Tinikeni pa kuti muye ku filimo

Tinikeni pa kuti mumone imitwe iilimo

 ICIPANDE ICIKALAMBA | IFIMONWA IFITWAFWA UKWISHIBA UKWIKALA IMIPASHI

Ifimonwa pa Baba mu Myulu Iishimoneka

Ifimonwa pa Baba mu Myulu Iishimoneka

Baibolo yalilanda pa fimonwa ifingi ifitwafwa ukwishiba ifyaba mu calo ca mipashi. Lekeni nomba tulande pali ifi ifimonwa. Nangu ca kuti fimo ifyalandwapo muli ifi ifimonwa fyalikwata ifintu fimbi ifyo fimininako, ukubelenga pali ifi ifimonwa kuti kwatwafwa ukwishiba ababa mu calo ca mipashi e lyo ne fyo bengacita kuli ifwe.

YEHOVA ALIPULAMO

“Icipuna ca bufumu cali mu muulu, kabili pali ico cipuna ca bufumu pali no waikelepo. Kabili uwaikelepo, alebeeka nge libwe lya yaspi kabili nge libwe lyakashika ilyauma umutengo, no mukolamfula uwalemoneka nge libwe lya emarodi washingulwike icipuna ca bufumu.”—Ukusokolola 4:2, 3.

“Kwali ifyabeeka ifyamushingulwike. Kwali icalemoneka ngo mukolamfula uubako mu makumbi pa bushiku bwa mfula. E fyalemoneka ukubeeka ukwamushingulwike. Kwalemoneka kwati bukata bwa kwa Yehova.”—Esekiele 1:27, 28.

Ifi ifimonwa ifyo umutumwa Yohane na kasesema Esekiele bamwene filatwafwa ukwelenganya ubukata bwa kwa Lesa Wapulamo, Yehova, mu nshila iyo twingomfwa, pantu ubukata bwakwe babupalanya ku fintu twaishiba pamo nga amabwe ayabeeka, umukolamfula, e lyo ne cipuna ca bufumu icayemba. Ifi ifimonwa filalenga twaishiba ukuti uko Yehova aikala kusuma icine cine, kabili kwaliba umutende.

Ifyo aba bakasesema balondolola pali Lesa muli ifi ifimonwa fyalipalana sana ne fyo Amalumbo 96:4-6 yalanda. Yatila: “Yehova mukulu kabili alilinga ukulumbanya. Alinga ukubela akatiina ukucila balesa bambi. Pantu balesa ba nko bonse, ni balesa ba fye; Lelo Yehova ena, e wapangile imyulu. Ubucindami na bukatebebe fyaba pa ntanshi yakwe; Ubukose no kuyemba fyaba umwa mushilo mwakwe.”—Amalumbo 96:4-6.

Nangu ca kuti Yehova alipulamo, alafwaya tulelanda nankwe mwi pepo, kabili nga twapepa alakutika. (Amalumbo 65:2) Yehova alitutemwa sana kabili alatusakamana, ici e calengele umutumwa Yohane alembe ukuti: “Lesa kutemwa.”—1 Yohane 4:8.

YESU ABA NA LESA

“Ilyo [umutumwa Stefani] aiswilemo umupashi wa mushilo, alolekeshe mu muulu no kumona ubukata bwa kwa Lesa no bwa kwa Yesu ninshi Yesu eminine ku kwa kulyo kwa kwa Lesa, no kutila: ‘Moneni! Ndemona umuulu nawisuka no Mwana wa muntu naiminina ku kwa kulyo kwa kwa Lesa.’”—Imilimo 7:55, 56.

Umutumwa Stefani alelanda ku ntungulushi sha mapepo isha baYuda, shilya shine ishaipeye Yesu ilyo ashilamona ici icimonwa. Ici icimonwa calangilile fye ukuti Yesu alibuushiwe ku bafwa kabili balimucindamike. Umutumwa Paulo na o alembele ukuti: ‘[Yehova] abuushishe Kristu ku bafwa no kumwikalika ku kwa kulyo kwakwe mu muulu. Nomba alimucindamika, amupeela ubufumu ubwacila  sana ubuteko bonse no butungulushi na maka na bukateka ne shina lyonse ililumbulwa, muli buno bwikashi, e lyo na mu bwikashi ubukesa.’—Abena Efese 1:20, 21.

Baibolo tailanda fye ukuti Yesu alikwata icifulo icikalamba, lelo ilalanda no kuti alatusakamana kwati fye ni filya fine Yehova atusakamana. Ilyo Yesu aali pa calo, aleundapa abalwele, abalemana, kabili alebuusha fye na bafwa. Ilyo apeele umweo wakwe nge cilubula, alilangile ukuti alitemwa sana Lesa na bantunse. (Abena Efese 2:4, 5) Apo Yesu aikala ku kuboko kwa kulyo ukwa kwa Lesa, nomba line fye ali no kubomfya amaka Lesa amupeela ku kucitila abantu ababa ne cumfwila ifintu ifikalenga bakapaalwe sana.

BAMALAIKA BALABOMBELA LESA

Kasesema Daniele atile, “Nakonkenyepo ukulolesha fyasuka fyatekwa ifipuna fya bufumu, e lyo Uwa Nshiku ne Nshiku aikala. . . . Kwali na 1,000,000 abalemubombela, 100,000,000 nabeminina pa ntanshi yakwe.”—Daniele 7:9, 10.

Muli ici icimonwa, Daniele tamwene fye malaika umo, lelo amwene bamalaika abengi icine cine. Ici cifwile cali cimonwa ca kupapusha kabili ica kutiinya. Bamalaika mipashi iyakwata sana amano e lyo na maka. Baba mu mabumba ayalekanalekana pamo nga baserafi na bakerubi. Baibolo yalilanda pali bamalaika ukucila pa miku 250.

Abantu nga bafwa tabasanguka bamalaika. Lesa apangile bamalaika kale sana ninshi talapanga abantu. Ilyo apangile isonde, bamalaika e ko bali kabili baliweleshe.—Yobo 38:4-7.

Inshila imo iyo bamalaika babombelamo Lesa, ni filya babombako umulimo wacindamisha pano calo, uwa kubila imbila nsuma iya Bufumu bwa kwa Lesa. (Mateo 24:14) Icimonwa umutumwa Yohane amwene calilangile ukuti bamalaika balabombako uyu umulimo. Alembele ukuti: “Namwene malaika umbi alepupuka mu muulu, kabili aali ne mbila nsuma ya muyayaya iya kubila ku baikala pe sonde, na ku nko shonse na ku mitundu yonse na ku ba ndimi shonse na ku bantu bonse.” (Ukusokolola 14:6) Nangu ca kuti bamalaika tabalanda na bantu pali ino nshita nga filya balecita limo kale, balafwa abalebila imbila nsuma ukusanga abantu abafwaya ukukutika.

 SATANA ALALUFYA ABANTU ABENGI

“Kwabuukile inkondo mu muulu: Mikaele [Yesu Kristu] na bamalaika bakwe balwile ne cing’wena, icing’wena na bamalaika ba ciko na fyo fyalwile na bo lelo tafyacimfishe iyo, kabili tafyakwete apa kwikala ku muulu. E fyo icing’wena cikalamba capooselwe pa nshi, icisoka ca pa kutendeka, iciitwa Kaseebanya kabili Satana, icilufya aba pano isonde bonse; capooselwe pe sonde, na bamalaika ba ciko bapooselwe pamo na co.”—Ukusokolola 12:7-9.

Te lyonse ku muulu kwali ukwa mutende. Tapakokwele ukutula apo Lesa abumbiile abantunse, malaika umo atendeke ukufwaisha ukupepwa, ne ci calengele apondokele Yehova, kabili aishileba Satana, icalola mu kuti “Uukaanya.” Bamalaika bambi nabo balipondweke kabili baishileba ifibanda. Aba bamalaika balibipa sana ica kuti balacita ifili fyonse pa kuti ifyo Yehova afwaya filacitika, kabili balilenga abantu abengi ukuleka ukumfwila ifyo Lesa uwaba no kutemwa Yehova atweba.

Satana ne fibanda fyakwe bankalwe icine cine. Balipata sana abantu kabili e balenga abantu balecula sana pa calo. Ku ca kumwenako, Satana alipeye ifitekwa na babomfi ba kwa Yobo, uwali ne cishinka kuli Lesa. Lyena alipeye abana 10 aba kwa Yobo, ukubomfya “umwela uukalamba” uwawishishe ing’anda iyo baalimo. Pa numa ya ifi, Satana alwalike Yobo “ifipute ifyabipisha ukutampila ku nyantilo ya lukasa lwakwe no kufika pa kati ka mutwe.”—Yobo 1:7-19; 2:7.

Na lyo line, nomba line fye Satana balamonaula. Ukutula ilyo bamupoosele pa calo, alishiba ukuti “ali fye ne nshita inono.” (Ukusokolola 12:12) Tulomfwa bwino sana ukwishiba ukuti Satana bali no kumonaula.

ABAFUMA PA CALO

“[Mwe Yesu] mwashitiile Lesa abantu ukufuma mu mitundu yonse ne ndimi na bantu ne nko, kabili mwabalengele ukuba ishamfumu kabili bashimapepo ba kwa Lesa wesu, kabili bakaba bashamfumu abakalateka isonde.”—Ukusokolola 5:9, 10.

Nga filya fine Yesu abuushiwe no kuya ku muulu, kukaba na bambi abakabuushiwa no kuya ku muulu. Yesu aebele abatumwa bakwe aba cishinka ukuti: “Ndeya ku kumupekanishisha apa kwikala. Kabili, . . . nkesa na kabili, no kumupokelela ku mwandi, ukuti uko nkaba e ko na imwe mukabe.”—Yohane 14:2, 3.

Abaya ku muulu balikwata imilimo baya mu kubomba.  Bakateka capamo na Yesu mu Bufumu ubukalateka isonde lyonse kabili ubukawamya ifintu pa calo. Ubu bwine Ubufumu e bo Yesu alelandapo mwi pepo lya cilangililo ilyo aebele abasambi bakwe ukulapepa ati: “Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.”—Mateo 6:9, 10.

IFYO ABABA KU MUULU BAKACITA

Umutumwa Yohane atile: “Naumfwile ishiwi ilikalamba ukufuma ku cipuna ca bufumu lileti: ‘Moneni! Itenti lya kwa Lesa lili pamo na bantunse, . . . kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.’”—Ukusokolola 21:3, 4.

Ici icimonwa calesobela ifikacitika ilyo Ubufumu bwa kwa Lesa bukapwisha imitekele ya kwa Satana no kulenga isonde ukuba paradaise. Ubu Ubufumu butekwa na Yesu na bantu ababuushiwa ukufuma pa calo. Takwakabe ifintu ifilenga abantu balecula no kukalipwa. Nangu fye ni mfwa tayakabeko.

Cikaba shani ku bantu abengi nga nshi abafwa abashibuushiwa ukuya ku muulu? Bakababuusha kabili bakekala umuyayaya muli paradaise pa calo.—Luka 23:43.

Ifi ifimonwa filalenga twaishiba ukuti Yehova Lesa, Umwana wakwe Yesu Kristu, bamalaika ababa ne cishinka e lyo na bantu ababuukila ku muulu balitubikako sana amano kabili balafwaya kuti ifintu filetuwamina. Nga mulefwaya ukwishibilapo na fimbi pa fyo bakacita, kuti mwalanshanya ne Nte sha kwa Yehova nelyo kuti mwaya pa webusaiti yesu iya www.jw.org/bem, no kukopolola icitabo icitila Bushe Cinshi Baibolo Isambilisha?