Tinikeni pa kuti muye ku filimo

Tinikeni pa kuti mumone imitwe iilimo

Ifyo Musalapo Ukucita Kuti Fyalenga Mwaisaikala Umuyayaya Nelyo Iyo!

Ifyo Musalapo Ukucita Kuti Fyalenga Mwaisaikala Umuyayaya Nelyo Iyo!

BUSHE IFYO MUCITA FILALENGA IFINTU UKUMUWAMINA NELYO UKUMUBIPILA? Abantu bamo bamona kwati ifibacitikila fyalilingilwe libela. Nga bafilwa ukucita ifyo bapangile, balanda fye ukuti tapali ifyo bengacitapo. Balanda ukuti: “E fyo cali fye no kuba.”

Bambi nabo balapelenganishiwa nga bamona ulufyengo lwaba mu calo. Nalimo balabombesha pa kuti baleikalako bwino, nomba inkondo, ubunkalwe, utuyofi, na malwele filalenga balefilwa ukufikilisha ifyo bapangile. Ici cilalenga baletontonkanya ukuti, ‘Tapali nangu cimo ico ningacita.’

Ca cine ukuti ifitucitikila kuti fyalenga twafilwa ukucita ifyo twalepanga. (Lukala Milandu 9:11) Na lyo line, ifyo mucita e fikalenga mukakwate umweo wa muyayaya nelyo iyo. Na kuba Baibolo ilanda ukuti ifyo tucita e fingalenga twaisaba no mweo wa muyayaya nelyo iyo. Natulande pa fyo Baibolo ilanda.

Ilyo abena Israele bali mupepi no kwingila mu Calo ca Bulayo, Mose uwali intungulushi yabo atile: “Nimbika pa ntanshi yenu umweo ne mfwa, ipaalo ne citiipu; e ico saleni umweo pa kuti mube no mweo, imwe na bana benu, pa kulatemwa Yehova Lesa wenu, pa kulaumfwila ishiwi lyakwe na pa kulambatila kuli ena.”Amalango 30:15, 19, 20.

“Nimbika pa ntanshi yenu umweo ne mfwa, ipaalo ne citiipu; e ico saleni umweo.”—Amalango 30:19

Lesa alibalubwile mu busha mu Egupti no kubapeela ishuko lya kuba abantungwa no kulaikala ne nsansa mu Calo ca Bulayo. Nomba balingile ukucitapo fimo pa kwikala muli ici calo. Pa kwikala muli ici calo balingile ‘ukusala umweo.’ Bali no kusala shani umweo? Balingile ‘ukulatemwa Yehova Lesa, ukulaumfwila ishiwi lyakwe no kulambatila kuli ena.’

Na imwe bene, ifyo mucita e fingalenga mwaisaba no mweo wa muyayaya nelyo iyo. Nga mwatemwa Lesa, mulemumfwila, kabili mwatwalilila ukuba cibusa wakwe, ninshi mwasala umweo wa muyayaya mu paradaise pe sonde. Nomba kuti mwacita shani ifi twalandapo?

UKUTEMWA LESA

Ukutemwa e mibele ya kwa Lesa iyapulamo. Lesa alengele umutumwa Yohane ukulemba ukuti, “Lesa kutemwa.” (1 Yohane 4:8) E ico ilyo baipwishe Yesu ifunde lyacila amafunde yonse, ayaswike ukuti: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.” (Mateo 22:37) Tatufwile ukulapepa Yehova Lesa pa mulandu fye wa kuti tulatiina ukutukanda nelyo ukulamupepela fye ico cine, lelo tufwile ukulamupepa pa mulandu wa kuti twalimutemwa. Nomba cinshi tufwile ukumutemenwa?

Yehova atemwa abantunse nga filya umufyashi atemwa abana bakwe. Nangu ca kuti abafyashi tabapwililika, balasambilisha abana, balabakoselesha, balabatungilila, kabili balabasalapula pantu bafwaya ukuti baleba ne nsansa no kuti ifintu filebawamina. Finshi abafyashi bafwaya abana ukucita pali ifi fyonse babacitila? Bafwaya abana babo babatemwa no kulatasha pa fyo babacitila. Bushe Shifwe wa ku muulu na o tenekela ukuti tulingile ukumutemwa no kulatasha pa fyo atucitila?

UKULAMUMFWILA

Ishiwi lya kuti ukukutika ne lya kuti ukumfwila lipilibula icintu cimo cine. Kanshi ishiwi ilyo bapilibula muli Baibolo ukuti “ukukutika” lipilibula ukucita ifyo bakweba. Na kuba nga twaeba umwana ukuti uleumfwila abafyashi bobe, ninshi tulemweba fye ukuti alecita ifyo abafyashi balemweba. E ico nga tulekutika kwi shiwi lya kwa Lesa, ninshi tulesambilila no kulacita ifyo atweba. Apo te kuti tumfwe uko Lesa alelanda, tulakutika kuli ena nga tulebelenga Baibolo no kulacita ifyo alanda mu Cebo cakwe.—1 Yohane 5:3.

Ilyo Yesu alelanda pa fyo cacindamina ukukutika kwi shiwi lya kwa Lesa, atile: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.” (Mateo 4:4) Ukusambilila pali Lesa kwalicindama ukucila na pa fyo ifya kulya fyacindama ku bumi. Cinshi twalandila ifi? Imfumu ya mano Solomone yatile: “Amano yalacingilila filya fine indalama shicingilila; lelo ubusuma bwa mano bwa kuti yalapususha ubumi bwa bayakwata.” (Lukala Milandu 7:12) Amano ayo tukwata nga tulebelenga Icebo ca kwa Lesa kuti yatucingilila pali ino nshita kabili kuti yalenga twapingulapo ifingalenga twaisakala umuyayaya.

UKUBA CIBUSA WAKWE

Tontonkanyeni pa cilangililo Yesu alandile ico twalandilepo mu cipande cafumineko. Alandile ukuti: “Impongolo iyacepa, no musebo uwaya ku bumi walicepa nga nshi kabili banono abausanga.” (Mateo 7:13, 14) Nga tuleenda muli uyu umusebo, kuti cawama sana nga kuli uletutungulula uwaishiba ifya kwenda muli uyu musebo pa kuti tukafike uko tuleya no kukwata umweo wa muyayaya. Kanshi tufwile fye ukuba ifibusa fya kwa Lesa. (Amalumbo 16:8) Nomba kuti twaba shani ifibusa fya kwa Lesa?

Cila bushiku kulaba ifintu ifingi ifyo tucita ne fyo twingatemwa ukucita. Ifi fintu kuti fyalenga twilakwata inshita ya kutontonkanya nelyo ukucita ifyo Lesa afwaya tulecita. Ici e calenga Baibolo ilande ukuti: “Cenjeleni, mwilaenda kwati bawelewele lelo mule-enda nga ba mano, mulebomfya bwino inshita yonse iyo mwashukila, pantu ishi nshiku sha bubifi.” (Abena Efese 5:15, 16) Kuti twaba ifibusa fya kwa Lesa nga ca kuti bucibusa bwesu na Lesa ebo twabikako sana amano.—Mateo 6:33.

NI MWE MUFWILE UKUSALAPO

Nangu ca kuti te kuti mwalule ifyo mwapitamo, ifyo musalapo ukucita kuti fyalenga mwaisaikala bwino no lupwa lwenu nelyo iyo. Baibolo ilanda ukuti Shifwe wa mu muulu, Yehova Lesa, alitutemwa sana kabili alitweba ifyo afwaya tulecita. Kasesema Mika atile:

“We muntu, alikweba icisuma. Kabili cinshi cimbi Yehova alefwaya kuli iwe? Bushe te kuba no mulinganya, no kutemwa icikuuku, no kwenda bufuuke bufuuke na Lesa obe?”Mika 6:8.

Bushe kuti mwatemwa ukuba cibusa wa kwa Yehova no kukwata amapaalo ayo ifibusa fya kwa Yehova fikakwata umuyayaya? Ni mwe mufwile ukusalapo!