“Amenso ya kwa Yehova yaba pa balungama.”—1 PET. 3:12.

1. Luko nshi ulupya ulwapyene abena Israele abapondokele Yehova? (Moneni icikope cili pa muulu.)

YEHOVA e o tutasha, pantu e wabikileko icilonganino ca Bena Kristu mu nshita ya batumwa, kabili e watendeke cipya cipya ukupepa kwa cine muno nshiku. Nge fyo twasambilile mu cipande cafumineko, abantu abo Yehova asalile kabili abalekonka Kristu, e bapyene uluko lwa bena Israele ulwapondweke. Ulu uluko ulupya ulo Lesa atemenwe sana, lwalipuswike ilyo Yerusalemu yaonawilwe mu 70 C.E. (Luka 21:20, 21) Ifyacitike ku babomfi ba kwa Lesa mu nshita ya batumwa, filanga ifikacitika ku ntanshi ku babomfi ba kwa Yehova aba muno nshiku. Kanshi icalo ca kwa Satana cili no konaulwa nomba line, lelo ukuteyanya kwa kwa Lesa kwena takwakonaulwe. (2 Tim. 3:1) Cinshi calenga ukuti tushininkishe?

2. Finshi Yesu alandile pa “bucushi bukalamba,” kabili bukatendeka shani?

2 Ilyo Yesu alandile pa ca kwishibilako ukuti aleteka no kuti impela ya calo naipalama, atile: “Kukaba ubucushi ubukalamba ubushatala abubako ukutula pa ntendekelo ya ba pano calo ukufika nomba, kabili tabwakatale abubako na kabili.”  (Mat. 24:3, 21) Ubu ubucushi bukalamba ubushatala abubako bukatendeka ilyo Yehova akonaula “Babiloni Mukalamba,” ukupepa konse ukwa bufi. Yehova akabomfya amabuteko ya bantunse pa konaula ukupepa kwa bufi. (Ukus. 17:3-5, 16) Finshi fikakonkapo?

IFYO SATANA AKACITA FIKALENGA ARMAGEDONE IKATENDEKE

3. Pa numa ukupepa kwa bufi kwaonaulwa, cinshi Satana akacita ku bantu ba kwa Yehova?

3 Ukupepa kwa bufi nga kwaonaulwa, Satana na bantu bakwe bakasansa ababomfi ba kwa Yehova. Baibolo yalanda pali “Goge wa mu calo ca Magoge” ukuti: “Kabili ukanina. Ukesa nge cimwela icikalamba. Ukaba nga makumbi ya kukupa icalo, iwe na mabumba yobe yonse ne nko sha bantu ishingi ishaba pamo na iwe.” Apo Inte sha kwa Yehova bamoneka kwati tabakwata uwa kubacingilila, kabili tabaibimba na mu fimfulunganya, cikamoneka kwati cikanguka ukubasansa. Lelo abakabasansa bakailetelela fye!—Esek. 38:1, 2, 9-12.

4, 5. Cinshi Yehova akacita ilyo Satana akafwaya ukonaula ababomfi ba kwa Lesa?

4 Cinshi Yehova akacita ilyo Satana akafwaya ukonaula abantu ba kwa Lesa? Apo ni mulopwe uwa bumba ifintu fyonse, akabomfya amaka akwata ku kucingilila abantu bakwe. Yehova amona abasansa ababomfi bakwe ukuti e o balesansa. (Belengeni Sekaria 2:8.) Kanshi Shifwe wa ku muulu bwangu bwangu akatupokolola ku balwani besu. Pa numa, icalo ca kwa Satana bakaconaula pa Armagedone, “inkondo ya bushiku bukalamba ubwa kwa Lesa Wa Maka Yonse.”—Ukus. 16:14, 16.

5 Ukusesema kwa mu Baibolo kulanda pali Armagedone ukuti: “‘Yehova ali no mulandu wa kushinina inko. Akapingula abantunse bonse. Kabili ababipa akaleka bakepaiwe ku lupanga,’ e fyasosa Yehova. Yehova wa mabumba atila, ‘Moneni! Ubucushi bukafuma ku luko lumo no kuya ku luko lumbi, kabili icipuupu ca mwela icikalamba cikema ukufuma ukwalepesha pe sonde. Mu bushiku ubo abakepaiwa kuli Yehova, bakakumana pano isonde, ukufuma ku mpela ukufika na ku mpela. Tabakabalooshe, kabili tabakabalonganike nangu ukubashiika. Bakaba umufundo pa mushili.’” (Yer. 25:31-33) Pa Armagedone, epo Lesa akonaula icalo ca kwa Satana. Lelo ukuteyanya kwa kwa Yehova ukwa pe sonde kukatwalilila.

UMULANDU UKUTEYANYA KWA KWA YEHOVA KUYILA PA NTANSHI

6, 7. (a) Bushe ni kwi kufuma abantu abapanga “ibumba likalamba”? (b) Kulunduluka nshi tulemona mu kuteyanya kwa kwa Lesa?

6 Umulandu ukuteyanya kwa kwa Lesa kwabelako na ino nshita no kutwalilila ukukulilako, ni co mwaba abantu abo Lesa atemwa. Baibolo itila: “Amenso ya kwa Yehova yaba pa balungama, na matwi yakwe yomfwa ukupapaata kwabo.” (1 Pet. 3:12) Pali aba abalungama, pakaba aba mwi “bumba likalamba” ‘abakafuma mu bucushi bukalamba.’ (Ukus. 7:9, 14) Aba tabakabe “ibumba” ilinono, lelo bakaba “ibumba ilikalamba,” cinkupiti wa bantu. Bushe na imwe mulelenganya ukuti mukaba pe bumba ilikalamba abakapusuka “ubucushi bukalamba”?

7 Bushe abapanga ibumba likalamba bafuma kwi? Icilenga ukuti baleisa, mulandu wa filya Yesu asobele ukuti e fyali no kulacitika mu nshiku sha kulekelesha. Atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mat. 24:14) Muli shino nshiku sha kulekelesha, uyu e mulimo  ukuteyanya kwa kwa Lesa kwabikako sana amano. Pa mulandu wa kuti Inte sha kwa Yehova balashimikila imbila nsuma mwi sonde lyonse, calilenga abantu abengi sana ukulapepa Lesa “mu mupashi na mu cine.” (Yoh. 4:23, 24) Ku ca kumwenako, mu myaka fye 10 iyapita, pa kati ka mwaka wa 2003 ukufika mu 2012, abantu ukucila pali 2,707,000 bali-ipeele kuli Lesa no kubatishiwa. E lyo mu calo conse, ba Nte nabacila pali 7,900,000, kabili kwaliba na bambi abesa mu kulongana na ifwe, maka maka pa Cibukisho. Twalitemwa pali ifi ibumba likalamba likulilako fye cila nshita, kabili twalishiba ukuti ni ‘Lesa e umesha.’—1 Kor. 3:5-7.

8. Cinshi cilenga ukuti abantu balefulilako mu kuteyanya kwa kwa Yehova ukwa pano isonde?

8 Abantu abengi baleba ababomfi ba kwa Lesa pantu Yehova alatungilila Inte sha kwakwe. (Belengeni Esaya 43:10-12.) Uku kufula kwa bantu kwalisobelwe mu mashiwi ya kusesema ayatila: “Umunono akaba ikana limo (1,000), kabili uwacepa akaba uluko lwa maka. Ine, ne Yehova, nkacilenga ukucitika bwangu bwangu mu nshita ya ciko.” (Esa. 60:22) Pa nshita imo, abasubwa bali fye ‘abanono’ sana, lelo balifulile ilyo na bambi baishile mu kuteyanya kwa kwa Lesa. (Gal. 6:16) Pa mulandu wa kuti Yehova alapaala ukuteyanya kwakwe, ibumba likalamba nalyo lileya lilekulilako fye.

IFYO YEHOVA AFWAYA KUTI TULECITA

9. Cinshi tufwile ukucita pa kuti tukaipakishe amapaalo ayo Lesa atulaya mu Cebo cakwe?

9 Nampo nga twaba mwi bumba lya basubwa nelyo ibumba likalamba, tukapokelela amapaalo ayo Yehova atulaya mu Cebo cakwe. Lelo pa kuti cikabe ifi, tufwile ukulakonka amafunde ya kwa Yehova. (Esa. 48:17, 18) Natulande pa bena Israele abalekonka Amafunde ya kwa Mose. Aya amafunde yali no kubacingilila ku bulalelale, ukubalanga ifyo balingile ukucita amakwebo ukwabula ubufufuntungu, ifya kusakamana abana, ifya kuba ne cikuuku ku bantu banabo, e lyo na fimbipo. (Ukufu. 20:14; Lebi 19:18, 35-37; Amala. 6:6-9) Na ifwe nga tulakonka amafunde ya kwa Lesa tulanonkelamo, kabili tatumona ukuti ukukonka amafunde yakwe kwalyafya. (Belengeni 1 Yohane 5:3.) Nga filya fine amafunde ya bena Israele yalebacingilila, na ifwe bene nga tulekonka amafunde ya kwa Yehova Lesa tukacingililwa kabili tukatwalilila ukuba “abatuntulu mu citetekelo.”—Tito 1:13.

10. Mulandu nshi tulingile ukutantikila inshita ya kulaisambilisha Baibolo no kulakwata Amapepo ya Lupwa cila mulungu?

10 Ukuteyanya kwa kwa Yehova ukwa pano isonde kuleilako fye pa ntanshi mu nshila shalekanalekana. Ku ca kumwenako, lyonse fye tuleshibilako icine ica mu Baibolo. Kabili ifi fine e fyo twenekela pantu “inshila ya balungami yaba ngo lubuuto lwa lucelo uluya lulebuutilako fye ukufikila akasuba kasaama.” (Amapi. 4:18) Lelo nalimo kuti twaipusha ukuti: ‘Bushe ndomfwikisha no kulakonka ubulondoloshi ubupya ubwa malembo? Bushe ndabelenga Baibolo cila bushiku? Bushe nalitemwa sana ukubelenga impapulo shesu? Bushe tulakwata Amapepo ya Lupwa cila mulungu?’ Fwe bengi kuti twatila tacayafya ukucita ifi. Ilingi line icifwaikwa fye, kutantika inshita. Kabili calicindama nga nshi ukutwalilila ukwishibilako icine ca mu Baibolo, ukulacibomfya e lyo no kulalunduluka maka maka ino nshita ilyo ubucushi bukalamba bulepalama!

11. Busuma nshi bwali mu kusangwa ku mitebeto, kabili bushe ukulongana kwa cilonganino no kulongana kukalamba kutwafwa shani?

11 Ukuteyanya kwa kwa Yehova kulatukoselesha  ukulacita filya umutumwa Paulo alandile ukuti: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.” (Heb. 10:24, 25) Imitebeto iyo abena Israele balekwata cila mwaka, ukusanshako no kulongana kumbi fyalekosha icitetekelo cabo. E lyo kabili Imitebeto ya Nsakwe iyaibela iyalebako mu nshita ya kwa Nehemia yali ni nshita ya kusekelela. (Ukufu. 23:15, 16; Nehe. 8:9-18) Na ifwe bene icitetekelo cesu cilakoselako kabili tulasekelela nga twasangwa ku kulongana kwa pa cilonganino no kulongana kukalamba. Kanshi tulesangwako lyonse kuli uku kulongana.—Tito 2:2.

12. Bushe tufwile ukulamona shani umulimo wa kushimikila pa Bufumu?

12 Fwe baba mu kuteyanya kwa kwa Lesa, twalikwata ishuko lya kubombako “umulimo wa mushilo uwa mbila nsuma iya kwa Lesa.” (Rom. 15:16) Ukubombako uyu “mulimo wa mushilo” kutulenga ‘ukulabombela pamo na Lesa’ uwaba “Uwa Mushilo.” (1 Kor. 3:9; 1 Pet. 1:15) Ukushimikila imbila nsuma kulalenga ishina lya kwa Yehova ukuba ilya mushilo. Kabili lishuko nga nshi ukutupeela umulimo wa kushimikila “imbila nsuma iya bukata iya kwa Lesa wa nsansa.”—1 Tim. 1:11.

13. Finshi tulingile ukucita pa kuti tube ifibusa fya kwa Lesa no kuba ne nsansa?

13 Lesa afwaya ukuti tutwalilile ukuba ifibusa fyakwe no kulatungilila ukuteyanya kwakwe mu nshila ishalekanalekana. Mose aebele abena Israele ukuti: “Nalenga umuulu ne sonde ukuba inte pali imwe lelo, ukuti nimbika pa ntanshi yenu umweo ne mfwa, ipaalo ne citiipu; e ico saleni umweo pa kuti mube no mweo, imwe na bana benu, pa kulatemwa Yehova Lesa wenu, pa kulaumfwila ishiwi lyakwe na pa kulambatila kuli ena, pantu ena e mweo wenu kabili e ukalenga ukuti mwikale inshiku ishingi, pa kuti mwikale mu calo ico Yehova alapile ukupeela ku fikolwe fyenu, Abrahamu, Isaki na Yakobo.” (Amala. 30:19, 20) Pa kuti tube ne nsansa, kano tulecita ifyo Yehova afwaya, ukumutemwa, ukulamumfwila, no kulambatila kuli ena.

14. Bushe munyinefwe umo alemona shani ukuteyanya kwa kwa Lesa ukwa pe sonde?

14 Munyinefwe Pryce Hughes, uwatwalilile ukuba cibusa wa kwa Lesa kabili uwale-endela pamo no kuteyanya kwa kwa Lesa atile: “Nalitemwa nga nshi, pantu ukufuma fye ilyo umwaka wa 1914 ushilafika ukufika na lelo, nalitwalilila ukucita ifyo Yehova afwaya . . Icacindama sana, kutwalilila ukuba mu kuteyanya kwa kwa Yehova. Ifyo napitamo fyansambilisha ukuti te cisuma ukushintilila pa mano ya bantunse. Ici calenga ukuti insalepo ukutwalilila ukuba mu kuteyanya kwa kwa Lesa. Ukucita ifi e kwingalenga ukuti Yehova atutemwe no kulatupaala.”

TWALILILENI UKWENDELA PAMO NO KUTEYANYA KWA KWA LESA

15. Landeni icacitike ico Baibolo yalandapo icilanga ifyo tufwile ukulamona ukwaluka mu bulondoloshi bwa Malembo.

15 Nga tulefwaya ukuti Yehova aletupaala, tufwile ukulatungilila ukuteyanya kwakwe no kulakonka ubulondoloshi bonse ubupya ubwa Malembo. Natulande pa cacitike ilyo Yesu afwile. AbaYuda abengi abali Abena Kristu abalekonka sana Amafunde ya kwa Mose, calibakoseele ukuleka ukuyakonka. (Imil. 21:17-20) Lelo ilyo Paulo alembele kalata ku baHebere, balilwike ukuti  ‘amalambo ayaletuulwa ukulingana na Mafunde’ tayalebalenga ukuba aba mushilo, kano ilambo lya “mubili wa kwa Yesu Kristu uwatuulilwe umuku umo fye capwa.” (Heb. 10:5-10) Ukwabula no kutwishika, balya abaYuda abengi balyalwike kabili balilekele ukukonka Amafunde ya kwa Mose. Na ifwe bene tufwile ukubika amano ku kuisambilisha no kulakonka ubulondoloshi ubupya ubwa Cebo ca kwa Lesa, ne nshila sha kushimikilamo ishipya isho bengatweba.

16. (a) Mapaalo nshi yakalenga ukuti cikawamishe ukwikala mu calo cipya? (b) Finshi mufwaisha ukwisamona no kucita mu calo cipya?

16 Yehova akapaala bonse abatwalilila aba cishinka kuli ena na ku kuteyanya kwakwe. Abasubwa aba cishinka bakapeelwa imilimo iyacindama ilyo bakalateka na Kristu ku muulu. (Rom. 8:16, 17) Nga twakwata isubilo lya kwikala pano isonde, elenganyeni ifyo cikawama ukwikala mu Paradaise. Ukuba mu kuteyanya kwa kwa Yehova kwalenga tule-ebako abantu pa calo cipya ico Lesa atulaya, kabili ici cilatuletela insansa! (2 Pet. 3:13) Baibolo pa Amalumbo 37:11 itila: “Abafuuka e bakekala mu calo, kabili bakasekelela nga nshi pantu umutende ukafula.” Abantu “bakakuula amayanda no kwikalamo” kabili bakasekelamo mu “mulimo wa minwe yabo.” (Esa. 65:21, 22) Takwakabe ukucula, ubupiina ne nsala. (Amalu. 72:13-16) Kabili abantu tabakalebepwa pantu ninshi takuli ukupepa kwa bufi. (Ukus. 18:8, 21) Abafwa bakabuuka kabili bakakwata ishuko lya kwikala umuyayaya. (Esa. 25:8; Imil. 24:15) Ala cikawama nga nshi ku bantu abaipeela kuli Yehova! Pa kuti tukaipakishe ifi fyonse ifyo Yehova atulaya, tufwile ukutwalilila ukukosha bucibusa bwesu na ena, no kulaendela pamo no kuteyanya kwakwe.

Bushe mulelenganya ukuti muli mu Paradaise? (Moneni paragrafu 16)

17. Bushe tufwile ukulamona shani ukupepa Yehova no kuba mu kuteyanya kwakwe?

17 Apo cino calo cili no kupwa nomba line, natutwalilile ukuba ne citetekelo icakosa no kulatasha Lesa pa fyo acita pa kuti tulemupepa. Ifi fine e fyo na Davidi alefwaisha ukutwalilila ukucita, atile: “Kuli Yehova nalombako fye cimo—Ico cine e co ndefwaya, ukuti ndeikala mu ng’anda ya kwa Yehova inshiku shonse isha mweo wandi, pa kutila ndemona ubusuma bwa kwa Yehova no kulatamba itempele lyakwe.” (Amalu. 27:4) Lekeni bonse tulambatile kuli Lesa, ukulaendela pamo na bantu bakwe, no kutwalilila ukulaendela pamo no kuteyanya kwakwe.