Mu 1947, bashimapepo be calici lya Katolika mu Santa Ana, ku El Salvador, bafwaile ukutendeka ukucusha ba Nte. Bushiku bumo ilyo bamunyinefwe balelongana Isambililo lya Ulupungu lwa kwa Kalinda, abalumendo batendeke ukupoosa amabwe mu mwinshi wa ng’anda ya bamishonari umo balonganine. Lyena kwaishile ibumba na limbi ilyo bashimapepo baletungulula. Bamo pali lilya ibumba basendele batoci; bambi basendele ifilubi ifyo balebomfya pa kupepa. Pa ma-awala yabili balepoosa amabwe pa ng’anda ya bamishonari kabili balelanda abati: “Nacisungu wa muyayaya!” e lyo, “Yehova ena nafwe!” Ico balecitila ifi fyonse balefwaya ukutamfya bamishonari mwi tauni. Nalishiba ico balecitila ifi, pantu na ine nali mishonari kabili e po naali na pali kulya kulongana, apapita nomba ne myaka 67. *

IMYAKA ibili mu kubangilila, ninshi ifi nalandapo tafilacitika, ine na ba Evelyn Trabert abo twalebomba nabo bumishonari, twalipwishishe amasambililo ya bumishonari mwi kalasi ilyalenga 4 ilya Watchtower Bible School of Gilead, ilyabelele mupepi ne tauni lya Ithaca, mu New York. Ilyo twapwishishe Isukulu lya Gileadi batutumine ukuya mukubombela mu Santa Ana. Lelo, ilyo nshilamulondolwelako fimo pa mu mulimo wandi uwa bumishonari uo nabomba pa myaka nalimo 29, kamwebeko icalengele ukuti ntendeke uyu mulimo.

IFYO ULUPWA LWANDI LWASAMBILILE ICINE

Abafyashi bandi ba John na ba Eva Olson, baleikala mu Spokane mu Washington, ku U.S.A. Nafyelwe mu 1923. Balepepa kuli baLutheran lelo tabasumine mu cisambilisho ca kuti kwaliba umulilo wape, pantu calipusene ne fyo baishibe ukuti Lesa kutemwa. (1 Yoh. 4:8) Batata balebomba incito ya kupanga umukate, bushiku bumo uo balebomba nankwe abebele ukuti Baibolo taisambilisha ukuti kwaliba ukupya mu mulilo wape. Tapakokwele abafyashi bandi balitendeke ukusambilila Baibolo ne Nte sha kwa Yehova kabili balisambilile icicitika umuntu nga afwa.

Pali iyi nshita nali fye ne myaka 9, lelo ndebukisha ifyo abafyashi baletemwa ukulanda pa cine ca mu Baibolo ico balesambilila. Balitemenwe sana ilyo basambilile ishina lya kwa Lesa wa cine, Yehova, kabili balilubwike ku cisambilisho ca bufi ica kuti kwaba balesa abene batatu. Natendeke ukumfwikisha icine ico Baibolo isambilisha ‘icilenga abantu ukuba abantungwa.’  (Yoh. 8:32) E ico, nshaletendwa ukusambilila Baibolo, lelo lyonse naletemwa ukubebeta Icebo ca kwa Lesa. Nangu ca kuti nali uwa nsoni, naleya na bafyashi bandi mu kushimikila. Mu 1934 e lyo Abafyashi bandi babatishiwe. Mu 1939, ilyo nali ne myaka 16, na ine nalibatishiwe no kuba umubomfi wa kwa Yehova.

Ine, bamayo na batata pa kulongana kwa muputule mu St. Louis mu Missouri mu 1941

Mu 1940, abafyashi bandi balishitishe ing’anda yabo, kabili ifwe batatu twatendeke ukubomba umulimo wa nshita yonse uwa bupainiya mu Coeur d’Alene ku Idaho. Twatendeke ukwikala mu ng’anda iinono iya kusonkela iyabelele pa muulu wa cikuulwa ico balelungishishamo bamotoka. Mu ng’anda twaleikala e mwalebeela no kulongana. Pali ilya nshita, filonganino fye ifinono ifyakwete Amayanda ya Bufumu, kanshi abengi balelonganina mu mayanda nelyo mu fikuulwa fya kusonkela.

Mu 1941, ine na bafyashi bandi twalisangilwe ku kulongana kwa muputule mu St. Louis, ku Missouri. Ubushiku bwa pa Mulungu bwali “Bushiku bwa Bana,” kabili bonse abaali ne myaka 5 ukushinta 18 baikele pa fipuna fyali ku ntanshi. Ilyo munyinefwe Joseph F. Rutherford afikile pa kati ke lyashi lyakwe, aebele abaice ukuti: “Imwe bonse . . . mwe bana . . . mwe basumine ukumfwila Lesa ne Mfumu yakwe, iminineniko!” Bonse twaliminine. Lyena munyinefwe Rutherford atile: “Moneni ba Nte aba Bufumu abapya ukucila 15,000!” Ala iyi nshita yalingafwile ukupingulapo ukulabomba bupainiya ubumi bwandi bonse.

IMILIMO IYO ULUPWA LWESU LWALEBOMBA

Imweshi fye inono pa numa ya kulongana kwa muputule ukwali mu St. Louis, ulupwa lwesu lwakuukile ku kapinda ka ku kulyo aka California. Mu musumba wa Oxnard, umulimo twapeelwe wali wa kutendeka icilonganino. Twaleikala mwi tolokoshi umwali fye ica kusendamapo cimo. Ubushiku nga bwaila lyonse nalelaala pa muulu we tebulo twalelilapo. Ifi te fyo nalelaala ilyo nali no muputule wandi uwa kusendamamo!

Ilyo tatulafika mu California, icalo ca Japan calisanshile Pearl Harbor mu Hawaii, pa December 7, 1941. Ubushiku bwakonkelepo, icalo ca United States catendeke Inkondo ya Calo iya Bubili. Ubuteko bwa California bwaebele abantu ukulashimya amalaita inshita ya bushiku. Amato ya nkondo aya bena Japan yalepitana mu lulamba lwa calo ca California, kabili pa mulandu wa kuti kwalefiita sana calelenga abena Japan abaleba na mato ya nkondo aya pa menshi balefilwa ukupoosa ifinshinga pa fikuulwa.

Pa numa ya myeshi na imbi, mu September 1942, twalisangilwe ku kulongana kwaleti New World Theocratic Assembly mu Cleveland, ku Ohio. Twalikutike ilyo munyinefwe Nathan H. Knorr alandile ilyashi ilyaleti “Peace—Can It Last?” (Bushe Umutende Ukabelelela?). Alandile pe lembo lya Ukusokolola icipandwa 17, ilyalanda pa “ciswango” ‘icalipo, lelo tacabapo, kabili calaswa cifume mu cilindi cabula impela.’ (Ukus. 17:8, 11) Munyinefwe Knorr alondolwele ukuti ici “ciswanngo” cali ni League of Nations iyalekele ukubomba mu 1939. Baibolo yalisobele ukuti akabungwe ka League of Nations kakapyanikwapo, no kulenga kukabe umutende wa pa kashita akanono. E ico, mu 1945 Inkondo ya Calo iya Bubili yapwile. Pa numa, “iciswango” calimoneke na kabili, cali kabungwe ka United Nations. Inte sha kwa Yehova balitendeke ukubombesha mu mulimo wa kushimikila, kabili abantu abengi nga nshi balishile mu kuteyanya kwa kwa Lesa!

Diploma yandi iya Gileadi

Uku kusesema kwalengele ukuti njiluke ifyali no kucitika ku ntanshi. Ilyo babilishe ukuti umwaka ukonkelepo Isukulu lya Gileadi lyali no kutendeka,  calengele ukuti ntampe ukutontonkanya pa kuba mishonari. Mu 1943, balintumine ukuya mu kubomba bupainiya mu Portland, ku Oregon. Muli ilya myaka, twalebomfya amaseleti pa kulishisha abene ba mayanda amalyashi ayakopwa, e lyo pa numa twabapeela ulupapulo ulwalelanda pa Bufumu bwa kwa Lesa. Muli ulya mwaka onse, naletontonkanya fye pali bumishonari.

Mu 1944, nalitemenwe icine cine ukupokelela kalata ya kunjitilapo kwi Sukulu lya Gileadi na cibusa wandi Evelyn Trabert. Pa myeshi isano, bakafundisha besu balitusambilishe ifyo twingalaba ne nsansa ilyo tuleisambilisha Baibolo. Twalisambilileko ifingi ku fyo baali abaiceefya. Pa tushita tumo, inshita ya kulya nga yafika aba bakafundisha e baletupeela ifya kulya pa matebulo. Twapwishishe Isukulu lya Gileadi pa 22 January mu 1945.

UMULIMO WANDI UWA BUMISHONARI

Ine na ba Evelyn, e lyo na ba Leo na ba Esther Mahan, twafikile mu El Salvador mu calo umo batutumine ukubombela mu June 1946. Twasangile abantu abengi mu ici calo balafwaisha ukukutika ku mbila nsuma. Kanshi yali “ni nshita ya kuseepa” muli ici calo. (Yoh. 4:35) Ifyacitike ifyo nandilepo pa kubala filelanga ifyo bashimapepo bakalifiwe. Umulungu umo ilyo ifi fishilacitika, twalikwete ukulongana kwa muputule mu Santa Ana. Twalisabankenye sana ilyashi lya ku cintubwingi kabili twali ne nsansa ukumona abantu nalimo 500 abaishile ku kulongana. Twalilekele ukutiina ukututamfya mwi tauni, kabili twatwalilile ukwikala muli ili tauni pa kuti twingafwa abalefwaisha ukusambilila Baibolo. Nangu ca kuti bashimapepo balisokele abantu ukuti tabafwile ukubelenga Baibolo kabili na bantu baali fye abanono abakwete Baibolo, lelo abantu abengi balefwaisha ukusambilila icine. Balitemenwe ukuti twalesambilila iciSpanish pa kuti tulebasambilisha pali Lesa wa cine, Yehova, na pa malayo yakwe ayasuma aya kulenga isonde ukuba Paradaise.

Ilyo twapwishishe isukulu lya Gileadi, ifwe 5 batutumine ku El Salvador. Ukufuma ku kuso ukuya ku kulyo: Ba Evelyn Trabert, ba Millie Brashier, ba Esther Mahan, ine, na ba Leo Mahan

Ba Rosa Ascencio baali pabo natendeke ukusambilila na bo Baibolo. Ilyo batendeke ukusambilila Baibolo, balipatukene no mwaume uo baleikala nankwe. Uyu mwaume alitendeke ukusambilila Baibolo. Aba babili balyupene, kabili balibatishiwe, no kuba Inte ishacincila isha kwa Yehova. Ba Rosa e babalilepo ukuba bapainiya mu Santa Ana. *

Ba Rosa balikwete ishitolo ilinono. Pa kuya mu kushimikila, baleisala ishotolo lyabo kabili balecetekela Yehova ukuti ukulabapeela ifyo balekabila. Nga babwela no kwisula ishitolo abantu abaleisa mu kushita ifipe baleba abengi. Bali-imwenene abene ukuti amashiwi ayaba pali Mateo 6:33 ya cine kabili baali aba cishinka kuli Yehova ukushinta fye na lintu bafwile.

Bushiku bumo, shimapepo alitandalile umwine wa ng’anda iyo ifwe bamishonari 6 twaleikalamo no kumweba ukuti, nga ca kuti atwalilila ukusonkesha ng’anda yakwe kuli ifwe, ena no mwina mwakwe bali no kubatamfya mu calici. Uyu mwine wa ng’anda, uwali shimakwebo uwalumbuka, alipatile ifyo aba bashimapepo balecita e ico alikeene ukumfwila ifyo  uyu shimapepo amwebele. Aebele shimapepo ukutila kuti caba fye bwino nga amutamfya mu calici. Umwine wa ng’anda iyo twaleikalamo atwebele ukutwalilila ukwikala mu ng’anda yakwe mpaka fye tukaifuminemo.

SHIMUCINDIKWA ABA NTE

Iofeshi lya musambo ilyo bakuulile mu 1955

Mu musumba uukalamba, uwa San Salvador, mishonari na umbi alesambilila Baibolo na bamuka ba Baltasar Perla bainjiniya. Ba Baltasar Perla balilekele ukutetekela muli Lesa pa mulandu wa bumbimunda bwa ntungulushi sha mapepo. Ilyo kwali ukukuula iofeshi lya musambo, ba Baltasar, nangu ca kuti tabali ba Nte, bali-ipeeleshe ukuleenga ifyo umusambo wali no kuba kabili balikulileko ukwabula ukulipilisha pa mulimo uo babombele.

Pa numa ya kubombela pamo na bantu ba kwa Yehova pa makuule, ba Baltasar balishinkishe ukuti na basanga ukupepa kwa cine. Babatishiwe pa 22 July mu 1955, e lyo pa numa ba Paulina, abena mwabo nabo balibatishiwe. Abana babo babili balabombela Yehova ne cishinka. Abana babo abaume, ba Baltasar, Jr, balibomba imyaka 49 pa Bethel ya ku Brooklyn, apo batungilila umulimo uulebombwa icalo fye conse uwa kushimikila kabili pali ino nshita baba mu komiti ya musambo ku United States. *

Ilyo twatendeke ukulongana kukalamba mu San Salvador, munyinefwe Perla alitwafwile pa kuti tulebomfya icikuulwa cikalamba ica fyangalo. Ilyo uku kulongana kwatendeke twaleba fye abantu abanono, Yehova alitupaalile kabili twatampile ukufula cila mwaka ukufikila fye icikuulwa conse calaisula ica kuti abantu batendeke no kwikala pa nse! Pali uku kulongana, twalikumene nabo nalesambilisha Baibolo. Nali ne nsansa sana ilyo aba nasambilishe Baibolo balenangilila abo nabo balesambilisha Baibolo kabili ababatishiwe pali uku kwine kulongana!

Munyinefwe F. W. Franz alelanda kuli bamishonari pa kulongana kwa citungu

Pa kulongana kwa muputule kumo, munyinefwe umo alishile no kunjeba ati ndefwaya ukulomba ubwelelo. Nshamwishibe kabili nalisakamene. Anjebele ukuti: “Na ine nali pa balumendo abamupoosele amabwe mu Santa Ana.” Pali iyi nshita, ninshi na o alabombela Yehova! Ala nalitemenwe icine cine. Ifyo twalanshanye fyalengele nshininkishe ukuti mu mulimo wa nshita yonse mulafuma ifisuma nga nshi.

Ukulongana kwa muputule ukwa kubalilapo uko twasangilweko mu El Salvador

 UMULIMO UULENGA NDEBA NE NSANSA

Pa myaka nalimo 29, nali mishonari mu El Salvador, natendeke ukubombela mu musumba wa Santa Ana, lyena mu Sonsonate, nabombele na mu Santa Tecla, e lyo mu kulekelesha nabombele mu San Salvador. Mu 1975, pa numa ya kutontonkanyapo sana no kupepelapo, napingwilepo ukuleka bumishonari no kubwelelamo ku Spokane. Abafyashi bandi ababombele Yehova ne cishinka pa myaka iingi balikotele kabili balingile ukubasakamana.

Batata bafwile mu 1979, pa numa natwalilile ukusakamana bamayo abalelwalilila kabili na maka tabakwete. Nabasungile pa myaka 8 kabili bafwile ninshi bali ne myaka 94. Pa mulandu wa aya mafya yonse, na ine nalinakile sana ica kuti ne filonda ifyaba kwati mulilo walesa fyalimfulwime pa mubili. Lelo ipepo no kwafwa kwa kwa Yehova, fyalingafwile ukushipikisha. Amashiwi ya kwa Yehova yalifikilishiwe aya kuti: ‘Ukufika ku mfwi nkakusenda no kukutungilila kabili nkakupususha.’—Esa. 46:4.

Mu 1990, nakuukiile ku Omak mu Washington. Natendeke ukubomba mu cifulo umo balanda iciSpanish, kabili abengi abo nalesambilisha Baibolo balibatishiwe. Mu November 2007, nalikukile mu ng’anda yandi mu Omak pantu nalefilwa ukuisunga bwino, e ico nakukiile mu ng’anda iinono mwi tauni ilyali mupepi ilya Chelan, mu Washington. Bamunyinane mu cilonganino ca balanda iciSpanish abo nongana nabo balansakamana, kabili ndatasha sana. Apo mu cilonganino nabamo fye neka ne mukote, aba bwananyina banjita ukuti nine nakulwibo.

Nangu ca kuti nasalilepo ukunaupwa no kunakwata ulupwa pa kuti ndebombesha mu mulimo wa kushimikila ukwabula “ifya kupumfyanya,” nalikwata abana abengi mu cilonganino. (1 Kor. 7:34, 35) Natontonkenye ukuti nshilingile ukukwata fyonse muli ici calo. Kanshi nalitangisha ifyacindama, e kutila ukubombela Yehova no mutima onse. Mu calo cipya tukakwata inshita iikalamba iya kubombamo imilimo yonse iisuma. Ilembo ilyo natemwa sana lya Amalumbo 145:16, ililanda ukuti Yehova ‘akapeela ica mweo conse ifyo cilefwaya.’

Umulimo wa bupainiya walenga ukuti ntwalilile ukuba uwacincila

Nangu ca kuti ndi ne myaka 91, ncili ni nkwatako amaka, e ico nalitwalilila bupainiya. Umulimo wa bupainiya walenga ukuti ntwalilile ukuba uwacincila no kuba ne nsansa. Ilyo fye nafikile mu El Salvador e lyo umulimo wa kushimikila waletendeka. Nangu ca kuti Satana alitwalilila ukucusha sana abantu ba kwa Lesa, bakasabankanya muli ici calo nabacila 39,000. Kabili ici calenga icitetekelo candi ukukosa. Ukwabula no kutwishika, umupashi wa mushilo uwa kwa Yehova e uleyafwa abantu bakwe ukulabombesha!

^ par. 4 Moneni 1981 Yearbook of Jehovah’s Witnesses, amabula 45-46.

^ par. 19 Moneni 1981 Yearbook, amabula 41-42.

^ par. 24 Moneni 1981 Yearbook, amabula 66-67, 74-75.