Bushe mwalibelenga bwino bwino magazini ya Ulupungu lwa kwa Kalinda iya nomba line? Moneni nga kuti mwayasuka ifi fipusho:

Lubembu nshi Yesu alelandapo ilyo alandile amashiwi yaba muli Mateo 18:15-17?

Yesu alandile pa lubembu ulo uulufyenye na uo balufyenye bengalanshanya fye babili. Lelo nga bafilwa ukumfwana uulufyenye nga talapile kuti atamfiwa mu cilonganino. Ku ca kumwenako, ulu lubembu kuti lwaba lwambo nelyo ubucenjeshi.—w16.05 ibu. 7.

Finshi mwingacita pa kuti mulenonkelamo sana ilyo mulebelenga Baibolo?

Kuti mwacita ifi: Mulebelenga no mutima wa kufwaya ukusambilila, mulefwayamo ifyebo ifyo mwingabomfya; muleyipusha amepusho pamo nga ‘Kuti nabomfya shani ifi fyebo pa kwafwa bambi?’; kabili mulebomfya impapulo mwakwata pa kufwailapo ifyebo na fimbi pa fyo mulebelenga.—w16.05 amabu. 24-26.

Bushe Umwina Kristu alingile ukuloosha nangu ca kuti alisumina ukuti abafwa bakabuuka?

Ukutetekela ukuti abafwa bakabuuka takufumyapo ubulanda Umwina Kristu omfwa nga afwilwa. Abrahamu alilooseshe ilyo Sara afwile. (Ukute. 23:2) Mu kupita kwa nshita, ubulanda bulaya bulecepako.—wp16.3 ibu. 4.

Bushe umwaume uwali ne co kalemba abikamo inki na baume 6 abakwete ifya kutobawilako mu minwe abo balandapo muli Esekiele icipandwa 9 bemininako bani?

Bemininako ifibumbwa fya ku mupashi ifya ku muulu ifyaonawileko Yerusalemu kabili ifyo Yehova akabomfya ku konaula icalo ca kwa Satana mu nkondo ya Armagedone. Umwaume uwali ne co kalemba abikamo inki, emininako Yesu Kristu, uushila abakapusuka.—w16.06 amabu. 31-32.

Finshi fyali no kulenga Baibolo yonaike?

Baibolo tayaonaika nangu ca kuti (1) ifyo balelembapo fyaleonaika bwangu, balebomfya amacinda ne mpapa; (2) bakateka na bashimapepo balefwaya ukuyonaula; (3) abantu balefwaya ukwalula ubukombe ubwabamo.—wp16.4 amabu. 4-7.

Finshi Umwina Kristu engacita pa kwangusha imikalile?

Ishibeni ifyo mulekabila, kabili mwilashita ifintu icishiteshite. Mulelemba ifya kubomfya indalama. Peeleni nelyo shitisheni ifintu ifyo mushibomfya. Nga mwalikongola indalama, bwesesheni abo mwakongolako. Nga mulabomba kuti mwacefyako amaawala mubomba, kabili pekanyeni ifyo mwingacita pa kuti mulebomba sana imilimo ya Bufumu.—w16.07 ibu. 10.

Finshi Baibolo itila fyalicindama sana ukucila pali golde na silfere?

Yobo 28:12, 15 itila amano yafuma kuli Lesa yalicindama sana ukucila golde na silfere. Ilyo mulefwaya aya mano mulingile ukutwalilila ukuba abaicefya kabili ababa ne citetekelo cakosa.—w16.08 amabu. 18-19.

Bushe bamunyinefwe balingile ukuteka umwefu?

Mu ncende shimo, caliba fye bwino ukuteka umwefu nga ca kuti baleubeya bwino kabili taulelenga abantu balekaana ukukutika imbila nsuma. Na lyo line, bamunyinefwe bamo balasalapo ukukanateka umwefu. (1 Kor. 8:9) Mu fyalo fimo nelyo mu ncende shimo abantu tabateka umwefu kabili na Abena Kristu abekala muli ishi ncende tabateka umwefu.—w16.09 ibu. 21.

Cinshi cingalenga mwashininkisha ukuti ifyo Baibolo yalanda pali Davidi na Galyati fyalicitike?

Batila Galyati alepele amamita yatatu, pali ino nshita umuntu uo batila e walepesha pa bantu bonse kuti bamucilako amasentimita 15. Davidi eko ali, abashula ifintu mu mushili balisangile apalembelwe kuti ing’anda ya kwa Davidi, e lyo na Yesu na o alilandilepo pali Davidi. Incende isho Baibolo yalandapo ukuti e po balwiliile na ino ine nshita e ko shaba.—wp16.5 ibu. 13.

Bupusano nshi bwaba pa kwishiba, umucetekanya, e lyo na mano?

Umuntu uwaishiba fimo alakwata ifishinka pali ifyo fintu. Umuntu uwamucetekanya aleshiba ifyo icishinka cimo campene ne cibiye. Lelo umuntu uwa mano alabomfya ukwishiba pamo no mucetekanya pa kucita ifintu fimo.—w16.10 ibu. 18.