Nalimo kwaliba ifyalenga balelanda ifyo. Bamo batila baumfwile fye kuli bambi. E lyo bambi bena nalimo e fyo babeba kuli bashimapepo.

Tim: Limbi ico bamo balandila ukuti tamwasumina muli Yesu ni co tamutila muli Nte sha kwa Yesu, lelo mutila muli Nte sha kwa Yehova.

Anthony: Ico mwalanda na co kuti caba cishinka.

Tim: Cinshi mulandila sana pali Yehova?

“NALENGA BESHIBE ISHINA LYENU”

Anthony: Umulandu umo wa kuti twacetekela ukuti calicindama ukubomfya ishina lya kwa Lesa, Yehova, nga filya no Mwana wakwe Yesu alelibomfya. Moneni ifyo Yesu alandile ilyo apepele kuli Wishi. Ili ipepo lisangwa pali Yohane 17:26, belengenipo.

Tim: Paleti: “Nalenga beshibe ishina lyenu kabili nkalenga likeshibikwe, pa kuti babe no kutemwa uko mwantemenweko, na ine mbe muli bena.”

Anthony: Natasha. Yesu atile alilengele ishina lya kwa Lesa ukwishibikwa. Cinshi acitile ifi?

Tim: Kwena, nshishibe.

Pa kuti umuntu akapusuke afwile ukutetekela Yesu

Anthony: Lekeni kanshi tubelenge ilembo limbi ilyalalenga twishibe umulandu acitile ifyo. Ili lembo, Imilimo 2:21. Patila: “Onse uwalilila kwi shina lya kwa Yehova akapusuka.” Ndesubila mwalasumina ukuti ukulilila kwi shina lya kwa Yehova nga kulafwaikwa pa kuti umuntu apusuke, ninshi Yesu alishibe ukuti ukulenga ishina lya kwa Lesa ukwishibikwa kwalicindama.

Tim: Ca cine.

Anthony: Kanshi umulandu umo Yesu alefwaila abasambi bakwe ukwishiba ishina lya kwa Lesa no kulibomfya wa kuti e lyo bali no kupusuka. Kabili ici e co tulandila sana pali Yehova. Tumona ukuti calicindama ukulenga ishina lya kwa Lesa ukwishibikwa no kwafwa abantu ukulalilila kuli ili ishina.

Tim: Lelo nangu ca kuti abantu tabeshibe ishina lya kwa Lesa no kulibomfya tabalelibomfya, baleshiba ukuti uo balelandapo ni Lesa, bushe te ifyo?

Anthony: Ifyo mwalanda fya cine. Na lyo line, ifi Lesa atweba ishina lyakwe, alilenga catwangukila ukupalama kuli ena.

Tim: Mwalosha mwi?

 Anthony: Lekeni nangilile: Nga tatwaishibe ishina lya kwa Mose, nga tulanda fye ukuti mwaume wapaatwile Bemba wa Kashika nelyo uwapokele Amafunde Ikumi. E cimo cine na kuli Noa, nga tulanda fye ukuti mwaume uwakuulile icibwato no kupususha ulupwa lwakwe ne finama. Nangu fye ni Yesu Kristu wine nga tutila fye muntu uwafumine ku muulu no kutufwila pa kuti imembu shesu shile-elelwa, bushe te ifyo?

Tim: Kwena ni fyo fine.

Anthony: Lelo Lesa afwaile ukuti twishibe amashina ya aba bantu. Ukwishiba amashina yabo kwalenga twashininkisha ukuti e ko bali. Nangu ca kuti tatwatala atumonapo Mose, Noa, nelyo Yesu, ukwishiba amashina yabo kulalenga twaishiba ukuti ca cine e ko bali.

Tim: Nshatalile ntontonkanyapo pali ifi mwalanda. Lelo fyaumfwika ukuti fya cine!

Anthony: Uyu e mulandu na umbi uulenga Inte sha kwa Yehova balebomfya sana ishina lya kwa Lesa. Tufwaya abantu baba ne citetekelo icakosa muli Yehova Lesa, balemona ukuti ca cine eko aba kabili kuti bapalama na kuli ena. Na kabili tulalanda sana na pa fyo Yesu atucitila pa kuti tukakwate umweo wa muyayaya. Nalimo kuti twabelengako ilembo na limbi pa kuti tumfwikishe ici cishinka.

Tim: Cili fye bwino, natubelenge.

Anthony: Ilyo twacitendeka fye ukulanshanya, twacibelenga Yohane 14:6, Yesu alandile ukuti “nine nshila ne cine no mweo.” Lekeni uno muku tubelenge pali Yohane 14:1. Bushe kuti mwabelenga ifyo Yesu alandile ifili mu mashiwi ya kulekeleshako muli ici icikomo?

Tim: Mukwai patila: “Tetekeleni Lesa, tetekeleni na ine.”

Anthony: Natotela. Ukulingana na ili ilembo, bushe kuti mwatila ni nani tufwile ukutetekela pali Yehova na Yesu?

Tim: Yesu atile ni bonse babili.

Anthony: Ca cine. Kabili ndesubila mwalasumina ukuti tatufwile fye ukulanda ukuti twalitetekela muli Lesa na Yesu, lelo ne fyo tucita fifwile ukulanga ukuti ca cine twalibatetekela.

Tim: Mwalanda fye icishinka.

Anthony: Lelo bushe umuntu kuti alanga shani ukuti alitetekela Lesa na Yesu? Lekeni tukalanshanye ici cipusho ubushiku bumbi. *

Tim: Nkatemwa sana.

Bushe kwaliba ilyashi ilyo Baibolo yalandapo ilyo mufwaisha ukwishiba? Bushe mulafwaya ukwishiba ifyo Inte sha kwa Yehova basuminamo nelyo umulandu bashicitilako ifintu fimo? Nga mulafwaya ukwishiba, mukabepushe nga bamutandalila. Bakatemwa sana ukulanshanya na imwe.

^ par. 60 Nga mulefwaya ukwishibilapo na fimbi, belengeni icipandwa 12 mu citabo citila Bushe Cinshi Baibolo Isambilisha? icalembwa ne Nte sha kwa Yehova. Kuti mwacisanga na pa www.jw.org