ABANTU abengi balishiba ukuti abatumwa ba kwa Yesu bali 12, lelo nalimo tabaishiba ukuti pa basambi Yesu akwete, pali na banakashi. Yoana ali pali aba banakashi abali abasambi kwa Yesu.—Mat. 27:55; Luka 8:3.

Mulimo nshi Yoana alebomba ilyo alekonka Yesu, kabili finshi twingasambilila ku fyo acitile?

BUSHE YOANA ALI NANI?

Yoana ali ni “muka Kusa, umubomfi mukalamba uwa kwa Herode.” Nalimo Kusa aleyangalila imilimo mu ng’anda ya kwa Herode Antipa. Yoana ali pa banakashi abengi abo Yesu aundepe. Yoana na banakashi bambi baleya na Yesu e lyo na batumwa bakwe mu kushimikila mu fifulo fyalekanalekana.—Luka 8:1-3.

Bashimapepo abaYuda balesambilisha ukuti abanakashi tabafwile ukulasangwa na baume abashili balupwa lwabo. Apo ifi e fyo balesambilisha, ninshi abanakashi tabalingile nangu fye panono ukulaendela pamo na baume abashili ba lupwa lwabo. Na kuba abaume abaYuda tabalelanda sana na banakashi. Lelo Yesu talekonka ifi fishilano, alisuminishe abanakashi pamo nga Yoana na banakashi bambi abali ne citetekelo ukulamukonka.

Yoana tasakamene ifyo abantu bali no kulalanda pali ena filya alesangwa na Yesu na batumwa. Bonse abalekonka Yesu balingile ukwangusha imikalile yabo. Yesu alandile pa basambi bakwe ukuti: “Bamayo na bamunyinane ni balya abomfwa icebo ca kwa Lesa no kucikonka.” (Luka 8:19-21; 18:28-30) Bushe tamutemenwe ukwishiba ukuti Yesu alatemwa abaipeelesha ukuba abasambi bakwe?

ALEBAFWILISHA UKUBOMFYA IFINTU FYAKWE

Yoana na banakashi bambi abengi ‘balebomfya ifintu fyabo’ ukwafwilisha Yesu na basambi bakwe 12. (Luka 8:3) Kalemba umo alembele ukuti, “Amashiwi Luka alembele tayalola mu kuti abanakashi e baleipika ifya kulya, ukusuka imbale no kubila ifya kufwala. Nalimo balebomba iyi milimo . . . , lelo ifi te fyo Luka alandile.” Aba banakashi bafwile balebomfya indalama shabo, ne fintu fimbi ifyo bakwete ku kwafwilisha Yesu na basambi.

Yesu na basambi bakwe tabalebomba incito ya kusangilamo indalama ilyo baleya mu kushimikila mu ncende shalekanalekana. Kanshi nalimo tabalekwata indalama ishingi isha kushitamo ifya kulya e lyo ne fintu fimbi ifingakumana abantu nalimo 20 abaleya na Yesu mu kushimikila. Nangu ca kuti kwaleba abalebapeelako fimo no kubapokelela mu mayanda, filya Kristu na basambi balesenda  “akabokoshi ka ndalama,” cilangililo ca kuti tabaleenekela abantu ukubalabafwa muli fyonse fye. (Yoh. 12:6; 13:28, 29) Yoana na banakashi bambi bafwile balesangula indalama ne fintu ifimbi ifyalekabilwa.

Bamo balakaana ukuti abanakashi abaYuda tabalekwata indalama ne fintu fimbi. Lelo abaliko pali ilya nshita balemba ukuti abanakashi abaYuda bamo balekwata indalama ne fintu fimbi mu nshila shalekanaleka: (1) balebapeela ifya cishale nga ca kuti ba wishi bafwile ukwabula umwana umwaume, (2) bamo balebapeelako ifyuma, (3) ukulingana ne funde, balebakanyako indalama nga ca kuti umulume amuleka, (4) balemwakanyako ifintu umulume wakwe nga afwa, nelyo (5) balebomba incito.

Ukwabula no kutwishika abasambi ba kwa Yesu balesangula indalama ne fintu fimbi ifyo balekwata, kabili nalimo abanakashi bamo abali pali aba basambi bali abakankaala. Apo Yoana ali mukashi wa mubomfi mukalamba uwa kwa Herode, bamo batila afwile ali mu kankaala. Kanshi nga ali mukankala, nalimo e washitile ica kufwala ca mutengo umushali umulundo ico Yesu alefwala. Kalemba umo alandile pa ca kufwala ca kwa Yesu ukuti, “abaupilwe ku balondo be sabi te kuti bashite ici ca kufwala” ca mutengo ico Yesu akwete.—Yoh. 19:23, 24.

Amalembo tayalanda mu kulungatika ukuti Yoana alesangula indalama. Lelo aleyafwisha Yesu na basambi apapelele amaka yakwe. Finshi twingasambilila kuli ifi Yoana alecita? Fwe bene tulingile ukuipingwila ifyo twingapeela ku kutungilila umulimo wa Bufumu. Icacindama sana ico Lesa afwaya ca kuti, tulepeela ne nsansa ifyo twingakumanisha.—Mat. 6:33; Marko 14:8; 2 Kor. 9:7.

YOANA ALI UWA CISHINKA KULI YESU

Ilyo Yesu balemwipaya, nalimo Yoana e ko aali pamo na banakashi bambi “abalemukonka no kumubombela ilyo ali ku Galili, na banakashi bambi abengi abaile nankwe ku Yerusalemu.” (Marko 15:41) Ilyo bafumishe umubili wa kwa Yesu pa cimuti pa kuti bayeshika, “abanakashi abaishile nankwe ukufuma ku Galili, balikonkele, bamwene inshiishi ne fyo umubili wakwe wabikilwe kabili babwelele ku kupekanya ifyanunkila na mafuta ayanunkila.” Aba banakashi abo Luka alumbwile amashina ukuti ni “Maria umwina Magadala, na Yoana, na Maria nyina wa kwa Yakobo,” balile ku nshiishi pa numa ye sabata kabili basangile malaika uwabebele ukuti Yesu nabuuka ku bafwa.—Luka 23:55–24:10.

Cimoneka kwati Yoana na o e ko ali ilyo abasambi balongene mu Yerusalemu pa Pentekoste mu 33 C.E., apali Maria nyina wa kwa Yesu e lyo na bamunyina ba kwa Yesu. (Imil. 1:12-14) Apo umulume wa kwa Yoana alebomba kuli Herode Antipa, bamo batila, Yoana afwile aleebako Luka fimo pali Herode Antipa. Icalenga balande ifi nico pali bonse abalemba amabuuku ya Mbila Nsuma, ni Luka fye epela e walumbula Yoana mwi shina.—Luka 8:3; 9:7-9; 23:8-12; 24:10.

Kuti twasambilila ifingi kuli Yoana. Alyafwilishe Yesu na maka yakwe yonse. Afwile aletemwa ukupeelako Yesu, abasambi bakwe 12 e lyo na basambi bambi indalama ishalebafwa nga baya mu kushimikila ku ncende shalekanalekana. Yoana alibombele Yesu kabili ali uwa cishinka kuli ena na mu nshita ya mafya. Kanshi abanakashi Abena Kristu balingile ukulamupashanya.